Matthieu 21

Yeesu kɔ́ Jeerusaleem tiŋkin

(Kpèè Maar 11.1-11, Luuki 19.28-40, Yoow 12.12-19)

1Ŋyunti ŋun bi tóob́ Jeerusaleem ki bàn̄ Beetifagee timbiliiki kin bí Ɔliifi sufii jool#21.1 Kpèè Maar 11.1. caŋinee, ní Yeesu lēē u-boonnooliibi bili ki tú. 2U nìn bí-bi yii: «Nín̄ cámaan kitimbilii kin bí ti-nyɔkɔpu nee. Ni yaa bàn̄ kpalaayee, ni làá ká kimansalii kiba nì ki-biki gbìn̄ niin. Ní gbìntīń-mu kí cáań-mi. 3Ubɔ yaa bālifì-ni tibee, kíímaan-u yii: <Ti-Dindaan di nyàab̀-mu,> niinee, udaan làá yàntī ní cáań-mu.» 4An jítì míǹ kí dàkà Unimbɔti bɔnaatiliibi nín nìn lī ki síiǹ puee yii:

5«Tùkùmaan Siiyɔn tiŋki nib, yii:

Kpèèmaan, ni-bɔtiu dòoń ni-cee,

ki sá unil un mɔ̄ee.

U kā kimaŋ pu, u kāń dimampɔmbil, kimansalii biki pu#21.5 Saka 9.9..»

6Ní u-boonnooliibee búntì ki cūtìi ŋá kii Yeesu nín bí yii bí ŋá miŋyee. 7Bi cáań kimansaliiyee nì kimambiki, ní ki dū bi-bɔkutiŋ ki páaǹ mu-pu, ní Yeesu jɔ́m̀ ki kāl̀. 8Ní dinikitilee kansikin binib tikpil kpátí bi-bɔkutiŋ ki bīil̀ nsan pu, ní biba mun gà tikpakpati ki bīil̀ nsan pu#21.8 Dūú ŋmàntī nì 2 Bib 9.13.. 9Ní kunipaau kun līī Yeesu nyɔkɔpuee nì kun pá u-boonee kūuntí yii: «Oosaana! Daafiidi naantiiu ń ká tinyool! Ti-Dindaan ń bìin̄ un dòoń u-yindi puee! Bí nyɔ̄ŋkì Unimbɔti un bí yilpuee#21.9 Dūú ŋmàntī nì Ilan 118.25-26.!»

10Yeesu nín bàn̄ ki kɔ́ Jeerusaleemee, ní kitiŋ kɔkɔ fōō ki píĺ dàmmm, ní binib bàlifī yii: «Unil nee sá ŋma ní?» 11Ní kunipaauee kíikí yii: «An sá Yeesu Unimbɔti bɔnaatiliu un sá Naasaareeti Galiilee tiŋkinee.»

Yeesu jìn̄ biwannyafiliibi kunimbɔtidiin

(Kpèè Maar 11.15-19, Luuki 19.45-48, Yoow 2.13-22)

12Ní Yeesu kɔ́ kunimbɔtidiin ki jìn̄ biwannyafiliibi nì bidaliibi kɔkɔ ki nyántì, ní ki lábitì binimbikpantiliibi teebilib nì binanjinyafiliibi jaliŋ ki cìb̄, 13ní ki bí-bi yii: «An ŋmàn̄ Unimbɔti gbɔŋku poon yii: <Bi làá dāá nīn yíì man diiku ŋwimmeem diiku ní,> ama ní nimbi dū-ku ki kpántì kunaayudii#21.13 Dūú ŋmàntī nì Yees 56.7, Yeer 7.11..»

14Niinee ní bijɔfub nì bin tà bi-taaŋi puee sútìń ki pìl̄-u kunimbɔtidii poon, ní u cáaǹ-bi. 15Bisaraaŋakpilib nì bimaradakaliibi nín ká maamaaci tuuŋŋi ŋin Yeesu ŋáaǹee, nì mbiyaamu nín bí kunimbɔtidii poon ki tátí yii: «Oosaana! Daafiidi naantiiu ń ká tinyoolee!» ní bi fōō diŋuul, 16ní ki bí-u yii: «A gbìl̀ bi nín tátí ki lì pueeyaaa, saa gbìl̀ ní?» Ní u kíí-bi yii: «M gbìl̀! Naa láá pée kàan̄ Unimbɔti gbɔŋkun laakin an ŋmàn̄ yii: <A yāntì mbiyaamu ki kpáaǹ mun dáá bíi ŋáaḿee nyɔ́ŋkí-si#21.16 Ilan 8.3.>?» 17U lī mimmee, ní ki yāntì-bi, ki nyáń ki búntì Beetanii ki tin dōoǹ.

Busubu bun kaa lòoǹee bɔti

(Kpèè Maar 11.12-14,20-26)

18Ku wúntì kutaafaau, Yeesu fàtīi gítiń kitiŋinee ní ŋkùm cúú-u. 19U kpēēyee ki ká busubu bun bi yíì fiigee yú nsan caŋin, ní u pāatì busubuee taapu ki bàà nyàab̀ asubil kí ŋmɔ́, ní ki ká yii an sá tifaal ŋmaniŋma ní. Ní u lī busubuee yii: «Sii pée gíti kpá kí lòoǹ dibil.» Kpalaa niin ní busubuee kūń. 20U-boonnooliibi ká mimmee ní an ŋá-bi bitii, ní bi bālifì-u yii: «Mana ní busubuee pūtì kpáàa kūń míǹ dicilpuee?» 21Ní Yeesu bí-bi yii: «Ibaamɔn ní m tùkù-ni, ni yaa fōō Unimbɔti ki kíí mbaamɔmin kaa gùgufēe, an kaa sá min m ŋá busubu nee ŋmaniŋma ní ni làá dāá ŋmā kí ŋá. Ni dāa ŋūǹ kí lì gba dijool nee yii: <Á yīkì laakin a yú nee kí cùú jēetí tiŋkun!> ní dí lafun ŋá míǹ. 22Tin kamaa ní ni yaa mēē Unimbɔti ní ki yaa fōō ki kíí yii u làá ŋá kí tīī-nee, ni làá ká kudɔŋu.»

Yeesu pɔŋŋu nín nyánní laakiŋyee

(Maar 11.27-33, Luuki 20.1-8)

23Yeesu tí kɔ́ kunimbɔtidiin ki bíi dàkà binib Unimbɔti bɔtee, ní bisaraaŋakpilib nì Juuda yab kpilib dɔ́miń u-cee ki bālifì-u yii: «Nì nsan ŋulɔŋu pu ní a tūǹ atuun ŋin a tūǹ nee ní? Ŋma di pú-si an saŋŋu?» 24Ní u bí-bi yii: «Dinyɔɔbumbaantiil ní m làá pée bàlifì-ni ní kíí-mi kí wàatī, ní ma mun ń tùkù-ni nì nsan ŋun pu ní m ŋáań mimmee. 25Yoowaneesi nín fùul̀ binib Unimbɔti nyimee, ŋma di tīī-u an pɔŋŋu ní? Unimbɔtaaa, binib?» Niinee ní bi kíĺ ki bíi sòoǹ bi-ŋmaniŋma yii: «Ti yaa kíí yii: <An sá Unimbɔti di túnní-u,> u làá wòoǹ-ti yii: <Kin, ba ŋá ní naa fōō-u ki kíí?> 26Ti yaa tí kíí-u yii: <An sá binib di túnní-uaaa,> ti fàŋkí kunipaau mun, kun puee báà ŋma kɔkɔ nyí yii Yoowaneesi sá Unimbɔti bɔnaatiliu ní.» 27Ní bi kíí Yeesu yii: «Taa nyí.» Ní u mun bi yii: «An yaa sée, ma mun kaa làá tùkù-ni nì nsan ŋun pu ní m ŋáań mimmee!»

Binaacimpɔmbi bili bɔti

28Ní Yeesu gíti bí yii: «Ni dàkafī tibɔti nee pu yii ba? Uninja ubɔ di cáá binaacimpɔmbi bili ní ki bí upeepeekaa yii: <M-jipɔɔn, á cù kusaau díǹ kí tɔ̄ ditundi.> 29Ní kibikee yíì ki lī yii: <Maa làá cù,> ama ní boonee ki dāa kpántì ki-landɔkɔŋu ní ki búntì kusaau. 30Ní u cūtì un kíǹee cee ní ki lī u mun tibɔbaantiil. Ní úǹ kíí-u yii: <M-baa, m làá cù!> ama ní kaa gbóoń kusaau. 31Binaacimpɔmbee liitil kansikinee, ulɔu di ŋá min bi-baa lèe?» Ní bi kíí yii: «Upeepeekaa di ŋá.» Niinee ní Yeesu bí-bi yii: «Ibaamɔn ní m tùkù-ni, bifɔtiliibi nì nnimpulaakpaamu làá lìntī ni-nyɔkɔpu kí kɔ́ Unimbɔti Beelin. 32Di sá yii Yoowaneesi dɔ́miń ni-cee ki dàkà-ni deedee saŋŋu ní naa fōō-u ki kíí, ama ní bifɔtiliibi bin ni kpèé fámee nì nnimpulaakpaamu fōō-u ki kíí. Ni nín ká mimmee boonee naa kpántì ni-landɔkɔi kí fōō-u kí kíí.»

Bipaadaŋkpitib bɔŋmantikaati

(Kpèè Maar 12.1-12, Luuki 20.9-19)

33Ní Yeesu bí yii: «Gíti pīlifìmaan tibɔŋmantikaal nee. Uninja ubɔ di kùn̄ fiinyi kpaabu. U cóoǹ kunaabakau ki māntì ki tú-bu, ki gbìn̄ mbòó ŋun ni u làá nīn ŋmāam̀ isufee biliŋee, ki gāā isupaa bukpaayee kansikin#21.33 Dūú ŋmàntī nì Yees 5.1-2., ní ki dū isufee ki tīī bipaadambi biba, ní ki búntì nsan. 34Isufee biliŋ kìtitam bàn̄ee, ní ukpilee túnní u-tɔntɔnliibi biba u-paadambee cee bí fōō u-jandi kí cáań-u. 35Ní bipaadambee cúú u-tɔntɔnliibee ubɔ ki gbáń ní ki kūū ubɔ mun ní ki yáŋkì utataati ataŋkpee ki kūū. 36Ní bukpaadaanee gíti túnní bitɔntɔnliibi biba bíǹ wīikíǹ bin u péé péé ki túnnée, ní bipaadambee tí cúú bi mun ki ŋá kii bi nín ŋá bipeepeekaabee puee. 37Boonee ní u baasii dū u-jipɔɔn ki tú, ki dàkafī yii: <Úǹ sá m-jipɔɔnee, bi làá fàŋkì-u.> 38Ama bipaadambee nín ká u-jipɔɔnee páaǹnée, ní bi bíi lì tɔb cee yii: <Kpèè un làá dāá jī bukpaa fool boonee di dòońee! Tí kpɔ̀maan-u kí jī kusaau!> 39Ní bi cúú-u ki nyántì ŋkpaabuku ki kūū-u.»

40Ní Yeesu bālifì-bi yii: «Mimmee bukpaadaan yaa láa bāańee, u làá ŋá-bi mana?» 41Ní bisaraaŋakpilib nì Fariisab kíí-u yii: «U yaa bāańee, see ú kpɔ̀ binikpitib gbanti nsansaaŋkúm ní kí dū u-kpaabu kí tīī bipaadambi bin ŋyunti yaa bāań, bi làá nīn tìiń-u an subiliŋee.»

42Ní Yeesu bí-bi yii: «Naa láa pée kàan̄ Unimbɔti gbɔŋkun laakin lī yii:

<Ditaŋkpal din bidimaliibi nìn dūu fée,

díǹ di dāa kpántì ditaŋkpal din ŋúb́ kudii pɔŋŋuee.

Ti-Dindaan nín ŋá tiŋyee

kaa sá maamaaci ki tīī-taaa#21.42 Ilan 118.22-23.?>

43An pu ní m tùkù-ni yii bi làá dāá fōō ni-cee Unimbɔti Beel kí dūú tīī ditimbundi din yab làá ŋá Unimbɔti lammee. [ 44Un di yaa lítì ditaŋkpalee puee làá yàaǹ, ama ní ditaŋkpalee yaa tàb̄ uŋyee, udaan làá nà ní dúsi dusi#21.44 Uyakatikaa nee kaa bí tigbɔŋkpikil tikpil poon. Kpèè 20.18..]»

45 Bisaraaŋakpilib nì Fariisab nín gbìl̄ Yeesu bɔŋmantikaati gbantee, ní bi béè yii bíǹ ní u lì. 46Ní bi bíi nyàab̀ nsan ŋun bi làá dī kí cúú-uee, ama ní ki fàŋkí kunipaau, kun puee báà ŋma nyí yii Yeesu sá Unimbɔti bɔnaatiliu ní.

Currently Selected:

Matthieu 21: BASSARDC

Highlight

Copy