Matthieu 20

Bukpaadaan ubɔ nì u-paadambi bɔti

1«Unimbɔti Beel náań nì kii bukpaadaan ubɔ nín nyáń kutaafaau pɔ̀lpɔl kí nyàab̀ bipaadambi bí tɔ̄ ditundi u-kpaabun puee ní. 2U ká-bee, ní bi sòon̄ ki bɔ́ntì yii u làá pà-bi ŋwiin ŋubɔ tundi paati, ní u cáá-bi ki tɔ́ u-kpaabun. 3Tikúti tiwa gbáńee, u nyáń ki ká biba kā kinyɔŋin fám kaa bíi tūǹ diba, 4ní u bí-bi yii: <Ni mun, nín̄ cámaan m-kpaabun, m làá dāá pà-ni an nín máaǹ puee.> 5Ní bi búntì. Ní bukpaadaan tí nyáń tikúti saalaa nì tili, ní ki dāa nyáń wiŋkpooti tikúti tita ki ká biba mun. 6Kujoou tikúti tiŋmoo watilee, ní u tí nyáń ki ká biba kā, ní u bālifì-bi yii: <Ba ŋá ní doooo kutaafaau ni kā doo fám, kaa bíi tūǹ diba?> 7Ní bi kíí-u yii: <Di sá yii ubɔ kaa cúú-ti pàá.> Ní u bí yii: <Too, ni mun nín̄ cámaan man kpaabun.>

8«Kujoou jóotèe, ní bukpaadaan bí un kpèé u-paadambee yii: <Yíiń bipaadambee kí pà-bi bi-paati, kí kíliń bin m lúŋkèe kí dāá kátí bin m pééyee.> 9Ní bin bi cúú kujoou tikúti tiŋmooyee dɔ́miń, ní bi-kɔkɔ fōō ŋwimmɔn paati. 10Bin bin u péé péé ki cúúyee dàkafī yii bíǹ làá fōō tipaal án nīn wīikí ki jítiǹ bin lúŋkì boonee, ní bi dū ŋwiin ŋubɔ paati ki tīī báà ŋma. 11Bi nín fōō animbilee, ní bi bíi gbùkum̄ ukpilee pu, yii: 12<Bin a lúŋkì ki fōō nee, kukúbambaantiiu ní bi dūu túń ditundi, ní a pàn̄-bi mbaantiim kii timbi bin kíĺ doooo kutaafaau ki kùn̄ ki gīī, ŋwìiń píĺ-tee.> 13Ní u fātìi kíí bi-kansikin ubɔ yii: <M-bɔɔ, maa mūul̀-si. Man nì si kaa sòon̄ a kíí yii a làá fōō ŋwiin ŋubɔ paati níii? 14Fōō a-nimbiliŋ kí nīn cá, m là kí tīī ujoolkaa nee kii m nín tīī si mun puee ní. 15Maa cáá nsan kí dū m-nimbiliŋ kí ŋá m nín là pueeee? Àá, m nín ŋá un béeyee tiŋanee ní an wù-si ní?>» 16Ní Yeesu gíti lī yii: «Biboompaanliibi làá dāá ŋá bisanlintiliibi, ní bisanlintiliibi ń dāá ŋá biboompaanliibi.»

Yeesu sòon̄ ntataatiim u-kúm nì u-fìkititam pu

(Kpèè Maar 10.32-34, Luuki 18.31-34)

17Ŋyunti ŋun Yeesu làá nīn cá Jeerusaleemee ní u yíiń u-boonnooliibi saalaa nì bilee ŋkpaanceeti, ki bí-bi yii: 18«Ni ká Jeerusaleem un ti jɔ́ḿ neeyaa, bi làá cúú man Kinibiki kí tīī bisaraaŋakpilib nì bimaradakaliibi, ní bíǹ ń dāá sòoǹ m-bɔti kí lì yii bí kpɔ̀-mi. 19Bi làá dū-mi kí ŋúbíǹ bin kaa sá Juuda yabee ní bíǹ ń bèel̀-mi kí gbá-mi anaalab, kí kpáá-mi ndɔpuntikaa pu kí kpɔ̀-mi, ní winta dalee ḿ fàtīí fìkitī.»

Seebeedee jipɔmbi mēē Yeesu ipaammɔnti

(Kpèè Maar 10.35-45)

20Niinee, Seebeedee jipɔmbi na yōoǹní u-jipɔmbi ki dɔ́miń Yeesu cee ki gbāaǹ u-nimbiin kí mèè-u tiba. 21Ní Yeesu bālifì-u yii: «Ba ní a là?» Ní u bí-u yii: «Ŋyunti ŋun a yaa láa kpántì ubɔtee, á yàntī m-jipɔmbi bili nee ubɔ ń dāá nīn kā a-ŋaŋgiil pú, un kíǹee a-ŋaŋgan pú.» 22Ní Yeesu bí yii: «Naa nyí tin ni mèéyee. Ni ŋūǹ kí nyɔ̀ falaa un man làá nyɔ̀ naaa?» Ní bi kíí-u yii: «Iiin, ti ŋūǹ.» 23Ní Yeesu kíí-bi yii: «Tiŋman, an lafun sá ní nyɔ̀ falaa gbanti#20.23 Dūú ŋmàntī nì Atuun 12.2., ama an yaa kíǹ ŋŋaŋgiil nì ŋŋaŋgan kakaaŋu bɔtee, an kaa sá man di pūǹ an paaŋyi. Ipaan gbanti sá ki tīī bin pu m-Baa bɔ́ntì-i ki síiǹee ní.»

24U-boonnooliibi saalaa bin kíǹee nín gbìl̄ mimmee, ní bi fōō nnabiyaamu mulee pu diŋuul. 25Niinee ní Yeesu yíiń bi-kɔkɔ, ní ki bí-bi yii: «Ni nyí yii atimbun bɔtiibi wɔ́b́ bi-yab, ní binikpaambi tɔ́kɔ́ bin kíǹee pu ki dàkà-bi bi-pɔŋŋu. 26An kaa máaǹ kí nīn bí míǹ nimbi kansikin, ama un yaa là kí nīn sá ukpaan ni-kansikinee, udaan ń gíiǹ u-ba ni-tɔntɔnliu, 27ní ni-kansikin ubɔ yaa là kí nīn sá upeepeekaayee, udaan ń nīn sá ni-yumbuu. 28Míǹ ní man Kinibiki kaa dɔ́miń bí tɔ̄ ditundi kí tīī-mi, m dɔ́miń kí tɔ̄ atuun kí tīī binib ní kí dū m-maŋfal kí pà kí fōō binib tikpil kí líí#20.28 Dūú ŋmàntī nì 26.28, 1 Tiim 2.6..»

Yeesu cáaǹ bijɔfub bili

(Kpèè Maar 10.46-52, Luuki 18.35-43)

29Ŋyunti ŋun Yeesu bíi nyēē Jeeriikoo tiŋkee, dinikitikpaandi diba nìn nóó-u. 30Bijɔfub bili nìn kā nsan caŋin. Bi gbìl̄ Yeesu bíi jītée, ní bi bíi tátí yii: «Ukpil, Daafiidi naantiiu, sɔ̄ ti-saai!» 31Ní diniwulee bíi wòoǹ-bi yii bí ŋmīĺee ní bi mɔ̄tìi bíi tátí mpɔn yii: «Ukpil, Daafiidi naantiiu, sɔ̄ ti-saai!» 32Niinee ní Yeesu sāā ki síl̀, ní ki yíiń-bi ki bālifì-bi yii: «Ba ní ni là ḿ ŋá kí tīī-ni ní?» 33Ní bi kíí-u yii: «Ukpil, ŋúbití ti-nimbiliŋ.» 34Ní Yeesu súń bi-saai ní ki gbēē bi-nimbiliŋ, kpalaa niinee ní bi wál̀, ki kíǹ ki nóó-u.

Currently Selected:

Matthieu 20: BASSARDC

Highlight

Copy