Matthieu 25

Bisapɔmbi saalaa bɔti

1«Unimbɔti Beel náań nì kii bisapɔmbi saalaa biba bin yōoǹ bi-fitilab ki búntì kí tūŋkìń unimpucaan calee ní. 2Bi-kansikinee biŋmoo sá bigbaambi ní biŋmoo sá biciŋfitiibi. 3Bigbaambee yōoǹ bi-fitilab, kaa ŋúb́ ŋkpam ansaŋkiya pu, 4ama bin bin sá biciŋfitiibee yōoǹ bi-fitilab ní ki gíti kpíĺ ŋkpam miba ansaŋkiya pu. 5Unimpucaan cal nín kaa bíi bàń malaayee ní ŋgeem cúú bisapɔmbee kɔkɔ, ní bi gèen̄. 6«Kunyataasiiu búmbumee, ní bi téeń yii: <Kpèèmaan unimpucaan cal dee! Cù kí tūŋkìmaan-u!> 7Niinee ní bisapɔmbi saalaayee kɔkɔ fīntì ki bíi ŋáŋkí bi-fitilab. 8Ní bisapɔŋgbaambee bí bin cáá iciinee yii: <Pɔ̄maan-ti ni-kpamaa! Timbi fitilab bíi kúù.> 9Ní bin cáá iciinee bí-bi yii: <Aayee, min bí timbi cee nee kaa làá bà kí kpáaǹ ni mun. Pūtì nín̄ cámaan bin nyáfée cee kí dāmaan.> 10Ŋyunti ŋun bi búntì kí dā ŋkpamee, ní unimpucaan cal bāań, bin bɔ́ntèe nóó-u ki kɔ́ kunimpucandiin, ní bi dū kipunyɔkɔ ki pīiǹ. 11Boonee, bisapɔmbi bin kíǹee mun dūu bāań ki bíi yíì yii: <Ukpil, ukpileeee, pìitī-ti!> 12Ní u kíí-bi yii: <Ibaamɔn ní m tùkù-ni, maa nyí-ni.>» 13Ní Yeesu gíti lī yii: «Taa nín̄ gèem̀maan, kun puee naa nyí ŋwiin, kaa nyí kukúluu kun m làá dāá gítińee.»

Bitɔntɔnliibi bita bɔŋmantikaati

(Kpèè Luuki 19.11-27)

14«Unimbɔti beel dāa bí kii uninja ubɔ nín làá cù nsan ki yíiń u-tɔntɔnliibi ki dū u-gaajawanti ki ŋúbiǹ-bi puee ní. 15U dū nnimbifɔmu muŋmoo ki tīī ubɔ, ní ki dū nnimbifɔmu muli ki tīī ubɔ, ní ki dū kinimbifɔŋ kiba ki tīī utataati. U pée tīī báà ŋma nì u-pɔŋŋu nyɔkɔm, ní ki búntì nsan. 16Dicilpu niinee, un fōō nnimbifɔmu muŋmooyee kpáàa búntì dibàntil ní ki kánní nnimbifɔmu muŋmoo ki kútì muŋmoo mun bi tīī-uee pu. 17Míǹ ní un fōō nnimbifɔmu mulee mun kánní muli ki kútì mun bi tīī-uee pu. 18Ama ní un fōō kiba jee cūtì ki gbìn̄ mbòó ki dū u-kpiliu nimbiliŋ ki bál̀.

19«Uninjee búntèe, ki yúntìń tikpil. U dāa fātìi bāańee ní ki yíiń u-tɔntɔnliibi bí tùkù-u bi nín dū u-nimbiliŋ ki ŋá kuŋyee. 20Ní un nìn fōō nnimbifɔmu muŋmooyee sútìń ki bí yii: <Ukpil, a nìn tīī-mi nnimbifɔmu muŋmoo, ní m dūu bāntì ki ká muŋmoo ki kútì, an sèé.> 21Ní u-kpiliu bí-u yii: <An ŋān̄, a sá utɔntɔmmɔnti ki bí deedee! A nín ŋúb́ tin kaa náaǹee deedeeyee, m làá kàan̄-si á nīn kpèé tiwan tikpil. Kɔ́ man a-kpiliu mɔŋŋun!> 22Ní utɔntɔnli un mun fōō nnimbifɔmu mulee dɔ́miń ki bí yii: <Ukpil, a nìn tīī-mi nnimbifɔmu muli, ní m dūu bāntì ki ká nnimbifɔmu muli ki kútì, an sèé!> 23Ní u-kpiliu bí-u yii: <An ŋān̄, a sá utɔntɔmmɔnti ki bí deedee. A nín ŋúb́ tin kaa náaǹee deedeeyee, m làá kàan̄-si á nīn kpèé tiwan tikpil. Kɔ́ man a-kpiliu mɔŋŋun!> 24Ní un fōō kinimbifɔŋ kiba jee mun sútìń ki bí yii: <Ukpil, m nyí yii a sá unil un bɔti pɔ̄ɔ̄yee, laakin saa yāaǹ iwamboolee niin ní a dāa cēē, ní laakin saa gbáń ki bíl̀ee niin ní a fà. 25An puee m fāŋkì, ní ki cáá a-nimbiliŋ ki gbìn̄ kitiŋ ki dūu bál̀, kpèè, a-wanti sèé!> 26Niinee ní u-kpiliu kíí-u yii: <Utɔntɔŋkpiti, uwutijoodaan ní a sá! A nín nyí yii laakin maa yāaǹee ní m cēē, ní laakin maa gbáń ki bíl̀ee ní m fèe, 27ba pu ní saa dū m-nimbiliŋ ki ŋá-mi baŋkan? M bàà bāań nee ní kí fōō m-nimbijaliŋ nì ipaati,> 28ní ki bí yii: <Fōōmaan u-nimbifɔŋki kí dūú kūtì un cáá nnimbifɔmu saalaayee. 29Di sá yii un kamaa yaa ŋúb́ tin u cááyee tiŋanee bi dāa kútí-u, ní ú nīn bí digbilin. Ama un kamaa yaa kaa ŋúb́ tin u cááyee tiŋanee, bi dāa fòol̄ fiii un u cááyee ní. 30Ama an yaa kíǹ utɔntɔnli un kaa bí tiban nee, cúúmaan-u kí tɔ̄ mmɔŋki dibɔmbɔndin! Niin ní u làá nīn sūǹ, u-nyiŋŋi ń nīn gà tɔb kàkaka.>»

Yeesu làá dāá sòoǹ binib bɔti

31«Man Kinibiki yaa láa dɔ́miń m-nyootinee nì Unimbɔti tuuŋyi kɔkɔee, m làá dāá kàl̄ m-beejal pu nì tinyool. 32Duulinya timbuliŋ kɔkɔ dāa kpáfí m-nimbiin ní ḿ gàntī-bi kii uwaŋkpaal nín gàntī ipii nì iŋoobu puee. 33U làá dū ipii kí yóoń m-ŋaŋgiil pú, ní kí dū iŋoobu kí yóoń m-ŋaŋgan pú. 34Niinee ní man ubɔti ń bí bin bí m-ŋaŋgiil púee, yii: <Dāam̄maan, nimbi bin pu m-Baa bīiǹee, kí fōōmaan Dibeel din u bɔ́ntì ki yóoǹ-ni doooo duulinya kíltamee. 35Di sá ŋkùm nìn cúú-mi ní ni tīī-mi tijin m jíń, nnyinnyoo nìn cáá-mi ní ni pú-mi nnyim m nyùn̄, m nìn sá unicaan ní ni fōō-mi. 36Maa nìn cáá tiba kí pèen̄ ní ni pú-mi tiwan m pēeǹ, m nìn būǹ ní ni kpēē-mi, m nìn bí sarkan ní ni dɔ́miń ki māntì m-pu.> 37Niinee ní bin yúl̀ nì Unimbɔti deedeeyee ń dāá kíí-mi yii: <Ti-Dindaan, ba dal ní ti ká-si ŋkùm cáá-si ní ti tīī-si tijin a jíń, àá nnyinnyoo cáá-si ní ti tīī-si nnyim a nyùn̄ ní? 38Ba dal ní ti ká-si a sá unicaan ní ti fōō-si, àá aa cáá tiba kí pèen̄ ní ti tīī-si tiwan a pēeǹ ní? 39Ba dal ní ti ká-si a būǹ, àá a bí sarkan ní ti cūtì ki māntì a-pu?> 40Ní man ubɔti ń dāá kíí-bi yii: <Ibaamɔn ní m tùkù-ni, ni nín pée ŋá min ki tīī bin sá ŋwaamu m-naalib nee kansikin ubɔee, man ní ni ŋá ki tīī.>»

41«Míǹ boonee ní ḿ fàtī kí tùkù bin yú m-ŋaŋgan púee yii: <Sútímaan niin kí wàatī-mi, mbusudambi! Nín̄ cámaan ŋŋmi ŋun làá nīn wù jaanjaanee ni, ŋun bɔ́ntì ki yóoǹ Sitaan nì u-tuuŋyee! 42Di sá yii ŋkùm nìn cáá-mi, naa pú-mi tijin m jíń. Nnyinnyoo nìn cáá-mi, naa pú-mi nnyim m nyùn̄. 43M nìn sá unicaan, naa fōō-mi. Maa nìn cáá tiba kí pèen̄, naa tīī-mi tiwan m pēeǹ. M nìn būǹ, naa kpēē-mi, m nìn bí sarkan, naa dɔ́miń ki māntì m-pu!> 44Niinee ní bí kíí-mi yii: <Ti-Dindaan, ba dal ní ti ká-si ŋkùm nì nnyinnyoo cáá-si, àá a sá unicaan, àá aa cáá tiba kí pèen̄, àá a būǹ, àá a bí sarkan, ní taa tútúǹ-si?> 45Ní man ubɔti ń dāá kíí-bi yii: <Ibaamɔn ní m tùkù-ni, ni nín kaa ŋá min ki tīī ŋwaamu nee kansikin kibee, man ní naa ŋá ki tīī.> 46Ní bí dāá dū-bi kí tɔ̄ ditafadaaldi din kaa cáá dikúntilee ni, ní bin yúl̀ nì Unimbɔti deedeeyee ń nīn cá dimaŋfal din kaa cáá dikúntilee ni#25.46 Dūú ŋmàntī nì Dani 12.2..»

Currently Selected:

Matthieu 25: BASSARDC

Highlight

Copy