Matayo 21

Jeso unaphokerwa Jerusalemu dza mufalume

(Mariko 11:1-11; Luka 19:28-40; Johana 12:12-19)

1Jeso na ahumwae ariphokala anatapira Jerusalemu, áfika kadzidzi kariko kuko Betifage, kʼanda-kʼanda ya mulima wa Mizeituni. Phapho Jeso achiahuma ahumwae airi 2achiaamba, “Endani kadzidzi kara kodzikalozera mbavu, na muchendaphenya tu mumo kadzidzini, mundamona pʼunda mwenye mwana ufungwa. Muchimona, muvuguleni na mwanawe mwarehe phapha. 3Na mutʼu yeyosi achimuuza mwambeni, ‘Bwana unaye haja,’ na yiye mutʼu undamuhenzeza mwahwale phapho kare.” 4Neno riro rahendeka kwa hata maneno ga Mulungu gogombwa ni mugomviwe Zakariya gachimire. Mulungu waamba,

5 # Zak 9:9 “Aambireni achina Jerusalemu kukala,

Lolani, mufalume wenu unadza!

Yiye ni murumwengu, na upanda pʼunda,

upanda mwana pʼunda mulume ariye utuwana na ameye.”

6Ndo ao ahumwa hinyo, achendahenda dza vyokala adzambwa ni Jeso. 7Achimurehera Jeso yiye pʼunda na mwanawe, achiika mavalo gao dzulu-dzulu ya ao pʼunda kwa Jeso asagalire, na achipanda achiuka. 8Atʼu anji kati ya riro duu achichachasa mavalo gao yiyo njira bomu, na anjine ao achitema vitai vya mihi na kuvitandaza mumo njirani vivyo. 9#Zab 118:25, 26Atʼu osi okala a mbere za Jeso, na okala a nyumaze, achanza kugomba kʼululu kwamba,

“Naalikwe mutʼu wa mudzungu wa Daudi!

Waajaliwa ni Mwenyezi Mulungu yiye adzaye kwa dzina ra Bwana!

Naalikwe Mulungu ariye u dzulu mulunguni!”

10Jeso ariphophenya mudzi wa Jerusalemu, chila mutʼu phapho mudzini wakala u chʼenichʼeni hata phachikala kʼaphasikizika. Atʼu ákala anauza, “Ni ani yuno?” 11Duu ra atʼu rokala rikudza na Jeso richiudzidza vivi, “Yuyu ni mugomvi wa Mulungu Jeso, kulaa Nazareti jimbo ra Galilaya.”

Jeso unavuguza achuzi kulaa Hekaluni

(Mariko 11:15-19; Luka 19:45-48; Johana 2:13-22)

12Phapho Jeso achendaphenya boma ra Hekalu, na achiavuguza osi alae konze okala anaguza, na kugula miyo mumo. Chisha, achizipetula-petula meza za okala anavunzirana pʼesa, na mabao ga aratʼu okala anaguza ngiya manga. 13#Isa 56:7; Jer 7:11Ndo achiaamba, “Gaandikwa Maandikoni ga Mulungu kukala, ‘Nyumba yangu yindaihiwa nyumba ya mavoyo.’ Ela mwimwi, ninaona mudziyihenda ni pʼanga ya aivi!”

14Atʼu otsʼiona, na a virema achimutuwa kuko Hekaluni, naye Jeso achiaphoza. 15Ela makuhani abomu na alimu a shariya átsukirwa muno ariphoona gago mautʼu-mautʼu ga kwangalaza gokala unagahenda, na anache anapiga kʼululu mumo boma ra Hekalu kwamba, “Naalikwe mutʼu wa mudzungu wa Daudi!” 16#Zab 8:2Ndo ao achimwamba Jeso vivi, “Unasikira vivyo aambavyo ao anache?” Jeso achiaudzidza achiaamba, “Ee, ninaasikira!” Chisha achiauza vivi, “Kwani mwimwi kʼamudzangwe kurisoma rino Andiko rambaro, ‘Uwe waafunza ana atsanga na anache adide kukulika’?”

17Chisha Jeso achiaricha ao atʼu, achiuka phapho Jerusalemu, achenda kadzidzi kariko kuko Betania kwendalala.

Jeso unaulaphiza muhi wa mutini

(Mariko 11:12-14, 20-24)

18Chiramukoche, Jeso phokala unauya Jerusalemu, wakala unasikira nzala. 19Achiona muhi wa mutini kʼanda-kʼanda ya yiyo njira, na achenda hata phapho koloni, ela wawona kʼauna matunda gogosi, hata ni makodza maphuphu. Ndo achiulaphiza achiwamba, “Tsʼivyale tʼude kahiri!” Phapho kare uo mutini uchifinyalala makodza. 20Ao ahumwa ariphoona gago áangalala muno hata achiamba, “Aa! Asena, uno muhi wa mutini ufinyalaladze makodza maruru vino?” 21#Mat 17:20; 1 Akor 13:2Jeso achiudzidza achiamba, “Ninamwambira jeri mino, muchikala munakuluphira jeri na kʼamuna shaka mwenu myoyoni, mundaidima kugahenda gaga godziuhendera uu mutini. Na chisha tsʼigo gago hicheye bee, ela mundaidima kuwamba hata mulima uu, ‘Ngʼoka ukadzitiye baharini,’ na vivyo vihendeke. 22Chochosi mumuvoyacho Mulungu kwa njira ya mavoyo, mundapata muchikala munakuluphira kukala, Mulungu undamuhendera.”

Ayahudi anamuuza Jeso dzulu ya widimiwe

(Mariko 11:27-33; Luka 20:1-8)

23Jeso ariphouka phapho phenye muhi wa mutini, waenderera na charoche hata Jerusalemu, na achendaphenya boma ra Hekalu achisagala, na achanza kufunza. Ndo makuhani abomu na atumia achimutuwa achendamuuza vivi, “Uwe Jeso, gano ga kuvuguza atʼu muno boma ra Hekalu, unagahenda kwa widimi wani? Na ni ani yekupʼa widimi uno?” 24Jeso naye achiaudzidza achiaamba, “Mimi nami nindamuuza swali mwenga, na muchiudzidzatʼo, hʼaya nami nindamwambira ninahenda maneno gaga kwa widimi wani. 25Johana Mubatizi ariphobatiza atʼu, uo widimiwe wakala ulaa kwa Mulungu, hebu wakala ulaa kwa atʼu?” Ela ao achanza kuuzana-uzana ao enye kwa enye vivi, “Aa! Hwambedze asena? Huchamba widimiwe walaa kwa Mulungu, undahwuza yiye ahwambe, ‘Bee heka kʼamumukuluphirire?’ 26Na huchamba, ‘Widimiwe walaa kwa atʼu,’ hʼaya manyani hu maengaengani. Maana, atʼu osi anakuluphira kukala, Johana wakala ni mugomvi wa Mulungu.” 27Ndo achimuudzidza Jeso achimwamba, “Kʼahumanya sino.” Ndo Jeso naye achiaamba, “Hʼaya bee hata mimi nami tsʼindamwambira yenipʼa widimi wa kuhenda maneno gaga.”

Tʼadi ya atana airi ariohumwa ni abayao

28Jeso waenderera kugomba na ao makuhani abomu na atumia. Yiye waamba, “Hebu sirikisani tʼadi yino, na chidzako munambire maazo genu. Pʼindi kwakala mutʼu mumwenga na anae airi a chilume. Tsʼiku mwenga, achimwamba yiye muvyere, ‘Baba, rero enda ukahende kazi kuko munda wa mizabibu.’ 29Yiye mwana achimwamba abaye, ‘Tsʼindakwenda mino!’ Ela chidzakoche, watya mwenye na achenda. 30Aripholaa phapho, yiye mutumia wakwendamwambira yiye muvaha, naye achikubali kare kukala undakwenda, ela kʼendere. 31Hʼaya nambirani sambi, ni yuphiye kati ya ao airi yehenda gara gokala alagizwa ni abayao?” Ao achiudzidza achiamba, “Ni yiye muvyere.” Phapho Jeso achiaamba, “Hʼaya bee ninamwambira jeri mino, vivi atosi a kodi na mahawa anamulongolera kwenda Ufalumeni kwa Mulungu. 32#Luk 3:12; 7:29, 30Maana, Johana Mubatizi wakudza, achidzamwambira njira ya kuhendera ga haki, na mwimwi makuhani abomu na alimu a shariya kʼamumukuluphirire. Ela atosi a kodi na mahawa ao achimukuluphira, na hata muriphoona ao akuluphira, chisha mwimwi kʼamutyire na kukuluphira vivyo.”

Tʼadi ya munda wa mizabibu na aroromi

(Mariko 12:1-12; Luka 20:9-19)

33 # Isa 5:1, 2 Jeso waenderera kugomba na ao makuhani na alimu a shariya. Yiye waamba, “Sirikisani yino tʼadi yinjine nayo. Mutʼu mumwenga warima mundawe, na achiphanda mizabibu. Ariphomala gago achiulinga uchigo, achitsonga phatʼu pha kubundira zabibu mwambani, na achimutʼa uringo wa kurindira. Chisha, acherekezana na atʼu anjine aurorome uo munda, ela zabibu zichiiva adze agavye, chidzako yiye mwenye achitsamira itsʼi yinjine. 34Musimu wa zabibu kwiva uriphofika phephi, mwenye munda waahuma ahendikazie kwa aratʼu aroromi, kwa hata akamuhwalire fungure ra mavuno ga zabibu. 35Ela aratʼu aroromi achendaagwira ao ahendikazie. Mumwenga ámupiga, munjine achimupiga mawe, na munjine achihendamuulaga. 36Mwenye munda achiahuma kahiri ahendikazi anjine, anji kuchira ao acharo cha mwanzo, ela ao aroromi achendaahendera dza ao a mwanzo. 37Musindikizowe, achimuhuma mwanawe na maazo ga kukala, ‘Andakwendamogopha yuyu mwanangu.’ 38Ela ao aroromi ariphomona tu yiye mwanawe, áambana vivi, ‘Yuyu abaye achifa ndiye yendahwala ufa. Ndo nahumuulageni kwa hata abaye achidzafa, ufawe ukale wehu!’ 39Ndo achimugwira kare achimulavya hata konze ya uratʼu munda wa mizabibu, achendamuulaga.” 40Ndo Jeso achiuza vivi, “Hʼaya munaona yiye mwenye munda achidza, undakudzaahendadze ao aroromi?” 41Ao achimuudzidza achimwamba, “Yiye achidza, undakudzaaulaga voro-voro naye aratʼu aroromi ai, na uratʼu munda wa mizabibu aerekezane na aroromi anjine, ario andamupʼa fungure ukati wa mavuno.” 42#Zab 118:22, 23Phapho Jeso achiaamba, “Mukale mwimwi kʼamudzangwe kugasoma Maandiko gano ga Mulungu gaambago:

‘Dziwe riro roremwa ni ajengi,

vivi ndiro rodzikala dziwe ra tende muno!

Bwana Mulungu ndiye ariyehenda neno riro,

naro ni neno ra kuhwangalaza muno’?”

43“Kwa vivyo ninamwambira kamare mino, mwimwi mundakulaviwa kuko Ufalumeni kwa Mulungu, na kuphirikwe anjine ondavyala matunda ga uo Ufalume wa Mulungu.”#21:43 Nakala zinjine zinaonjeza fungu ra 44 dza: Na mutʼu achigwa dzulu ya dziwe riro undatoka visiku-visiku, na richimugwerera mutʼu, rindamutisatisa.

45Makuhani abomu na Afarisayo ariphosikira zizo tʼadize ámanya kukala, Jeso wakala unagomba dzulu yao. 46Kwa vivyo, achikala anahenza amugwire Jeso, ela ni áogopha riro duu ra atʼu tu, kwakukala, ao osi ákala anakuluphira kukala, Jeso ni mugomvi wa Mulungu.

Currently Selected:

Matayo 21: CHIDUR

Highlight

Copy