Matayo 22
22
Tʼadi ya nyambura
(Luka 14:15-24)
1Jeso waenderera kwafunza ao atʼu chitʼadi. Yiye waamba, 2“Hunaidima kuuhwalanisha Ufalume wa Mulungu na tʼadi yiyi. Mufalume mumwenga wamwikira mwanawe nyambura. 3Tsʼiku ya nyambura yiriphofika, yiye waahuma ahendikazie akaaihe atʼu okala adzambirwa, ela kʼaahenzere kudza. 4Achihuma ahendikazie anjine achiaamba, ‘Kaambireni ao atʼu oambira yiyi nyambura kukala, mimi nidzitsinza kare nzao na ndama ya kunona, na vivi leu ridziiva, na chila chitʼu chikamilika. Kwa vivyo, hindeni hukayiuseni yo nyambura.’ 5Ela ao okala adzambirwa, kʼaagatuwire mijali gago. Chila mutʼu watuwa gakwe mwenye. Mumwenga wakwenda kwakwe mundani, munjine achenda kwakwe uchuzini, 6na ao anjine achiagwira ao ahendikazi okala áhumwa, achiapiga hata achiaulaga. 7Yiye mufalume phapho achitsukirwa muno hata achialagiza shikarie achendaaulaga okala adziulaga ao ahendikazie, na uo mudzi wao achiutiya moho. 8Chisha, mufalume achiaiha ahendikazie anjine achiaamba, ‘Nyambura ya mwanangu ni rero, ela ao atʼu oambira ákala kʼaawirya. 9Ndo vivi, endani matanyiko ga njira bomu, na osi ondaaona, aambeni adze nyamburani.’ 10Ndo ahendikazi hinyo achenda kuko matanyikoni ga njira bomu, achendaambira atʼu anji adzo na ai, chisha achiareha kuko nyamburani kwa yiye mufalume, na riro dzidzumba rokala nyambura yinauswa mumo, richiudzala. 11Ela yiye mufalume ariphokwenda kuko dzumbani kwendalola ao ajenie, wamona mutʼu mumwenga yekala kʼavalire nguwo za kwendera nyamburani, 12na achimuuza vivi, ‘Abaye, udziphenyadze muno uwe photsʼi nguwo za kwendera nyamburani?’ Phapho, yiye mutʼu kʼapatire ra kugomba kamare. 13#Mat 8:12; 25:30; Luk 13:28Ndo yiye mufalume achiaamba ahendikazie, ‘Mugwireni yuya mumufunge mikono na magulu, chisha mukamutsuphe kuko konze dzizani, ariko undadzuta, na arire hata ga milatso.’ ” 14Ndo kumarigiza Jeso achiamba, “Mulungu unaaiha atʼu anji kwakwe Ufalumeni, ela ni achache o atsagulwao.”
Vilongozi a Ayahudi anaheza kumuhega Jeso
(Mariko 12:13-17; Luka 20:20-26)
15Ndo phapho ao Afarisayo ákwendadzila kwa akamuhege Jeso kwa kumuuza maswali. 16Ariphomala, achiahuma anafunzi ao na atʼu a chama cha Herode. Ao achendamuuza Jeso vivi, “Mwalimu, hunamanya kukala uwe u mujeri, unafunza ujeri dzulu ya njira ya Mulungu, na kʼogopha, hebu kumupendeleya mutʼu, mana, uwe kʼulola cheo cha mutʼu. 17Ndo sambi uwe hwambire maazogo. Yikale yino Shariya yehu yinahuhenzeza kuripha kodi kwa Kaisari, hebu kʼayihuhenzeza?” 18Ela Jeso yiye achikala udzigamanya kare gago maazo gao mai. Ndo hata achiaamba, “Mwimwi alumakwiri, kwadze munaheza kunihega? 19Hebu mwenye pʼesa za kodi naalavye.” Mumwenga aripholavya dinari,#22:19 Dinari mwenga zakala ni pʼesa ya Chirumi yokala yichiriphwa mutʼu yedzisinda dii kuhenda kazi. 20Jeso achiauza vivi, “Sura rino na dzina rino ni vyakwe ani?” 21Ao achimuudzidza achimwamba, “Ni vyakwe Kaisari.” Phapho Jeso achiaamba, “Hʼaya vyakwe Kaisari mupʼeni mwenye, na vyakwe Mulungu navyo mupʼeni Mulungu mwenye vivyo.” 22Ao atʼu okala áhumwa ni Afarisayo ariphosikira gago, áangalazwa muno ni gago maudzidzige na achiuka, yiye achimuricha phapho.
Asadukayo anamuuza Jeso dzulu ya kufufuka
(Mariko 12:18-27; Luka 20:27-40)
23 #
Mahe 23:8
Tsʼiku yiyo mwenga, Asadukayo aambao kukala afadzi kʼaafufuka, ákwenda kwa Jeso achendamwamba, 24#Kʼumb 25:5“Mwalimu, Shariya ya Musa yinahwamba, ‘Mutʼu achihwala na afe achikala kʼadzangwe kupata mwana, nduguye yiye mufadzi ni seti amuhwale yiye gungu amuvyalire ana nduguye.’ 25Ndo sambi, pʼindi phapha phásagala ndugu mwenga, alume afungahe. Yuyatʼu muvyere wahwala, ela achifa photsʼivyala naye yiye muche. Kwa vivyo, yiye muchewe achimusiyira yuyatʼu muvahawe yedzituwirizana. 26Muvahawe achimuhwala yuyatʼu gungu, ela yuyu naye, kʼavyalire naye achifa vivyo. Wa hahu naye dza vivyo, na bee vichenderera vivyo hata osi afungahe. 27Ariphosira kufa ao ndugu osi afungahe, yuyatʼu muchetʼu naye achidzafa. 28Ndo sambi, tsʼiku atʼu phondafufulwa, muchetʼu yiye undakala mukaza ani? Kwani osi afungahe amuhwala vivyo!” 29Ela Jeso yiye achiaamba vivi, “Mu alongo mwimwi, mana, kʼamugaelewa Maandiko ga Mulungu, hebu widimi wa Mulungu! 30Maana, atʼu phondafufuka kʼaandahwala hebu kuhwalwa, ela andakala dza malaika a mulunguni. 31Na dzulu ya gano maneno ga atʼu kufufuka kulaa kuzimu, mwimwi Asadukayo mukale kʼamudzangwe kusoma dzuluye vyoambwa ni Mulungu mwimwi, 32#Kul 3:6phara phoamba, ‘Mimi ndimi Mulungu wa ano Burahemu, Isaka, na Jakobo!’ Na bee, yiye tsʼiye Mulungu wa afadzi, ela ni Mulungu wa aratʼu ario moyo.” 33Riro duu ra atʼu ririphosikira gago, raangalazwa muno ni gago mafunzoge.
Lagizo ra halahala rolaviwa ni Mulungu
(Mariko 12:28-34; Luka 10:25-28)
34Ela Afarisayo ariphosikira kukala, Jeso wakala udziakomesa Asadukayo, áonana, 35chisha mumwenga wao yekala ni mwalimu wa shariya, achendamuhega Jeso kwa kumuuza swali. Yiye wamuuza vivi, 36“Mwalimu, kati ya malagizo gosi garigo Shariyani, ni riphiro ra halahala?”
37 #
Kʼumb 6:5
Jeso achiudzidza achiamba, “Ni riratʼu rambaro, ‘Muhenzeni Mwenyezi Mulungu, Mulungu wenu na moyo wenu wosi, na roho renu rosi na kwa akili zenu zosi.’ 38Riri ndiro lagizo ra kwanza, na ra halahala. 39#Alaw 19:18Na ra phiri, ririro ringa riro, ni riratʼu rambaro, ‘Muhenze jiranio dza vivyo udzihenzavyo uwe mwenye!’ 40#Luk 10:25-28Shariya zosi za Musa na mafunzo ga agomvi a Mulungu, ganategemea malagizo gaga mairi.”
Swali dzulu ya Kʼirisito
(Mariko 12:35-37; Luka 20:41-44)
41O Afarisayo ariphokala acheri phamwenga, Jeso waauza vivi, 42“Chivyenu mwimwi, munaona yiye Kʼirisito ni mutʼu wa mudzungu wa ani?” Ao achiudzidza achiamba, “Siswi hunaona ni mutʼu wa mudzungu wa Daudi.” 43Jeso achiaamba, “Chikala ni vivyo sambi, ni kwadze Daudi wamwiha Bwana phokala udziudzalwa ni Roho wa Mulungu? Maana, Daudi waamba,
44 #
Zab 110:1
‘Bwana Mulungu wamwamba Bwana wangu:
“Sagala upande wangu wa mukono wa kulume,
hata phondakuhenda warime tsetsetse adawao.” ’
45“Yiye Daudi mwenye tu unamwiha yiye Kʼirisito, ‘Bwana,’ sambi yiye Kʼirisito unaidimadze kukala mutʼu wa mudzunguwe kahiri?” 46Jeso ariphogomba gago, kʼaphana mutʼu yeidima kumuudzidza. Na kulaa tsʼiku yiyo, kʼaasubutire kumuuza kahiri maswali manjine.
Currently Selected:
Matayo 22: CHIDUR
Highlight
Share
Copy
Want to have your highlights saved across all your devices? Sign up or sign in