Matayo 20

Jeso unalavya tʼadi ya ajima a munda wa mizabibu

1Jeso waenderera kugomba achiamba, “Ndo hunaidima kuuhwalanisha Ufalume wa Mulungu na tʼadi yiyi. Mutʼu mumwenga wakala una munda wa mizabibu, na tsʼiku mwenga, warauka dani-dani achendagwira atʼu adze ahende kazi mwakwe mundani. 2Acherekezana nao kwaripha kawaida ya dididi, chisha achiaphirika ko kwakwe mundani. 3Ziriphofika saa tʼahu, achilaa kahiri achendaaona anjine aimire cheteni kʼaana kazi. 4Ao nao achiaamba, ‘Endani kwangu mundani mukahende kazi, na mino nindamuripha kawaida ya dididi!’ 5Ndo o atʼu hinyo achenda. Dzuwa ririphoima na vitswa, mwenye munda wahenda vivyo, na saa chenda napho achihenda dza vivyo. 6Ziriphofika saa kumi na mwenga za dziloni, wakwenda kuko cheteni kahiri, na achendaaona atʼu anjine acheri kwima phapho. Ndo yiye achiauza vivi, ‘Heka hata kunatswa phapha na kʼamuna kazi?’ 7Ao achimuudzidza, ‘Kʼahuna mutʼu yedzihugwira vibaruwa.’ Ndo yiye mwenye munda wa mizabibu achiaamba, ‘Bee, endani kwangu mundani mukahende kazi namwi.’

8 # Alaw 19:13; Kʼumb 24:15 “Dziloni saa ya kufunga kazi yiriphofika, mwenye munda wamwamba yiye mwimiriziwe wa ao ahendikazi, ‘Aihe ahendikazi wariphe. Chisha, anza na odzanza kazi kusindikiza, na umarigize na odzanza kazi mwanzo.’ 9Ndo achidza okala adzanza kazi saa kumi na mwenga, na achiriphwa kawaida ya dididi. 10Aratʼu okala adzanza kazi na chimbere ariphofika, áona andariphwa nyinji, ela hata ao nao achihewa yo kawaida ya dididi. 11Ao a kwanza kazi mwanzo áriphoriphwa pʼesa zao, áanza kumunungʼunikira yiye mwenye munda kwamba, 12‘Heka hata ano odzihenda kazi saa mwenga tu, nao ariphwa sawa na siswi odzisinda dii na dzuwa kuhenda kazi?’ 13Ela yiye mwenye munda achimuudzidza mumwenga wao achimwamba, ‘Ni vivyo baye, ela mimi tsʼikuzulumire. Maana, hudzerekezana nikuriphe kawaida ya dididi, nami vivyo ndivyo vyodzihenda. 14Kwa vivyo, uwe hwala hakiyo wende. Mimi nidzamula mwenye kwaripha sawa na mwimwi aa odzanza kazi kusindikiza. 15Na nina haki ya kuhumira pʼesa zangu vyangu nihenzavyo. Hebu unalumwa ni moyo kwakukala, mino ni mutʼu wa mbazi?’ ” 16#Mat 19:30; Mar 10:31; Luk 13:30Ndo kumarigiza Jeso achiamba, “Ario ni a mwanzo vivi, andakudzakala a musindikizo na ario ni a musindikizo vivi, andakudzakala a mwanzo.”

Jeso unagomba lwa hahu dzulu ya chifoche

(Mariko 10:32-34; Luka 18:31-34)

17Jeso na ahumwae ariphokala a charoni anakotʼa kwenda Jerusalemu, waaiha njama aratʼu anafunzie kumi na airi tu hichiyao, na achiaamba vivi, 18“Sirikisani! Vivi hunakotʼa kwenda Jerusalemu, na kuko mimi Mutʼu yelaa dzulu, nindakwendalaviwa kwa makuhani abomu na alimu a shariya, na ao andanilamula ninyongwe. 19Chisha, andanilavya kwa atʼu a makabila manjine, ario andanihenda chinyago, anipige vibokʼo na aniulage kwa kunikotʼa misumari musalabani. Ela tsʼiku ya hahu yichifika, nindafufulwa.”

Voyo ra ameye Jakobo na Johana

(Mariko 10:35-45)

20Jeso ariphomarigiza kugomba na ao ahumwae kumi na airi, mukaza Zebedayo na anae airi a chilume ámwendera Jeso. Yiye muchetʼu achimitʼa mavindi mbere za Jeso chiishima kwa alavye voyore. 21Jeso achimuuza achimwamba, “Unani?” Yiye muchetʼu achimwamba, “Mimi ninakuvoya uwe kukala, uchikala usegere kwako Ufalumeni unatawala, wambe aa anangu airi, mumwenga asagale mukonoo wa kulume, na yiye munjine asagale mukonoo wa kotsʼo mutawale phamwenga.” 22Ela Jeso achiudzidza achiamba, “Kʼamumanya muvoyaro mwimwi. Mukale mwimwi munaidima kushononeswa dza mimi vyondashononeswa?” Ao achimuudzidza achimwamba, “Ehʼe hunaidima.” 23Jeso achiaamba, “Mwimwi mundashononeswa dza mimi vyondashononeswa, ela mimi tsʼimi mulamuli yendalamula kukala, ni yuphiye yendasagala mukono wangu wa kulume, hebu mukono wangu wa kotsʼo. Baba Mulungu nafasi zizo waaikira aratʼu oatsagula azihwale.” 24Aratʼu ahumwa anjine kumi ariphogasikira gago, áatsukirirwa ao mutʼu na nduguye. 25#Luk 22:25, 26Ndo phapho Jeso achiaiha osi phamwenga na achiaamba vivi, “Mwimwi munamanya kukala, atawali na vilongozi a mataifa bee, anaatawala atʼu na chiguvuguvu. 26#Mat 23:11; Mar 9:35; Luk 22:26Ela mwimwi kwenu navitsʼikale hivyo. Ahenzaye kukala chilongozi kati yenu, ni seti aahikirehikire anzie osi. 27Na yeyosi kati yenu yendahenza kukala wa mwanzo, ni seti akale dza mugulwa muhumiki wenu, 28dza viratʼu nirivyo mimi Mutʼu yelaa dzulu nákudzaahikirahikira atʼu, na nidzilavire kufa kwa niativye anji. Ela tsʼidzire kudzahikirwahikirwa.”

Jeso unaaphoza atʼu airi otsʼiona

(Mariko 10:46-52; Luka 18:35-43)

29Jeso na ahumwae ariphokala anauka mudzi wa Jeriko, duu bomu ra atʼu ramutuwa. 30Ndo atʼu airi otsʼiona ákala asegere kʼanda-kʼanda ya yiyo njira bomu, na ariphosikira kukala Jeso wakala unachira na phatʼu phapho, áanza kugomba kwa laka ra dzulu achiamba, “Hwonere mbazi mutʼu wa mudzungu wa Daudi!” 31Riro duu ra atʼu richiagombera, na achiaamba anyamale. Ela ao hata achikaza kugomba kwa laka ra dzulu kwamba, “Hwonere mbazi mutʼu wa mudzungu wa Daudi!” 32Jeso phapho achiima, na achiaiha. Chisha achidzaauza vivi, “Munahenza nimuhenderedze?” 33Ao atʼu otsʼiona achimuudzidza achimwamba, “Bwana, hunakuvoya uhuphoze matso gehu hwone.” 34Jeso achiaonera mbazi, achigakumba matso gao, na phapho kare achiona, na achimutuwa.

Currently Selected:

Matayo 20: CHIDUR

Highlight

Copy