JOSUE 10
10
Ang Pagdaug sa mga Amornon
1Sang nabatian ni Adoni-zedec nga hari sang Jerusalem kon paano nga naagaw ni Josue ang Ai, kag nalaglag niya ini sing bug-os, subong sang nahimo niya sa Jerico kag sa iya hari, amo ini ang ginhimo niya sa Ai kag sa iya hari, kag kon paano nga ang mga pumuluyo sang Gabaon nagpakighidait sa Israel kag yadto sa tunga nila, 2ginhadlukan sila sing daku, bangud nga ang Gabaon daku nga banwa, subong sang isa sang kabanwaanan nga harianon, kag bangud nga labi pa kadaku sia sa Ai, kag ang tanan niya nga tawo gamhanan. 3Gani nagpadala si Adoni-zedec nga hari sang Jerusalem kay Hoham nga hari sang Hebron, kay Piram nga hari sang Jarmut, kay Jafia nga hari sang Laquis, kag kay Debir nga hari sang Eglon, nga nagasiling, 4“Taklad kamo sa akon, kag bulugi ako, kag gubaton ta ang Gabaon; kay sia nagpakighidait kay Josue kag sa katawohan sang Israel.” 5Niyan ang lima ka hari sang mga Amornon, ang hari sang Jerusalem, ang hari sang Hebron, ang hari sang Jarmut, ang hari sang Laquis, kag ang hari sang Eglon, nagtingub, kag nagtaklad sila pati ang tanan nila nga kasoldadosan kag nagpahamtang sing dologan batok sa Gabaon, kag nagpakig-away sa iya.
6Kag ang mga lalaki sang Gabaon nagpadala kay Josue sa dologan sa Gilgal, nga nagasiling, “Dili pagpabay-i sang imo mga kamut ang imo mga alagad; taklad ka sing madali sa amon, kag luwasa kami, kag tabangi kami; kay ang tanan nga hari sang mga Amornon nga nagapuyo sa kabakoloran nagtingub batok sa amon.” 7Gani nagtaklad si Josue gikan sa Gilgal, sia kag ang bug-os nga hangaway kaupud niya, kag ang tanan nga gamhanan nga lalaki nga isganan. 8Kag ang Ginoo nagsiling kay Josue, “Dili ka magkahadluk sa ila, kay natugyan ko sila sa imo mga kamut; wala sing bisan sin-o nga tawo sa ila nga makatindug sa atubangan mo.” 9Gani si Josue nag-abut sa ila sing hinali, kay sa bug-os nga gab-i nagtaklad sia gikan sa Gilgal. 10Kag gingumon sila sang Ginoo sa atubangan sang Israel, kag ginpatay niya sila sa daku nga pagpamatay sa Gabaon, kag ginlagas sila sa dalanon sang taklaran sang Bet-horon, kag ginsamad sila tubtub sa Azeca kag tubtub sa Maceda. 11Kag sang nagpalagyo sila gikan sa atubangan sang Israel, sang didto sila sa dulhogan sang Bet-horon, ginhologan sila sang Ginoo gikan sa langit sing dalagku nga mga bato tubtub sa Azeca, kag nagkalamatay sila; madamu pa sa ila ang nagkalamatay sa mga bato nga hielo sang sa mga ginpamatay sa espada sang mga tawo sang Israel.
12Niyan si Josue nagpamolong sa Ginoo sang adlaw nga gintugyan sang Ginoo ang mga Amornon sa atubangan sang mga tawo sang Israel; kag nagsiling sia sa itololok sang Israel,
“Adlaw, pahimonong ka sa ibabaw sang Gabaon,
kag ikaw Bulan sa nalupyakan sang Ayalon.”
13Kag ang adlaw nagpahimonong, kag ang bulan nagdolog,
tubtub nga ang pungsud nakapanimalus sa ila mga kaaway.
Wala bala masulat ini sa tolon-an ni Jaser?#2 Sam. 1:18. Ang adlaw nagdolog sa tunga sang langit, kag wala magdalidali sa pagtunud sing mga isa ka adlaw nga bug-os. 14Wala sing adlaw nga kaangay sadto nga una sini ukon olihi sini, nga ang Ginoo nagpamati sa tingug sang isa ka tawo; kay ang Ginoo nagpakig-away tungud sa Israel.
15Niyan si Josue kag ang bug-os nga Israel kaupud niya nagpauli sa dologan sa Gilgal.
16Ini nga lima ka hari nagpalagyo, kag nagpanago sa lungib sa Maceda. 17Kag ginsugid kay Josue, “Nakita ang lima ka hari nga nagapanago sa lungib sa Maceda.” 18Kag si Josue nagsiling, “Paligira ninyo ang bato nga dalagku tubtub sa baba sang lungib, kag butangan sing mga tawo sa luyo niya sa pagbantay sa ila; 19apang kamo dili magdolog, lagsa ang inyo mga kaaway, samara ang naolihi sa ila, dili sila pagpasudla sa ila kabanwaanan; kay gintugyan sila sa inyo mga kamut sang Ginoo nga inyo Dios.” 20Sang si Josue kag ang mga tawo sang Israel nakatapus sa pagpamatay sa ila sa daku nga pagpamatay, tubtub nga napapas sila, kag ang nabilin sa ila nakasulud sa kabanwaanan nga napamakuran, 21ang bug-os nga katawohan nagpauli sa paghidait sa dologan kay Josue sa Maceda; wala sing bisan sin-o nga naghulag sang iya dila batok sa bisan kay sin-o sang katawohan sang Israel.
22Niyan nagsiling si Josue, “Buksi ninyo ang baba sang lungib, kag dalhon sa akon yadto nga lima ka hari pagowa gikan sa lungib.” 23Kag ginhimo nila ang subong sini, kag gindala sa iya yadto nga lima ka hari pagowa gikan sa lungib, ang hari sang Jerusalem, ang hari sang Hebron, ang hari sang Jarmut, ang hari sang Laquis, kag ang hari sang Eglon. 24Kag sang gindala nila kay Josue yadto nga lima ka hari, gintawag ni Josue ang tanan nga lalaki sang Israel, kag nagsiling sa mga pangolo sang mga hangaway nga nag-upud sa iya, “Palapit kamo, ibutang ang inyo mga tiil sa mga liog sini nga mga hari.” Niyan nagpalapit sila, kag ginbutang ang ila mga tiil sa mga liog nila. 25Kag si Josue nagsiling sa ila, “Dili magkahadluk ukon magkahangawa; magpakabakud kag magpakaisug; kay subong sini ang himoon sang Ginoo sa tanan ninyo nga kaaway nga ginaaway ninyo.” 26Kag sang olihi ginsakit sila ni Josue kag ginpatay sila, kag ginbitay sila sa lima ka kahoy. Kag nabitay sila sa mga kahoy tubtub sa kahaponon; 27apang sa tion nga nagahinunud ang adlaw, si Josue nagsogo, kag gintonton nila sila gikan sa mga kahoy, kag ginpilak sila sa lungib diin nagpanago sila, kag ginbutangan sing dalagku nga mga bato ang baba sang lungib, tubtub sini gid nga adlaw.
28Kag gin-agaw ni Josue ang Maceda sadto nga adlaw, kag ginpilas ini sa sulab sang espada kag ang iya hari; ginlaglag niya sila sing bug-os kag ang tanan nga kalag nga yara sa sulud niya, wala sia sing ginbilin; kag ginhimo niya sa hari sang Maceda subong sang nahimo niya sa hari sang Jerico.
29Niyan si Josue nagtaliwan sa Maceda, kag ang bug-os nga Israel kaupud niya, pakadto sa Libna, kag nagpakig-away batok sa Libna; 30kag ang Libna man kag ang iya hari gintugyan sang Ginoo sa kamut sang Israel; kag ginpilas niya ini sa sulab sang espada, kag ang tanan nga kalag nga yara sa sulud niya; wala sia sing ginbilin sa iya; kag ginhimo niya sa iya hari subong sang nahimo niya sa hari sang Jerico.
31Kag si Josue nagtaliwan sa Libna, kag ang bug-os nga Israel kaupud niya, pakadto sa Laquis, kag nagpahamtang sing dologan batok sa iya, kag nagpakig-away batok sa iya: 32kag gintugyan sang Ginoo ang Laquis sa kamut sang Israel, kag gin-agaw niya ini sa ikaduha nga adlaw, kag pinilas ini sa sulab sang espada, kag ang tanan nga kalag nga yara sa sulud niya, sono sa tanan nga nahimo niya sa Libna.
33Niyan si Horam nga hari sang Gezer nagtaklad sa pagbulig sang Laquis; kag ginpilas ni Josue sia kag ang iya katawohan, tubtub nga wala sia sing ginbilin sa iya.
34Kag si Josue nagtaliwan gikan sa Laquis kag ang bug-os nga Israel kaupud niya pakadto sa Eglon; kag nagpahamtang sila sing dologan batok sa iya, kag nagpakig-away batok sa iya; 35kag gin-agaw nila ini sa sadto nga adlaw, kag ginpilas ini sa sulab sang espada; kag ang tanan nga kalag nga yara sa sulud sini ginlaglag niya sing bug-os sadto nga adlaw, sono sa tanan nga nahimo niya sa Laquis.
36Niyan si Josue kag ang bug-os nga Israel kaupud niya nagtaklad gikan sa Eglon pakadto sa Hebron; kag nagpakig-away sila batok sa iya, 37kag gin-agaw nila ini, kag ginpilas ini sa sulab sang espada, kag ang iya hari kag ang tanan niya nga kabanwaanan, kag ang tanan nga kalag nga yara sa sulud sini; wala sia sing ginbilin, sono sa tanan nga nahimo niya sa Eglon, apang ginlaglag niya ini sing bug-os kag ang tanan nga kalag nga yara sa sulud sini.
38Niyan si Josue, kag ang bug-os nga Israel, kaupud niya nagliso pakadto sa Debir kag nagpakig-away batok sa sini, 39kag gin-agaw niya ini kag ang iya hari kag ang tanan niya nga kabanwaanan; kag ginpilas nila sila sa sulab sang espada, kag ginlaglag sing bug-os ang tanan nga kalag nga yara sa sulud sini; wala sia sing ginbilin; subong sang nahimo niya sa Hebron amo ini ang nahimo niya sa Debir kag sa iya hari, subong sang nahimo niya man sa Libna kag sa iya hari.
40Gani ginlaglag ni Josue ang bug-os nga duta, ang kabakoloran kag ang Bagatnan kag ang kapatagan kag ang nalubluban, kag ang tanan nila nga hari; wala sia sing ginbilin, kondi nga ginlaglag niya sing bug-os ang tanan nga nagaginhawa, subong sang ginsogo sang Ginoong Dios sang Israel. 41Kag ginlaglag sila ni Josue kutub sa Cades-barnea tubtub sa Gaza, kag ang bug-os nga duta sang Gozen, tubtub sa Gabaon. 42Kag ini tanan nga hari kag ang ila duta gin-agaw ni Josue sa makaisa, bangud nga ang Ginoong Dios sang Israel nagpakig-away tungud sa Israel. 43Niyan nagbalik si Josue, kag ang bug-os nga Israel kaupud niya, sa dologan sa Gilgal.
Currently Selected:
JOSUE 10: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
