JOSUE 9
9
Ang Padugi sang Gabaon
1Sang nakabati sini ang tanan nga hari nga yara sa tabok sang Jordan sa kabakoloran kag sa kapatagan kag sa bug-os nga baybayon sang Daku nga Dagat sa atubang sang Libano, ang mga Hethanon, ang mga Amornon, ang mga Canaanhon, ang mga Pereznon, ang mga Hevhanon, kag ang mga Jebusnon, 2nag-ulugyon sila sing tingub sa pagpakig-away kay Josue kag sa Israel.
3Apang sang nakabati ang pumuluyo sang Gabaon sang nahimo ni Josue sa Jerico kag sa Ai, 4sila man nagbuhat sing malimbongon, kag naglakat kag nagpakaembajador sila, kag nagdala sing lapat nga mga sako sa ila mga asno, kag mga panit nga suludlan sing alak, nga lapat kag gisi-on kag pinongyutan, 5mga sapin nga mga lapat kag tinukapan sa ila mga tiil, kag lapat nga mga panapton sa ila; kag ang tanan nga tinapay nga balon nila nagtig-a kag agup-upon. 6Kag nagkadto sila kay Josue sa dologan sa Gilgal, kag nagsiling sa iya kag sa mga tawo sang Israel, “Nag-abut kami gikan sa malayo nga duta; busa karon pakigkatipan kamo sa amon.” 7Apang ang mga tawo sang Israel nagsiling sa mga Hevhanon, “Ayhan kamo nagapuyo sa tunga namon; niyan paano bala ang pagpakigkatipan namon sa inyo?”#Ex. 23:32; 34:12; Deut. 7:2. 8Kag sila nagsiling kay Josue, “Kami imo mga alagad.” Kag si Josue nagsiling sa ila, “Sin-o bala kamo? Kag diin kamo maghalin?” 9Nagsiling sila sa iya, “Ang imo mga alagad naghalin sa malayo gid nga duta, bangud sang ngalan sang Ginoo nga imo Dios; kay nakabati kami sang iya kabantugan, kag sang tanan nga ginhimo niya sa Egipto, 10kag sang tanan nga ginhimo niya sa duha ka hari sang mga Amornon nga didto sa tabok sang Jordan, kay Sihon nga hari sang Hesbon, kag kay Og nga hari sang Basan, nga didto sa Astarot.#Num. 21:21-35. 11Kag ang amon mga tigulang kag ang tanan nga pumuluyo sang amon duta nagpamolong sa amon, ‘Dala kamo sa inyo mga kamut sang balon nga sa panlakatan, kag maglakat sa pagsugata sa ila, kag silingon sila, “Kami inyo mga alagad; kag karon pakigkatipan kamo sa amon.” ’ 12Ini amon tinapay; ginkuha namon ini nga mainit pa nga amon balon gikan sa amon mga balay sang adlaw nga naghalin kami sa pagkari sa inyo, apang karon, yari, nagtig-a na sia kag nag-agup-upon; 13ini nga mga panit nga sa alak nga ginpuno namon mga bag-o, kag yari karon, mga gisi-on na; kag ini nga amon mga panapton kag ang amon mga sapin naglapat bangud sang tama kalawig nga panlakatan.” 14Gani ang mga tawo nagkuha sang ila balon, kag wala magpangayo sing laygay sa baba sang Ginoo. 15Kag si Josue nagpakighidait sa ila, kag nagpakigkatipan sa ila, sa pagpakabuhi sa ila; kag ang mga dungganon sang katilingban nagsumpa sa ila.
16Sa tapus ang tatlo ka adlaw nga tapus sila makapakigkatipan, nakabati sila nga mga kaingud nila sila, kag nga nagpuyo sila sa tunga nila. 17Kag nagpanlakatan ang katawohan sang Israel kag sa ikatlo ka adlaw nag-abut sa ila kabanwaanan. Karon ang ila banwa amo ang Gabaon, ang Cafira, ang Beerot, kag ang Kiryat-jearim. 18Apang wala sila paglaglaga sang katawohan sang Israel, bangud nga ang mga principe sang katilingban nakasumpa sa ila tungud sa Ginoo, ang Dios sang Israel. Niyan ang bug-os nga katilingban nagkumud batok sa mga principe. 19Apang ang tanan nga principe nagsiling sa bug-os nga katilingban, “Nakasumpa kami sa ila tungud sa Ginoo, ang Dios sang Israel, kag karon indi naton matandug sila. 20Ini amo ang himoon ta sa ila, kag pakabuhion sila, basi nga ang kasingkal manginsa aton, bangud sang sumpa nga ginsumpa namon sa ila.” 21Kag ang mga principe nagsiling sa ila, “Pakabuhia sila.” Gani nanginmanugpangahoy sila kag manugsag-ub sang tubig sa bug-os nga katilingban, sono sa napamolong sa ila sang mga principe.
22Gintawag sila ni Josue, kag nagpamolong sa ila, “Ngaa bala nga dinayaan ninyo kami, nga nagasiling, ‘Tama kami kalayo sa inyo,’ sing ugai nagapuyo kamo sa tunga namon? 23Busa karon pinakamalaut kamo, kag dili mag-untat nga may mangin-ulipon sa inyo, nga mga manugpangahoy kag mga manugsag-ub sang tubig nga sa balay sang akon Dios.” 24Sila nagsabat kay Josue, “Bangud nga ginsugid sa minatuud sa imo mga alagad kon paano nga ang Ginoo nga imo Dios nagsogo kay Moises nga iya alagad nga ihatag sa inyo ang bug-os nga duta, kag laglagon ang tanan nga pumuluyo sang duta gikan sa atubangan ninyo; busa nahadluk kami sing tama tungud sang amon kabuhi bangud sa inyo, kag naghimo sini nga butang. 25Kag karon, yari kami sa imo kamut: ang subong nga daw maayo kag matarung sa amo nga himoon sa amon, himoa.” 26Gani amo ini ang ginhimo niya sa ila, kag ginluwas sila sa kamut sang katawohan sang Israel; kag wala nila sila pagpatya. 27Apang ginhimo sila ni Josue sadto nga adlaw nga mga manugpangahoy kag mga manugsag-ub sang tubig nga sa katilingban kag sa halaran sang Ginoo, tubtub sini nga adlaw, sa duug nga iya pagpilion.
Currently Selected:
JOSUE 9: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
