JOSUE 8

Ang Pag-agaw kag Paglaglag sang Ai

1Kag ang Ginoo nagsiling kay Josue, “Dili magkahadluk ukon magkahangawa; dalha kaupud nimo ang bug-os nga hangaway, kag magtindug, magtaklad sa Ai; tan-awa, nahatag ko sa imo kamut ang hari sang Ai, kag ang iya katawohan, ang iya banwa, kag ang iya duta; 2kag himoon mo sa Ai kag sa iya hari ang subong sang ginhimo mo sa Jerico kag sa iya hari; lamang ang inagaw sa iya kag ang kahayupan sa iya kuhaon ninyo nga sa inyo subong nga inatihan; magbutang ka sing puut sa banwa, sa likod nayon.”

3Gani nagtindug si Josue, kag ang bug-os nga hangaway sa pagtaklad sa Ai; kag nagpili si Josue sing katloan ka libo ka lalaki, ang gamhanan nga mga lalaki nga isganan, kag ginpadala sila sa kagab-ihon. 4Kag nagsogo sia sa ila, “Yari karon, magapuut kamo batok sa banwa, sa likod sini; dili kamo magpahilayo sing tama sa banwa, kondi maghanda kamo nga tanan; 5kag ako, kag ang bug-os nga katawohan nga kaupud nakon, magapalapit sa banwa. Kag kon maggowa sila batok sa amon, subong sang sa nahauna, magapalagyo kami sa atubangan nila; 6kag sila magagowa sa olihi namon, tubtub nga mapapalayo namon sila sa banwa; kay sila magasiling, ‘Nagapalagyo sila sa atubangan naton, subong sang sa nahauna.’ Gani magapalagyo kami sa atubangan nila; 7niyan kamo magatindug sa pulut-an, kag magaagaw sang banwa; kay igatugyan ini sa inyo kamut sang Ginoo nga inyo Dios. 8Kag kon maagaw na ninyo ang banwa, tutdan ninyo sing kalayo ang banwa, himoon ninyo sono sa polong sang Ginoo; tan-awa, ginsogo ko kamo.” 9Kag ginpadala sila ni Josue; kag nagkadto sila sa pulut-an, kag nagpabilin sa gin-utlan sang Bet-el kag Ai, sa katundan sang Ai; apang si Josue nagpabilin sadtong gab-i sa katawohan.

10Kag nagbangon si Josue sing aga pa kag gintipon ang katawohan kag nagtaklad, upud ang mga tigulang sang Israel, sa una sang katawohan pakadto sa Ai. 11Kag ang bug-os nga mga hangaway nga kaupud niya nagtaklad, kag nagpalapit, kag nag-abut sa atubang sang banwa, kag nagpahamtang sing dologan nayon sa aminhan sang Ai, sa ulut niya kag sang Ai may nalupyakan. 12Kag nagkuha sia sing mga lima ka libo ka tawo, kag ginbutang sila sa pagpuut sa ulut sang Bet-el kag Ai, nayon sa katundan sang banwa. 13Gani ginbutang nila ang katawohan, ang bug-os nga kasoldadosan nga yadto sa aminhan sang banwa kag ang ila manugpuut nga yadto sa katundan sang banwa. Apang nagkadto si Josue sa sadtong gab-i sa tunga sang nalupyakan. 14Kag sang nakita ini sang hari sang Ai nagdalidali sila kag nagbangon sing aga pa, kag naggowa sa pag-awayan batok sa Israel, sia kag ang bug-os niyang katawohan, sa pinat-ud nga tion sa atubangan sang Araba; apang wala sia makahibalo nga may puut batok sa iya sa likod sang banwa. 15Kag si Josue kag ang bug-os nga Israel naghimo subong nga daw nadaug sila sa atubangan nila, kag nagpalagyo sa dalanon sang kamingawan. 16Gani ang bug-os nga katawohan nga yadto sa banwa gintawag sing tingub sa paglagas sa ila, kag naglagas sila kay Josue kag nagpalayo sa banwa. 17Wala gid sing lalaki nga nabilin sa Ai ukon sa Bet-el, nga wala maggowa sa paglagas sa Israel; kag ginbayaan nila ang banwa nga nabuksan, kag naglagas sa Israel.

18Niyan ang Ginoo nagsiling kay Josue, “Iuntay ang sumbiling nga yara sa imo kamut nayon sa Ai; kay ihatag ko sia sa imo kamut.” Kag inuntay ni Josue nayon sa banwa ang sumbiling nga yara sa iya kamut. 19Kag ang puut naggowa sing dalidali gikan sa ila duug, kag nagdalagan sila sa gilayon nga nauntay niya ang iya kamut, kag nagsulud sa banwa kag nag-agaw sini; kag nagdalidali sila kag ginsonog sa kalayo ang banwa. 20Gani sang nagbalikid sa olihi nila ang mga lalaki sang Ai, nakita nila, kag yari karon, ang aso sang banwa nagtub-ok pa langit; kag wala sila sing gahum sa pagpalagyo sa sini ukon sa sina nga dalanon, kag ang mga tawo nga nagpalagyo sa kamingawan nagbalik batok sa mga nagalagas. 21Kag sang nakita ni Josue kag sang bug-os nga Israel nga naagaw sang nagpuut ang banwa, kag nga ang aso sang banwa nagtub-ok, niyan nagbalik sila kag ginpamatay ang mga tawo sang Ai. 22Kag ang iban naggowa sa banwa sa pagsugata sa ila; sa bagay nga sila natunga sa Israel, ang iban sa sini nga luyo, kag ang iban sa sina nga luyo; kag ginlaglag nila sila, sa bagay nga wala sing bisan sin-o sa ila nga nabilin ukon nakapalagyo. 23Apang gindakup nila nga buhi ang hari sang Ai, kag gindala sia kay Josue.

24Sang nakatapus ang Israel sa pagpatay sang tanan nga pumuluyo sang Ai sa latagon sa kamingawan diin ginlagas nila sila kag tanan sila napukan sa sulab sang espada tubtub nga napapas sila, ang bug-os nga Israel nagbalik sa Ai, kag ginlaglag ini sa sulab sang espada. 25Kag ang tanan nga napukan sa sadto nga adlaw, mga lalaki kag mga babayi, napulo kag duha ka libo, ang tanan nga tawo sang Ai. 26Kay wala pagpunggi ni Josue ang iya kamut, nga iya ginbuno sang sumbiling, tubtub nga nalaglag niya sing bug-os ang tanan nga pumuluyo sang Ai. 27Ang kahayupan lamang kag ang mga inagaw sa sadto nga banwa ginkuha sang Israel nga sa ila subong nga inatihan, sono sa polong sang Ginoo nga iya ginsogo kay Josue. 28Gani ginsonog ni Josue ang Ai, kag ginhimo ini nga isa ka tinumpok nga dayon, kamingawan tubtub sini nga adlaw. 29Kag ang hari sang Ai ginbitay niya sa kahoy tubtub sa kahaponon; kag sa nagahinunud ang adlaw nagsogo si Josue, kag ginkuha nila sa kahoy ang bangkay, kag ginpilak ini sa salamputan sang gawang sang banwa, kag gintampukan sing isa ka daku nga tinumpok sang mga bato, nga yara tubtub sini nga adlaw.

Ang Kasogoan Ginsulat sa Bukid nga Ebal

30Niyan si Josue nagpatindug sing halaran sa Ginoo, ang Dios sang Israel, sa Bukid nga Ebal, 31subong sang ginsogo ni Moises nga alagad sang Ginoo sa katawohan sang Israel, subong sang nasulat sa tolon-an sang kasogoan ni Moises, “Isa ka halaran sang mga bato nga wala mabasbasi, nga wala magamiti sang bisan sin-o nga tawo sang salsalon”;#Ex. 20:25. kag nagdolot sila sa ibabaw sini sing mga halad-nga-sinonog sa Ginoo, kag naghalad sing mga halad-sa-paghidait. 32Kag nagsulat sia didto sa mga bato sing huwad sang kasogoan ni Moises, nga iya ginsulat, sa atubangan sang katawohan sang Israel.#Deut. 27:2-8. 33Kag ang bug-os nga Israel, kag ang ila mga tigulang kag mga manugdumala kag ang ila mga hukom, nagtindug sa sini nga kilid sang kaban kag sa sina nga kilid sa atubangan sang mga sacerdote nga mga Levinhon nga nagpas-an sang kaban sang katipan sang Ginoo, subong ang manlulugayaw amo man ang tumandok, ang katunga nila sa atubang sang Bukid nga Gerisim kag ang katunga nila sa atubang sang Bukid nga Ebal, sono sa ginsogo anay ni Moises nga alagad sang Ginoo, nga pakamaayohon nila ang katawohan sang Israel. 34Kag ugaling ginbasa niya ang tanan nga polong sang kasogoan, ang pagpakamaayo kag ang pagpakamalaut, sono sa tanan nga nasulat sa tolon-an sang kasogoan. 35Wala sing bisan ano nga polong sang tanan nga ginsogo ni Moises nga wala pagbasaha ni Josue sa atubangan sang bug-os nga pagtilipon sang Israel, kag sang mga babayi, kag sang mga magamay, kag sang mga manlulugayaw nga yara sa ila.#Deut. 11:29; 27:11-14.

Currently Selected:

JOSUE 8: ABHIL82

Highlight

Copy