JOSUE 11
11
Ang Pagdaug sa mga Kadampig ni Jabin
1Sang nabatian ini ni Jabin nga hari sang Hazor, nagpadala sia kay Jobab nga hari sang Madon, kag sa hari sang Simron, kag sa hari sang Acsaf, 2kag sa mga hari nga didto sa aminhan sa kabakoloran, kag sa Araba sa bagatnan sang Cinerot, kag sa kapatagan, kag sa mga kataasan sang Dor sa katundan, 3sa Canaanhon sa sidlangan kag sa katundan, sa Amornon, sa Hetanon, sa Pereznon, kag sa Jebusnon sa kabakoloran, kag sa Hevhanon sa ubus sang Hermon sa duta sang Mizpa. 4Kag naggowa sila, ang tanan nilang kasoldadosan kaupud nila, madamu gid nga katawohan, subong sang kadamuon sang balas nga yara sa baybayon, nga may mga kabayo kag mga kangga nga tama gid kadamu. 5Kag ini tanan nga hari nagtingub, kag nag-abut sila kag nagpahamtang sing dologan sing tingub malapit sa mga tubig sang Merom, sa pagpakig-away sa Israel.
6Kag ang Ginoo nagsiling kay Josue, “Dili ka magkahadluk sa ila, kay buwas sa sining tion itugyan ko sila tanan nga patay sa atubangan sang Israel; kitinan mo ang ila mga kabayo, kag sonogon sa kalayo ang ila mga kangga.” 7Gani si Josue kaupud niya ang bug-os nga hangaway nag-abut batok sa ila sing hinali, sa luyo sang mga tubig sang Merom, kag gindamhagan sila. 8Kag gintugyan sila sang Ginoo sa kamut sang Israel, kag ginsalakay sila kag ginlagas sila tubtub sa Sidon nga Daku kag tubtub sa Misrefot-maim, kag tubtub sa nalupyakan sang Mizpa nayon sa sidlangan; kag ginlaglag nila sila, tubtub nga wala sing nabilin sa ila. 9Kag ginhimo ni Josue sa ila subong sang ginsogo sang Ginoo sa iya; ginkitinan niya ang ila mga kabayo, kag ang ila mga kangga ginsonog sa kalayo.
10Kag si Josue nagbalik sa sadtong tion, kag gin-agaw ang Hazor, kag ginpatay sa espada ang iya hari; kay ang Hazor anay amo ang olo sadto tanan nga ginharian. 11Kag ginpilas nila sa sulab sang espada ang tanan nga kalag nga yara sa iya, nga naglaglag sa ila sing bug-os; wala gid sing nabilin nga nagaginhawa, kag ang Hazor ginsonog niya sa kalayo. 12Kag ginkuha ni Josue ang tanan nga kabanwaanan sadtong mga hari, kag ang tanan nga hari nila, kag ginpapas niya sila sa sulab sang espada, kag ginlaglag sila sing bug-os, sono sa ginsogo ni Moises nga alagad sang Ginoo. 13Apang nahanungud sang mga banwa nga nagtindug sa ila kabakoloran walay bisan isa sa ila nga ginsonog sang Israel, luwas lamang ang Hazor; yadto ginsonog ni Josue. 14Kag ginkuha sang katawohan sang Israel nga ila inatihan ang tanan nga inagaw kag ang kahayupan sining kabanwaanan; apang ang tagsa ka tawo ginlabo nila sa sulab sang espada, tubtub nga nalaglag nila sila, kag wala gid sila sing ginbilin nga nagaginhawa. 15Subong sang ginsogo sang Ginoo kay Moises nga iya alagad, amo ini ang ginsogo ni Moises kay Josue, kag amo ini ang ginhimo ni Josue; wala sia sing ginbilin nga wala mahimo sang tanan nga ginsogo sang Ginoo kay Moises.
Si Josue Nagakuha sang Bug-os nga Duta
16Gani gin-agaw ni Josue ang bug-os sadtong duta, ang kabakoloran kag ang bug-os nga Bagatnan kag ang bug-os nga duta sang Gosen kag ang kapatagan kag ang Araba kag ang kabakoloran sang Israel kag ang iya kapatagan 17kutub sa Bukid nga Halak, nga nagataklad pa Seir, tubtub sa Baal-gad sa nalupyakan sang Libano sa ubus sang Bukid nga Hermon. Kag ginkuha niya ang tanan nga hari nila, kag ginlabo sila, kag ginpatay sila. 18Si Josue nagpakig-away sing malawig sa tanan sadtong hari. 19Walay banwa nga nagpakighidait sa katawohan sang Israel, luwas sang mga Hevhanon nga mga pumuluyo sang Gabaon; ang tanan gin-agaw nila sa inaway. 20Kay ini nagikan sa Ginoo ang pagpatig-a sang ila mga tagiposoon sa pagsumpung sa Israel sa inaway, agud nga malaglag niya sila sing bug-os, kag indi sila magpangayo sing kalooy kondi malaglag niya sila, subong sang ginsogo sang Ginoo kay Moises.#Deut. 7:16.
21Kag nag-abut si Josue sa sadtong tion, kag ginpapas ang mga Anakimnon gikan sa kabakoloran, gikan sa Hebron, gikan sa Debir, gikan sa Anab, kag gikan sa bug-os nga kabakoloran sang Juda, kag gikan sa bug-os nga kabakoloran sang Israel; ginlaglag sila ni Josue sing bug-os pati ang ila kabanwaanan. 22Wala gid sing nabilin sang mga Anakim sa duta sang katawohan sang Israel; lamang sa Gaza, sa Gat, kag sa Asdod, nabilin ang iban. 23Gani gin-agaw ni Josue ang bug-os nga duta, sono sa tanan nga ginpamolong sang Ginoo kay Moises; kag ginhatag ini ni Josue sa Israel nga panublion sono sa ila mga bahin sa ila kabikahan. Kag ang duta nakapahuway gikan sa inaway.
Currently Selected:
JOSUE 11: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
