ISAIAS 59

Pagtu-ad sang Pungsudnon nga Pagkamalaut

1Yari karon, ang kamut sang Ginoo indi malip-ot, nga indi ini makaluwas,

kag ang iya idulungug indi bungul, nga indi ini makabati;

2apang ang inyo mga kalautan nagpahamulag

sa inyo kag sa inyo Dios,

kag ang inyo mga sala naglipud sang iya nawung sa inyo

sa bagay nga indi sia magpamati.

3Kay ang inyo mga kamut nadagtaan sing dugo

kag ang inyo mga tudlo sing kalautan;

ang inyo mga bibig nagpamolong sing kabutigan,

ang inyo dila nagamitlang sing pagkamalaut.

4Wala gid sing nagasumbung sa pagkamatarung,

wala gid sing nagapangapin sa kamatooran;

nagasalig sila sa kadayawan, nagapamolong sing kabutigan,

nagapanamkon sila sing kalainan kag nagaanak sing kalautan.

5Nagapabuto sila sang mga itlog sang mga man-ug nga dalitan,

nagahabol sila sang lawa sang damang;

ang nagakaon sang ila mga itlog nagakapatay,

kag ang nagakapusa nagagowa nga man-ug nga dalitan.

6Ang ila mga lawa mangin-indi mga panapton;

indi sila makapanabon sang ila mga binuhatan.

Ang ila mga binuhatan mga binuhatan sang kalautan,

kag ang buhat sang panglugus yara sa ila mga kamut.

7Ang ila mga tiil nagadalagan sa malaut,

kag nagadalidali sila sa pagpaagay sing dugo nga walay sala;

ang ila mga hunahuna mga hunahuna sang kalautan, ang kamingaw kag kalaglagan yara sa ila mga banas.

8Wala sila makakilala sang dalanon sa paghidait,#Roma 3:15-17.

kag walay katarungan sa ila mga paglakat;

naghimo sila nga sa ila sing mga banas nga tiko,

ang bisan sin-o nga nagalakat sa ila wala makakilala sing paghidait.

9Busa malayo sa aton ang katarungan,

kag wala nagalambut sa aton ang pagkamatarung;

nagapangita kita sang kapawa, apang yari karon, ang kadudulman,

kag sang kasanag, apang nagalakat kita sa kadulum.

10Ginapangapkap ta ang dingding kaangay sang mga bulag,

nagapangapkap kita subong sang mga walay mata;

nagakasandad kita sa kaodtohon subong sang sa kasisidmun,

sa tunga sang mga kusganan subong kita sang patay nga mga tawo.

11Kita tanan nagangurub kaangay sang mga oso,

naganguynguy sing tama kaangay sang mga tukmo;

nagapangita kita sang katarungan, apang wala;

sang kaluwasan, apang malayo ini sa aton.

12Kay ang amon mga paglalis nagdamu sa atubangan nimo,

kag ang amon mga sala nagapamatuud batok sa amon;

kay ang amon mga paglalis yari sa amon,

kag nahanungud sa amon mga kalautan kilala namon sila:

13ang paglalis kag pagpanhiwala sa Ginoo,

kag ang pagtalikod sa pagsonod sa amon Dios,

ang pagpamolong sing pagpigus kag pagribuk,

ang pagpanamkon kag pagmitlang gikan sa tagiposoon sing mga polong nga dimatuud.

14Ang katarungan ginapaisul,

kag ang pagkamatarung nagatindug sa malayo;

kay ang kamatooran napukan sa dalan,

kag ang pagkatadlong indi makasulud.

15Ang kamatooran kulang,

kag ang nagahalin sa malaut nagahimo sang iya kaugalingon nga tulukbon.

Nakita ini sang Ginoo, kag naakig sia

nga walay katarungan.

16Nakita niya nga walay tawo,

kag natingala sia nga walay manugpatunga;

busa ang iya kaugalingon nga butkon nagdala sing kaluwasan sa iya,

kag ang iya pagkamatarung nagpatindug sa iya.

17Ginsuklub niya ang pagkamatarung subong sang limbutong,#Efe. 6:14.

kag ang pandong sang kaluwasan sa iya olo;#Efe. 6:17; 1 Tes. 5:8.

nagsuklub sia sang mga panapton sang pagtimalus,

kag napanaptan sang kakugi subong sang kunup.

18Sono sa ila mga buhat, sia magabayad sing sono,

kasingkal sa iya mga kasumpung, tumbas sa iya mga kaaway;

magabayad sia sa kapuloan sing tumbas.

19Sa amo magakahadluk sila sa ngalan sang Ginoo kutub sa katundan,

kag ang iya himaya kutub sa bulutlakan sang adlaw;

kay magaabut sia subong sang nagasagana nga ilig,

nga ginahuyup sang ginhawa sang Ginoo.

20“Kag ang isa ka Manunubus magaabut sa Sion,

sa mga nagaliso gikan sa paglalis sa Jacob,#Roma 11:26. nagasiling ang Ginoo.

21“Kag nahanungud sa akon, amo ini ang akon katipan upud sa ila, nagasiling ang Ginoo: ang akon Espiritu nga yara sa imo, kag ang akon mga polong nga ginbutang ko sa imo baba, indi magtaliwan sa imo baba, ukon sa baba sang imo kaliwat, ukon sa baba sang kaliwat sang imo kaliwat, nagasiling ang Ginoo, kutub karon kag sa gihapon.”

Currently Selected:

ISAIAS 59: ABHIL82

Highlight

Copy