ISAIAS 58
58
Ang Matarung nga Pagbantay sang mga Puasa
1“Singgit sing mabaskug, dili magpugung,
bayawa ang imo tingug kaangay sang budyong;
ipahayag sa akon katawohan ang ila paglalis,
sa panimalay ni Jacob ang ila mga sala.
2Apang ginapangita nila ako adlawadlaw,
kag nagakalipay sa pagkilala sang akon mga dalanon,
subong sang pungsud nga naghimo sang pagkamatarung
kag wala magbiya sang pagsolondan sang ila Dios;
nagapangayo sila sa akon sing matarung nga mga paghukom,
nagakalipay sila sa pagpalapit sa Dios.
3‘Ngaa bala nagpuasa kami, kag wala ka makakita?
Ngaa bala nga ginpiotan namon ang amon kalag, kag wala ka nagasapak?’
Yari karon, sa adlaw sang inyo pagpuasa nakita ninyo ang inyo kalipayan,
kag nagsukut sang bug-os ninyong mga pagpangabudlay.
4Yari karon, nagapuasa kamo tungud sa pagbanggianay kag pagsinuay
kag sa pagsumbag nga may inumol sang pagkamalaut.
Wala kamo nagapuasa sa sining adlaw
agud nga mapabati ninyo ang inyo tingug sa hitaas.
5Amo bala ina ang puasa nga ginpili ko,
ang adlaw nga ang tawo magpapiot sang iya kalag?
Amo bala ang pagduko sang iya olo subong sang bagaas,
kag paghumlad sing panapton nga sako kag may abo sa idalum niya?
Tawgon mo bala ining puasa,
kag kalahamut-an nga adlaw sa Ginoo?
6“Indi bala amo ini ang puasa nga ginpili ko:
ang paghubad sang mga gapus sang pagkamalaut,
ang pagpalus sang mga higot sang gota,
ang pagbuhi sang mga ginpigus,
kag nga balion ninyo ang tagsa ka gota?
7Indi bala ini ang pagpaambit sang imo kalan-on sa nagutum,
kag nga dalhon mo sa imo balay ang mga makalolooy nga ginasikway;
kon makita mo ang hubo, nga panaptan mo sia,
kag nga dili ka magpanago gikan sa imo kaugalingon nga unud?
8Niyan ang imo kapawa magasilak subong sang kaagahon,
kag ang imo pag-ayo magaabut sing madali;
magauna sa imo ang imo pagkamatarung,
ang himaya sang Ginoo mangin-imo bantay sa imo likod.
9Niyan magatawag ka, kag ang Ginoo magasabat;
magatuaw ka, kag magasiling sia,
Yari ako.
“Kon kuhaon mo sa tunga nimo ang gota,
ang pagtudlo sa pagyubit, kag ang pagpamolong sing malauton,
10kon ikaw magkaawa sa imo kalag sa nagutum
kag magbusug sang napiotan nga kalag,
niyan ang imo kapawa magasilak sa kadudulman
kag ang imo kadulum manginsubong sang kaodtohon.
11Kag ang Ginoo magatuytuy sa imo sing dalayon,
kag magabusug sang imo kalag sa kigas nga mga duug,
kag magapabakud sang imo mga tul-an;
kag manginkaangay ka sang katamnan nga natubigan,
kaangay sang tuburan sang tubig,
nga ang iya mga tubig wala pagkahubas.
12Kag ang mga gikan sa imo magapatindug sang dumaan nga mga duug nga nalaglag;
patindugon mo ang mga sadsaran sang madamung kaliwatan;
tawgon ka nga manugkaayo sang bulho,
ang manugpahauli sang mga banas nga puy-an.
Ang Pagbantay sang Inugpahuway
13“Kon ipalikaw mo ang imo tiil sa inugpahuway,
gikan sa paghimo sang nahamut-an mo sa akon balaan nga adlaw,
kag tawgon nga kalipay ang inugpahuway
kag dungganon ang balaan nga adlaw sang Ginoo;
kon tahoron ini, nga wala nagahimo sang imo kaugalingon nga mga paagi,
ukon nagapangita sang imo kaugalingon nga kalipayan, ukon nagapamolong sang imo kaugalingon nga mga polong;
14niyan magakalipay ka sa Ginoo,
kag pasakyon ko ikaw sa mataas nga mga duug sang duta;
pakan-on ko ikaw sang pinanubli ni Jacob nga imo amay,
kay ang baba sang Ginoo nagpamolong sini.”
Currently Selected:
ISAIAS 58: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
