ISAIAS 57
57
Ang Pagtagudili sang Pagsimba sang Israel sang Larawan
1Ang matarung nagakawala,
kag wala sing tawo nga nagahuput sini sa iya tagiposoon;
ang maloloy-on nga mga tawo ginakuha,
wala sing bisan sin-o nga nagapatugsiling.
Kay ang matarung ginakuha sa malaut nga magaabut,
2nagasulud sia sa paghidait;
nagapahuway sila sa ila mga higdaan
ang tagsatagsa nga nagalakat sa iya pagkatadlong.
3Apang palapit diri, kamo
nga lalaki nga mga anak sang diwatahan nga babayi,
ang kaliwat sang makihilahion kag sang makihilawason.
4Batok kay sin-o bala nagauligyat kamo?
Batok kay sin-o bala ginpasangkad ninyo ang baba
kag ginapadiwal ang dila?
Indi bala kamo mga anak sang paglalis,
kaliwat sang pagkadimatuud,
5kamo nga nagapadabdab sang inyo kaugalingon sa tunga sang mga roble,
sa idalum sang tagsa ka kahoy nga malambo;
nga nagapatay sang kabataan sa mga nalupyakan,
sa idalum sang mga guab sang mga igang?
6Ang imo bahin yara sa mahining nga mga bato sang nalupyakan;
sila, sila ang imo kapalaran;
sa ila gid nag-ula ka sing halad-nga-ilimnon,
nagdolot ka sing halad.
Malugpayan bala ako sini nga mga butang?
7Sa ibabaw sang mataas kag makahalawhaw nga bukid
ginpahamtang mo ang imo higdaan,
didto man nagtaklad ka sa pagdolot sing halad.
8Sa likod sang mga ganhaan kag sang mga haligi
nagpatindug ka sang imo handumanan;
kay naghublas ka sang imo kaugalingon sa iban sang sa akon,
kag nagsaka,
ginpalapad mo ang imo higdaan;
kag nagpakigkatipan ka sa ila,
ginahigugma mo ang ila higdaan,
diin nakita mo ini.
9Ikaw nagkadto nga may lana sa hari
kag nagdugang ang imo mga pahumut;
nagpadala sang imo mga embajador sa malayo,
kag nagpakubus sang imo kaugalingon tubtub sa Sheol.
10Ginlapyo ka sa kalawigon sang imo dalanon,
apang wala ka magsiling, “Wala ini sing pulus”;
nakakita ka sing pagpahauli sang imo kusug,
busa wala ka pagpunawa.
11Sa kay sin-o ka bala nahangawa kag nahadluk,
nga nagabutig ka,
kag wala magdumdum sa akon,
ukon maghuput sini sa imo tagiposoon?
Wala bala ako maghipus, sa malawig na gid nga tion,
kag ikaw wala nagakahadluk sa akon?
12Ipahayag ko ang imo pagkamatarung kag ang imo mga binuhatan,
apang indi mo sila mapuslan.
13Kon magtuaw ka, paluwasa sa imo ang mga diosdios nga gintipon mo!
Ang hangin magkuha sa ila,
ang isa ka huyup magadala sa ila tanan.
Apang ang nagadangup sa akon magatag-iya sang duta,
kag magapanubli sang akon balaan nga bukid.
14Kag magasiling sia,
“Tampok kamo, tampok kamo, amana ang dalanon,
kuhaa ang kasandaran sa dalanon sang akon katawohan.”
15Kay amo ini ang ginasiling sang mataas kag makahalawhaw nga Isa
nga nagapuyo sa wala sing katubtuban, nga ang iya ngalan Balaan:
“Nagapuyo ako sa mataas kag balaan nga duug,
kag upud sa iya man nga may mahinulsulon kag mapainubuson nga espiritu,
sa pagpaumpaw sang espiritu sang mapainubuson,
kag sa pagpaumpaw sang tagiposoon sang mahinulsulon.
16Kay indi ako magapakigsuay sa gihapon,
ukon magkasingkal ako sa gihapon;
kay ang espiritu mapunaw sa atubangan nakon,
kag ang mga kalag nga akon ginhimo.
17Bangud sang kalautan sang iya pagkamahamkonon nasingkal ako,
ginsakit ko sia, gintago ko ang akon nawung kag nasingkal;
apang nagpadayon sia sa pagtalikud sa dalanon sang iya tagiposoon.
18Nakita ko ang iya mga dalanon, apang ayohon ko sia;
tuytuyan ko man sia kag iuli ang mga paglipay sa iya,
kay sa iya mga manuglalaw ako nagatuga sang bunga sang mga bibig.
19Paghidait, paghidait, sa iya nga malayo kag sa iya mga malapit,#Efe. 2:13. nagasiling ang Ginoo;
kag ayohon ko sia.
20Apang ang mga malauton kaangay sang dagat nga natublag;
kay indi ini makapahuway,
kag ang iya mga tubig nagaalimbukad
sing lunang kag dag-ut.
21Wala sing paghidait, nagasiling ang akon Dios, sa malauton.”#Isa. 48:22.
Currently Selected:
ISAIAS 57: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
