ISAIAS 60
60
Ang Palaabuton nga Himaya sang Sion
1Magtindug, magdilag; kay ang imo kapawa nagaabut,
kag ang himaya sang Ginoo nagasilak sa imo.
2Kay yari karon, ang kadudulman magatabon sang duta,
kag ang pitipit nga kadudulman sang mga katawohan;
apang ang Ginoo magasilak sa imo,
kag ang iya himaya makita sa imo.
3Kag ang mga pungsud magaabut sa imo kapawa,
kag ang mga hari sa kasanag sang imo pagdilag.
4Bayawa ang imo mga mata sa palibut, kag tan-awa;
sila tanan nagatipon sing tingub, nagakari sila sa imo;
ang imo mga anak nga lalaki magaabut gikan sa malayo,
kag ang imo mga anak nga babayi kuguson sa mga butkon.
5Niyan makit-an mo kag magabanaag,
ang imo tagiposoon makunyag kag magadaku;
bangud nga ang kabugana sang dagat magasaylo sa imo
ang manggad sang mga pungsud magaabut sa imo.
6Ang kadam-an sang mga camelyo magatabon sa imo,
ang bataon nga mga camelyo sang Madian kag Efa;
sila tanan magaabut gikan sa Saba.
Magadala sila sing bulawan kag incienso,
kag magabantala sang mga pagdayaw sa Ginoo.
7Ang tanan nga panong sang Cedar tiponon sing tingub sa imo,
ang mga carnero nga lalaki sang Nabayot magaalagad sa imo;
magasaka sila nga may kahamuut sa akon halaran,
kag himayaon ko ang balay sang akon himaya.
8Sin-o bala ini sila nga nagalupad subong sang panganud,
kag subong sang mga tukmo sa ila mga talambuan?
9Sa pagkamatuud ang kapuloan magahulat sa akon,
una ang mga sakayan sang Tarsis,
sa pagdala sang imo mga anak nga lalaki gikan sa malayo,
ang ila pilak kag ang ila bulawan upud sa ila,
tungud sa ngalan sang Ginoo nga imo Dios,
kag tungud sa Balaan sang Israel,
bangud nga naghimaya sia sa imo.
10Ang mga dumoloong magapatindug sang imo mga kuta,
kag ang ila mga hari magaalagad sa imo;
kay sa akon kasingkal ginsakit ko ikaw,
apang sa akon kahamuut nalooy ako sa imo.
11Ang imo mga gawang man buksan sing dalayon;
indi sila pagtakpan sa adlaw ukon sa gab-i;
agud nga ang mga tawo magadala sa imo sang manggad sang mga pungsud,#Bug. 21:25-26.
kag ang ila mga hari dalhon nga bihag.
12Kay ina nga pungsud kag ginharian
nga indi mag-alagad sa imo mawala;
yadto nga mga pungsud laglagon sing bug-os.
13Ang himaya sang Libano magaabut sa imo,
ang abeto, ang encina, kag ang boks nga kahoy sing tingub,
sa pagpatahum sang duug sang akon santuario;
kag himoon ko nga mahimayaon ang duug sang akon mga tiil.
14Ang lalaki nga mga anak sang mga nagpapiot sa imo
magakari nga nagayaub sa imo;
kag tanan sila nga naghikay sa imo
magahapa sila tubtub sa dapadapa sang imo mga tiil;#Bug. 3:9.
tawgon ka nila nga Banwa sang Ginoo,
ang Sion sang Balaan sang Israel.
15Sa baylo nga ginbayaan kag gindumtan ka,
sa bagay nga wala sing tawo nga nag-agi sa imo,
himoon ko ikaw nga maglabaw sa wala sing katubtuban,
kalipay sang madamu nga mga kaliwatan.
16Ikaw man magasoso sang gatas sang mga pungsud,
magasoso sang dughan sang mga hari;
kag ikaw makahibalo nga ako, ang Ginoo, imo Manluluwas
kag imo Manunubus, ang Makagagahum ni Jacob.
17Sa baylo sang saway magadala ako sing bulawan,
kag sa baylo sang salsalon magadala ako sing pilak;
kag sa baylo sang kahoy, saway,
sa baylo sang mga bato, salsalon.
Himoon ko man nga imo mga manugdumala ang paghidait
kag imo mga manugsukut ang pagkamatarung.
18Ang pagpigus indi na mabatian sa imo duta,
ang kamingaw ukon ang kalaglagan sa imo mga ginsakpan;
kondi tawgon mo ang imo mga kuta Kaluwasan,
kag ang imo mga gawang Pagdayaw.
19Ang adlaw indi na
mangin-imo kapawa sa adlawon,
kag ang bulan indi na
maghatag sang kasilaw sang iya kapawa sa imo;
kondi ang Ginoo mangindayon nga kapawa sa imo,
kag ang imo Dios imo himaya.#Bug. 21:23; 22:5.
20Ang imo adlaw indi na matunud,
kag ang imo bulan indi na magtaliwan;
kay ang Ginoo mangin-imo dayon nga kapawa,
kag ang mga adlaw sang imo paglalaw matapus.
21Ang imo katawohan man mangin-matarung nga tanan;
panublion nila ang duta sa gihapon,
ang sanga sang akon tinanum, ang binuhatan sang akon mga kamut,
agud nga himayaon ako.
22Ang diotay mangin-isa ka libo,
kag ang diotay manginmabakud nga pungsud;
Ako amo ang Ginoo;
magapadali ako sini sa iya tion.
Currently Selected:
ISAIAS 60: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
