Popular Bible Verses from ISAIAS 60

Share

Magtindug, magdilag; kay ang imo kapawa nagaabut, kag ang himaya sang GINOO nagasilak sa imo.

Kag ang mga pungsud magaabut sa imo kapawa, kag ang mga hari sa kasanag sang imo pagdilag.

Kay yari karon, ang kadudulman magatabon sang duta, kag ang pitipit nga kadudulman sang mga katawohan; apang ang GINOO magasilak sa imo, kag ang iya himaya makita sa imo.

Ang diotay mangin-isa ka libo, kag ang diotay manginmabakud nga pungsud; Ako amo ang GINOO; magapadali ako sini sa iya tion.

Ang adlaw indi na mangin-imo kapawa sa adlawon, kag ang bulan indi na maghatag sang kasilaw sang iya kapawa sa imo; kondi ang GINOO mangindayon nga kapawa sa imo, kag ang imo Dios imo himaya.

Ang imo adlaw indi na matunud, kag ang imo bulan indi na magtaliwan; kay ang GINOO mangin-imo dayon nga kapawa, kag ang mga adlaw sang imo paglalaw matapus.

Niyan makit-an mo kag magabanaag, ang imo tagiposoon makunyag kag magadaku; bangud nga ang kabugana sang dagat magasaylo sa imo ang manggad sang mga pungsud magaabut sa imo.

Bayawa ang imo mga mata sa palibut, kag tan-awa; sila tanan nagatipon sing tingub, nagakari sila sa imo; ang imo mga anak nga lalaki magaabut gikan sa malayo, kag ang imo mga anak nga babayi kuguson sa mga butkon.

Ang imo katawohan man mangin-matarung nga tanan; panublion nila ang duta sa gihapon, ang sanga sang akon tinanum, ang binuhatan sang akon mga kamut, agud nga himayaon ako.

Ang pagpigus indi na mabatian sa imo duta, ang kamingaw ukon ang kalaglagan sa imo mga ginsakpan; kondi tawgon mo ang imo mga kuta Kaluwasan, kag ang imo mga gawang Pagdayaw.

Ang imo mga gawang man buksan sing dalayon; indi sila pagtakpan sa adlaw ukon sa gab-i; agud nga ang mga tawo magadala sa imo sang manggad sang mga pungsud, kag ang ila mga hari dalhon nga bihag.

Ang kadam-an sang mga camelyo magatabon sa imo, ang bataon nga mga camelyo sang Madian kag Efa; sila tanan magaabut gikan sa Saba. Magadala sila sing bulawan kag incienso, kag magabantala sang mga pagdayaw sa GINOO.

Ang mga dumoloong magapatindug sang imo mga kuta, kag ang ila mga hari magaalagad sa imo; kay sa akon kasingkal ginsakit ko ikaw, apang sa akon kahamuut nalooy ako sa imo.

Sa baylo nga ginbayaan kag gindumtan ka, sa bagay nga wala sing tawo nga nag-agi sa imo, himoon ko ikaw nga maglabaw sa wala sing katubtuban, kalipay sang madamu nga mga kaliwatan.

Ikaw man magasoso sang gatas sang mga pungsud, magasoso sang dughan sang mga hari; kag ikaw makahibalo nga ako, ang GINOO, imo Manluluwas kag imo Manunubus, ang Makagagahum ni Jacob.