Lucas 9
9
Ginpadala ni Jesus ang Dose ka mga Gintuton-an
(Mat. 10:5-15; Mar. 6:7-13)
1Gintawag ni Jesus sing tingob ang dose ka mga gintuton-an kag ginhatagan sila sing gahom kag awtoridad sa pagtabog sang tanan nga mga demonyo kag sa pag-ayo sang mga balatian. 2Dayon iya sila ginpadala sa pagwali nahanungod sang paghari sang Dios kag sa pag-ayo sang mga masakiton. 3Nagsiling#Luc. 10:4-11. sia sa ila, “Indi kamo magdala sing bisan ano sa inyo pagpanglakaton: bisan sungkod, bag, tinapay, kwarta kag bisan isa ka ilislan nga bayu. 4Kon diin kamo nga balay ginabaton, dira lang kamo dayon tubtob maghalin kamo sa sina nga banwa. 5Kon#Bin. 13:51. sa diin man nga lugar nga ang mga tawo indi magbaton sa inyo, bayai ninyo ina nga banwa kag itaktak ang yab-ok sa inyo mga tiil subong pagpaandam sa ila.”
6Ang mga gintuton-an naglakat kag nagkadto sa tanan nga mga kabarangayan sa pagwali sang Maayong Balita kag sa pagpang-ayo sang mga tawo sa tanan nga lugar.
Naglibog ang Ulo ni Herodes
(Mat. 14:1-12; Mar. 6:14-29)
7Si#Mat. 16:14; Mar. 8:28; Luc. 9:19. Herodes nga pangulo sang Galilea nakabati sang tanan nga mga butang nga nagkalatabo. Naglibog gid ang ulo niya tungod kay may mga tawo nga nagsiling, “Nabanhaw si Juan nga manugbautiso.” 8Ang iban nagsiling nga si Elias nagpakita, kag ang iban pa gid nagsiling nga ang isa sang mga propeta sang una nabanhaw. 9Nagsiling si Herodes, “Ginpapugotan ko si Juan, pero sin-o ining tawo nga madamo ang akon nabatian nahanungod sa iya?” Kag nagtinguha sia sa pagpakigkita kay Jesus.
Ginpakaon ni Jesus ang Lima ka Libo
(Mat. 14:13-21; Mar. 6:30-44; Juan 6:1-14)
10Ang mga apostoles nagbalik kag nagpanugid kay Jesus sang tanan nga ila nahimo. Gindala sila ni Jesus kag nagkadto sila nga silahanon lang sa isa ka banwa nga ginhingalanan Betsaida. 11Sang nahibaluan ini sang madamo nga mga tawo nag-apas sila sa iya. Ginbaton niya sila kag naghambal sa ila nahanungod sang paghari sang Dios. Kag gin-ayo niya ang mga nagakinahanglan sang pag-ayo.
12Sang nagahinunod na ang adlaw, ang dose ka mga apostoles nagkadto sa iya kag nagsiling, “Palakta ang mga tawo agod nga makakadto sila sa mga barangay kag mga kaumhan sa palibot sa pagpangita sing kalan-on kag dalayunan tungod kay maligwin ini nga lugar.”
13Pero si Jesus nagsiling sa ila, “Kamo mismo ang maghatag sa ila sang sarang makaon.”
Nagsabat sila, “Lima gid lang ka bilog ang aton tinapay kag duha lang ka isda. Luyag mo bala nga maglakat kami sa pagbakal sing pagkaon para sa sini tanan nga mga tawo?” 14Kay mga 5,000 ang mga lalaki didto.
Si Jesus nagsiling sa iya mga gintuton-an, “Papungkua ninyo sila sing grupo-grupo nga tag-singkwenta kada grupo.”
15Ginhimo ini sang mga gintuton-an kag ginpapungko sila tanan. 16Ginkuha ni Jesus ang lima ka bilog nga tinapay kag ang duha ka isda, nagtangla sia sa langit, nagpasalamat sa Dios, ginpamihakpihak ini, kag ginhatag sa mga gintuton-an agod ipanagtag sa mga tawo. 17Nagkalaon sila tanan kag nagkalabusog. Ang mga gintuton-an nakatipon sing dose ka mga alat sang nagkalabilin.
Ang Ginpabutyag ni Pedro Nahanungod kay Jesus
(Mat. 16:13-19; Mar. 8:27-29)
18Sang isa ka adlaw sang nagapangamuyo si Jesus nga isahanon lang, ang mga gintuton-an nagpalapit sa iya. Si Jesus nagpamangkot sa ila, “Sin-o bala ako suno sa mga tawo?”
19Nagsabat#Mat. 14:12; Mar. 6:14-15; Luc. 9:7-8. sila, “May mga tawo nga nagasiling nga ikaw si Juan nga manugbautiso. Ang iban nagasiling nga ikaw si Elias, kag ang iban pa gid nagasiling nga isa ikaw sang mga propeta sang una nga nabanhaw.”
20Ginpamangkot#Juan 6:68-69. niya sila, “Pero sa inyo iya, sin-o bala ako?”
Si Pedro nagsabat, “Ikaw ang Cristo nga ginpadala sang Dios.”
Si Jesus Naghambal Nahanungod sang Iya Pag-antos kag Kamatayon
(Mat. 16:20-28; Mar. 8:30–9:1)
21Dayon ginmanduan sila ni Jesus nga indi magpanugid sini sa bisan kay sin-o. 22Nagsiling pa gid sia, “Kinahanglan mag-antos sang tuman ang Anak sang Tawo kag pagasikwayon sang mga katigulangan sang mga Judio, sang pangulo nga mga pari, kag sang mga manunodlo sang Kasugoan. Pagapatyon sia pero pagabanhawon sa ikatlo nga adlaw.”
23Kag#Mat. 10:38; Luc. 14:27. nagsiling sia sa ila tanan, “Kon sin-o ang luyag magsunod sa akon, dapat niya kalimtan ang iya kaugalingon, magpas-an sang iya krus adlaw-adlaw, kag magsunod sa akon. 24Kay#Mat. 10:38; Luc. 17:33; Juan 12:25. ang bisan sin-o nga luyag magluwas sang iya kaugalingon nga kabuhi, madula niya ini, pero ang bisan sin-o nga nagadula sang iya kabuhi tungod sa akon, maluwas niya ini. 25May makuha bala ang tawo kon maangkon niya ang bug-os nga kalibutan, pero madula ukon malaglag niya ang iya kaugalingon? 26Ang bisan sin-o nga nagakahuya sa akon kag sa akon mga pulong, igakahuya man sia sang Anak sang Tawo kon mag-abot sia sa iya himaya kag sa himaya sang Amay kag sang balaan nga mga anghel. 27Dumdoma ninyo ini! May yari diri nga nagatindog nga indi mapatay tubtob nga makakita sila sang paghari sang Dios.”
Ang Pagbalhin sang Dagway ni Jesus
(Mat. 17:1-8; Mar. 9:2-8)
28Mga#2 Ped. 1:17-18. isa ka simana sa tapos mahambal ni Jesus ini nga mga butang, gindala niya si Pedro, si Juan, kag si Santiago kag nagtaklad sila sa isa ka bukid sa pagpangamuyo. 29Sang nagapangamuyo sia, nagbalhin ang dagway sang iya nawong kag ang iya bayu nanginmakasililaw nga kaputi. 30Sa hinali may duha ka tawo nga nagpakighambal sa iya. Ini sila amo si Moises kag si Elias, 31nga nagpakita sa dagway nga makasililaw kag nagpakighambal kay Jesus nahanungod sang iya madali na lang nga pagkapatay sa Jerusalem sa pagtuman sang tinutuyo sang Dios. 32Si Pedro kag ang iya mga kaupdanan natulogan sing mahamuok, pero nakabugtaw sila kag nakita nila ang himaya ni Jesus kag ang duha ka tawo nga nagatindog upod sa iya. 33Sang manughalin na ang duha ka tawo sa atubang ni Jesus, si Pedro nagsiling sa iya, “Manunodlo, maayo gid kay yari kita diri! Mahimo kami sing tatlo ka tolda, isa para sa imo, isa para kay Moises kag isa para kay Elias.” Pero naghambal sia nga wala makahibalo kon ano ang iya ginasiling.
34Sang nagahambal pa sia, ang panganod nag-abot kag naglandong sa ila, kag ang mga gintuton-an hinadlukan sang ginlikupan sila sang panganod. 35May#Isa. 42:1; Mat. 3:17; 12:18; Mar. 1:11; Luc. 3:22. tingog gikan sa panganod nga nagsiling, “Amo ini ang akon Anak nga akon ginpili! Pamatii ninyo sia!”
36Sang pag-untat sang tingog, isahanon na lang si Jesus. Ginhipsan lang ini sang mga gintuton-an, kag sadto nga mga inadlaw wala gid sila magpanugid sang bisan ano sa bisan kay sin-o sang ila nakita.
Gin-ayo ni Jesus ang Bata nga may Malaut nga Espiritu
(Mat. 17:14-18; Mar. 9:14-27)
37Sang madason nga adlaw nagdulhog si Jesus kag ang tatlo ka mga gintuton-an halin sa bukid kag ginsugata si Jesus sang madamo nga mga tawo. 38May isa ka tawo gikan sa ila nga nagsinggit, “Manunodlo! Nagapakitluoy ako sa imo, tan-awa man anay ang akon anak nga lalaki, ang akon bugtong nga anak! 39Ginagamhan sia sang espiritu, kag sa hinali lang nagasinggit sia. Ginapakurog sia sa bagay nga nagabura ang iya baba kag indi sia paghalinan sang espiritu kay ginapaantos gid sia. 40Nagpakitluoy ako sa imo mga gintuton-an nga tabugon nila ang espiritu, pero indi sila makasarang sa pagtabog.”
41Si Jesus nagsabat, “Sa pagkadi-matinuohon kag kabalingag sa inyo nga mga katawhan! Tubtob san-o pa bala ang pag-upod kag ang pagbatas ko sa inyo?” Dayon nagsiling sia sa tawo, “Dalha diri ang imo anak.”
42Sang nagapalapit ang bata, gintumba sia sang demonyo sa duta kag ginpakurog. Ginmanduan ni Jesus ang malaut nga espiritu, gin-ayo ang bata, kag gin-uli sia sa iya amay. 43Ang tanan nga mga tawo natingala gid sa daku nga gahom sang Dios.
Si Jesus Naghambal Liwat Nahanungod sang Iya Kamatayon
(Mat. 17:22-23; Mar. 9:30-32)
Samtang nagakatingala pa ang mga tawo sa tanan nga ginhimo ni Jesus, nagsiling sia sa iya mga gintuton-an, 44“Indi kamo magkalipat sang akon isiling sa inyo. Ang Anak sang Tawo itugyan sa mga kamot sang mga tawo.” 45Pero wala makahibalo ang mga gintuton-an kon ano ang kahulogan sini. Ginlikom ini sa ila agod nga indi sila makahangop, kag nahadlok sila magpamangkot sa iya nahanungod sini.
Sin-o ang Labing Daku?
(Mat. 18:1-5; Mar. 9:33-37)
46Ang#Luc. 22:24. mga gintuton-an nagbinais kon sin-o sa ila ang labing daku. 47Nahibaluan ni Jesus kon ano ang ila ginahunahuna, gani nagkuha sia sing isa ka bata kag ginpatindog sia sa iya tupad 48kag#Mat. 10:40; Luc. 10:16; Juan 13:20. nagsiling sa ila, “Ang bisan sin-o nga nagabaton sini nga bata sa akon ngalan nagabaton sa akon, kag ang bisan sin-o nga nagabaton sa akon nagabaton man sa iya nga nagpadala sa akon. Kay sia nga labing kubos sa inyo tanan amo gid ang labing daku.”
Ang Indi batok sa Inyo Nagaapin sa Inyo
(Mar. 9:38-40)
49Si Juan nagsiling, “Manunodlo, may nakita kami nga isa ka tawo nga nagatabog sang mga demonyo sa imo ngalan, kag ginpauntat namon sia tungod kay indi sia katapo naton.”
50Pero si Jesus nagsiling sa iya kag sa iban nga mga gintuton-an, “Indi ninyo sia pagdumilii, tungod kay ang bisan sin-o nga indi batok sa inyo apin sa inyo.”
Si Jesus Wala Ginbaton sa Isa ka Barangay sa Samaria
51Sang malapit na lang ang mga inadlaw nga si Jesus pagadalhon sa langit, nagpamat-od sia sa pagkadto sa Jerusalem. 52Nagpadala sia sang mga mensahero sa pagkadto sing una sa isa ka barangay sang Samaria sa pag-aman sang tanan para sa iya. 53Pero ang mga tawo didto indi magbaton sa iya tungod kay maathag nga sia nagapakadto sa Jerusalem. 54Sang#2 Hari 1:9-16. pagkahibalo sini sang mga gintuton-an nga amo sanday Santiago kag Juan, nagsiling sila, “Ginoo, luyag mo bala nga magpangayo kami sang kalayo halin sa langit kag sunogon sila?”#9:54 Ang iban nga mga manuskrito nagadugangsubong sang ginhimo ni Elias.
55Si Jesus nagbalikid kag nagsaway sa ila,#9:55 Ang iban nga mga manuskrito nagadugang sangkag nagsiling, “Wala kamo makahibalo kon ano nga sahi sang espiritu ang nagapanag-iya sa inyo; kay ang Anak sang Tawo wala nag-abot sa paglaglag sang kabuhi sang mga tawo, kundi sa pagluwas sa ila.” 56kag nagpadayon sila sa isa naman ka barangay.
Ang mga Nagahandom nga Manginsumolunod ni Jesus
(Mat. 8:19-22)
57Sang nagapadayon sila sa paglakat, may isa ka tawo nga nagsiling kay Jesus, “Maupod ako sa imo bisan diin ka magkadto.”
58Si Jesus nagsiling sa iya, “Ang mga singgalong may mga buho, kag ang mga pispis may mga pugad, pero ang Anak sang Tawo wala gid sing hiligdaan kag palahuwayan.”
59Nagsiling si Jesus sa isa naman ka tawo, “Upod ka sa akon.”
Pero ang tawo nagsiling, “Sir, tugoti anay ako sa pagpauli kag paglubong sang akon amay.”
60Si Jesus nagsabat, “Pabay-i ang mga patay sa paglubong sang ila mga minatay. Lakat ka kag iwali ang nahanungod sang paghari sang Dios.”
61Ang#2 Hari 19:20. isa pa gid ka tawo nagsiling, “Maupod ako sa imo, Sir, pero tugoti ako anay sa pagpaalam sa akon panimalay.”
62Si Jesus nagsiling sa iya, “Ang bisan sin-o nga nagaarado kag nagabulobalikid wala nagakabagay nga manginsakop sang paghari sang Dios.”
Currently Selected:
Lucas 9: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
