Lucas 8

Ang mga Babayi nga Nag-upod kay Jesus

1Sa tapos sadto si Jesus nagkadto sa mga banwa kag mga barangay agod magwali sang Maayong Balita nahanungod sang paghari sang Dios. Nag-upod sa iya ang dose ka mga gintuton-an 2kag#Mat. 27:55-56; Mar. 15:40-41; Luc. 23:49. subong man ang pila ka mga babayi nga gin-ayo niya sa mga balatian kag malaut nga mga espiritu. Ang mga babayi amo sanday Maria nga ginatawag Magdalena nga gikan sa iya gintabog ni Jesus ang pito ka mga demonyo, 3si Juana nga asawa ni Chuza nga isa ka opisyal sa korte ni Herodes; si Susana, kag madamo pa nga iban. Gingamit nila ang ila mga pagkabutang sa pagbulig kay Jesus kag sa iya mga gintuton-an.

Ang Palaanggiran Nahanungod sa Manugsab-og

(Mat. 13:1-9; Mar. 4:1-9)

4Ang mga tawo nga naghalalin sa mga kabanwahanan padayon nga nagpalapit kay Jesus. Sang madamo na gid ang mga tawo nga nagtipon, nagsugid si Jesus sini nga palaanggiran:

5“May isa ka tawo nga nagkadto sa iya uma agod sa pagsab-og sang binhi. Sang pagsab-og niya, ang iban nga binhi nagtupa sa dalan. Gintapakan ini sang mga tawo kag gintuka sang mga pispis. 6Ang iban nagtupa sa batuhon nga duta, kag sang magtubo ini, nalaya ang tanom tungod kay mamala ang duta. 7Ang iban nga binhi nagtupa sa duta nga may mga talungon kag ang mga talungon nagtubo upod sa tanom kag naglumos sang tanom. 8Ang iban nga binhi nagtupa sa maayo nga duta kag nagtubo ini kag nagpatubas sing 100 ka pilo.”

Si Jesus nagsiling pa gid, “Gani, magpamati kamo, kon may mga dulonggan kamo!”

Ang Katuyoan sang mga Palaanggiran

(Mat. 13:10-17; Mar. 4:10-12)

9Ang mga gintuton-an ni Jesus nagpamangkot sa iya, “Ano bala ang kahulogan sining palaanggiran?” 10Si#Isa. 6:9 (LXX). Jesus nagsabat, “Ang paghibalo sang mga tinago nahanungod sang paghari sang Dios ginhatag sa inyo. Pero sa iban ginahatag ini paagi sa mga palaanggiran, agod nga kon magtan-aw sila, indi sila makakita kag kon makabati sila, indi sila makahangop.

Ginsaysay ni Jesus ang Palaanggiran Nahanungod sang Manugsab-og

(Mat. 13:18-23; Mar. 4:13-20)

11“Amo ini ang kahulogan sang palaanggiran: ang binhi amo ang pulong sang Dios. 12Ang mga binhi nga nagtupa sa dalan amo ang nakabati, ugaling nagaabot ang Yawa kag nagaagaw sang pulong sa ila mga tagipusoon, agod nga indi sila magtuo kag maluwas. 13Ang mga binhi nga nagtupa sa batuhon nga duta amo ang nakabati sang pulong kag nagabaton sini sing malipayon. Pero ang pulong wala gid makapanggamot sa ila. Wala magdugay ang ila pagtuo kay kon mag-abot ang pagsulay, nagabiya sila sang ila pagtuo. 14Ang mga binhi nga nagtupa sa duta nga may mga talungon amo ang nakabati, pero ang mga palaligban, ang mga manggad kag ang mga kalipayan sining kabuhi nagaginutok kag nagalumos sa ila, kag ang ila bunga wala nagagulang. 15Ang mga binhi nga nagtupa sa maayo nga duta amo ang nagapamati sang pulong kag nagapabilin ini sa maayo kag matinumanon nga tagipusoon kag nagapadayon tubtob nga magpamunga sila.

Ang Suga sa Idalom sang Sulodlan

(Mar. 4:21-25)

16“Wala#Mat. 5:15; Luc. 11:33. sing may nagasindi sing suga kag tabunan niya ini sang sulodlan, ukon ibutang niya ini sa idalom sang higdaan, kundi ginabutang niya ini sa tulongtungan, agod nga ang mga tawo nga nagasulod makakita sang kapawa.

17“Kay#Mat. 10:26; Luc. 12:2. wala sing natago nga indi mapahayag, ukon tinago nga indi mahibaluan kag mabuyagyag.

18“Gani#Mat. 25:29; Luc. 19:26. maghalong kamo kon paano ang inyo pagpamati, tungod kay ang bisan sin-o nga may iya na hatagan pa, pero ang wala iya, bisan pa ang diutay nga ginahunahuna niya nga iya pagakuhaon pa.”

Ang Iloy kag mga Utod ni Jesus

(Mat. 12:46-50; Mar. 3:31-35)

19Ang iloy kag mga utod nga lalaki ni Jesus nagkadto sa iya, pero indi sila makapalapit sa iya tungod sang madamo nga mga tawo. 20May nagsiling sa iya, “Ang imo iloy kag mga utod yara sa gwa nagatindog kag luyag magpakigkita sa imo.”

21Pero si Jesus nagsiling sa ila tanan, “Ang akon iloy kag mga utod amo sila ang nagapamati sang pulong sang Dios kag nagatuman sini.”

Ginpauntat ni Jesus ang Bagyo

(Mat. 8:23-27; Mar. 4:35-41)

22Sang isa ka adlaw si Jesus nagsakay sa isa ka sakayan upod sa iya mga gintuton-an kag nagsiling sia sa ila, “Dali, matabok kita sa pihak sang linaw.” Gani nagtulak sila. 23Sang nagapanakayon sila natulogan si Jesus. Sa hinali nagmadlos ang hangin sa linaw, sa bagay nga ang sakayan ginsudlan sang tubig kag yara sila sa daku nga katalagman. 24Ginpalapitan sang mga gintuton-an si Jesus kag ginpukaw sia nga nagasiling, “Manunodlo, Manunodlo! Daw malunod kita!”

Nagbangon si Jesus kag iya ginmanduan ang hangin kag ang nagadaguhob nga mga balod. Nag-untat ang bagyo kag naglinaw. 25Dayon nagsiling sia sa iya mga gintuton-an, “Diin na bala ang inyo pagtuo?”

Hinadlukan kag natingala gid sila kag nagsinilingay, “Sin-o bala ini nga tawo, nga bisan ang hangin kag balod nagapati sang iya sugo?”

Gin-ayo ni Jesus ang Tawo nga Ginagamhan sang mga Demonyo

(Mat. 8:28-34; Mar. 5:1-20)

26Dayon nagdungka si Jesus kag ang iya mga gintuton-an sa kadutaan sang Gerasa#8:26 Gerasa: Ang iban nga mga manuskrito mayGadara (tan-awa ang Mat. 8:28); ang iban mayGergesa. nga nagaatubang sa Galilea. 27Sang pagtakas ni Jesus, ginsugata sia sang isa ka tawo halin sa banwa. Ginagamhan sia sang mga demonyo kag madugay na nga wala nagabayo kag wala man nagaestar sa balay, kundi sa mga lungib nga lulobngan. 28Sang pagkakita niya kay Jesus nagsinggit sia kag naghapa sa atubang ni Jesus kag nagsiling sa mabaskog nga tingog, “Jesus, Anak sang Dios nga Labing Mataas! Ano ang labot mo sa akon? Maluoy ka sa akon, indi ako pagsiluti!” 29Nagsiling sia sini tungod kay ginsugo ni Jesus ang malaut nga espiritu sa paggwa sa iya. Kay sa madamo na nga beses ginagamhan sia sang demonyo, kag bisan pa nga ginapriso nila sia kag ginagapos sang mga kadena ang iya mga tiil kag ang iya mga kamot, ginapamugto niya ang mga gapos kag ginatabog sia sang demonyo sa desierto.

30Si Jesus namangkot sa iya, “Ano ang imo ngalan?”

Nagsabat sia, “Ang akon ngalan si ‘Madamo.’” Ginsiling niya ini kay madamo nga mga demonyo ang nagsulod sa iya. 31Ang mga demonyo nagpakitluoy kay Jesus nga indi sila pagsugoon nga magkadto sa kadadalman.#8:31 KADADALMAN: Ginapatihan nga ang mga demonyo ginabilanggo sa idalom sang duta tubtob sa katapusan nila nga silot.

32Malapit sa sadto nga lugar may daku nga panong sang mga baboy nga nagapang-ungad sa banglid. Gani ang mga demonyo nagpakitluoy kay Jesus nga tugotan sila sa pagsulod sa mga baboy, kag gintugotan niya sila. 33Dayon ang mga demonyo naggwa sa tawo kag nagsulod sa mga baboy. Ang bug-os nga panong nagdinaguso padulhog sa kilid sang pil-as pakadto sa linaw kag nagkalalumos.

34Ang mga nagabantay sang mga baboy nakakita sang nahanabo. Gani, nagpalagyo sila kag nagpalapnag sang balita sa banwa kag sa mga kaumhan. 35Dayon ang mga tawo nagkadto didto sa pagtan-aw sang nahanabo. Nagpalapit sila kay Jesus kag nakita nila ang tawo nga halin sa iya nagwa ang mga demonyo. Nagapungko sia sa tiilan ni Jesus, nga may bayu na kag yara sa iya husto nga paminsaron, kag hinadlukan gid sila. 36Ang mga nakakita sang nahanabo nagpanugid sa mga tawo kon paano nag-ayo ang tawo nga gingamhan sang mga demonyo. 37Dayon ang tanan nga mga tawo sa palibot sang banwa sang Gerasa nagpangabay kay Jesus nga maghalin sia, tungod kay nahadlok gid sila. Gani si Jesus nagsakay sa sakayan kag naghalin didto. 38Ang tawo nga sa iya nagwa ang mga demonyo nagpakitluoy kay Jesus, “Paupda ako sa imo.”

Pero ginpalakat sia ni Jesus kag ginsingganan, 39“Pauli ka sa inyo kag isugid kon ano ang ginhimo sang Dios sa imo.”

Ang tawo naglakat sa bug-os nga banwa kag nagpanugid sang ginhimo ni Jesus sa iya.

Ang Anak nga Babayi ni Jairo kag ang Babayi nga Nagtandog sang Kunop ni Jesus

(Mat. 9:18-26; Mar. 5:21-43)

40Sang pagbalik ni Jesus sa pihak sang linaw gin-abiabi sia sang mga tawo, tungod kay tanan sila naghulat sa iya. 41May nag-abot nga isa ka tawo nga ginhingalanan kay Jairo nga opisyal sang sinagoga. Nagluhod sia sa tiilan ni Jesus kag nagpakitluoy sa iya nga magkadto sa iya balay, 42tungod kay tagumatayon ang iya bugtong nga anak nga babayi nga nagapanuigon sing dose ka tuig.

Sang nagapadulong si Jesus, gindugokan sia sang mga tawo sa palibot. 43May isa ka babayi didto nga nag-antos sa pagpanggwa sang madamo nga dugo sa iya, sa sulod sang dose ka tuig. Naurot na niya gasto ang iya tanan nga kwarta sa pagpabulong,#8:43 Ang iban nga mga manuskrito wala nagalakip sangNaurot na niya gasto ang iya tanan nga kwarta sa pagpabulong. pero wala gid sing may nakaayo sa iya. 44Nagpanagil-ot sia sa tunga sang mga tawo sa likod nayon ni Jesus, kag iya gintandog ang sidsid sang kunop ni Jesus kag sa gilayon nag-untat ang pagpanggwa sang iya dugo. 45Namangkot si Jesus, “Sin-o ang nagtandog sa akon?”

Sang wala sing may nag-ako, si Pedro nagsiling, “Manunodlo, nagaginutok lang kag nagadis-uganay ang mga tawo sa palibot mo.”

46Pero si Jesus nagsiling, “May nagtandog gid sa akon, kay nabatyagan ko ang paggwa sang gahom sa akon.” 47Sang matalupangdan sang babayi nga nasapwan sia, nagpalapit sia nga nagakurog kag nagluhod sa tiilan ni Jesus. Sa atubang sang tanan, ginsugiran niya si Jesus kon ngaa nga gintandog niya sia kag kon paano sia nag-ayo gilayon. 48Si Jesus nagsiling sa iya, “Anak ko, ang imo pagtuo nag-ayo sa imo. Maglakat ka sa paghidait.”

49Sang nagahambal pa sia sini nag-abot ang isa ka tawo nga ginsugo halin sa balay sang opisyal. Nagsiling sia kay Jairo, “Ang imo bata nga babayi patay na. Indi na lang pagtublaga ang Manunodlo.”

50Pero nabatian ini ni Jesus, kag nagsiling sia kay Jairo, “Indi ka magkahadlok, magtuo ka lang kag magaayo sia.”

51Sang pag-abot ni Jesus sa balay ni Jairo wala niya pagtugoti ang bisan sin-o sa pagsulod sa balay upod sa iya luas lang kanday Pedro, Juan, Santiago kag ang amay kag iloy sang dalagita. 52Ang tanan didto nagahinibi kag nagahaya tungod sa bata. Si Jesus nagsiling sa ila, “Indi kamo maghibi, kay ang bata indi patay kundi nagakatulog lang!”

53Ginkadlawan nila sia, tungod kay nahibal-an nila nga patay na ang dalagita. 54Pero gin-uyatan ni Jesus ang kamot sang dalagita kag gintawag sia, “Inday, bangon ka!” 55Nabuhi sia liwat kag nagbangon gilayon. Ginsugo sila ni Jesus nga hatagan sia sang iya sarang makaon. 56Ang iya mga ginikanan naurongan, pero ginmanduan sila ni Jesus nga indi sila magpanugid sang natabo bisan kay sin-o.

Currently Selected:

Lucas 8: MBBHIL12

Highlight

Copy