Matayo 7

Thumo banja ri jowoti jo

(Luk 6:37-38,41-42)

1Wikiri withum banja ri jowoti win, aka bende Were k'othumi riwin banja. 2#Mar 4:24Kwoŋbedo ibino thumo riwin banja i yo acel ma withumo gine banja ri jowoti win, aka ibino tiyo kwoŋ win gi cik ma witiyo gine kwoŋ jowoti win. 3Am'omiyo, raŋo m'iŋiyo nyaka yath m'ondhilo man manitie i waŋ omerin, t'ikidew kwoŋ thwon kasik manitie i waŋin won? 4Iere nedi waco ri omin ni, mondo, weyi akwany woko nyaka yath m'ondhilo no i waŋin, ma to in won bende initie gi kongolo kasik i waŋin? 5In, jarendirok! Kutho kwany woko kongolo kasik i waŋin, aka nyaka ibino neno maber ŋey inokwany woko yath m'ondhilo i waŋ omerin.

6Ikir'imiy gwokere gigipiny maleŋ, jobino wire rin to jokayin ayino; kendo ikir'ibol ge ma welo ri mbiji, jobino nyonanyona ayino.

Kway, rangi, gudi thigo

(Luk 11:9-13)

7Kway, aka inolimi; rangi, aka inonwaŋ; gudi thigo aka ibino yawo rin. 8Kole dhano je ma kwayo, limo; aka ŋata rango, nwaŋo, aka ŋata gudo thigo, iyawo rigo. 9Ŋa kwoŋ win bacere ji ka ma di miy wode tele, k'okwayo mugat? 10Kosa di miy go thwol, k'okwayo rec? 11Kole kada wireco ameno, wiŋeyo miyo nyithindho mewin gigipiny mabeyo. Aka Bawin manitie i polo oloy win didi i miyo joma kwayo go, gigipiny mabeyo!

12 # Luk 6:31 Tim win ri jowoti win gima wimito jowotimi riwin: Me a dwoŋ Cik pa Musa kodi fonji pa jotuci wac Were.

Waŋkac madiny kodi malac

(Luk 13:24)

13Donji gi i waŋkac madiny, rupiri waŋkac malac nigi royo mayot luwo, to tero jo i rerok, aka jomathoth joluwo royo no. 14Waŋkac madiny nigi royo matek luwo, to tero jo i kwo, aka ji manok ama jonwaŋo royo no.

Yath kodi olemo mere

(Luk 6:43-44)

15Gwokere win kwoŋ jotuci wac Were ma twodo, ma jobino bongi win i cal pa rombo gi woko, to iy'adieri mere jobedo arara i cuny gin. 16Riameno wibino ŋeyo jo kwoŋ gima nyak wok i tim pajo. Kudho oriaŋ bende cene nyak vini? Odoko kudho alwi bende cene nyak nyandere? 17Kole yath maber nyak gimaber, aka yath marac bende nyak gimarac. 18Yath maber kinyal nyak gimarac, aka yath marac kinyal nyak gimaber. 19#Mat 3:10; Luk 3:9Yath je ma kinyak gimaber itoŋo woko t'ibolo i mac. 20#Mat 12:33Am'omiyo wibino ŋeyo jotuci wac Were ma twodo cungo kwoŋ gima nyak ma nenere i tim pajo.

Jafonjirok m'otire

(Luk 13:25-27)

21Ki dhano je ma lwoŋan ni, Rwoth, Rwoth, ma bino donjo i Ker ma polo, kende ŋata timo gima Baba man polo yenyo. 22I ndelo no, jomathoth jobino waco ni, “Rwoth, Rwoth, kole watuco mikwenda pa Were i nyingin, wariemo woko jwogi i nyingin aka watimo gir'aura madongo m'omore i nyingin!” 23#Zab 6:9Gikenyo abino waco rijo ni, “Akuya win, kendo eye win bongan win wijotimi reco me.”

Jogeto ario

(Luk 6:47-49)

24Am'omiyo dhano je ma winjo wac paran me aka tiyo gine bino cale gi dhano mariek m'ogeto ot pere i wi tele. 25Koth ocwe, mikula omol, aka asur okudho to ot no k'opodho, kwoŋbedo oger i wi tele. 26To ŋata winjo wac paran me aka kitiy gine, cale dhano mamiŋ m'ogero ot pere i kwoyo. 27Koth ocwe, mikula omol, asur okudho ot no matek, to podho. Podho no oasere marom kune!

Meni pa Yesu

28 # Mar 1:22; Luk 4:32 Munyo Yesu ocowo waco gime, lwak ji jouro swa kite ma go ofonjo gine. 29Go onwaŋo kicale kodi jondiko, rupiri go ofonjo pa ŋat'oyido nigi meni.

Currently Selected:

Matayo 7: DHOPE

Highlight

Copy