Matayo 8

Yesu botho jadhowo

(Mar 1:40-45; Luk 5:12-16)

1Munyo Yesu oloro wi got, lwak ji joluwo go. 2Gikenyo jadhowo moro obino bonge, oriewere piny ruwaŋe, to waco ni, “Jadwoŋ k'iyenyo inyalo bothan.” 3Yesu ocwayo cinge to geyo go munyo waco ni, “Ayenyo, bothi!” Gikenyo dhowo pere ocango i hongo no won. 4#Jolevi 14:1-32To Yesu waco rigo ni, “Neni! Ikir'iwaci ri nyatoro, to kidhi tirtir bongi jacway ri Were i wi migam, go wokaŋasa in, aka imiy mic ma cowirok ma nyutho dhano je nike ibothi, paka mitere i Or ma Musa ondiko.”

Yesu botho jatic pa jalweny madwoŋ ma Jaroma

(Luk 7:1-10)

5Munyo Yesu odonjo Kapernaum, jasirikale madwoŋ ma Jaroma oromo gine to kwayo kony ni, 6“Jadwoŋ, jatic paran ni peco two nyaŋinya i kanindo, kinyal ay, aka nitie i litho madwoŋ swa.” 7Yesu owaco ni, “Abino kidho botho go.” 8Jalweny odwoko ni, “Be Jadwoŋ, kiripi ran in donjo i ot paran, waci nyaka wac acel to jatic paran both. 9Kole abende anitie gi jodongo ma jotelan, aka nitie jolweny ma bende joluwan; k'awaco ri me ni kadhi, to kadho; ri man ni biye, to bino; aka ka aoro jago paran ni, tim gimanyo, to go timo.” 10Yesu ouro munyo owinjo gime, omiyo owaco ri ji m'onwaŋo joluwo go ni, “Awaco riwin, fodi akineno kiti yeyo me i nyatoro je i Isiraili. 11#Luk 13:29Poyi win gime! Jomathoth jobino wok yuwok ceŋ kodi yupodho ceŋ to jobedo dhower i Ker ma polo kodi Abraham, Isaka, kodi Yakobo. 12#Mat 22:13; 25:30; Luk 13:28To jom'oyido joripo bedo i Ker ibino bolo jo woko i mudho kama jobino ywak'iye to jomwodo laki gin.” 13Aka Yesu owaco ri jasirikale ni, “Dok peco, paka iyeyo, gim'iyenyo wotimere rin.” Aka jatic pa jasirikale obothi sawa no won.

Yesu botho ji mathoth

(Mar 1:29-34; Luk 4:38-41)

14Yesu okidho peco pa Petero, aka kenyo or Petero m'obedo min cege oyido ni kanindo kwoŋe oowere. 15Gikenyo go ogeyo cingi dheno, to two weyo go; aka oay malo to cako rweyo go.

16Munyo piny oyutho, ji jokelo bongi Yesu ji ma jwogi nikwoŋ gin. Yesu oriemo woko jwogi gi wac pere to botho jotwo je. 17#Isa 53:4Go otimo ama ma miyo gima jatuci wac Were Isaya owaco otundi i kare ni, “Go won okwanyo woko nyapo mawan, to tiŋo two mawan.”

Joma di jobedo joma luwo Yesu

(Luk 9:57-62)

18Munyo Yesu oneno lwak ji jothoko go, owodho or ni jowopor loka man ma wakawaka. 19Jafonji ma Cik moro obino bonge to waco ni, “Jafonji ayikere kidho kodin kam'inocom'iye je.” 20Yesu odwoko go ni, “Kibwe jonitie gi kero pajo, aka winyin bende jonitie gi od gin, to Wod Dhano ongoye kodi kama go othen'iye wiye.” 21Acel kwoŋ jafonjirok pere owaco ni, “Jadwoŋ, weyi kutho akidhi ayiki baba.” 22Yesu odwoko go ni, “Luwan. Weyi jom'otho wegi jowoyiki jom'otho pajo.”

Yesu kweyo asur

(Mar 4:35-41; Luk 8:22-25)

23Munyo Yesu odonjo i ye, jofonjirok pere jokadho gi go. 24Piyo piyo no asur madwoŋ obino i wakawaka m'omiyo pi ma tula oyido umo woko ye aka Yesu oyido nindo. 25Jofonjirok jokidho bonge to jocewo go ka jowaco ni, “Bothi wan, Rwoth! Wacegin tho!” 26Yesu odwoko ni, “Wibwok ameno raŋo! Apaka yeyo mewin nok ama!” Gikenyo go oay malo to oro asur kodi wakawaka m'oyido tula kwe; aka gimoro je okwe maber. 27Dhano je odhier. Jowaco ni, “Me kiti dhano ma nedi? Kiri asur kodi kitula pa pi je winjo go!”

Yesu botho j'ario ma jwogi nikwoŋ gin

(Mar 5:1-20; Luk 8:26-39)

28Munyo Yesu obino iy'adec ma Gadara, yu loka man ma wakawaka, j'ario m'oyido jonigi jwogi aka jowok i ŋungu m'iyik'iye ji, joromo gine. Jono oyido joger swa, am'omiyo ji bin jolworo luwo royo no. 29Piyo piyo no jokoko malo ni, “Iyenyo timo aŋo gi wan, Wod Were? Ibino cando wan mafodi ndir m'otire k'otundo? 30Cegin kenyo, oyido nitie sidwol mbiji ma cemo.” 31Gikenyo to jwogi jokwayo Yesu ni, “K'imito riemo wan woko, ere dhiri wan i sidwol mbiji no.” 32Yesu owaco rijo ni, “Kidhi win.” Gikenyo jowok to jodonjo i sidwol mbiji. Sidwol gibe oloro piny wok wi tendere to jomunyere i pi.

33Ji m'onwaŋo jokwayo mbiji joringo to jokidho i tindi, to jowaco ri ji ma kenyo gimoro je m'otimere ri jom'onwaŋo jwogi nikwoŋ gin. 34Gino omiyo dhano je ma tindi owok kidho romo gi Yesu; aka munyo joneno go, jokwayo go ni woeye iy'adec pajo.

Currently Selected:

Matayo 8: DHOPE

Highlight

Copy