Matayo 6

Fonji kwoŋ konyirok

1 # Mat 23:5 Gwokere win wikiri winyuthi tim mewin mabeyo i waŋ ji ni aka ji jowoneni to jofoyo win. Ka witimo ameno i dier ji wik'olim kemba bongi Bawin manitie i polo.

2Am'omiyo ka wimiyo jacandi gimoro, wikiri wiasa nyutho kamaler, paka joma rendere jotimo i kalamo pa Joyuda kodi i royo m'okare i tindi. Jotimo ameno nike ji jowopaki jo. Adieri awaco riwin, otiek miyo jo kemba pajo m'opoŋ. 3To k'icwayo ri jacandi gimoro, kony go makada mere perin ma kacunyin k'oŋeyo, 4ŋey wobedi gima nyaliŋliŋ, aka Benin, ma neno gim'imito nyaliŋliŋ, ama bino miyin kemba.

Fonji kwoŋ kwayo

(Luk 11:2-4)

5 # Luk 18:10-14 K'ikwayo, ikir'ibedi paka joma rendere! Jomaro cungo ka jokwayo i kalamo pa Joyuda kodi i thengi royo m'okare ma tindi ŋey dhano je wonen jo. Adieri awaco riwin, ameno jotieko limo kemba pajo kicutho. 6To ka ikwayo, donji i ot perin icegi thigo, aka ikway Benin, ma kinenere kamaler. Aka Benin, ma neno gim'imito nyaliŋliŋ bino miyin kemba.

7I kwayo perin, ikir'ior wac kweth m'ongoye kony paka jokafir jotimo; ato joparo ni Were bino winjo jo ro kwayo pajo maboyo. 8Am'omiyo wikiri wicale gi jo; kole Bawin manitie i polo oŋeyo gima wicando kada mafodi wikikwayo go. 9Me apaka wiripo kwayo,

Bawan ma i polo;

Nyingin wolwor.

10Keri perin wobin;

Gim'iyenyo wotimere i piny paka timere i polo.

11Miy waye konon cemo mawan ma noknok;

12Cwaki riwan reco mawan;

Paka wacwako ri joma timo riwan marac.

13Ikir'iter wan i karatem, to bothi wan ayino,

kwoŋ gimarac, [rupiri ker obedo aperin, kodi meni, kodi dwoŋ, cil gi cil]. Ameno.

14 # Mar 11:25-26 Kole ka wicwako ri ji reco ma jotimo riwin, Bawin manitie i polo bende bino cwako win. 15To ka wikicwaki reco pa joman, ameno Bawin manitie i polo bende k'ocwaki riwin reco ma witieko timo.

Fonji kwoŋ riyo kec

16Aka ka wiriyo kec, wikiri winenere pa wigut paka joma rendere. Ato jonyeko waŋ gin ŋey ji je jowoŋey nike joriyo kec. Adieri awaco riwin, ameno jotieko limo kemba pajo m'opoŋ. 17To k'iriyo kec, lwoki waŋin kendo iyiki wiyin, 18aka joman jokiri jowoneni nike iriyo kec; Benin kende ma kinenere kamaler ama bino ŋeyo. Aka Benin, ma neno gim'imito nyaliŋliŋ, ama bino miyin kemba.

Kano ŋaŋo i polo

(Luk 12:33-34)

19 # Yak 5:2-3 Wikiri wikan ŋaŋo mewin i piny ka, kama masirigi kodi nyal jobino nyek'iye, aka jokwo jobino donj'iye to jokwalo woko; 20to kucel, kani win ŋaŋo mewin i polo, kama masirigi kodi nyal jokibino nyek'iye, aka jokwo jokibino donj'iye kwalo. 21Kole kama diŋaŋo perin ama cunyin bed'iye ndir je.

Lero ma delkwoŋ dhano

(Luk 11:34-36)

22Waŋ meno tala ma del; ka waŋin olama, delkwoŋin gipi lero bino poŋ'iye; 23to ka waŋin k'olama, delkwoŋin bino bedo i mudho. Am'omiyo ka lero ma kwoŋin olokere mudho, mudho bino asere marom nedi?

Were kodi lim

(Luk 12:22-31; 16:13)

24Ongoye ŋata nyalo tiyo ri rwodhe ario; go bino maro acel to dak man, kosa nyalo tiyo ri acel to cayo man. Ikinyal tiyo ri Were kodi ri lim bende.

25Am'omiyo awaco riwin gime: Wikiri wirembi kwoŋ gir'acama kodi gir'amadha ma wiyenyo ma kwo, kosa ruk ri delkwoŋ win. Adieri kwo pa dhano kiloy cemo, odoko delkwoŋe kiloy ruk? 26Neni win winyin ma jouco malo, jokipidhi kodhi, jokicoki cemo jokethi i dere, to kole Bawin manitie i polo kuro jo! To kere win wikiloy winyin no bor? 27Ŋa kwoŋ win manyalo medo kiyindira i kwo pere ro rembo ri gigipiny no?

28To raŋo ma wirembo ri ruk? Neni win thiw dudi paka jodongo; jokicwer kwok i tic odoko wegi jokitim ruk pajo. 29#1 Kerin 10:4-7; 2 Kigana 9:3-6To awaco riwin kada Solomon, ma cango oŋaŋ m'oasere, k'obedo gi ruk mabeyo paka nyaka acel kwoŋ thiw dudi me. 30To k'inen meno apaka Were ruko lum, ma konon nitie to yawere mere thwo t'iwaŋo i kendo, go k'oruki win maloyo kenyo, a ji ma yeyo pajo nok me! 31Am'omiyo wikiri wicaki rembo, ka wiwaco ni, “Wanocam aŋo?” Kosa ni, “Wanomadhi aŋo?” Kosa ni, “Wanoruki aŋo?” 32Kole me a gigipiny ma jokafir joyenyo hongo je; aka Bawin manitie i polo oŋeyo nike wiyenyo gi go je. 33To kutho rangi win Ker pa Were kodi tiro ma go yenyo, aka go bino miyo win gigipiny me je. 34Am'omiyo wikiri wirembi ri gima dikin; kole kisi ndelo won yawere gi wac mere. Ki yenyere medo teko man wi teko ma piny m'oyawere kelo.

Currently Selected:

Matayo 6: DHOPE

Highlight

Copy