Matayo 5

Fonji wi Got

1Yesu oneno kitipa ji, to idho wi got, aka munyo otieko bedo piny, jofonjirok pere jobino bonge; 2aka ocako fonjo jo.

Kisangala mar'adieri

(Luk 6:20-23)

3Josilwany a joma candere i cuny gin,

kole Ker ma polo obedo apajo.

4 # Isa 61:2 Josilwany a joma ywak, kole ibino,

kweyo cuny jo.

5 # Zab 37:11 Josilwany a jomamwol,

kole jobino lunjo piny.

6 # Isa 55:1-2 Josilwany a joma nitie g'awanya madwoŋ,

ma timo gima Were yenyo,

kole ibino yeŋo jo.

7Josilwany a joma nyutho jowoti gin wor,

kole Were bino nyutho jo bende wor.

8 # Zab 24:3-4 Josilwany a joma cuny gin olony, kole

jobino neno Were.

9Josilwany a joma kweyo piny,

kole ibino lwoŋo jo ni nyithindho pa Were.

10 # 1 Pet 3:14 Josilwany a joma ilwenyo gi jo ro timo gima Were yenyo,

kole Ker ma polo obedo apajo!

11 # 1 Pet 4:14 Win wijosilwany ka ji joyeto win aka jolwenyo gi win, ka jowaco wac je kwoŋ win rupiri wibedo joma luwan. 12#2 Kigana 36:16; Tim 7:52Yodere win aka wisangala, rupiri kemba mewin obedo m'oasere i polo. Me apaka cango jotimo kiri ri jotuci wac Were macon.

Cumbi kodi lero

(Mar 9:49-50; Luk 14:34-35)

13 # Mar 9:50; Luk 14:34-35 Wibedo cumbi ma piny. To ka cumbi orwenyo woko cwe mere, aŋo manyalo miyo bedo mamit kendo? Lokere gim'ongoye kony; am'omiyo ikonjo woko to ji nyono gi tiendi gin.

14 # Yoh 8:12; 9:5 Win wiŋati wibedo lero ma piny. Tindi m'oger wi tendere madwoŋ kipanere. 15#Mar 4:21; Luk 8:16; 11:33Ongoye ŋata cwinyo tala to riewo i agono; kucel go ripo ŋawo tala no malo kama nyalo miyo lero ri ji je ma ot. 16#1 Pet 2:12Riameno lero mewin bende ripo menyo iye je ŋey ji jowoneni gima beyo ma witimo to jopako Bawin man polo.

Fonji kwoŋ Cik

17Wikiri wipar nike abino ka kwanyo woko Cik pa Musa kodi fonji pa jotuci wac Were, t'abino nyutho dwoŋ mere mar'adieri ayin. 18#Luk 16:17Adieri awaco riwin, ka polo gi piny fodi nitie, ongoye kada gimathin kosa adec m'ondhilo kwoŋ Cik m'ibino kwanyo woko, to bino bedo ama tundo kama gimoro je otieko timer'iye. 19Am'omiyo nyatoro je m'okwer winjo kada gimoro nyaka mathin kwoŋ Cik aka ofonji joman bende timo ameno, bino bedo ŋata loyo thino i Ker ma polo. Kucel nyatoro je m'owinji Cik aka ofonji joman bende timo ameno, bino bedo ŋatadwoŋ swa i Ker ma polo. 20Am'omiyo, awaco riwin ni wikibino nyalo donjo i Ker ma polo kwanyo woko ka wibedo gi leŋo ma kalo apa jondiko kodi Jofarisayo i timo gima Were yenyo.

Fonji kwoŋ nge

(Luk 12:57-59)

21 # Wok 20:13; Cik 5:17 Witieko winjo ni cango owaci ri ji macon ni, ikir'ineki, aka nyatoro je ma janek ibino tero go ruwaŋ jathum banja. 22To pama onyo awaco riwin ama: Ŋat'omaki nge g'omin bino bedo jabanja kapido. Ŋat'otim roro kwoŋ omin ibino tero go ruwaŋ jothumi banja, aka ŋat'oyeti omin ni, mamiŋ ma bukony, ibino bolo go i mac makitho. 23Am'omiyo k'onwaŋo itero mic perin ri Were i wi migam to gikenyo ipoyo nike omerin nitie gi dhaw kodin, 24weyi mic perin i nyim migam kenyo, kutho ikidhi iyiki wac g'omin in aka nyaka idwoki imiy Were mic perin.

25Ka dhano nigi wac moro kodin aka mito terin kapido, yik gine wac no ma fodi hongo nitie, kafodi wikitundo kapido. Ka winotundi kenyo, go bino bolin i cingi jathum banja, ma bino kethin i cingi jolweny ma katwec t'itweyin. 26Ibino bedo kenyo, awaco rin, cuka inocul kiri pesa macowe m'othumi rin.

Fonji kwoŋ turo cik ma nywomirok

27 # Wok 20:14; Cik 5:18 Witieko winjo paka cango owaci ni, Ikir'itim cot. 28To pama awaco riwin ama: Ŋata ŋiyo dhako moro aka cunye wanya go, meno otieko timo gine cot gi i cunye. 29#Mat 18:9; Mar 9:47Am'omiyo k'inen waŋin maracuc miyin timo gimarac, goli woko ibol woko! Kole ber ikeŋ adec moro ma delkwoŋin loyo nwaŋo delkwoŋin gipi t'ibolo i mac makitho. 30#Mat 18:8; Mar 9:43K'inen cingin maracuc miyin timo gimarac, ŋondi ibol woko! Rupiri ber iremi cingin acel loyo delkwoŋin gipi kidho i mac makitho.

Fonji kwoŋ riemo dhako

(Mat 19:9; Mar 10:11-12; Luk 16:18)

31 # Cik 24:1-4; Mat 19:7; Mar 10:4 Cango con owaci ni nyatoro ma riemo woko cege ripo miyo go balwa ma riemo go i ndiko. 32#Mat 19:9; Mar 10:11-12; Luk 16:18; 1 Kor 7:10-11To pama awaco riwin ni: Nyatoro je m'oriem cege ri wac moro je ma k'obedo wac ma kidakana, meno go miyo cege donjo i cot. Aka ŋata nywomo dhako ma pameno, meno bende timo gine cot.

Fonji kwoŋ kwoŋirok

33 # Jolevi 19:12; Kwan 30:3; Cik 23:22 Witieko winjo paka cango con owaci ni ikir'ikwoŋere ma twodo, to tim gim'ikwoŋere timo ruwaŋ Rwoth. 34#Yak 5:12; Isa 66:1; Mat 23:22To pama awaco riwin ni: Ikir'ikwoŋere kada mathin k'itimo cikirok, ikir'ikwoŋere gi polo, rupiri meno kom pa Were, 35#Isa 66:1; Zab 48:3kosa gi piny, rupiri meno ka ywomo tiende, kosa gi Yerusalem, rupiri meno obedo tindi pa Kere madwoŋ; 36Odoko ikir'ikwoŋere gi wiyin, rupiri ikinyal loko kada yer acel matar wobedi macol kosa macol wobedi matar; 37Waci nyaka ni, “Ey.” Kosa “Be.” Gima kalo kenyo man m'inowaci meno wok bongi Ŋatarac.

Fonji kwoŋ culo kwor

(Luk 6:29-30)

38 # Wok 21:24; Jolevi 24:20; Cik 19:21 Witieko winjo cango con paka owaci ni, waŋ culo kwor gi waŋ, lak bende gi lak. 39To onyo pama awaco riwin ni: Ikir'iculi kwor kwoŋ ŋata timo rin marac. Ka nyatoro ogoyo lembin maracuc g'adhoŋ, weyi wogoyi lembin maracam bende. 40Aka ka nyatoro oterin i kapido ro yenyo sati perin, weyi go woter kiri kot perin bende. 41Aka ka nyatoro oromin woth mayiro acel, woth gine mayiro ario. 42Ka dhano okwayin gimoro, miy go, aka ka nyatoro mito gimoro m'ociko culo, miy go.

Maro jokwor

(Luk 6:27-28,32-36)

43Witieko winjo cango con paka owaci ni mari mere perin, aka dakere kodi jakwor perin. 44To onyo pama awaco riwin ni, mari win jokwor mewin, odoko kway win ri joma timo riwin marac, 45aka nyaka wibino bedo nyithindho pa Bawin manitie i polo; kole go miyo ceŋ pere liel ri ji mareco kodi mabeyo marom, aka go miyo jomabeyo gi joreco je koth. 46Raŋo ma di wigen ni womiy win kemba ka wimaro ji ma bende jomaro win won kende? Jocoki misolo bende jokitim ameno? 47To ka wimothere wiwegi gi wegi, meno witimo ye aŋo m'opokere kodi gima ji man jotimo? Jopath bende jokitim ameno? 48#Jolevi 19:2; Cik 18:13Bedi win maleŋ paka Bawin manitie i polo leŋ.

Currently Selected:

Matayo 5: DHOPE

Highlight

Copy