Matayo 4

Jwogi temo Yesu

(Mar 1:12-13; Luk 4:1-13)

1 # Ebu 2:18; 4:15 Gikenyo Cuny Maleŋ otero Yesu i thim ŋey jwogi wotem go. 2Munyo go ocowo odieceŋ gi wor piero aŋwen munyo riyo, Yesu owinjo kec. 3Jwogi obino bonge to waco ni, “K'inen ibedo Wod Were adieri, ere apawiri telin me wolokere cemo.” 4#Cik 8:3Yesu odwoko ni, “Ondiki ni, ‘Dhano kinyal kwo gi cemo kende, to gi wac je ma wok i dhok Were.’ ”

5Gikenyo jwogi otero Yesu i tindi maleŋ to ketho go wilwindi ma Ot pa Were, 6#Zab 91:11-12to waco rigo ni, “K'inen ibedo Wod Were ere papor ye piny.” Kole ondiki ni,

“Were bino oro rin jomalaika pere,

ma jobino bielin i cingi gin,

aka ikibino cadho tiendin kwoŋ tele.”

7 # Cik 6:16 Yesu odwoko ni, “Kole ondiki bende ni, ‘Ikir'item Rwoth Were perin.’ ”

8Gikenyo jwogi otero Yesu wi got mabor swa, to nyutho go ker ma piny je, gi dwoŋ manitie i iye je. 9Jwogi owaco ni, “Abino miyin gi go je, ka iriewere ruwaŋan t'ilaman.” 10#Cik 6:13Gikenyo Yesu odwoko ni, “Eye bongan Sitan! Ondiki ni, ‘Lami Rwoth Were perin aka itiy rigo won kende.’ ”

11Gikenyo jwogi oweyo go; aka jomalaika jobino jomiyo go kony.

Yesu cako tic pere i Galili

(Mar 1:14-15; Luk 4:14-15)

12 # Mat 14:3; Mar 6:17; Luk 3:19-20 Munyo Yesu owinjo ni otwey Yohana, go oay to kidho Galili. 13#Yoh 2:12Go oeye Nazareth, to kidho Kapernaum, tindi ma dho jwom Galili, iy'adec mapa Zebulun kodi Nafital. 14Gime otimere ma miyo gima Isaya jatuci wac Were owaco wotundi i kare ni,

15 # Isa 9:1-2 “Piny pa Zebulun, piny pa Nafital,

thenge ma yu wakawaka, i thengi Yordan,

Galili, pa Jopath!

16Ji m'oyido jonitie i mudho

joneno lero madwoŋ;

Aka ri jom'oyido jonitie i piny ma mudho ma tho,

lero otieko menyere.”

17 # Mat 3:2 Wok i hongo no kadho yuwaŋe Yesu ocako fonjo ka waco ni, “Ŋuti win reco rupiri Ker ma polo nicegin.”

Yesu lwoŋo cwo aŋwen ma jokitoga

(Mar 1:16-20; Luk 5:1-11)

18Munyo Yesu oyido wotho dho Wakawaka Galili, go oneno wutmere ario ma jokitoga, Simon (m'ilwoŋo ni Petero) gi Andereya omin go, munyo oyido jociko rec i wakawaka gi bwo rupiri oyido jobedo jokitoga. 19Yesu owaco rijo ni, “Biye luwan win aloki win jokitoga ji.” 20Piyo piyo jono joweyo bwo pajo, to joluwo go.

21Yesu omedere woth aka oneno wutmere ario man, Yakobo kodi Yohana, yac pa Zebedayo. Onwaŋo jonitie i ye pajo gi ba gin Zebedayo joyiko bwo pajo, to lwoŋo jo. 22Piyo piyo jono joweyo ye pajo gi ba gin, to joluwo Yesu.

Yesu tito wac gi botho ji

(Luk 6:17-19)

23 # Mat 9:35; Mar 1:39 Yesu owotho i Galili parom, munyo fonjo Wac Manyen Maber kwoŋ Ker pa Were i kalamo pa Joyuda, gi botho two kodi ramirok ma nger je. 24Wac ma mako kwoŋe onyay i piny Siria gipi, m'omiyo ji jokelo rigo ji je m'onwaŋo jotwo kiti two m'opokere je, kodi ramirok ma nger je m'oyido cando jo: Ji ma jwogi nikwoŋ gin, joma tho fum, kodi jonyaŋinya; to Yesu botho jo je. 25Lwak ji m'oasere joluwo go wok Galili kodi Dekapoli (tindi m'ocokere apar) wok Yerusalem, Yuda, kodi piny ma loka Yordan.

Currently Selected:

Matayo 4: DHOPE

Highlight

Copy