Luka 3

Ettittoyo Ono Yoane Etifuotoni Batisimo

(Mat 3:1-12; Mar 1:1-8; Yoa 1:19-28)

1Ihiŋa etattomoni homiyet ono elohobu Tiberias, Hobu elle ittokon; ara nyia Pontio Pilato amondir olo Yudea, buo Erode ara elettok olo Galilea, buo illanyi Filipo ara elettok olo afau Iturea iko Trakonito; buo fe Lisania ara elettok olo Abilin, 2buo Anas iko Kaifas arai a hehumak hulle ittaha. Attati ekiana ono Hollum ittuna jio Yoane lonyi Sakariya ihidiofo. 3Ania, ette Yoane leten aŋacio 'daŋ hutteger hari Yordano buo ittittoyo jiojio, “Obusana eyyata hatai, ifuotuna batisimo buo Hollum adi ette ihohina eyyata hatai.” 4Ihuo igioroni nyia ibuk ono Isaya ekianani Hollum jio,

“Obo latulo elle iwuwoŋita ihidiofo jiojio,

‘Ihuhumana ekoi ono Lamonye

itabisana alori honyi!

5Ijiara luŋa isihani awudorita 'daŋ,

ijiara osotoni adoŋiok 'daŋ iko aduleti ifau.

Ijiara ekotia 'daŋ hunno okukudoi 'to itabisanie 'tor 'tor,

buo fe iliŋoni alori 'daŋ hunno ogoŋie 'to.

6Igonyuni adi aati 'daŋ etalahuna enne iyaŋuno Hollum.’ ”

7 # Mat 12:34; 23:33 Ofuonni nyia eluluŋi waati arriai jio Yoane ifuotuniere batisimo, buo inyi ette jiaran jihosi, “Itai amunuok hulo! Ŋai asar itai ifuhori ettigemio onno olo Hollum ifahuna? 8#Yoa 8:33Ihuo ayyani onno oŋijak 'to aaŋer ihaniete egemita hunne itahutani 'to jio, ihara itai eyyata hatai. Hètteriete ajiaran ta ahuattek hatai jio, ara Abramo ahohonyi hatai. Nyio, eramak ni itai jio, oremik Hollum iduhuna amoruoi huna ette iyyeuna aduri hutto woyo Abramo. 9#Mat 7:19Ihuania, accio atolu ihadde 'yani. Ayyani onno obeŋ 'to oŋijak aŋer hunno oyiji 'to olloŋori adi inyi ette ibironia ihima.”

10Buo eluluŋi waati ette ifiyo inyi, “Ehan 'tadi hohoi anyio?”

11Itarraŋ nyia inyi ojio, “Lia, ollo owon 'to iko aboŋojin arrihai, ijiara luŋa aharak ebotie jio ollo obeŋ 'to owon iko obo. Ijiara buo fe lia ollo owon 'to iko amat ihan ihuo nyia.”

12 # Luk 7:29 Ofuonni nyia buo fe omuk eddudduhak musuru ifuotuniere batisimo, ette isi ifiyo inyi ojio, “Hettiyanani, ehan 'tadi hohoi anyio?” 13Buo inyi ette iramana isi jiojio, “Hètallaŋana amusuru hunne iddudduhuttati itai jio aati.”

14Ette buo fe omuk oseŋer ifiyo inyi jiojio, “Buo hohoi, ehan 'tadi hohoi anyio?” Buo inyi ette iramana isi jiojio, “Hèhorotiete arobiyaa waati, hètisiahina obo atulo obojiai; hèmianati buo fe edumiti hatai.”

15Obobolororo nyia eyihina waati, ania, ette itterierek isi eŋiŋa ta atajia hosi jio, kuyya hara Yoane Olonyimoto. 16Ania, iramaniere Yoane isi 'daŋ jiojio, “Etifuocio ni itai batisimo ta aari, ati ottu adi lobo alla agalik 'to ani. Abeŋ ni ikoddaŋ asiru ihouniere amuha honyi. Ottu adi inyi itifuocio itai batisimo to Loholio Olibo iko te eema. 17Owon egilli honyi ihani, igilliyere emma hunne igis inyi. Ififieu adi inyi emma 'daŋ ette ihanana imugu honyi, buo ette isuahina acono ihima onno obeŋ 'to odunya.”

18Ittittoyo nyia Yoane Asayyo Ayijok jio aati te ekotia arriai buo fe ihum iramana isi oŋida iloiti emanyiti hosi. 19#Mat 14:3-4; Mar 6:17-18Ati iŋerejanio nyia Yoane tuar tuar jio Erode Lamondir, te etadetuna Erode hahutani honyi Erodias buo fe te egemita honyi hunno orrohoji 'to. 20Attati Erode inyiak irinyana obo epali onno orroho 'to agalik 'daŋ te etifitana honyi Yoane ibabus.

Efuotuna Yesu Batisimo

(Mat 3:13-17; Mar 1:9-11)

21Ninyia ifuotuni aati 'daŋ batisimo, ette buo fe Yesu ifuotuna. Ninyia homojo inyi, aŋa nyia edou; 22#Mat 3:17; Mar 1:11; Luk 9:35ette Loholio Olibo ollo owon iko ahuan ihuo awolo isuuna jihonyi tedou. Buo ekiana ette ittuna tedou onno ojio, “Iyye luŋa Lonyi hoŋ, ollo obuor ataji hoŋ; amuno ni iyye bebe.”

Hohonyiok Yesu

(Mat 1:1-17)

23Ninyia itteriere Yesu egiama honyi, arai nyia aŋasi honyi ihuo atomuana hunihoi. Igigiloi nyia aati jio, inyi lonyi Yosefu, lonyi Eli, 24lonyi Matat, lonyi Lefi, lonyi Melki, lonyi Yanai, lonyi Yosefu, 25lonyi Matasias, lonyi Amos, lonyi Nahum, lonyi Esli, lonyi Nagai, 26lonyi Maas, lonyi Matasias, lonyi Semin, lonyi Yosek, lonyi Yoda, 27lonyi Yoanan, Lonyi Resa, lonyi Serubabel, linyia ara 'to lonyi Salatiel, linyia ara 'to lonyi Neri, 28lonyi Meleki, lonyi Adi, lonyi Kosam, lonyi Elemadama, lonyi Er, 29lonyi Yosua, lonyi Elieser, lonyi Yorima, lonyi Matat, lonyi Lefi, 30lonyi Simion, lonyi Yuda, lonyi Yosefu, lonyi Yonam, lonyi Elayakim, 31linyia ara 'to lonyi Meliya, lonyi Mena, lonyi Mattatta, lonyi Natan, lonyi Dafide, 32lonyi Yese, Lonyi Obed, lonyi Bowas, lonyi Salmon, lonyi Nason, 33lonyi Aminadab, lonyi Adimin, lonyi Arni, lonyi Heseron, lonyi Peres, lonyi Yuda, 34lonyi Yakobo, lonyi Isako, lonyi Abramo, lonyi Tera, lonyi Nahor, 35lonyi Seruca, linyia ara 'to lonyi Ru, lonyi Pelek, lonyi Eber, lonyi Sela, 36lonyi Kainan, lonyi Arfaksad, lonyi Sem, lonyi Noa, lonyi Lamek, 37lonyi Metusela, lonyi Enok, lonyi Yared, lonyi Mahalalil, lonyi Kenan, 38lonyi Enos, lonyi Ses, lonyi Adam, lonyi Hollum.

Currently Selected:

Luka 3: EA2003

Highlight

Copy