Luka 2

Esiuna Ono Yesu

(Mat 1:18-25)

1To ninyia tonyia, ifak nyia Augusto, Hobu elle ittokon, eram jio oŋida igioroni afureta waati hutto obuore Roma 'daŋ. 2Onyurak nyia etteri ihenio ono aluaji waati Kuirino ara amondir olo afau Siria. 3Tania, ofuoi nyia aati 'daŋ iborejin gala hosi ababo itigioroniere afureta hosi.

4Ette buo fe Yosefu ette idioto to bore gala Nasaret, atta fau Galilea, ette leten ibore gala Betelehem atta fau Yudea, abore gala ninyia isiorik Hobu Dafide. Olo nyia inyi diya nyio, ara nyia inyi to woyo Dafide. 5Iyaru nyia inyi iko Maria, oduoti ninyia ocoroni jihonyi, itigioroniere afureta hosi. Oyedu nyia Maria, 6attati noloŋ enne isiori inyi lumon buo isi howoni Betelehem; 7ette inyi isiuna lonyi honyi oloŋeu, ette ibubunana inyi ta aboŋojin, ette itaferihina inyi itobol etanyai hisuŋ, nyio, obiaŋarak nyia isi amaji totua haji eyirit.

Eyyahak Kioro Iko Ajilohien

8Owoni nyia omuk eyyahak kioro itua mur hulle irririai akioro hosi ta narue jio naŋati nyia. 9Attati ajilo olo Lamonye ileyehino jihosi, ette akuatan ono Lamonye ifaŋan jihosi 'tel 'tel, buo isi 'daŋ ette ibaŋi bebe. 10Ati ojio nyia ajilo jihosi, “Hèbaŋata! Nyio, eyaŋuno ni jihatai asayyo ayijok hunno ofuonni 'to itamuno aati 'daŋ bebe. 11Isiuni duahana jihatai Letalahani itua bore gala Dafide, inyi Lamonye, Olonyimoto! 12Ara adi ana jihatai etahuti; ifuatta adi itai irumana olodole ofer itobol etanyai hisuŋ ollo obubuna ta aboŋojin.” 13Teya teya, oleyehino nyia eluluŋ ajilohien enne ittoki iko ajilo lia ette idolo afureta etahabuta Hollum jiojio, 14“Akuatan hatawana ihide dou buo nelik tajia ifau jio aati hullo omuno inyi bebe!”

15Ninyia acaharai ajilohien hulia lidou, ette eyyahak kioro jiaran, “Ikohafatta Betelehem imijuniere eram enne iduoŋ 'to ana, enne itahutak Lamonye jihohoi.”

16Ania, ette isi iruharu kokuak ette inyurana Maria iko Yosefu buo olodole ollo ofer itogol. 17Ninyia igonyuni eyyahak hia inyi, ette isi itisarrahina asayyo honyi ihuo itaniŋuni nyia isi jio ajilo. 18Illillihai nyia aati 'daŋ hunyia itaniŋuni 'to asayyo hunyia iramani eyyahak hulia jihosi. 19Ogottiere nyia Maria erre hunia 'daŋ itua taji honyi buo fe igigilo tesi bebe. 20Acaharai nyia eyyahak kioro hulle itakuacie buo fe itahabuye Hollum te erre 'daŋ hunyia itaniŋuni isi buo fe igonyuni; nyio, onyurani nyia isi erre hua ihuo iramak nyia ajilo jihosi.

Efurana Fure jio Yesu

21 # Luk 1:31 Ihalu esabit abotie, afany nyia oloŋ onno obosierek olodole, ette isi ifurana inyi Yesu, afure ninyia ifurak ajilo jihonyi many hobeŋ honyonyi oyedu inyi.

Isiarani Yesu Ihaji Emojit enne Ittokon

22Ninyia attubai oŋitek hunno ofuarik Maria iko Yosefu ihaniere efahi ono etaliborio ihuo igioroni ifahita huno Mose, iyarai nyia isi leto alia Yerusalem isioriere inyi jio Lamonye. 23Nyio, igioroni nyia ifahita huno Lamonye jio, “Oŋida oloŋehua 'daŋ igialani ahulo Lamonye.” 24Ofuoi nyia buo fe isi isiarana amami arrihai kuyya awolosin arrihai hunne ihumarik ihuo ojiori efahita huno Lamonye.

25Owon nyia obo atulo Yerusalem afure honyi Simion. Ara nyia inyi atulo alla abaŋ Hollum bebe. Itila nyia inyi etalahuna waati Israele. Owon nyia Loholio Olibo jihonyi, 26linyia iramak 'to jihonyi jio, obeŋ adi inyi ojio aye kuak many igonyuniere inyi Olonyimoto linyia ocorok Lamonye. 27Olo nyia Simion Ihaji emojit enne ittokon ihuo iramak nyia Loholio Olibo inyi. Ninyia iyaŋunie ba Yosefu iko Maria lonyi hosi Yesu itua Haji emojit enne ittokon ihaniere jihonyi ihuo ojiori efahita hosi, 28ette Simion ikafuna Yesu; ette isio ahumo jio Hollum ette jiaran:

29“Ihuania, Lamonye, ijiara ani egiamani hoi aye te nelik taji ihuo ijio nyia iyye.

30Nyio, egonyu ni to oŋite hoŋ etalahani

31elle ihuhumak iyye ihosiere waati 'daŋ

32Ara adi inyi afaŋan, jio Alufajak,

buo fe iyaŋuno adi inyi akuatan jio aati hoi Israele.”

33Tania, illillihai nyia esiok Yesu bebe te erre honyi hunyia ikiana Simion. 34Attati Simion imojonia jihosi amuno, ette jiaran jio Maria, honyonyi jio, “Iyaŋuno adi leto olo akuaharu iko etalahuna waati Israele arriai. Ara adi inyi etahuti onno ottu 'to jio Hollum. 35Oliwarik adi aati arriai inyi. Tania, asalanie adi egigilita hutto tajia hosi. Ocuk adi ejiriŋa ataji hoi ihuo ademi onno ofi 'to.”

36-37Owon nyia buo fe nobo ekianani Hollum enne imaruak afure honyi Anna, ŋarri Fanuele, to woyo ba Aser. Oye nyia habi honyi buo isi hamanyuni aŋasi hattarik ijiai. Ihuania arai nyia aŋasi honyi atamuana hottohunik haŋuan#2:36-37 atamuana hottohunik haŋuan : kuyya, ara nyia inyi ehidak aŋasi atamuana hottohunik haŋuan.. Odulo nyia inyi etahabuyo Hollum ta aferutta iko ta amojo Ihaji emojit enne ittokon, ta afanni iko ta arue 'daŋ.

38Jio asaa ania, afany nyia Anna ette isio ahumo jio Hollum, ette ikiana eram leto alia jio aati 'daŋ hunyia itilai 'to etalahuna ono Yerusalem.

Acaharu Hosi Nasaret

39 # Mat 2:23 Ninyia atuhi ba Maria iko Yosefu ehanio hirre 'daŋ ihuo ojiori nyia efahita huno Lamonye, ette isi icaharu ibore gala hosi Nasaret atta fau Galilea. 40Ninyia abolo leto alia, ofuananie nyia buo fe agolon iko olofioro honyi 'daŋ. Owon nyia buo fe inyi iko amuno ono Hollum.

Awanan Leto Yesu Ihaji Emojit enne Ittokon

41Adahatie nyia esiok Yesu Yerusalem aŋasi 'daŋ iyomori eyom ono allaŋan. 42Ninyia ara Yesu aŋasi 'tomon harrihai, ofuoi nyia isi iyom ihuo iyomitarik isi aŋasi 'daŋ. 43Ninyia atuho neyom, acaharai nyia isi abore gala hosi Nasaret, ati arasahino nyia Yesu Yerusalem. Obeŋi nyia isi omijani arasa honyi, 44nyio, igigiloi nyia isi jio owon adi inyi ihiji iluluŋ waati. Teya, adaharai nyia isi oloŋ abotie attati ittifia inyi ihiji hutta haŋ iko orriahat hosi. 45Ninyia abeŋi isi onyurani inyi, ette isi icaharu Yerusalem ittifiari inyi. 46Iholoŋ etahunihi#2:46 Oloŋ etahunihi : Oloŋ etabotie acaharai isi a Naraset to Yerusalem; Oloŋ etarrihi inyiahi isi icaharu Yerusalem; oloŋ etahunihi ottifiai isi inyi ette inyurana itua Haji Emojit enne ittokon. orumani nyia isi inyi itua Haji emojit enne ittokon, ihiji hettiyanak Yudei, elle itayirio jihosi buo fe ifiyo isi. 47Te elofioro iko te etarraŋita honyi, illillihai nyia aati 'daŋ hunyia itaniŋuni 'to inyi. 48Ninyia igonyuni esiok honyi inyi, ette isi illilliha. Attati honyonyi jiaran jihonyi, “Lonyi hoŋ, nyio ihanio iyye ihuania jihohoi? Ettoho ani iko monyohoi ehawwa iko attifia iyye.” 49Itarraŋ nyia Yesu ojio, “Nyio ittifiati itai ani? Itimoti itai jio oŋida ani awon ihaji Monyoŋ?” 50Ati obeŋi nyia isi omijani ikiana inyi anyio.

51Attati Yesu icaharu ikosi Nasaret, amaji ninyia oniŋiere inyi ekiana hosi. Ogottiere nyia Maria erre hunia 'daŋ itaji honyi. 52Ofuananie nyia abolori iko elofioro Yesu buo fe amuno Hollum inyi iko amuno waati inyi ette ifuananio.

Currently Selected:

Luka 2: EA2003

Highlight

Copy