Luka 4

Okemio Sittan Yesu

(Mat 4:1-11; Mar 1:12-13)

1Ninyia acohuno Yesu to hutuk lowore Yordano, ifut nyia inyi iko Loholio Olibo. Teya itadihoro nyia Oloholio alia inyi itua hidiofo, 2diya okemio nyia Sittan inyi oŋitek atomuana aŋuan. Jio oŋitek hua 'daŋ, obeŋ nyia inyi anya obo ariŋ; ania, ette ahure ittohoro inyi ninyia atuhoi oŋitek hua.

3Attati Sittan jiaran jihonyi jio, “Elle ira iyye Lonyi Hollum, iramak amoruo ana hotoyitoi emune.”

4Ati, itarraŋ nyia Yesu ojio, “Igioroni ibuk Hollum jio, ‘Obeŋ atulo amanya te emune ijiai.’ ”

5Attati Sittan iyaru Yesu jio obo amaji onno odu; teya teya, ette itahutana jihonyi olobiehien hutta fau 'daŋ. 6Ette iramana jihonyi jio, “Esio adi ni jihoi elohittok iko esamiti honyi 'daŋ, nyio, isiori nyia isi 'daŋ jihoŋ. Aremik ni isiarana isi jio lia alla awak ni. 7Arai adi hunia 'daŋ ahunohoi elle itahabuyo iyye ani.”

8Itarraŋ nyia Yesu ojio, “Igioroni ibuk Hollum jio, ‘Itahabuye Hollum Lamonye hoi, buo fe igiama jihonyi hama!’ ”

9Attati Sittan iyaru inyi Yerusalem, ette itawojihina inyi isihidi Haji emojit enne ittokon, ette jiaran jihonyi, “Elle ira iyye lonyi Hollum, orruaŋai ahuan hoi tene many ifau. 10Nyio, igioroni ibuk Hollum jio, ‘Iramak adi Hollum ajilohien honyi oŋida irririai iyye.’ 11Igioroni buo fe jio, ‘Ittarrauni adi isi iyye ta ahas hosi jio ŋadi iyye ibosok eejek hoi imoruoi.’ ”

12Ati itarraŋ nyia Yesu ojio, “Ojio abuk ono Hollum jio, ‘Hèkemio Hollum Lamonye hoi.’ ” 13Ninyia atuhok Sittan ekotia honyi 'daŋ hunyia okemiere inyi Yesu, ette inyi leten do addi.

Itterio Yesu Egiama Honyi Galilea

(Mat 4:12-17; Mar 1:14-15)

14Acaharu nyia Yesu Galilea buo owon iko agolon ono Loholio Olibo. Isarrahini nyia asayyo honyi jio afau nyia 'daŋ. 15Ittiyenio nyia inyi ihasik emojiti buo aati 'daŋ ette itahuyo inyi.

Ihari Aati Nasaret Yesu

(Mat 13:53-58; Mar 6:1-6)

16Attati Yesu leten Nasaret, amaji ninyia itabolorunierek inyi, ette leten ihaji emojit to oloŋ Sabatto#4:16 Sabatto : Inyi neyom ono aati Yudei, oloŋ ono ayiri ihuo dominika. ihuo adahatiere inyi toloŋi. Odioto nyia inyi iheniere abuk Hollum, 17ette imojuna abuk ono Isaya ekianani Hollum, ette iwalak agagar, ette inyurana aŋati enne igioronierek jio,

18“Owon Oloholio olo Lamonye jihoŋ,

nyio, onyimu nyia inyi ani ittittoyere asayyo ayijok jio alociaŋak.

Ifahu inyi ani iramaniere ahouno jio efitak,

buo fe inyiahiniere amijio jio aŋodok,

ihohiniere aati hulle ittigemie,

19iramaniere eeŋa,

onno ottuniere Lamonye italahuniere aati honyi.”

20Ninyia atuhok inyi ehenio, obobin inyi agagar nyia, ette inyiahina jio aluahani; buo inyi ette itoŋo ittittoyere. Attati aati hunyia totua haji emojit iyohojonia jihonyi 'tok 'tok. 21Buo inyi ette jiaran jihosi, “Ahana, arai egierita huna ahode te neduo itaniŋuniete itai isi ihenie.”

22Itahuye nyia aati 'daŋ inyi buo fe ette illilliha bebe ta abisan ikenita honyi, ette isi jiaran, “Obiaŋara soho lonyi Yosefu alia?”

23Buo inyi ette jiaran jihosi, “Amijak ni jio iramana adi itai ani ekeni ofioro onno ojio 'to jio, ‘Diktor, itaŋidara ahuan hoi.’ Ihanie buo fe dini ibore gala hatai erre hunyia etaniŋu hohoi jio ihanio iyye Kapernaum.” 24#Yoa 4:44Ette inyi jiaran, “Eramak ni itai hode jio, obeŋi aati iruhi ekianani Hollum otto bore gala hosi.

25“Ahode, eramak ni itai, owoni nyia aŋoruo ehidahi arriai ifau Israele to oŋitek huno Elija. Obeŋ nyia ahide asayo aŋasi hunihoi iko ayafajin ille, ette aati afau ania 'daŋ ihuria. 26Obeŋ nyia Hollum ifak Elija jio obo atulo ta fau Israele, ati ifahini nyia inyi jio obo aŋotte ehidak ninyia amanya 'to Sarafat atta fau Sidon. 27Oluaji nyia buo fe aati hullo owoni 'to iko aŋuai belelio ifau Israele to oŋitek huno Elisa ekianani Hollum. Obeŋi nyia italibori obo olosi arari fe Naman a Siriatanani hama.”

28Ninyia itaniŋuni aati hutto tua haji emojit erre hunia, ette isi 'daŋ iloŋojita bebe. 29Ania, ette isi idioto, ette ipihoro inyi addi to bore gala, ette iyaru inyi ihide doŋe ollo odiha linyia awattari abore gala hosi. Awahi nyia isi isuluna inyi to hide walaŋ. 30Ati ohihisaru nyia inyi tehiji hosi, ette leten addi.

Atulo Ollo Owon 'to Iko Aminiaŋati

(Mar 1:21-28)

31Attati Yesu leten Kapernaum, abore gala otto Galilea, ette ittiyenio aati to noloŋ Sabatto. 32Illillihai nyia isi ettiyenio honyi, nyio, ikiana nyia inyi te elohittok. 33Diya, owon nyia obo atulo itua haji emojit ollo owon iko aminiaŋati, ette inyi iluaha woŋ woŋ jiojio, 34“Eii! Yesu olo Nasaret, nanyio enne iwak iyye jihohoi? Ittu iyye itatturiere hohoi? Amijak ni iyye ŋai. Iyye Olonyimoto Hollum!”

35Ati iŋerejanio nyia Yesu jihonyi, “Oduai! Ojiŋu addi jio atulo alia!” Ette aminiaŋati ania ibuarana atulo alia ifau ihosiere hosi ette ijiŋuna addi jihonyi, buo obeŋ iriafu inyi.

36Illillihai nyia aati 'daŋ, ette ifiyo ahuattek hosi jiojio, “Anyio ikenita huna? Iŋerejanio atulo olo jio aminiaŋa te elohittok iko ta agolon, buo isi ette ijiŋuna addi.” 37Tania, ette asayyo Yesu isarrahina jio afau nyia 'daŋ.

Itaŋida Yesu Aati Arriai

(Mat 8:14-17; Mar 1:29-34)

38Odioto nyia Yesu ta haji emojit, ette leten ihaŋ Simone. Diya, oŋuai nyia hamoni Simone iko anahan huan onno orroho 'to bebe. Attati isi ifiyo Yesu oŋida oluak inyi. 39Attati Yesu leten ette iwotia iger ijotit hamoni Simone, ette ifuhara anahan huan ania buo inyi ette leten addi. Teya teya, odioto nyia hamoni Simone ette ihuhumana jihosi aŋiyo.

40Ninyia iddorro oloŋ, iyaŋunie nyia aati 'daŋ orriahat hosi hunyia owoni 'to iko eŋuati gele gele jio Yesu; buo Yesu ette ittir isi ababo ta ahas honyi ette itaŋida isi 'daŋ. 41Ojiŋuni nyia aminiaŋa addi jio aati arriai, buo oluahai jio, “Iyye Lonyi Hollum!”

Iŋerejanio nyia Yesu jihosi buo ette itik isi ikianari nyio omijani nyia isi jio ara inyi Olonyimoto.

Ittittoyo Yesu Ihasik Imojiti

(Mar 1:35-39)

42Nyia taŋatio motie, iwany nyia Yesu totua bore gala ette leten jio obo amaji onno obeŋi waati. Attati aati ittifia inyi. Ninyia anyurani isi inyi, awahi nyia isi itihotio inyi jio Hèlaha inyi obusaru isi. 43Ati ojio nyia inyi jihosi, “Ijiara buo fe ani alo ittittoyo Asayyo Ayijok huno Olobie Hollum jio aborejin gala hunnomuk, nyio, inyi eram ania ninyia ifahunierek ani.”

44Ania, ittittoyere inyi ihasik emojiti hutta fau Yudea#4:44 Yudea : Jio ekori ana, ottubak inyi aŋacio (Galilea, Yudea, iko Samaria) huno afau waati Israele 'daŋ (imija ekori 1:5 iko 7:17). 'daŋ.

Currently Selected:

Luka 4: EA2003

Highlight

Copy