Kiilanu 1

Ala Hakkili saniyandeŋɛ lajigi koe malalɔŋɛ la

1Teyofili,

N bata a yita i la n na kitabu fɔlɛ tɔ, Isa ka wale nun kawande min bɛ ma bɔɔla a fɔlɔ wagate, 2han Ala ka a layɛlɛ lun min na saŋɛ tɔ. Yannun wo luŋɛ, a be kiila minnu masubɛren, a ka wonu yamɔri Hakkili saniyandeŋɛ sabu la. 3A la faga ɲagankata kɔma, a bɔɔta anu ma a kende la. Tele bi naani kɔtɔ, a tota a fan yitala le anu la seedeɲɔgɔya banba la, a mɛn be Ala la mansabaya la ko fɔla anu ye.

4Lun do, Isa nun anu la talibenu be madɛnden dɔmɛ dɔmɔ koe la, a ka anu yamɔri anu kana bɔɔ Darisalamu, a ko anu ma: «Wo ni wo hakkile to lahire ma Baaba be min jiganden wo ye, iko n ka a fɔ wo ye ki min na.#1:4 Injila Isa Luki be min sɛbɛren, sora 24 haaya 49 fɛlɛ. 5Yaya ka mɔgɛnu lasuwɛ je le tɔ, kɔnɔ wole kan, Ala si naa Hakkili saniyandeŋɛ le lajigi wo ma, a te tele siyama bɔɔ bitugun.»

Isa layɛlɛ koe saŋɛ tɔ

6Lun do, Isa nun a la talibenu to be madɛnden, anu ka a maɲininka, anu ko: «Marige, i be mansaya lasaagila bani Isirayila bɔnsɛ ma kɛ wagate le ba?» 7A ka anu jaabi, a ko: «N Baaba dɔrɔn de be a la wagatenu nun a la tɛmuɛnu masubɛla a la mansabaya saniyandeŋɛ tɔ, wole hajue kana to wonu lɔn koe ma. 8Kɔnɔ wo si sɛnbɛ sɔtɔ Ala Hakkili saniyandeŋɛ kan ma min si naa jigi wo ma, wo butɔ wo si naa ma n na seedenu la Darisalamu saa butɔ, anun Juda duge bɛ tɔ, anun Samari duge bɛ han ka sigi dunuya daŋɛ la.»

9Isa la bandeŋɛ wo fɔla, Ala ka a layɛlɛ saŋɛ tɔ, anu be balaren a ma han luuture ka a dogon anu la. 10Anu ɲanu to be sɔren saŋɛ la, Isa be yɛlɛla ka min, kayi fila bɔɔta anu ma kisanna, donfeŋɛ beema be lajigiren anu ma. 11Wonu ka a fɔ: «Galile kaanu, wo be sɔren yan fenna wo ni to balaren saŋɛ ma? Ale Isa min bɔɔta wo tɛma, Ala ka min nayɛlɛ saŋɛ tɔ, a mɛn si tajigi le iko wo ka a yen yɛlɛla saŋɛ tɔ ki min na.»

Isa la kiilanu la mamadɛŋɛ

12Wo kɔma, anu bɔɔta Jayitunu kɔnkɛ tɔ, saagila Darisalamu. Wo kɔnkɛ be wo saa banba kɛnna le, fayida kilo dɔndɔ tagamaŋɛ le mu. 13Anu dondeŋɛ saa tɔ, anu donta konke tɔ koori boŋɛ do kanna, anu be tola madɛnna ka min na. Piyɛri be anu tɔ, anun Yaya, anun Yaguba, anun Andire; Filipu nun Tomasi; Baritelemi nun Matiyu; Alifa la den kayireŋɛ Yaguba, anun Simɔn a be fɔla min ma Kunkala; anun Yaguba do la den kayireŋɛ Juda. 14Anu bɛ tota ɲɔ anu be timiladiyaren Ala mataraŋɛ la hanigi dɔndɔ la, anu nun musenu, anun Isa nɛɛnɛ Mariyama, anun Isa dɔgɔ kayimanu.

Judasi Isikariyoti faliŋɛ

15Wo lanuma, Piyɛri wulita lun do, a sɔta a nɛɛnɛdɔndɛnu tɛma. Wo ka a taran, anu madɛndeŋɛ si mɔgɔ kɛmɛ mɔgɔ mugan ɲɔgɔn bɔɔ. 16A ko: «N nɛɛnɛdɔndɛnu, Ala Hakkili saniyandeŋɛ ka min fɔ nun Jaburu Dauda tɔ, Judasi la ko tɔ min mata sabu la tagala Isa bita dula, a fɛrɛ bele fɔ wo sɛbɛre ni kamali. 17A be kɔntiren mɔle tɛma nun, mɔ bɛ le be masubɛren kiilaya wale ma koe la. 18Awa, a la wo wali koroŋɛ sɔŋɛ, a ka duge sɔngɔ do san wo la. A boeta a kuŋɛ ma ɲɔ, a bue farata, a tetekenu bɛ bɔɔta. 19Darisalamu kaanu bɛ ka wo koe mɔɛ. Wolo mu wo duge tɔgɔ be fɔla anu tɛn kuma tɔ ‹Hakeledama›, min be a fɔren: basi duge. 20Bayi a be sɛbɛren Jaburu tɔ, a ko:

‹Bɛ ni a sabatidula aɲɛ,

mɔgɔ yo kana sabati ɲɔ.› # 1:20 Jabura, sora 69, haaya 26 fɛlɛ.

A mɛn be sɛbɛren tugun,

‹Do ni sɔ a faliŋɛ la.› # 1:20 Jabura, sora 109, haaya 8 fɛlɛ.

21-22Wolo mu, a bɛnta kayi dɔndɔ ni masubɛ min si ma mɔ fɛ seede la ka a fɔla Isa bata tawuli. A bɛnta wo mɔ ni mɔgɛ masubɛ min be wo mɔ tɛma tɛmuɛ bɛ, wo mɔ nun Marige Isa to be tagamanna ɲɔgɔn na, bɔɔla Yaya ka a lasuwɛ wagate min tɔ, han Ala ka a layɛlɛ saŋɛ tɔ lun min na.» 23Wo butɔ, anu ka mɔgɔ fila dantɛgɛ: Matiyasi anun Yusufu min tɔgɔ Barasabasi, a si fɔ tugun Yusitusu. 24Anu ka mamataraŋɛ ma, anu ko: «Marige, ile min ka mɔgɛ bɛ sondoŋɛ butɔ koe lɔn, a yita mɔ la i be min masubɛren kɛ mɔgɔ fila tɔ, 25a ni ma Judasi faliŋɛ la, kiilaya wale ma koe la, Judasi bata bɔɔ min tɔ a tagata a taga dula.» 26Anu ka tonbola ma, Ala ka Matiyasi yita anu la. Wo butɔ, a sata kɛ kiila tan nun dɔndɛ kunma.

Currently Selected:

Kiilanu 1: MOG

Highlight

Copy