Yaya 21
21
Isa la a yɛtɛ labɔɛ talibi wɔrɔwila ma
1Kɛ koenu tanbi kɔma, Isa mɛn ka a yɛtɛ labɔɔ a la talibenu ma, Tibɛriyadi ba dala. A ka a yɛtɛ labɔɔ ki min na, wolo mu kɛ la. 2Simɔn Piyɛri, nun Tomasi anu be min ma «Fɛrɛŋɛ», anun Natanayeli min be bɔɔren Kaana saa tɔ, Galile duge tɔ, anun Sebede la den kayireŋɛnu, anun Isa la talibi fila donu, anu bɛ le mu. 3Simɔn Piyɛri ka a fɔ anu ye: «Nde ni taga kasinɛti filidula.» Anu ka a fɔ a ye: «Wo mɔ bɛ ni taga.» Anu wulita, anu tagata yɛlɛ kuluŋɛ butɔ, kɔnɔ anu ma fenfen bita wo sue tɔ.
4Ɲɔ la kɛnɛ to keta, Isa be sɔren ba dala, kɔnɔ a la talibenu ma a lɔn ka a fɔla Isa le mu. 5Isa ka a fɔ anu ye: «N na deŋɛnu, yɛgɛ bele wo bolo ba n ni a dɔmɔ?» Anu ka a jaabi, anu ko: «Ade.» 6A ka a fɔ anu ye: «Wo kasinɛti fili kuluŋɛ bolo ɲinma sɔngɛ la, wo si do sɔtɔ le.» Anu ka a ma ɲɔgɔnna le. Wo kɔma, anu ma nɔ a sabaala, bayi yɛgɛ la siya sɛnbɛ bata koloya. 7Talibe min di Isa ye, wo ka a fɔ Piyɛri ye, a ko: «Wo mɔ Marige le mu!» Bɔɔla Simɔn Piyɛri ka wo kuma mɔɛ, a ka a la doroke kiti a tɛ ma, a sɔrɔnta je tɔ. Bayi a be doroki lanma pɛti le donden. 8Talibe doenu ka kuluŋɛ nati anu fɛ, anu be kasinɛti sabaala, a be faren yɛgɛ la. Anu ma yanfa kɛnɛ la, fayida mɛtari kɛmɛ. 9Anu to yɛlɛta kɛnɛ tɔ, anu ka ta kenbue yen ɲɔ, yɛgɛ be saren a kunma, anu mɛn ka dɛgɛ tugun yen sɔngɔ. 10Isa ka a fɔ anu ye: «Wo be bɔɔren yɛgɛ minnu bitala, wo donu nati.» 11Simɔn Piyɛri yɛlɛta kuluŋɛ tɔ, a ka kasinɛti sabaa kɛnɛ tɔ, a be faren yɛgɛ banba la. Anu to ka anu kɔnti, anu tabɛnta kɛmɛ nun bi loolu nun saba ma. Kɔnɔ hali anu la wo siya ma kasinɛti fara.
12Isa ka a fɔ anu ye: «Wo na wo kɔɔjɔbɔɔ.» Talibenu to ka a lɔn Marige le mu, hali dɔndɔ ma suusɛ a maɲininkala, min mu a la. 13Awa, Isa ka a madon, a ka dɛgɛ jigan, a ka a dii anu ma, a ka yɛgɛ tugun fatan anu ma. 14Bɔɔla Isa wulita fagabaganu tɛma, a kɛɲa sabaɲɔgɛ le ka, a yɛtɛ labɔɔ koe la a la talibenu ma.
Isa nun Piyɛri la sumuŋɛ
15Anu to ka kɔɔjɔbɔɛ ban, Isa ka Simɔn Piyɛri maɲininka, a ko: «Simɔn, Yaya la den kayireŋɛ, i be n kanuren tanbi kɛnu bɛ la ba?» A ka a jaabi: «Iyon, Marige, ile ka a lɔn ka a fɔla i di n ɲɛ.» Isa ka a fɔ a ye: «Ka a ɲɔgɔnna le, i ni na saakadeŋɛnu daɲini.» 16A mɛn saagita a maɲininkala, a kunɲama filaɲɔgɛ la: «Simɔn, Yaya la den kayireŋɛ, i be n kanuren ba?» A ka a jaabi: «Iyon, Marige, ile ka a lɔn ka a fɔla i di n ɲɛ.» Isa ka a fɔ a ye: «Awa, i ni n na saakanu dankun.» 17A ka a maɲininka a kunɲama sabaɲɔgɛ la, a ko: «Simɔn, Yaya la den kayireŋɛ, n di i ye ba?» Piyɛri suunuta, bayi Isa ka a ɲininka a kunɲama sabaɲɔgɛ la, ka a di a ye. A ka a jaabi: «Marige, ile ka koe bɛ lɔn, ile ka a lɔn i di n ɲɛ.» Isa ka a fɔ a ye: «Awa, n na saakanu daɲini. 18N ni tɔɲa beeyareŋɛ pɔsi fɔ i ye: i be kamarenya tɔ wagate min tɔ, i be i tɛ takitila i fanna, i ni tagaman i dita tagala dula yo tɔ, i si taga. Kɔnɔ i tini kɔtɔya, i si i bolenu lafonti, mɔgɔ do ni naa i tɛ takiti, a ni i doni dula tɔ, i bele diren tagala ka min na.» 19Isa ka wo fɔ le, a ni Piyɛri faga ɲa yita, Piyɛri ni naa Ala la nɔɔra makɛnɛn a la faga sabu la. A to banta wo fɔla, a ka a fɔ a ye: «N jokki.»
Talibe min di Isa ye
20Wo kɔma, Piyɛri ka a firifiri. Talibe min di Isa ye, a ka wo yen a be anu jokkiren. Ale le sɛnbɛta Isa ma wura la dɔmɛ dɔmɔ tɛmuɛ, a ka a maɲininka min be naala a janfala. 21Awa, Piyɛri ka wo talibe yen, a ka Isa maɲininka, a ko: «N Marige, kɛ kan go, fen be naala kɛ masɔtɔla?» 22Isa ka a fɔ: «Ka n dita a ni to han n be tanala wagate min tɔ, wo be fen jarala ile ma? Ile ni n jokki.» 23Wo butɔ, kuma do tagamanta nɛɛnɛdɔndɛnu tɛma, a fɔla wo talibe te faga. Kɔnɔ Isa ma a fɔ Piyɛri ye, wo talibe te faga. A ka a fɔ le, aa ka a dita le a ni to han a be tanala wagate min tɔ, aa wo be fen jarala Piyɛri ma?
Sɛbɛre kunduse
24Wo talibe le be wo koenu seede bɔɔla, a ka anu sɛbɛ ɲɔgɔnna le. Mɔ ka a lɔn a la seedeɲɔgɔya mu tɔɲa le la.
25Isa ka ko gbɛtɛ siyama tugun ma le. Ka wo bɛ sɛbɛta dɔndɔ dɔndɔ le la nun, n ma laa a la ka wo kitabu sɛbɛreŋɛnu si kun nun dunuya butɔ. ⸂Amina⸃
Currently Selected:
Yaya 21: MOG
Highlight
Share
Copy
Want to have your highlights saved across all your devices? Sign up or sign in
