Yaya 20

Isa tawuli koe gabure tɔ

1Isa la mande tele saba luŋɛ tabɛnta sandeŋɛ min ma, Mari Magidala kaa tagata gabure dula, ɲɔ la kɛnɛ dibe ma. A la kereŋɛ ɲɔ, a ka a yen kure min be hibbɛren gabure da la, wo bata bɔɔ. 2Wo butɔ, a borita ka taga ke Simɔn Piyɛri nun talibe do ma, min di Isa ye. A ka a fɔ anu ye: «Ee, anu ka mɔ Marige fure jigan gabure butɔ! Mɔ ma a lɔn anu be a saren ka min na.»

3Wolo ka a ma, Piyɛri nun wo talibe bɔɔta, taga koe la gabure dula. 4Anu fila bɛ be borila ɲɔgɔn fɛ. Kɔnɔ wo talibe doe ka Piyɛri to bore la. A fɔlɔ keta gabure da la. 5A butinta a ni gabure butɔ fɛlɛ, a ka kasange yen saren, kɔnɔ a ma don. 6Simɔn Piyɛri nata sakkitɛ la, ale donta gabure butɔ, a ka wo kasange yen saren, 7anun kuta min be mamilinden Isa kuŋɛ ma nun. Wo kuta bele saren kasange dula, ale mamilindeŋɛ be saren a katima. 8Wo kɔma, wo talibe min fɔlɛ keta gabure da la, ale tugun donta a ka ɲɔ lasaga, a dɛnkɛnɛyata. 9Wo tɛmuɛ, talibenu ma Ala la sɛbɛre kɔtɔ fahamu betunna, a fɔ koe la, a fɛrɛ bele fɔ Isa ni tawuli a ni bɔɔ fagabaganu tɛma. 10Wo kɔma, talibenu tasaagita anu bata.

Mari Magidala la Isa yen koe

11Kɔnɔ wo ka a taran, Mari be sɔren bara tɔ gabure kɛnna, a be dila. A to be dila, a butinta, a ka gabure butɔ fɛlɛ. 12A ka maleka kuta beema tigi fila yen sigiren, Isa fure be saren ka min na nun. Dɔndɛ be a kun sa dula, doe be a kɛn sa dula. 13Wonu ka a fɔ a ye: «N na, i be dila fenna?» A ka a fɔ anu ye, a ko: «Bayi anu ka n Marige jigan, n ma a lɔn anu be a saren ka min na.» 14A to banta wo fɔla, a ka a kɔma tafɛlɛ, a ka Isa yen sɔren, kɔnɔ a ma a lɔn sɔtɔ a ma Isa le mu. 15Isa ka a fɔ a ye: «N na, i be dila fenna? I be ɲɔmɔ ɲinila?» Kɔnɔ a be toren muse ye, suntu kantalá le mu. A ka a fɔ a ye: «Baaba, ka ile le ka a fure jigan yan, i be a saren ka min na, i ni ɲɔ yita n na, n ni taga a jigan ɲɔ.» 16Isa ka a fɔ a ye, a ko: «Mari!» Mari ka a ɲamatelen a ma, a ka a fɔ ye: «Rabuni!» Wo be a fɔren de Hebure kuma tɔ «N karamɔgɔ!» 17Isa ka a fɔ a ye: «I kana maga n na, bayi n ma yɛlɛ n Baaba dula betunna. Kɔnɔ taga n nɛɛnɛdɔndɛnu dula, i ni a fɔ anu ye, n be yɛlɛla nde nun wole Baaba dula, min mu nde nun wole la Ala la.»

18Wo butɔ, Mari Magidala kaa tagata wo ɲamakaran talibenu ye, a ko aa a bata Marige yen, a mɛn ka a la wo kiilá fɔ anu ye.

Isa la a fan nabɔɔ koe a la talibenu ma

19Wo sandeŋɛ, ɲɔ to be pinpila, talibenu be madɛnden boŋɛ do butɔ. Anu ka bondanu mabalan anu kunma, bayi anu be kilanden Yahude kuntigenu la. Wo butɔ, Isa nata bɔɔ anu ma, a sɔta anu tɛma, a ka a fɔ anu ye: «Jususa ká to wo ye!» 20A to banta wo fɔla, a ka tɛlɛpatuenu yita anu la, minnu be a bolenu nun a bu sɔngɔ ma. Wo butɔ, talibenu ɲagalinta Marige yen koe la. 21Isa mɛn tasaagita a fɔla anu ye: «Jususa ká to wo ye! Iko n Baaba ka n kii ki min na, nde tugun be wo kiila ɲɔgɔnna le.» 22A to banta wo fɔla, a ka a da fɔɲɛ fe anu ma, a ka a fɔ anu ye: «Wo Ala Hakkili Saniyandeŋɛ labita! 23Wo tini diɲa minnu la junubenu ma, wonu la junube bata kafari. Ka wo ma diɲa minnu la junubenu ma, wonu tɛŋɛ te kafari.»

Tomasi la dɛnkɛnɛyabaliya

24Awa, Isa bɔɔta anu ma wagate min tɔ, wo talibi mɔgɔ tan nun fila tɔ, mɔgɔ dɔndɔ bele ɲɔ, wolo mu Tomasi la, anu be min ma «Fɛrɛŋɛ». 25Wolo mu, talibe doenu tota a fɔla a ye: «Mɔ ka Marige yen de!» A ka anu jaabi, a ko: «Ka nde ma arantuma banban baa yen a bolenu tɔ, ka n ma n bolo soliŋɛ ladon wo sɔɔ baanu tɔ, ka n mɛn ma n bole ladon a baa tɔ min be a bu sɔngɔ tɔ, n te laa a la muku!»

26Tele sagin na tanbireŋɛ, Isa la talibenu mɛn tatota boŋɛ butɔ, anu nun Tomasi bɛ le wo lun. Awa, Isa mɛn tanata sɔ anu tɛma, adun bonda bɛ be mabalanden anu kunma. A ka a fɔ anu ye: «Jususa ká to wo ye!» 27Wo kɔma, a ka a fɔ Tomasi ye, a ko: «I bolo soliŋɛ madon yan, i ni tɛlɛpatuenu fɛlɛ n bolo fila tɔ. I bole mɛn madon, i ni a sa n bu sɔngɔ ma. I kana ma dɛnkɛnɛyabale la de, i ni dɛnkɛnɛya!» 28Wo butɔ, Tomasi ka a jaabi, a ko: «N Marige Ala!» 29Isa ka a fɔ a ye: «Tomasi, i to bata n yen, i bata dɛnkɛnɛya. Hɛra be mɔgɛnu ye, minnu bata dɛnkɛnɛya hali anu ma n yen.»

Kɛ kitabue sɛbɛ kuŋɛ

30Awa, Isa ka kabanakoe gbɛtɛ donu siyama tugun ma a la talibenu ɲala, minnu bele sɛbɛren kɛ kitabue tɔ. 31Kɔnɔ kɛnu be sɛbɛren de, alako wo ni dɛnkɛnɛya ka a fɔla Isa mu Ala la mɔgɔ masubɛreŋɛ le la, a la den kayireŋɛ. Wo butɔ, ka wo dɛnkɛnɛyata a ma, wo si kise sɔtɔ le a tɔgɛ sabu la.

Currently Selected:

Yaya 20: MOG

Highlight

Copy