Kiilanu 2

Ala Hakkili saniyandeŋɛ la jige

1Hɔrɔya sale tanbi kɔma, tele bi loolu#2:1 Wo sale mu Sɛnɛ tɛgɛ sale le la Yahudenu ye. , Isa la talibenu bɛ labɛndeŋɛ be madɛnden kan dɔndɔ. 2Kulɛ do bɔɔta saŋɛ tɔ kisanna, iko fɔɲɔ banba kulɛ, wo kulɛ ka boŋɛ butɔ bɛ tabɔɔ anu be madɛnden ka min na. 3Anu ka nɛŋɛ la muluŋɛnu yen anu be toren iko ta. Wo nɛŋɛnu fatanta, a dɔndɔ dɔndɔ sigita a bɛ kunma. 4Wo butɔ, Hakkili saniyandeŋɛ be sabatiren anu bɛ tɔ, wo kɔma anu bakkuta sii gbɛtɛ la kumanu fɔla iko Ala Hakkili saniyandeŋɛ ka a dii anu ma ki min na dɔndɔ dɔndɔ.

5Wo ka a taran, Yahude Ala ɲalakilan donu be wagate do latanbiren Darisalamu, minnu be bɔɔren dunuya jamanɛ bɛ tɔ. 6Awa, wo wuumɛ kulɛ be bɔɔla wagate min tɔ, jama naata madɛn ɲɔ, anu kɔntɔfilita bayi anu bɛ dɔndɔ dɔndɔ be anu sɔtɔ kuma mɔɛla talibenu da tɔ. 7Wo ka anu kɔntɔfili han a mata anu ye kabanako la, anu ka a fɔ: «Kɛ mɔgɛnu minnu bɛ be kumala kɛ la, Galile kaa ma anu la ba? 8Mɔ bɛ nɔn be mɔ tɛn kuma mɔɛla anu la kama le, mɔ sɔtɔta kuma min tɔ? 9Mɔle minnu be bɔɔren Parate jamanɛ, anun Mede jamanɛ, anun Elamu jamanɛ, anun mɔle minnu be bɔɔren Mesapotami, anun Juda, anun Kapadosi, anun Pɔntu, anun Asi, 10anun Firigi, anun Panfili, anun Misira jamanɛnu tɔ, anun Libi jamanɛ dula donu tɔ, minnu be Sirɛni saa mafanna, anun mɔle minnu be bɔɔren Rɔmu saa butɔ, 11anun mɔle Kirɛti mɔgɛnu, anun Araboenu, Yahudenu ba, minnu donta anu la diina tɔ ba, mɔ bɛ be anu kulɛ mɔɛla, anu be Ala la kabanakoenu ɲamakaranna mɔ sɔtɔ kuma le tɔ.» 12A be anu bɛ mafuren ka kɔntɔfili, anu tota a fɔla ɲɔgɔn ye: «Kɛ kɔtɔ mu fen na?» 13Donu tugun be anu majelela, anu be a fɔla: «Kɛnu be siisiren beere nama le la!»

Piyɛri la kawande

14Wo butɔ, Piyɛri nun kɛ kiilá tan nun dɔndɛ doenu wulita. Piyɛri ka a kulɛ mayɛlɛ, a ka kiila lake anu ma, a ko: «Wole Juda kaanu, anun wole minnu bɛ be wagate do latanbiren Darisalamu: wo ni wo tolomasɔ n na kumanu la, wo ni a lɔn: 15kɛ mɔgɛnu bele siisiren iko wole be a miraren ki min na, bayi saguma le mu ka#2:15 Yahudenu si beere min, kɔnɔ anu te a ma saguma.. 16Kɔnɔ Ala ka min fɔ nun annabi Soyɛli sabu la, wolo be maren ka. A ko:

17‹Ala ko: n si min ma dunuya la baŋɛnu tɔ, wolo mu kɛ la:

n si n Hakkili saniyandeŋɛ lajigi Adamadeŋɛ bɛ le ma:

wo la den kayireŋɛnu anun wo la den musereŋɛnu si nabiyonmɛ kuma fɔ le.

Wo la kamareŋɛnu si laamutenu yen,

wo la kayibanu tugun si kibo le.

18 Iyon, n si n Hakkili saniyandeŋɛ lajigi

n na jon kayenu nun n na jon musenu ma wo tɛmuɛ,

anu si nabiyonmɛ kuma fɔ.

19 N si kabanakoenu yita saŋɛ tɔ,

n si laamutenu yita duge kunma,

minnu si ma base nun ta nun luuture siisinɛŋɛ la.

20 Yannun Marige la luŋɛ ni ke,

wo lun banba makilandeŋɛ,

tele si yɛlɛman a ni ma iko dibe,

kare si yɛlɛman a ni wulen iko base.

21 Ka mɔgɔ min yo be yigi saren Marige tɔgɛ la, wo tigi si kisi le.› # 2:21 Annabi Yoweli, sora 3, haaya 1 han 5 fɛlɛ.

22Wole bani Isirayila bɔnsɛnu, wo kɛ kuma lamɔɛ: Ala le ka Isa Nasarɛti kaa sɔ wo ye: a ka a yita wo la, ko sɛnbɛmanu nun kabanakoenu nun laamutenu le fɛ, a ka minnu ma ale la ko tɔ wo tɛma, iko wole yɛtɛ ka a lɔn ki min na. 23Ale Isa to donta wo bolo, wole tugun ka a to Ala la sariya lɔnbalenu sagoe tɔ, anu ni a banban lɔgɔ bangalandeŋɛ tɔ. Wo ka a la ko lamɔdɛ ɲɔgɔnna le, kɔnɔ wo bɛ Ala ka a sa ɲɔgɔnna le bɔɔla hau a la lɔnnɛ butɔ. 24Ala ka faga dumɛ bɔɔ a ma, a ka a talawuli. Iyon, faga ma nɔ sɛnbɛ sɔtɔla a kunma. 25Dauda ka ale la ko fɔ, a ko:

‹N be Marige yenna n ɲakɔtɔ wagate bɛ tɔ,

bayi a be n bolo ɲinma tɔ, alako n kana lamaga.

26 Wolo mu n juse be ɲagalinden,

n nɛŋɛ be lafulenden,

iyon, n bali bangue tugun si a sulen lannanteya butɔ.

27 N ka a lɔn, ile Alatala, i te n nɛ aɲɛ laakira,

i te sɔn i la mɔgɔ saniyandeŋɛ ni toli.

28 I bata malakise kilanu yita n na.

I ɲakɔtɔ si n juse lafa sɛɛwa la.› # 2:28 Jabura, sora 16, haaya 8 han 11 fɛlɛ. »

29Piyɛri mɛn ka a fɔ, a ko: «N bareŋɛnu, a bɛnta n ni wo mɔ benba Dauda la ko fɔ wo ye a beeyareŋɛ la, ka a fɔla a fagata, a baadɛta, a saare ɲan be sabatiren mɔ tɛma han bi. 30A mu nabiyonmɛ la, a mɛn be a lɔnden Ala bata lahire jigan a ye, a ka a kali Dauda bɔnsɛ mɔgɛ do si sigi a la mansa tintiŋɛ tɔ, 31a mɛn ka a lɔn Ala la ale mɔgɔ masubɛreŋɛ si naa tawuli le, awa, a ka ale len na ko fɔ, a to be a fɔla:

Ala ma a aɲɛ laakira, a bale ma toli.

32Iyon, Ala bata ale Isa le lawuli. Mɔ bɛ mu wo koe seede la. 33A to yɛlɛta, a sigita a Baaba Ala bolo ɲinma tɔ, jɔnɔn Ala ka a Hakkili saniyandeŋɛ don a bolo iko a ka lahire jigan a ye ki min na, ale tugun ka a lajigi mɔ ma, awa wo yɛtɛ be kɛ-lɛ mɔɛren kɔtɛ, wo mɛn be a yenden. 34Mɔ ka a lɔn, Dauda yɛtɛ ma yɛlɛ saŋɛ tɔ, a nɔn ka a fɔ, a ko:

‹Marige Alatala ka a fɔ n Marige ye: i majigi n bolo ɲinma tɔ,

35 han n ni i jaguenu ma i kɛnsɔfeŋɛ la.› # 2:35 Jabura sora 110, haaya 1 fɛlɛ.

36Awa, bani Isirayila bɔnsɛ bɛ ni a lɔn yati, sikkɛ yo bele wo tɔ: wole yɛtɛ ka Isa min banban lɔgɔ bangalandeŋɛ tɔ, Ala bata wolo ma Marige la, a mɛn bata a ma a la mɔgɔ masubɛreŋɛ la.»

Tuubɛlá fɔlɛnu

37Awa, mɔgɛnu to ka wo mɔɛ, wo ka anu nɛ tɔɔrɔ, anu ka a fɔ Piyɛri nun kiila doenu ye: «Mɔ bareŋɛnu, mɔ ni fen de ma?» 38Piyɛri ka anu jaabi, a ko: «Wo tuubɛ, jɔnɔn wo ni suwɛ je tɔ dɔndɔ dɔndɔ Isa tɔgɛ la, Ala la mɔgɔ masubɛreŋɛ#2:38 A fɔla Ala la mɔgɔ masubɛreŋɛ, wo be a fɔren de Al-Masihu, alako wo la junubenu ni kafari. Wo butɔ, Ala si wo kɔ a Hakkili saniyandeŋɛ la. 39Wo ni a lɔn, Ala ka wo lahire jigan de wole ye anun wo juruyanu, anun mɔgɛnu ye minnu bɛ be dula yanfama tɔ, mɔ Marige Ala si min bɛ madon a la.» 40Piyɛri mɛn ka anu lasii sɔɔbɛ la, a ka anu kawandi kuma siyama la, a ko: «Wo ni bɔɔ bi mɔgɔ telenbalenu kɔma, alako wo ni kisi.» 41Awa, minnu ka Piyɛri la kuma bita, wonu lasuwɛta je tɔ. Wo lun yati, mɔgɔ wulu saba ɲɔgɔn sata dɛnkɛnɛyabaganu kunma.

42Anu be timiladiyaren kiilanu la karaŋɛ ma, anun anu bolofeŋɛ fatan koe, anun dɛgɛ makuntu koe, anun Ala mataraŋɛ la. 43Kabanakoenu nun misali siyama tota mala kiilanu sabu la, wolo ka a ma mɔgɛ bɛ tota kilanden. 44Dɛnkɛnɛyabaga bɛ be bɛnden ko dɔndɔ ma, mɔgɔ dɔndɔ tɛŋɛ mu a bɛ tɛŋɛ le la. 45Anu tota anu la duge nun anu bolofeŋɛnu sanna, ka wonu sɔŋɛ fatan mɔgɛnu ma minnu bɛ be kɔntɔfile tɔ. 46Lun go lun anu be timiladiyaren hanige dɔndɔ la ka madɛn Ala batu bon banba tɔ, anu ni kɛnɛ dɛgɛ makuntula anu la boŋɛnu tɔ, anu mɛn ni dɔmɛ fatan ɲɔgɔn tɛma sɛɛwa banba nun jusu teleŋɛ la, 47anu be Ala tantula, anu mɛn be diyaren mɔgɛnu bɛ ye. Lun go lun, Marige tota mɔgɛnu sala talibenu la mamadɛŋɛ kunma, a ni anu lakisi.

Currently Selected:

Kiilanu 2: MOG

Highlight

Copy