LUKA 12

Li-tapawp nai molam y pany hai nai

(Mt 10.26–27)

1Huna nai khumi mipui sang neangneang achiu lengleang na pa-rei achu nai thym khala ly Isu my abangnaichi teng leu thui amteaung i, “Pharisaichi i angbo, tapawp naira y ly amkym u.#Mt 16.6; Mk 8.15 2Na i py amteng y ai nai heu nai ly ha py by y; pany y ai nai apha nai py ha py by y.#Mk 4.22; Lk 8.17 3Hunai deaungkho y nangchi i kaveng y thui nai ngierei ly kangvang y thai hai ai; panglai katem theung y kano keung y nangchi i leu thui nai ly amphu salo y aeu hai ai.

Jei ai avo nai keung

(Mt 10.28–31)

4“Naibaly ahawichi awi, kang thui pi, Tlang y padei iy, huni bo y ati takhra so bi thai y naichi ai ly jei u moh; 5na i py nangchi ly ami ai jei ai nai tla mo, nanai kang thui pi rym ai; padei nai bo y py ngari angawm y aphi bi pajau ai nai keung ai phai jei u; ne, huni ai phai jei u, kang napi kai ly. 6Li tavo chy pangrei y pia nyhrei jo u vai y a? 7Na i py nichi theung y Tameuh ly ha py takhawi vai y. Nangchi i sam amai malawn py kati be na a. Jei u moh; nangchi ly li tavo chy neangneangchi tleaung y py teng keh na a.

Krista ai Areng ne, nanai pany nai hawi apha nai keung

(Mt 10.32–39, 12.23, 10.19–20)

8“Naibaly kang thui pi, Amichi i mo y kai ai apha y nai ngierei ai ly Tameuh i kani pri i amtaw thau naichi i mo y Khumi i Chapo my ni ai apha hai y teang ai. 9Na i py amichi i mo y kai ai apha nai ai ly Tameuh i kani pri i amtaw thau naichi i mo y apha hai teang ai. 10Naibaly Khumi i Chapo ai cheh nai ngierei ai ly pahen pi ai: na i py Phailo Kachai y khrairei thui tamawn nai khumi ai ly pahen pi y ai.#Mt 12.32; Mk 3.29 11Naibaly achura yhm i khumichi hawi, arengchi hawi, miteaung kehchi i mo y ang hawi nai khala y, ‘Mana katlau ai mo? Ati leu kathui ai mo? nanai paleung adi adiu nai awm u moh;#Mt 10.19–20; Mk 13.11; Lk 21.14–15 12huna nai neng khala ly nangchi i thui ai nai ka-vo ly Phailo Kachai my ang patiu ai,” napi.

Kanang ka-khum hawi pata nai

13Naibaly khumi mipuichi theung i ami mo leaungrei ly Isu teng y, “Sara, jai teng y kai ai yhmtheaung paji ai nai thui pi kyh,” napi. 14Na i py ni my ly mymy teng y, “Nai awi, nangni i tlang tleaung y tara chih nai keung hawi, yhmtheaung paji ai nai keung y kai ai sa nai ly ami mo?” napi. 15Naibaly mymy ly nichi teng y, “Amkym u ly, paleung ano lyhlyh naira y ly akry u: yhmtheaung nang naira y ly khumi heng lawh nai ny y leang,” napi.

16Naibaly mymy ly nichi teng y pata nai leu thui i, “Khumi kanang leaungrei awm i, my i hlau khri pa-rei pa-tiu thym na. 17Naibaly adawn i, ‘Mana kasa ai mo hi ly? Kai i choh khai achu ai naira by y ly,’ napi. 18Mymy my teang, ‘Hina nai kasa ai; kai i choh beuchi aphrei ai i, hini tleaung y kalen sa iy, hu y ly kai i choh hawi yhmtheaung bawibawi khai achu ai. 19Naibaly kai i hengra teng y, Hengra awi, saneng neangneang i vui nang yhmtheaung pateung achu bo he; anawn ly, cho nei, amo theu naimy awm ba, kanapi ai,’ napi. 20Na i py Tameuh my ni teng y, ‘Kamthu awi, vai dym ly nang i hengra kang la pi ai bo; naibaly nang i yhmtheaung pateung achu nai ly ami nga ai mo?’ napi. 21Amy i vui yhmtheaung pateung iy, Tameuh ai amkhaw y pui nai ly hinai kamta awm reng,” napi.

Tameuh ai ym nai

(Mt 6.25–34)

22Naibaly mymy ly abangnaichi teng y, “Hunai deaungkho y kang thui pi, ‘Kaichi ati cha ai mo? nanai nangchi i hengra i vui hawi, ‘Kaichi ati ateaung ai mo? nanai nangchi i tlang i vui py paleung bi u moh. 23Cha ai nai tleaung y ly hengra ty keh, ateaung tleaung y py tlang ty keh. 24O-achi ai phai dawn u cham; nichi ly choh py tiu y, tyn py tyn y, choh pai py choh beu py by y; na i py Tameuh my nichi ai pacho reng; nangchi ly tavochi tleaung y mana tanrei teng keh mo? 25Naibaly nangchi theung y huna nai paleung bi nai deaungkho y amy i jeng mang miurei asang hai thai nai ly ami awm mo? 26Hini chy malawn py so u thai y pui nai ly, ati mana nai ati takhrara y paleung bi u lawh?

27“Jeupawmchi i prau nai sai dawn cham: hunichi ly kalop py so y, palo py kyn y: na i py kang thui pi, Solomon malawn py mymy i nang nai bawibawi amthyp khala y hini harei tahm matem py by y.#1 Ar 10.4–7; 2 Neng 9.3–6 28Hunaibaly nangchi ym nai di naichi awi, daichi acha kangheng, vaini ati heng iy khawn mang y ly mai y teih ryp nai ai malawn py Tameuh my huna tanrei pateaung baly, hunichi tleaung y ly nangchi ai ateaung mana tanrei ang pei ai mo?

29“Naibaly nangchi cha ai nai, nei ai nai hau u lyhlyh moh, naibaly paleung adi adiu nai kamta py awm u moh. 30Huni atiti bawibawichi ly khaileaung pri y cheng cheaungkhangchi my hau; na i py hunichi ly nangchi i aly aeang nanai Ngampo my ang pany pi yb nai bo. 31Mymy i peang nai phai hau u, naibaly hunichi py ang pei panawi bi ai mang.

Kani pri i yhmtheaung

(Mt 6.19–21)

32Kamkawm di naichi awi, jei u moh; Ngampo my ka-peang ang pei nai ly khri pa-rei ang kawn. 33Nangchi i awm nai ngierei jo u ly, khumi ngarichi teng y pei u; kani pri mang y kangviuchi tym y naira y, thaikem my cho y naira y, tangka yh tangym thai y nai hawi, yhmtheaung tamo pajau y nai py so u. 34Nangchi i yhmtheaung awm naira ngierei y nangchi i paleung py awm ai.

Dawn ryh patyh nai miseaungchi

35“Neina akyn iy nangchi i maisi py angveaung jo nai awm u ly;#Mt 25.1–13 36yhmkeung my aju palyn nai pawi i dengdairei vawi nai khala y ang tym iy, katheu takhei baly, paeaung praw thai ai nai ajeng rym naichi kamta awm u.#Mk 13.34–36 37Yhmkeung jeu nai neng khala y miseaung ajeng rym naimy niu nai miseaungchi ai ly taham hawi ai; meitang khyp kang thui pi, ni my ly neina akyn ai i, mymychi ai biu o hai iy nichi ai kry ai. 38Naibaly aneng hyh y mo, angthau nai neng khala y mo ang tym iy huna nai niu baly, huni miseaung ly taham hawi ai. 39Na i py hini ly pany u, yhmkeung my kangviu khumi tym ai nai neng pany i khyly mymy ly o rym ai i, mymy i yhm ateng pi vau ai nai khai su y leang bo.#Mt 24.43–44 40Nangchi py aeng ryhryh naimy awm u, nangchi i dawn y nai neng khala y ly Khumi i Chapo ly ang jeu ai,” napi.

Ka-ym awm nai hawi ka-ym by y nai miseaung

(Mt 24.45–51)

41Naibaly Petera my, “Areng, hini pata nai leu ly kaimychi my tlairei ai thui pi nai a, khumi bawibawichi ai thui pi nai a?” napi. 42Naibaly Areng my, “Hunaibaly dengtheaungchi ai kry iy avo nai neng tleirei y biu an dawn pi ai nai yhmkeung i khai nai yhmtheaung kry nai keung ka-ym kaawm cheng nai ly ami mo? 43Mymy i yhmkeung ang jeu nai neng khala y miseaung huna nai kamta sa nai ai niu nai ly taham hawi ai. 44Meitang khyp kang thui pi, mymy i awm nai bawibawichi tleaung y kry keung y khai ai. 45Na i py huni miseaung ly mymy i paleung y, ‘Kai i yhmkeung ly tym y leang rai mang,’ na iy miseaung neampachy neampacho ai pakhau iy cha nei nai pavui khyly, 46huni miseaung i yhmkeung ly ni i dawn y nai kani y, pany y nai neng khala y ang jeu ai, naibaly khri pa-rei chip ajiu piu iy, khumi ka-ym by y naichi i nga nai kamta nga hai ai. 47Yhmkeung i kangai pany se iy, aeng rym y nai hawi, yhmkeung i kangai py so y nai miseaung ai ly neangneang pakhau ai. 48Na i py pany y nai i tlang tleaung y pakhau ai nai ataing pa-rei atiti sa nai khumi ai ly maidenrei chy pakhau khyh ai. Naibaly ami teng y neangneang pei baly mymy teng y neangneang hnei ai; amichi my ami teng y neangneang au baly mymy teng y ang hnei ra hnei ra ai.

Isu ly aly hai y naira tym hai nai

(Mt 10.34–36)

49“Khaileaung pri y mai pala ai nai kang jeu nai ne; vai py kang dudu jau khyly kana kai y! 50Na i py kai baptisma nga ai nai awm rai, huni law y nai ryrei ly kai khri taho amchei na ly.#Mk 10.38 51Kai ly khaileaung pri y aly naira tym hai ai nai kang jeu, nanai dawn u lawh a? Ny y leang, kang thui pi, amprei hai ai nai kang jeu nai teu; 52vai dengdairei dengtheung harei y khumi leaung pangrei akhawi takhra ai, leaung thomrei my leaung nyhrei ai, leaung nyhrei my leaung thomrei ai tiu ai; 53nichi ai akhawi hai takhra iy, chapo my ampo ai, ampo my chapo ai: amhm my chaniu ai, chaniu my amhm ai: amni my lengo ai, lengo my amni ai tiu ai,” napi.#Mik 7.6

Neng katui pany thai nai

(Mt 16.2–3)

54Naibaly mymy ly khumi mipuichi teng y, “Nangchi ly ni dym mang y khupanym theu nai niu baly, ‘Kani nai ai bo,’ na u praw lawh; naibaly ne khyp ryp veng. 55Naibaly tokalawi ali aho nai pany baly, ‘Khri pa-rei bi ai,’ na u; naibaly ne khyp ryp veng. 56Tapawp naichi awi, nangchi ly khaileaung pri hawi, kani awm nai sai py hawihai pany kawp be, ati mana nai vai i neng awm nai sai ly pany kawp y lawh a?

Aly y nai keung hawi ka-lyra sa nai

(Mt 5.25–26)

57Ati mana nai y nangmychi i hawi naira ly chih u y lawh a? 58Naibaly tara chih nai keung i mo y nang ai seu nai khumi hawi nang tako nai kha y ly, tako hawi nai thym khala y amrawi ai naira hau tanga; ti y baly ni ly tara chih nai keung i mo y ang pahawi ta-li ai i, tara chih nai keung my ly pajeng nai keung teng y ang au iy, pajeng nai keung my ly theaung y ang paeung lawh na. 59Kang thui pi, pia sei chy py nang pe angym y ryrei ly hu i dengdairei nang pipi theu ai ny y,” napi.

Currently Selected:

LUKA 12: KCL02

Highlight

Copy