LUKA 11

Isu my chiu sa nai patiu pi nai

(Mt 6.9–13, 7.7–11)

1Naibaly hina nai awm, mymy ly mani meingtym y mo chiu sa i, chiu sa pajau kha y abangnaichi theung y leaungrei my ni teng y, “Areng, Johan i mymy teng y abangnaichi ai chiu sa nai reita patiu nai kamta, kaichi ai py patiu teang kyh,” napi. 2Naibaly ni my ly mymychi teng y, “Nangchi chiu sa khala ly hina nai thui u; Ngaai, nangmy amyn tahm khai nai awm sy; nangmy i peang nai tym sy. 3Kaichi i kani tleirei cha ai nai ly pei ba. 4Kaichi i kamngo pahen kyh ba, ati mana nai mo nabaly kaichi py kaichi i atiti kalai bawibawi pahen nai ne. Parawi naira y pahawi moh ba,” napi.

5Naibaly Isu my nichi teng y, “Nangchi theung y ami mo ahawi awm sy, aneng hyh y mymy teng y chei iy, 6‘Nai awi, tako phi thomrei piu pei kyh; kai i ahawi khuleaung chei nai kai i yhm y anga i, ni ai pacho ai nai kai ati sai py by y,’ ti khyly, yhm theung i khumi my, 7‘Khru khra hai reng moh; vai ly katheu py kho pawn bo i, kai i chanauchi py i pawn bo; angthau iy kang pei thai y leang bo,’ nanai ang pathang ai. 8Kang thui pi, ahawi ne nai deaungkho y pei ai nai angthau y i py, hnei ryry nai deaungkho y angthau iy, ni i ngai nai jirei ang pei ai. 9Hunai deaungkho y nangchi teng y kang napi, Hnei u, naibaly pei ai; hau u, naibaly niu ai; takhei u, naibaly ang paeaung pi ai. 10Ami py hnei nai ngierei ly nga ai; ami py hau baly niu ai; ami py takhei baly ang paeaung pi ai. 11Nangchi theung y ampo awm nai ngierei ly mymy i chapo my tako phi hnei khyly, lengseaung pei lawh na a? Ti y baly ngo hnei khyly ngo i vui y pavui pei lawh na a? 12Ti y baly akadui hnei khyly kani taai pei lawh na a? 13Hunaibaly nangchi khumi kamngo malawn py chanauchi teng y atiti kahawi pei ai nai sai pany baly, kani pri mang i Ngampo ly hnei nai keungchi teng y ly Phailo Kachai mana tanrei ang pei ai mo?” napi.

Isu hawi Beelzibula

(Mt 12.22–30; Mk 3.20–27)

14Naibaly mymy ly vawinam leu katheu thai y nai harei ai patheu i, hina nai awm: vawinam theu veng nai bo y ly leu katheu thai y nai khumi ly leu katheu thai bo; hunaibaly khumi mipuichi ly lyh parai. 15Na i py phyreichi my ly, “Vawinam areng Beelzibula deaungkho y na a, vawinamchi ai patheu rengnai ly,” napi.#Mt 9.34, 10.25 16Naibaly phyreichi my ly mymy ai cham ai nai kani pri mang i nai atiti ka-ma-ra hnei.#Mt 12.38, 16.1; Mk 8.11 17Na i py ni my ly mymychi i dawn naichi pany i mymychi teng y, “Mani pri y py amy tengtawi atiu nai ngierei ly tama ai; dengtheung py amy tengtawi atiu nai ngierei ly phra ai. 18Setan py amy tengtawi atiu baly ni i peang nai ly mana awm thai ai mo? Nangchi ly ‘Beelzibula deaungkho y na a vawinam ai patheu reng,’ napi nai y. 19Naibaly kai ly Beelzibula deaungkho y vawinamchi ai patheu nai teu nabaly, nangchi i chanauchi ly ami deaungkho y patheu nai mo? Hunai deaungkho y nichi ly nangchi ai chih ai nai keungchi ne ai. 20Na i py kai ly Tameuh i kiu pajeung deaungkho y vawinamchi ai patheu nai ne baly, Tameuh i peang nai ly nangchi teng y tym nai bo.

21“Khumi atho kaawm my ly mymy i yhm kry nai sala y ly mymy i vawn ly chymme naimy awm; 22na i py mymy tleaung y atho awm keh nai my ly jeu iy pajau nai kha ly, mymy i aeng nai tavai ateaung kangym lawm pi veng iy, mymy i vawn ly la pi i paji phro veng. 23Ami py kai mang y aso hai y nai ly kai ai tiu nai ne; ami py kai ai lo hai achu y nai ly ahei hai nai ne.#Mk 9.40

Aso y nai vawinam vawi ali teang nai

(Mt 12.43–45)

24“Vawinam ly khumi taku theung i dengdairei theu nai bo y anawnra hau nai tui by y nai meingtym y aleaung ryry; naibaly pipi ngo y i, ‘Kai i theu nai yhm y ka-li teang khere ai,’ napi. 25Naibaly tym kha y ly pasi pan iy hawihai palum nai niu lawh. 26Hunaibaly chei iy mymy tleaung y kamngo keh nai vawinam takhra saryhrei hawi i, hu y kun iy awm u jo ryp; naibaly huni khumi i kangkhym i awm nai sai ly angchei i tleaung y hawi y keh bo,” napi.

Taham hawi nai tatang

27Naibaly hina nai ne, mymy ly huni leu thui nai thym kha y, khumi mipui theung i neampachy ami mo aeu i ni teng y, “Nang ai aneng nai kajeu hawi, nang i nei nai kanu py taham hawi,” napi. 28Na i py ni my ly, “Ne, na i py Tameuh i leu thai iy patawm naichi ly taham hawi keh,” napi.

29Naibaly khumi mipuichi ly ni teng y awm achu khala y mymy ly, “Vai deung kangthauchi ly deung kangthau kamngo ne i, ka-ma-ra hau u lawh; na i py Jona i tlang tleaung i ka-ma-ra harei ny y baly ka-ma-ra ha py pei ai ny y.#Mt 16.4; Mk 8.12 30Jona ly Ninevi avang khumichi i vui ka-ma-ra lawn nai kamta ly, Khumi i Chapo py vai deung kangthauchi i vui ka-ma-ra ne ai.#Jona 3.4 31Tokalawi mang i samrang nu ly tara chih nai neng khala y ly vai deung i kangthauchi hawi vanrei angdo ai i, nichi ai sum hai ai; ati mana nai mo nabaly mymy ly Solomon i cheng naira tangai ai nai malawn py khuteng taki i dengdairei jeu be; naibaly khen cham, Solomon tleaung y len keh nai ly hi y awm na a.#1 Ar 10.1–10; 2 Neng 9.1–12 32Ninevi avang i khumichi ly tara chih nai neng khala y ly vai deung i kangthauchi hawi vanrei angdo i, nichi ai sum hai ai; ati mana nai mo nabaly Jona my leu thui nai deaungkho y nichi ly uikhei u veng bo; naibaly khen cham, Jona tleaung y len keh nai ly hi y awm na a.#Jona 3.5

Tlang i kangvang

(Mt 5.15, 6.22–23)

33“Ami py maisi thawn iy ka-deng ra y mo, teaung anui y mo khai vai y leang; kun nai khumichi ly kangvang niu thai ai nai khai reng naira y khai khyh.#Mt 5.15; Mk 4.21; Lk 8.16 34Nang i tlang i maisi ly mei ne; nang i mei pachym baly, nang i tlang py bom vanrei angvang, na i py chai y baly nang i tlang py kaveng kawi bebe bo. 35Hunaibaly nang theung y awm nai kangvang ly kaveng ne lawh na, nanai amkym u. 36Hunaibaly nang i tlang ly manira y py veng y naimy, tlang bom verei angvang bawibawi baly, maisi kangvang ka-teng ny y angvang hai nai kamta ly angvang bebe ai,” napi.

Isu my Pharisai hawi Reita patiu naichi ai pasum nai

(Mt 23.1–36; Mk 12.38–40)

37Naibaly mymy ly leu thui nai thym khala y Pharisai leaungrei my ni ai biu heang i, mymy ly kun iy biu o. 38Naibaly mymy ly kiu asi y naimy biu o nai ly Pharisai my niu i rengrang tlai ly, napi. 39Naibaly Areng my ni teng y, “Nangchi Pharisaichi ly khau hawi saibi ly salo mang paju veng; na i py nangchi i paleung y ly cha parawp ai nai hawi, kamngo nai kawi veng. 40Vang y naichi awi, salo mang sa nai keung my ly theung mang y so y a? 41Na i py theung y atiti awm nai ly khumi ngarichi teng y pei ai nai vui teaung u; hunaibaly khen cham, nangchi i vui ati cheaungkhang chai nai bo.

42“Nangchi Pharisaichi awi nangchi ly taham si! Nangchi ly seaungsyn hawi seaungken hawi amti amjang cheaungkhangchi ly horei y harei pei reng; hawi naira hawi, Tameuh i tamen naira ly dawn katlen vui veng; na i py huni na a nangchi i sa ai nai avo nai ly, takhrachi py khai su y naimy.#Lev 27.30 43Nangchi Pharisaichi awi, nangchi ly taham si! Achura yhm y tahm asang keh nai atehra hawi, seng meingtym y chiu nai py nangchi ngai keh lawh nai y. 44Nangchi ly taham si! Up naira amyn y nai, salo mang y khumichi aleaung nai atawm nangchi ly!” napi.

45Naibaly Reita pany nai keung leaungrei my ni teng y, “Sara awi, nang i hini leu thui nai ly kaichi ai py jo nai na a hi ly,” nanai pathang. 46Naibaly ni my ly, “Nangchi Reita pany nai keungchi awi, nangchi py taham si! Atiti myn kaji bym parai pa-rei khumichi ai pho hai iy, nangmychi my ly kiu pajeung harei py nam vai y. 47Nangchi ly tahm si! Nangchi ly amochi i tapreaung sa u lawh, nichi ai ly amsichi my padei. 48Hunaibaly amsichi i atiti sa nai ly nangchi my pany hai iy asa hai; nichi my ly padei iy, nangchi my ly tapreaung sa. 49Hunai deaungkho y Tameuh i chengra my py ‘Nichi teng y amochi hawi amtaw thau naichi ai kapato ai i, phyreichi ai ly padei ai, phyreichi ai ly ana ai; 50hunaibaly Abela i thi dengdairei maicham hawi meingtym kachai sala y dei nai Zakari i thi khrairei, 51amo bawibawi i thi khaileaung palum angchei nai dengdairei theu nai ly, vai deung kangthauchi i tlang tleaung y vawitheung tha pajau ai, nanai ly; ne, kang thui pi, vai deung kangthauchi i tlang tleaung y vawitheung tha ai.#AA 4.8; 2 Neng 24.20–21 52Nangchi Reita pany nai keungchi awi, nangchi ly taham si! Cheng naira saw ly nangchi my la vui iy, nangmychi py kun y pasi lawh i, kun ai naichi ai py kam veng lawh,” napi.

53Naibaly hu i nai theu baly Reita patiu nai keungchi hawi, Pharisaichi my ly mymy ai preng meimeaung i leu cheaungkhang thui hai akikan; 54leu thui tamang naira y patiu ai tau nai amo jojo.

Currently Selected:

LUKA 11: KCL02

Highlight

Copy