LUKA 13

Uikheih y baly myh kang ai

1Naibaly hunai thym khyp khala y amichi mo awm i, Pilata ly Kalili pri khumichi i thi mychi i apathyp naira hawi tabawi pi nai satang Isu teng y thui pi. 2Naibaly mymy ly nichi teng y, “Huni Kalili pri i khumichi ly hunai kamta atiti patang nai deaungkho y Kalili pri i khumi bawibawichi tleaung y kamngo keh nai athang khai u lawh a? 3Ny y leang, kang thui pi, nangchi py ukhei y baly hunai kamta tama be ai. 4Naibaly Siloam yhm ka-sang my khumi leaung holai tajareichi ai tih na naichi py Jerusalem i awm nai khumi bawibawichi tleaung y khumi kamngo keh nai athang khai u lawh a? 5Ny y leang, kang thui pi, nangchi py uikhei y baly hunai kamta tama be ai,” nanai pathang.

Athai y nai thaidu keung hawi pata nai

6Naibaly mymy ly hini pata nai leu thui i, “Ami mo kreip akho y thaidu keungrei ui iy, athai hau ai nai chei i ha py niu y. 7Naibaly mymy ly kreip angjyn kry nai keung teng y ly, “khen cham, saneng thomrei sala y hini thaidu keung y kai athai hau ai nai jeu i, ha py niu y; paliu veng, ati mana nai y meingtym py aawi cheng nai awm jojo mo?” napi. 8Naibaly ni my ly mymy teng y, ‘Areng, vaineng sanengrei ly awm rai sy; 9kaimy keung ahawi y tai iy ei hawi bawn ai; hunai bo y athai baly hawi: athai y baly paliu teu ba,’ napi” nanai thui pi.

Anawn kani y vawinam my nam nai neampachy ai hawi sa nai

10Naibaly Anawn Kani y mymy ly achura yhm harei y leu patiu i, 11khen cham, neampachy leaungrei, seneng holai tajarei no hai nai vawinam my nam nai awm; mymy ly meung jojo i, pipi kataw angdo pajau y. 12Naibaly Isu my ni ai niu baly palau i mymy teng y, “Lo awi, nang i no nai ly nang ai patlaw bo mang,” napi. 13Naibaly ni i tlang tleaung y mymy i kiu tamam i tlenrei khyh my taw praw iy Tameuh ai palo. 14Naibaly Isu my Anawn Kani y khumi ai hawi sa nai deaungkho y achura yhm i lu ly kado theu i, mipuichi ai preng iy mychi teng y, “Khumichi ly kalop sa ai nai kani tariurei awm na a; hunai sala y ly jeu ly, hawi aso u. Anawm Kani y jeu u moh,” napi.#Theu 20.9–10; Leu 5.13–14 15Na i py Areng my ly ni teng y, “Tapawp naichi awi, Anawn Kani y amy i sira mo keaungngo kano kasau mo teicha cha naira i nai su iy, tui nei ai nai pahawi u bawi vai y a? 16Naibaly hini neampachy ly Abraham i chaniu ne: khen u cham, Setan my saneng holai tajarei patiu jojo he, Anawn Kani y py hini kawm nai ly su pi ai nai tlo y a?” nanai pathang. 17Naibaly mymy ly huni leu thui nai thym khala y mymy ai ei nai paka naichi bawibawi ly kaji bo; na i py khumi mipuichi ly mymy i atiti bawibawi hawi parai nai sa nai deaungkho y kawn u bebe.

Anmawi hm hawi pata nai

(Mt 13.31–32; Mk 4.30–32)

18Hunaibaly ni my ly, “Tameuh i peang nai ly ati atawm mo? Ati hawi pata py pata ai mo? 19Anmawi hm amairei ami my la iy, akho y hei nai kamta atawm; huni ly prau i dengkeaung lawn bo; naibaly salo mang i tavochi ly changpi y jei,” napi.

Angbo hawi pata nai

(Mt 13.33)

20Naibaly mymy ly, “Tameuh i peang nai ly ati hawi pata ai mo? 21Neampachy my angbo la iy tako dei ne naira thomrei theung y num be pa-rei phui nai kamta atawm,” napi bi.

Katheu pa-kho kamchei

(Mt 7.13–14, 20–23)

22Naibaly ni ly patiu prei i Jerusalem mang y tapai naimy, avang katheang y py, kalen y py lyn preiprei. 23Naibaly ami mo ni teng y, “Paheng ai naichi ly maidenrei khyh cham be?” napi. 24Naibaly ni my ly mymychi teng y, “Katheu pa-kho kamcheira y ly kun tanga ai nai tau u; kang thui pi, khumi neangneangchi ly kun ai nai tau ai i, kun thai ai ny y. 25Yhmkeung my angthau iy katheu kho veng nai bo y nangchi ly angam mang y angdo iy, ‘Areng, peaung pi kyh,’ nanai katheu y takhei nai khala y ni my ly, ‘Nangchi ma mang i awm nai mo kang pany kang pacha y leang,’ nanai ang pathang ai; 26huna nai khala y ly nangchi my, ‘Nang i ka-niu y py kaichi cha reng nei reng nai bo, kaichi i lam y py nang patiu reng be,’ nanai napi ai rai; 27naibaly ni my ly, ‘Kang thui pi, nangchi ma mang i awm nai mo kang pany kang pacha y leang; kamngo sa nai bawibawichi awi, kai teng i nai leh u pawn,’ nanai ang napi ai.#Sam 6.8 28Abraham hawi Isaka hawi Jakob hawi amo bawibawichi hawi, Tameuh i peang naira theung y awm nai nangchi my niu ai i, nangchi ai angam mang y patheu nai bo, nanai apany nai khala y ly vo py vo ai, ho py akachai u ai.#Mt 22.13, 25.30#Mt 8.11–12 29Naibaly tosyh tokalawi, ni dym ni si mang i dengdairei ang jeu ai i, Tameuh i peang naira y ateh u ai. 30Naibaly khen cham, kangkhym kangtem naichi py kangman keh y awm ai, kangman keh naichi py kangkhym kangtem y awm ai,” napi.#Mt 19.30, 20.16; Mk 10.31

Isu my Jerusalem ai tamen nai

(Mt 23.27–39)

31Hunai thym khyp khala y ly Pharisai amichi mo ang jeu i ni teng y, “Theu ly, hi i nai tako veng; Heroda ly nang ai padei ai nai khrikhri pa-rei ngai bo,” napi. 32Naibaly ni my ly mymychi teng y, “Huni khiva teng y ly hini leu thui u: ‘Khen cham, vaini hawi, khawndam hawi vawinamchi ai patheu iy no nai py hawi sa i, kani pa-thom y ly angym ai bo. 33Ati py ne sy vaini hawi, khawndam hawi, khawnvai hawi kai aleaung veangveang ai nai tla; Jerusalem angam mang y ly amo dei pajau ai nai ny y leang. 34Aw Jerusalem, Jerusalem amochi ai padei nai keung nang teng y pato naichi ai ly lengseaung y aphi ka nai keung awi: A nu my mymy i chochi ai pakhi anui y o hai achu nai kamta, nang i chanuchi ai o hai achu ai nai tlen majirei kang tau mo? Na i py nangchi ly ngai u y. 35Khen cham, nangchi i yhm ly ka-keu khai pi jo veng bo. Kang thui pi, ‘Areng i amyn y jeu nai ly taham hawi,’ ti u y ryrei ly nangchi ly kai ai niu ali y leang bo he,” napi.#Sam 118.26; Jer 22.5

Currently Selected:

LUKA 13: KCL02

Highlight

Copy