LUKA 14

Isu my no nai khumi ai hawi sa pi nai

1Naibaly hina nai awm, mymy ly Anawn Kani y Pharisai leaungrei i yhm y biu cha ai nai chei khala y nichi my khen patawn jo. 2Naibaly khen cham, Isu i mo y tlang verei bau nai ami mo neampacho leaungrei awm. 3Hunaibaly Isu my Reita pany nai keungchi hawi Pharisaichi ai pathang i mychi teng y, “Anawn Kani y hawi sa ngau a, so ngau y a?” napi. 4Na i py mychi ly katheu y. Naibaly mymy ly ni ai amkhaw i hawi sa iy, tako hai bo. 5Naibaly mymy ly nichi teng y, “Nangchi theung y ami mo keaungngo kano kasau mo, sira mo tuikan y tlo khyly, Anawm Kani y py atheu praw y ai a?” napi.#Mt 12.11 6Naibaly huni leu py nichi pathang thai y bi bo.

Tahm apanem nai hawi angvyn ai kawn nai

7Naibaly heang naichi ly atehra kahawi keh vawi reng nai niu i, nichi teng y pata nai leu thui: 8“Aju palyn nai pawi y biu cha ai nai ami my mo ang heang nai khala y ly atehra kahawi keh y ateh u moh: ti y baly nang tleaung y khumi len keh nai ai heang vui ai i, nang ai ang heang nai keung my ly, ‘Hini atehra ly aheang pi,’ ang napi lawh ai;#Lkch 25.6–7 9naibaly nang ly kangji nga naimy atehra hawi y kehkeh naira y ateh makho lawh na. 10Hunai deaungkho y ang heang nai khala ly atehra hawi y kehkeh naira y phai ateh; hunaibaly nang ai heang nai keung my jeu iy nang teng y, ‘Nai awi, tahm asang kyh naira asyh ba,’ napi iy, nang i biu o hai naichi i mei ka-niu y my nang ai ang palo ai. 11Ami py tahm apasang nai ngierei ai ly tahm panem ai; tahm apanem nai ai ly tahm pasang ai,” napi.#Mt 23.12; Lk 18.14

12Naibaly mymy ly mymy ai heang nai keung teng y py, “Kani thun y mo, vum y mo nang pawi sa nai khala y ly, nang i ahawichi hawi, ngamjo ngamnauchi hawi, nang i misochi hawi, nang i saleaung khumi kanangchi ai ly heang u reng moh: ti y baly ang heang teang ai i, ang heung kaleih ai. 13Na i py nang ly pawi sa nai khala y ly khumi kamawnchi hawi, khumi kaphrachi hawi, kheu kambaichi hawi, mei kamjuchi ai phai heang u. 14Hunichi my ly ang heung ai nai by y nai deaungkho y nangchi taham hawi ai; khumi kahawichi angthau bi nai neng khala y ly ang heung bi ai,” napi.

Pacho panei nai pawi pui hawi pata nai

(Mt 22.1–10)

15Naibaly ni i biu o ahawi nai ami mo leaungrei huna nai thai i ni teng y, “Tameuh i peang naira y biu cha ai nai khumi ly taham hawi,” napi. 16Na i py mymy ly ni teng y, “Ami mo vum y pawi len parai nai sa i, khumi neangneangchi ai heang. 17Naibaly cha ai nai neng baly heang naichi teng y ly, ‘Jeu u jau, vai ly bawibawi pajau bo,’ napi ai nai miseaung ai pato. 18Naibaly nichi bawibawi leu harei amkhaw iy, akhi ai naira awm bebe. Kangman keh my ly mymy teng y, ‘Kai ly hlau van i khen ai nai tla; kai ai pahen ly, akhi hai kyh ba,’ napi. 19Naibaly khumi takhra my py, ‘Kai ly si pangrei van i, hawi mo hawi y mo cham ai nai chei ai nai tla; kai ai pahen ly, akhi hai kyh ba.’ napi bi. 20Naibaly khumi takhra my, ‘Kai ly aju la i kang jeu thai y leang,’ napi taleang bi.

21“Naibaly miseaung my ly ni i yhmkeung teng y huni satang thui pi. Hunaibaly yhmkeung ly kado theu i miseaung teng y, ‘Theu ly, lam y py, taki tavai y py chei kaliki ly, kamawmchi, khumi kaphrachi, mei kamjuchi, kheu kambaichi ai hi y pahawi,’ napi. 22Naibaly miseaung my ly, ‘Areng nang i leu pei nai kamta sa nai bo, na i py meingtym palai jojo rai,’ napi. 23Naibaly yhmkeung my miseaung teng y, ‘Theu ly, lam kalen y py, yhm meaungteng y py chei ly, kai i yhm kawi ai nai khumichi ai kun hai tanga. 24Kang thui pi, kai i heang nai khumichi ly leaungrei py kai i pawi sa naira y cha ai ny y leang,’ napi,” nanai thui pi.

Abangnai khumi lawn ai nai kahm

(Mt 10.37–38)

25Naibaly khumi mipui ka-teng ny y naichi ni teng y chei teang: hunaibaly mymy ly hi i nichi teng y, 26“Ami py kai teng y jeu nai ly mymy i ampo hawi amhm hawi, aju hawi chanauchi hawi, mymy i amjo amnauchi hawi tuichochi hawi, mymy i hengra ai py niu ngai y nai by y baly, kai teng y abang nai khumi lawn thai y leang.#Mt 10.37 27Ami py amy i kraws apu naimy kai teng y abang nai ny y baly, kai i khumi lawn thai y leang.#Mt 10.38, 16.24; Mk 8.34; Lk 9.23

28“Nangchi theung y ami py yhm ka-sang sa ai nai tau baly, angchei kha y ateh iy cheang pajau ai nai amy i yhmtheaung awm mo by y mo, nanai vang pasym y ai a? 29Ti y baly lengseaung leng jo iy cheang pajau y pasi lawh baly, khen nai ngiereichi my ly, 30‘Huni khumi ly yhm leng i cheang pajau y pasi lawh be,’ nanai ang panui hai lawh na. 31Naibaly samrang ami mo samrang takhra ai tiu ai nai chei ai nai kha y, angchei y ly ateh iy, khumi meaung kateaung nyhrei hawi atiu ai nai chei nai ly khumi meaung kateaungrei hawi nam vam mo, vam y mo adeng y ai a? 32Ti y baly samrang takhra ly kamlo paraira y awm nai thym khala y my aly ai nai leu hnei ai nai savai pato ai. 33Hunai kamta ly nangchi theung y ami py ni i awm nai bawibawi khai su y nai ngierei ly kai i khumi lawn thai y leang.

Palawi hawi pata nai

(Mt 5.13; Mk 9.50)

34Palawi ly hawi, na i py palawi py dau veng baly ati my lum hai bi ai mo? 35Khaileaung i vui py, ei khai achu naira i vui py hawi y bo; khumichi ly aphi veng. Ami py thai ai nai kano awm baly thai sy,” napi.

Currently Selected:

LUKA 14: KCL02

Highlight

Copy