EXODUS 2

Mosi Suaknâk Thu

1Hi liauah hin minung pakhat Levi phun nih amah phun lakah mi ber nunau a umpi le, 2fapa a ring. A nu nih fa mêlṭha tak asi ruangah thla thum a thuh. 3Sikhawmsele, a thuh châwklo rawh le, lâiluang hen bâwm a siam le, tî a lût lonâk ding hen lâwngthlîng hen a châr. Tiva kap bua nâwngah nausêm chu a siah. 4Nausêm chu a unu nih a râltlâng hen a vêng le, a ngâk.

5Lalchem fanu chu tak khawlh ding hen tiva ah a hawng le, a to-aw tla chu vakap ah an hawng. Bua nâwngah bâwm chu a muh le, mawhsareh hen a to-awnu a va lâktir. 6Lalchem fanu nih bâwm chu a awng le, mipa ngâksiatê a muh mi chu a ṭap le, lalchem fanu nih thungâi a zângfah. “Hi hi Hebrai fa ma hi,” a ti.

7Churawhchun, a unu nih lalchem fanu sinah, “A umhtu ding Hebrai nunau kan kawh piak lai ma?” a ti.

8“Kawh ko me,” a ti. Churawhchun, nunau ngâksia nih a nu ngelchel chu a va kawh rawh. 9Lalchem fanu nih, “Hi nausêm hi lâk le, hawng ka zauhkhenh piak, a man kan pêk lai,” a ti. Churawhchun, nausêm chu a lâk le, a zauhkhenh rawh. 10Chu nûnah chun ngâksia chu a hawng lian tâwk ual rawh le, lalchem fanu sinah a kalpi, anih nih amah fa rangah a nei rawh. A thinlung hen, “Tî lakah mi ka lâk ruangah a min ah Mosi#2.10 MOSI: Hebrai ah hi min umzia chu ‘lâk’ mawh ‘sar’ tinâk asi. ti hen ka sak lai,” a ti.

Mosi Midian Ram Ah a Tek

11Mosi chu a hawng lian vima le, a mi Hebrai mi tla va zauh na ding hen a suak le, rian hamh tak an ṭuantir na mi a muh rawh. Aigupta mi nih amah mi Hebrai minung a thah mi a muh rawh. 12Mosi nih a kiangkam â hâwi le, pakhat khawm minung an um lo ti a muh le, Aigupta minung chu a thah le, a ruak chu phildip ah a phûm ving. 13A thâituan ah a kîr leiah Hebrai minung panih anna sual mi a muh na. A diklo dauh mi sinah, “Zei rangah Hebrai minung vevê nanna sual?” a ti.

14Chu minung nih a sâng le, “Kan lakah lâirêltu leh hotu ding hen âunih an siah? Aigupta minung na thah mi hâwi hen thah ding na ka tum na maw?” a ti. Mosi chu a lâu le, a thinlung hen, “Mi nih ka thilti an theih ma hi,” a ti. 15-16Lalchem nih thil umdân a theih rawh chun, Mosi chu thah a tum le, khawmsele Mosi chu Midian ram ah um ding hen a tek ving.

Ni khat chu Mosi chu tikhurchawh kiangah a to liauah, Jethro, Midian bâwlpu fanu pasarih an pa dawrâ leh kêl tla rangah tî than an hawng le, ran tî dinnâk kuang ah tî an tleng. 17Dawrâpu tla an hawng le, Jethro fanu tla chu an kiangtir rang na. Churawhchun, Mosi nih a sanh na le, an ran tla chu tak a khawlh piak na. 18An pa sinah an va tlung rawh chun, “Tusûn chu nan hawng tlung tuan chiam e,” a ti na.

19Annih nih, “Aigupta mi nih dawrâpu lakah mi hawng kan sanh le, tî hawng kan than piak le, kan ran tla tak a khawlh na,” ti hen an sâng.

20“Chu minung chu zeiah a um? Zei rangah nan mâk thlap? Kan sinah buh ei ding hen va kawh u,” ti hen a simh na.

21Churawhchun, Mosi khawm nih chunah um ding chu rem a ti le, Jethro nih a fanu Zipporah hen a umhtir na le, 22fapa an ring. Mosi nih a thinlung hen, “Kei chu ramdang mi hi ram ah um mi kasi,” a ti le, a min ah Gersom#2.22 GERSOM: Hebrai ah hi min umzia chu ‘Ramdang mi’ tinâk asi. a sak.

23Kum tam tak nûnah Aigupta lalchem chu a thi le, sikhawmsele Israel tla chu an sal sinâk ruangah rûm leh âi hen an um le, ṭangpi deih hen an âu. An âu hâu chu Pathian sinah a tleng rawh. 24An rûm leh âi hâu theihtu Pathian nih chun Abraham, Isak leh Jakob sinah thu a tiamh mi chu a theihkumza. 25Israel tla sal an si mi chu a muh le, a siherh na.

Currently Selected:

EXODUS 2: BCLBV

Highlight

Copy