EXODUS 1
1
Aigupta Ram ah Israel Tla
Nehsawh Hen An Umnâk
1Jakob fapa tla, anmah dâwngsungkhur chiau hen, a sinah Aigupta ram ah kal mi tla chu, 2Reuben, Simeon, Levi, Juda, 3Isakar, Zebulun, Benjamin, 4Dan, Naphtali, Gad leh Aser tla chu an si. 5Hi Jakob thlâk tla hi an ektê hen minung sâwmsarih an si. A fapa Josef lam chu Aigupta ah a um chia rawh. 6Josef a dam liauah a unau tla leh thlâktu masa zawzawng chu an thi rawh. 7Sikhawmsele, an thlâk tla Israel mi tla chu fa tam tak an nei vima le, thungâi an pung hen an chak le, Aigupta ram an khat rawh.
8Chu nûnah chun, lalchem thar, Josef theihlotu Aigupta ram ah thuneitu a hawng um rawh. 9Anih nih a mi tla sinah, “Israel tla hi thungâi an tam hen an chak le, kan rangah zenh an kâi rawh. 10Râltuknâk tla a hawng um hen, kanmah do ding hen kan leido leiah anna ṭângṭawm chun hi ram ah mi hi an suak ving kho. Kanmah ngâk hen tam ngâi na khawmsele ti dân kâng dang hen anmah kham ding hen hâwl a suak lai,” a ti. 11Churawhchun, Aigupta mi tla nih anmah neh ding hen rian fâk tak ṭuantir na ding hen vêngtu tla an siah. Churawhchun, Israel tla nih lalchem rangah thil-leh-rî siahnâk ding hen Pithom leh Rameses khuapi an siam. 12Sikhawmsele Aigupta mi tla nih Israel tla an nehsawh na bilik leh an pung zia a fâk dadauh. A nehnûn ah chun ram an khat rawh. Aigupta mi tla nih Israel mi tla chu an zenh na le, 13-14Israel tla chu sal ah siam hen hamh kho rirî an hamhtir na. An in sak leh an phâisen rianṭuantu ah an mang na le, an lakah tâwm khawm khua an ruat lo.
15Churawhchun, Aigupta lalchem nih Hebrai nunau tla faring zauhkhenhtu Siprah leh Puah panih sinah thu a simh na. 16“Hebrai nunau nih fa an ring hen nau dawmh nan kal chun mipa fa chu thah vima ule, nunau fa lam chu zuah u,” a ti na. 17Sikhawmsele faring zauhkhenhtu tla nih Pathian an ṭih ruangah lalchem thupêk zia ti lo hen mipa an zuah na. 18Lalchem nih faring zauhkhenhtu tla chu, “Zei rangah hi hâwi thil nan ti, zei rangah mipa fa tla nan zuah?” a ti na.
19Annih nih, “Hebrai nunau chu Aigupta nunau hâwi an si lo, an nau neih a awl le, kan tleng lânah an nei ving tâwn,” ti hen an sâng. 20-21Faring zauhkhenhtu tla nih Pathian an ṭih ruangah an lakah a lungâwi le, dâwngsungkhur nei hen a siam na. Israel mi tla khawm an pung hen an chak vima. 22A dawnghnâk ah lalchem nih a mi le zawzawng hi hâwi hen thu a pêk na: “Hebrai mipa fa a suak mi vial chu Nile tiva ah lawnh ule, nunau fa vial chu zuah na u,” ti hen.
Currently Selected:
EXODUS 1: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.
