EXODUS 3

Pathian Nih Mosi A Kawhnâk

1Nikhat chu a pu Jethro, Midian bâwlpu dawrâ leh kêl rual a vêng le, ranrual tla chu ramkaro a palpi na le, tlâng thenhlimh Sinai Tlângah a kalpi na. 2Chunah chun LALPA vânmifial chu thingbû nâwngah meialh hâwi hen â langh. Mosi nih thingbû chu meialh lakah um mi hâwi hen a muh le, sikhawmsele a kâng lo fâwn. 3Chun, Mosi nih a thinlung hen, “A chê chiam e!” a ti. “Zeitin thingbû a kâng lo zia? Ka naih lai le, ka zauhnik lai,” a ti.

4LALPA nih Mosi nih a hawng naih mi a muh le, thingbû thawk hen, “Mosi! Mosi!” ti hen a auh.

Anih nih, “Hinah ka um, ti hen a sâng.

5Pathian nih, “Hawng ka naih lah rawh. Na umnâk kha mun thenhlimh asi ruangah na pheikawk kha lît rawh. 6Kei a nan thlâktu Pathian, Abraham Pathian, Isak Pathian leh Jakob Pathian kasi,” a ti. Churawhchun, Mosi nih Pathian chu a zauh ngam lo ruangah a mêl a khuh.

7Churawhchun, LALPA nih a sinah, “Ka mi tla Aigupta ram ah an nehsawh na zia ka muh le, anmah rangah Aigupta sal vêngtu tla lakah mi ruangsuah na ding hen an âu hâu khawm ka theih. An tuar zia tla ka theih le, 8churuang chun Aigupta ram ah an um mi chu suakpi na hen ram kâu tak pakhat neihnâk ding hen ram ningno tak, Kanaan mi tla, Hit mi tla, Amor mi tla, Periz mi tla, Hiv mi tla leh Jebus mi tla tuah an umnâk leiah kalpi na ding hen ka hawng ṭum asi. 9Ka minung tla âu hâu ka theih hen, Aigupta mi nih an nehsawh na mi tla khawm ka muh. 10Tuah Aigupta lalchem sinah ka nan fial asi, a ram ah mi ka minung tla chu suakpi hen na rui na ding hen,” a ti.

11Sikhawmsele, Mosi nih Pathian sinah, “Kei zeikhawm kasi lo, zeitin lalchem sinah kal hen Aigupta ram ah mi Israel tla ka suakpi kho na lai?” a ti.

12Pathian nih, “Na sinah ka um lai le, Aigupta ram ah mi ka mi tla na hawngpi na tikah chun hi tlângah hin nan ka sawnh lai. Chu chu keimah nih ka nan fial asi ti theihnâk asi lai,” ti hen a sâng.

13Sikhawmsele, Mosi nih a sâng le, “Israel fa tla sinah ka va kal lai le, nan thlâktu Pathian nih nan sinah hawng ka fial ka ti lai le, ‘a min âu?’ ti hen an ka deih lai le, churawhchun an sinah zei ka sim awt?” a ti.

14Pathian nih, “Keimah kasi a ti mi kha kasi, a ti. ‘Keimah kasi#3.14 Keimah kasi: Hinah Pathian chu ‘Keimah’ a ti le, Hebrai ah chun a min chu ‘Yahweh’ tinâk asi, chun ‘Jehovah’ ti hen leh asi. Chu min chu hi lehnâk lakah chun ‘LALPA’ ti hen leh asi. titu nih nan sinah hawng ka fial asi, na ti ding asi,” a ti. 15Israel fa tla chu, Kei, LALPA an thlâktu Pathian, Abraham Pathian, Isak leh Jakob Pathian nih an sinah ka nan fial mi na si ti na simh na ding asi. Hi hi zungzâl ka min asi; hi hi, hi nûnah thlâk hawng um ding mi tla nih ka min ah an ka kawhnâk ding mi asi. 16Kal le Israel ruitu tla pumh na le, Kei, an thlâktu tla Pathian, Abraham Pathian, Isak leh Jakob Pathian na sinah ka langh mi tla simh na. An sinah ka hawng mi leh Aigupta mi tla nih an tlûnah an ti na dân ka muh mi tla simh na. 17Aigupta ram ah nehsawh hen an umnâk ah mi suakpi hen Kanaan mi, Hit mi tla, Amor mi tla, Periz mi tla, Hiv mi tla leh Jebus mi tla umnâk neihnâk leh ram ṭha mun ah kalpi na ding ka tum mi simh na,” a ti.

18“Ka mi le tla nih an sinah thu na sim mi tla chu an ngâi lai. Churawhchun, Israel ruitu tla hen Aigupta lalchem sinah chun nan va kal lai le, a sinah, ‘LALPA Hebrai Pathian, kan sinah a hawng a langh le, tuah ni thum kal ramkaro ah LALPA kan Pathian sinah bâwl ding hen hawng kan siang piak.’ 19Aigupta lalchem nih chun chu hâwi ti ding hen zângnâwr lo chun an siang na awtlo ti ka theih. 20Sikhawmsele Aigupta ram rêp ding hen ka thiltikhonâk ka mang lai le, chunah chun thil ṭihnungkâi tla ka ti lai. Chu nûnah suak ding hen an siang na lai.

21“Aigupta mi tla nih an zah na ding hen ka siam na lai, ka mi le chu kutkaro hen an suak lonâk ding hen. 22Israel nunau tla chu Aigupta mi nunau an zâwlbâwm tla sinah an va kal lai le, Aigupta nunau a in ah a um mi âutal sinah nipuan leh ngûn leh tangka, lungmantam tla an deih na lai; chubang thil tla chu Israel mi tla nih an fanu leh an fapa tla an ruktir na lai le, Aigupta mi tla neih chu nan kalpi lai,” a ti.

Currently Selected:

EXODUS 3: BCLBV

Highlight

Copy