Mark i̱ Holisso 14

Chapta Awah Oshtah (14)

Jesus Oklah Abáchi̱kat Oklah Ittimatahlih

1Awánablit O̱t Iya I̱pa Chito (Passover Feast) hicha Pallaska Latassa I̱pa Chito (Flat Bread Feast) ayína kat a̱sháchi̱ ka̱ nittak at tokloh mómattók. Hikma̱ Priest i̱noshkobóka alhíha hicha Moses i̱ Nán Alhpisa im ábachi alhíha yat kanihchih ósh lomat Jesus a̱ yokáchi cha abáchi̱kat oklah ittimatálih ósh ma̱yattók. 2Hihókakósh oklah áchikat, “I̱pah chito oklah áma̱ya nittak ano oklah kí mihchoh kiya, kiyokma̱ oklah alhíha yat hapiyásanálit ná kaníhmit ásha hi̱nah ókih,” oklah áchittók.

Ohóyoh at Jesus a̱ Holítoblih ósh Ná Baláma Achokma Holítopa (Expensive) Inoshkobo o̱lhipílih

3Jesus at Bethany tamáhah o̱t a̱ttahmat, hattak Simon, haknip lhachówa alóta attóka̱, i̱ chokka anoka i̱pah ósh bini̱littók. Hihma̱ ohóyoh at ná baláma achokma holítopa fihna ho̱ ná alhtoho̱ shólih ósh alattók. Hihmat áyalhto ma̱ kóli cha Jesus i̱noshkobo ya̱ o̱ lhipílittók. 4Hihma̱, yamma̱ ma̱ya tokat kaniyómi kat oklah nokówa cha oklah ittimáchihmat, “Katína pí lhipít oppanit tahlih? 5Ná ishit balámachi ma̱, to̱ksali afammi achaffa iskali iyalli o̱naka̱ íka̱chá hi̱natok hicha iskali ma̱ ilbashsha alhíha oklah ilímá hi̱natok,” oklah áchittók. Hihmat ohóyoh ma̱ oklah isht miháchittók.

6Hihókako̱, Jesus at áchihmat, “Ohóyoh pa̱ hash apistikílinnáh! Katína hash ataklammi hó? Ohóyoh pat nán achokmaho̱ ásiya mihchih ókih. 7Ilbashsha alhíha ato yakni pa̱ hachibá ma̱yat tókalhlháchi̱h. Hikmat kaníkako̱ apílah hachinnah okmat hash mihchá hi̱nah. Hihókako̱ anáto hachibá takla a̱ttali̱ billíyá chi̱h kiyoh ókih. 8Ohóyoh pat ná baláma yappa̱ sa haknip o̱ lhipílikat, nána ka̱ á yamihcha hi̱nah alhlhi kat mihchih ókih. Sa haknip holloppáchi̱ ka̱, tikba̱li askachih ókih. 9A̱lhi hachim anólilíshkih. Yakni moyyómaka̱, kanímma máko̱ kanah alhíha yat ano ak isht imma ya̱ anóho̱likmat, ohóyoh pat nána ka̱ mihchittok ayína ka̱ oklah anólachi̱h. Hikma̱ oklahat isht ikkánáchi̱h ókih,” áchittók.

Judas at Jesus Asanálih

10Jesus iyákayya alhíha awahtokloh ma̱, achaffa kat Judas Iscariot attók. Judas at priest i̱noshkobóka alhíha pisat iyattók hicha oklah apílat Jesus yokáchá hi̱nah ósh i̱ makáchittók. 11Priest i̱ noshkobóka alhíha yat oklah hakloh mat, im achokmattók. Hicha yappa̱ mihchi ka̱ oklah i̱ chiloffá hi̱nah kat im anólittók. Hihma̱ Judas at kaníyohmi kakósh oklah apílachit Jesus yokácha hi̱nakat hashi kanalli isht alhpísaka̱ ho̱yottók.

Jesus at Iyakáyya Alhíha Ibá I̱pah

12Hitoko̱, Pallaska Latassa I̱pa Chito, (Flat Bread Feast) nittak ammona onattók. Nittak pako̱, Awánablit O̱t Iya chokfalhpowa oshi (Passover lamb) ya̱ oklah abí attók. Jesus iyakáyya alhíha yat Jesus i̱ ponaklohmat, “Katimmáko̱, ililhkólicha i̱pa ya̱ ish i̱pachi̱ka̱ il atahliho̱ chinna chó?” áchittók. 13Hihma̱ Jesus at iyákayya toklo ka̱ i̱makáchihmat, “Íya cha Jerusalem tamáhah ma̱ o̱t chokkowah. Hikma̱ hattak at oka áyalhto oka at a̱lhto ho̱ shóli kat hachiyafámáchi̱h ókih. Hikma̱, iyáka̱yyat hash iyáchikih. 14Hicha chokka o̱t chokkowak ma̱, hattak chokka iláp átok yamma̱ hash i̱ makáchikmat, ‘Nán im ábachi yat áchikat, “Katimmáko̱ abóha yat taka̱lih, siyákayya alhiha ya̱ Awanablit O̱t Iya i̱pa ittibá i̱palá hi̱naka̱?” áchih,’ hash im ácháshkih. 15Hikma̱ hattak mat, atoyya aboyyat hachi lawít iyat, aba abóha chitoh hachi písacháchi̱h. Nánah makósh alhtahat tahachi̱ ókih. Yammako̱ i̱pa hash hapim atahláshkih,” áchittók. 16Hitoko̱, iyákayyá toklo kásh mat iyat, tamáhah ma o̱t chokkowat oklattók. Hihmat, Jesus at nána ayimanólitok makfihna o̱t ahóchittók. Hicha, yammako̱ Awánablit O̱t Iya i̱pa ya̱ oklah atahlittók.

17Hihma̱ o̱t okítiya ma̱, Jesus hicha iyákayya awahtoklo (12) alhíha yat chokka ma̱ áyonattók. 18I̱pah ósh oklah ma̱yah ma̱, Jesus at áchihmat, “A̱lhi hachim anólilishkíh, yappa̱ a̱ka̱na yósh sabayi̱pah ósh hash binohma̱ya kat, hash kanimmakat siyasanáláchi̱h ókih,” im áchittók.

19Yappa̱ makáchihma̱, iyákayya alhíha yat oklah nokha̱kloh fihnattók. Hihmat, achaffa ayokka kat Jesus a̱ oklah i̱makáchihmat, “Ano ak kiyoh akíni ha?” oklah im áchittók.

20Hihma̱ Jesus at afálámmi̱t i̱makáchihmat, “Awah toklo (12) alhíha hachiya kat, ampo (bowl) pa̱ hash sabayi̱pa kat, hash achaffa kanimmakat siyasanáláchi̱h ókih. 21Holisso Holittópa yat áchikat, ‘Hattak Oshi Holittópa yat illih polláchi̱h,’ áchihósh isht áholissottók. Hihóka̱ mak yohmi malhlháchi̱. Hikash, hattak at siyasanálátok yammak ókato i̱ palammih polláchi̱h ókih! Hattak mat pi ik alhpówotok okmak ósh im i̱shahlánattók ókih,” áchittók.

22Hihma̱ oklah i̱pah ósh ma̱yah ma̱, Jesus at pallaska pit ishittók. Hihmat Chihówa pit i̱ yakokittók, hicha toshtolit tahlicha iyákayya alhíha pit imattók. Hicha áchihmat, “Pallaska pa̱ íshicha oh apah. Yappat sa haknip ókih,” im áchittók. 23Hicha Jesus at nán ayishko ya̱, pa̱ki okchi homi yat a̱lhtoho̱ íshicha, Chihówa pit i̱ yakókittók. Hicha iyákayya alhíha pit imattók, hihma̱ mo̱ma kat oklah áyishkottók. 24Hihmat áchihmat, “Yappat am issis ósh sa haknip álhipíyah ókíh. Ilappat oklah la̱wa ka̱ i̱ lhipíyah ókih. Chihówa yat am issis isht álhopólih hósh nán alhpisa himóna ikbi ókih. 25A̱lhi hachim áchilíshkih, himákma̱ pa̱ki okchi homi ak ishkoh ósh, moyyómakat Chihówa akósh i̱ mi̱ko yo̱ oklah hochífot holítobláchi̱ nittak mako̱ pa̱ki okchi homi himóna yo̱ ishkoláchi̱h ókih,” áchittók.

26Hihma̱ oklah moyyómakat aba isht talówa oklah talówattók hicha Olives Nanih Cháha (Mount of Olives) ilhkólittók.

Peter at Kanihmáchi̱ka̱, Jesus at Makáchih

27Hihma̱ Jesus at iyákayya alhíha i̱ makáchih mat, “Himak ninak pa̱, hash moyyómakat, hash saka̱chi cha hash balít ittafímáchi̱h ókih. Holisso Holittópa yat áchikat, ‘Chokfalhpowa apísachi abíláchi̱h, hikma̱, chokfalhpowa alhíha yat balít ittafímáchi̱h,’ áchittók óka̱. 28Hihókakósh, falámat tánilik mat, hachi ti̱kba Galilee i̱yaláchi̱h ókih, hicha yammako̱ o̱t hachiyáfámaláchi̱h,” im áchittók.

29Peter hat im áchihmat, “Oklah i̱lakat chiyásanáli hohmáko̱, anáto hichi̱h kiyoh ókih!” im áchittók.

30Hihma̱ Jesus at áchihmat, “A̱lhi chim áchilíshkih, himak ninak pa̱, aka̱k nakni yat hitokla ola alhlhi ka̱, chik sakkano kat hitohchina ka̱ ish makácháchi̱h ókih,” im áchittók.

31Hihókako̱, Peter at lha̱kochih ósh makáchihmat, “Chiyáwa̱t salláchi̱ hohmakósh, ak chikkáno iláhobbiláchi̱h kiyoh ókih,” im áchittók. Hihma̱ iyákayya alhíha akkiya makáshíniho̱ oklah makáchittók.

Jesus at Gethsemane Ma̱ Anno̱pa Ibashsha Asilhhah

32Hihmat, Jesus hicha iyákayya alhíha yat yakni tosha̱fa Gethsemane hohchifo ma̱ ilhkólittók. Hicha i̱makáchihmat, “Yappa̱ ho bínohma̱yah, hikma̱ anáto anno̱pa ilbashsha asilhhat iyálih,” áchittók. 33-34Jesus at Peter, James, hicha John iláwi̱t iyattók. Hihmat nokha̱kloh isht alóta hicha ataklammah fihnah ósh oklah im áchihmat, “Sa nokha̱kloh fihna kat, pi sálláchi̱ ahóbat kaniyah. Yappa̱ ho ma̱yah hicha oh apisa̱chi,” im áchittók.

35Hihmat, Jesus at mishihma chohmi íyah mómattók. Hihmat hacho̱bilhípa cha anno̱pa ilbashsha Chihówa pit imasilhhat, yohmá hi̱nakma̱ ilbashshákáchi̱ ka̱ i̱kanallichá hi̱nah ka̱ asilhhattók. 36Áchihmat, “Abba, A̱ki ma̱, nánah mako̱ ish mihchá hi̱nah, hitokósh salbashákáchi̱ ka̱, a̱kanallichih. Hihókakósh anákósh nán ahnilih kako̱ kiyoh ókih. Chishnákósh nána ish áyahnik mako̱ ik yohmih,” im áchittók.

37Hihmat Jesus at falámat onahmat iyákayya alhíha yat nosi yo̱ písacha Simon Peter i̱makáchihmat, “Ish nosi yo̱? Ná ish apisa̱chá híkiyotoko̱ hashi kanalli achaffa kiya? 38Apísa̱chi hicha nán ayashshachi hachik yohmo káchíkat anno̱pa ilbashsha okloh asilhhah. Chish shilombish at nána ka̱ alhpisát mihchih bannah, hihókako̱, chi haknip ato lha̱ko kat ikónoh,” im áchittók.

39Jesus at hima̱kma̱ kaní íyacha anno̱pa ilbashsha makáshi̱niho̱ asilhha mómattók. 40Hihmat, falámat alahmat, oklah nosih banna kat nishkin to̱wá híkiyotok ósh oklah nosih mómaka̱ o̱t pisattók. Hihma̱ Jesus at a̱t okchalih ma̱, nána oklah áchá hi̱nakat oklah ikimikshottók.

41Hihma̱ Jesus at isht atohchína ka̱ kaní íya cha anno̱pa ilbashsha asilhha mómattók. Hicha falámat alahmat, iyákayya alhíha i̱makáchihmat, “Hima̱kma̱ hash nosih hicha hash fohah mómaho̱? Makillah kiya! Hattak Oshi Holittópa (Holy Son of Man) ya̱ a̱t íshicha, nán ayashshachi alhíha pit ímáchi̱ ka̱ hashi kanalli at onah ókih. 42Ho wakáya! Oklah kililhkóli. Hattak kanah ósh siyasanáláchi̱ kat mi̱tih ókih,” im áchittók.

Jesus Oklah Yokáchih

43Jesus at ano̱polih ósh a̱ttah móma̱ho̱, Judas at makfihna ma̱ o̱t hayákattók. Judas at Jesus iyákayya awahtokloh (12) alhíha ma̱ ibíyachaffa áttók. Hikma̱ oklah lawah ósh bashpo faláya hicha iti taptowa chito shólih ósh takla ittanoho̱wattók. Oklah lawa alhíha ma̱, priest i̱noshkobóka alhíha hicha Moses i̱ Nán Alhpisa im ábachi alhíha hicha Jew tikba hikíya alhíha yómikakósh pit chaffichittók. 44Judas at tikba̱li ka̱ oklah i̱makáchihmat, “Hattak kanimápo kako̱ iyat o̱t ayokpachit i̱ po̱salik mako̱, mak hash yokáchicha apísa̱chit iláwít isht hash íyáshkih,” im áchittók. 45Hitokósh oklah áyonah aki̱ni ka̱, Judas at Jesus imónacha i̱makáchihmat, “Nán im ábachi mah,” áchittók. Hihmat Judas at i̱ po̱sattók. 46Hihma̱, hattak alhíha Judas takla ittanóho̱wa kásh mat, Jesus oklah hoklit íshi cha yokáchittók.

47Hihmat, Jesus iyákayya achaffa kat yamma̱ hiki̱ya tokósh bashpo faláya halát kohchittók. Hihmat, priest i̱noshkobóka i̱shahli i̱ to̱ksali ako̱ haksobis taplittók. 48Hihma̱ Jesus at hattak alhíha ma̱ i̱makáchihmat, “Katína ná ho̱kopa hash siyo̱mihchih ósh bashpo faláya hicha iti taptowa yómika̱ shólih ósh hash áyalah choh? 49Nittak ayyoka ka̱, Jew im Áyittanáha Chito ma̱ nán im ábachit hachibá a̱ttali ka̱, hachik sa yókáchotok. Hihókako̱, Holisso Holittópa yat nánah ósh yohma chi̱ho̱ makáchittóka̱ yohmikat a̱lháchi̱h ókih,” im áchittók. 50Hihma̱, Jesus iyákayya alhíha móma kat ka̱chicha oklah yilhípat tahattók.

51Hattak himitta yat nátanna holítopa (expensive) átoba makilla ho̱ fo̱kkah ósh Jesus iyáka̱yyattók. Hitokak pit oklah hoklit ishittók. 52Hitókako̱ hattak himitta ma̱ i̱ náfokka yat i̱sho̱fattók hihma̱ innipi illah ósh balít kaníyattók.

Jew Tikba Hiyohli Alhíha Yat Jesus at Ná Mihchitok Apísat Apónaklochih

53Hihma̱ Jesus a̱, priest i̱noshkobóka i̱shahli (High Priest) ya̱ oklah isht imónattók. Hihma̱, priest i̱ noshkobóka alhíha, hicha Jew tikba hikíya alhíha hicha Moses i̱ Nán Alhpisa im ábachi alhíha yat oklah ittafámattók. 54Peter ato mishi̱hma chohmiho̱ oklah iyáka̱yyat a̱yattók. Hitokósh iyáka̱yyat priest i̱ noshkobóka i̱ shahli i̱chokka onattók. Hihmat hattak nán apisa̱chi alhíha o̱t iba binílicha ilílibishlittók.

55Hihma̱ priest i̱ noshkobóka hicha tikba hikíya alhíha moyyómakat Jesus abih bannattók. Hitokósh, kanahat Jesus a̱ nán ik ayalhpíso mihchittók ácháchi̱ ka̱ oklah hoyottók. Hihókakósh kanah oklah ahóchá híkiyottók. 56Oklah alhíha la̱wa kat Jesus a̱ ná oklah áholábih ókakósh nána oklah áchikato ittimi̱lah bánottók.

57Hihma̱, hattak kaniyómikat wakáyat hikíya cha Jesus a̱ ná áholábittók. Hicha áchihmat, 58“Hattak pat áchihmat, ‘Jew im Áyittanáha Chito, hattak at ikbi ma̱, okpaníláchi̱h, hikmat nittak o̱t ishit átohchínakma̱, Jew im Áyittanáha Chito i̱la, hattak ásh ikbi kiyoho̱ ikbiláchi̱h,’ áchitók,” im áchittók. 59Hihókako̱ yammak máko̱ nána oklah áchikat ittimi̱lah bánottók.

60Hihma̱, priest i̱ noshkobóka i̱shahli mat oklah tikba hikíya cha, Jesus i̱ ponaklohmat, “Chik nánokácho káchi̱ho̱, ná ish mihchi ho̱ oklah chiya makáchi ka̱?” im áchittók. 61Hihókako̱, Jesus at ik nánokáyotok. Hihma̱, priest i̱noshkobóka i̱shahli mat i̱ ponaklohmat, “Chishnakósh Christ chiya ho̱, Holittópa ma̱ Oshi?” im áchittók.

62Jesus at áchihmat, “Mak siyah ókih. Nittak tikba ya̱, Hattak Oshi Holittópa yat Chihówa Lha̱ko Mo̱ma i̱ Shahli ya̱ ibbak isht a̱lhi imma bini̱li ka̱ hash pisáchi̱h ókih. Hicha hosho̱ti (clouds) yat aba yakni ámi̱tiho̱ o̱hiki̱yat mi̱tiliho̱ hash sapisáchi̱h ókih,” im áchittók.

63Hihma̱ priest i̱noshkobóka i̱shahli at yappa̱ hakloh mat nokówah ósh i̱ náfokka faláya ya̱ lhilafficha, áchihmat, “Katihmina hima̱kma̱ kanah i̱la ka̱ áponaklochih hapinnah cho? 64Hattak pat Chihówa oshi miya hósh makáchi ka̱ hash ha̱kloh. Náta hash ahnih cho?” áchittók. Hihma̱, oklah móma kat Jesus at illá hitok ahnit ittibáchaffattók. 65Oklah kaniyómi kat Jesus oklah o̱tofattók hicha inishkin ná o̱pohómottók. Hicha ibbak oklah bonni cha Jesus oklah bólittók. Hihmat Jesus oklah i̱ ponaklohmat, “Hapim anólih, oklah í katima kásh oklah í chisotók,” im áchittók. Hihmat tashka alhíha yat kani isht ilhkóli cha oklah bólittók.

Peter at Jesus a̱ Ná Ikkánah Kiyoh Ósh Makáchih

66Peter at chokka kocha a̱ttah ma̱, allatík priest i̱noshkobóka i̱shahli i̱ to̱ksali yat onattók. 67Hihmat Peter at lowak ma̱ álibíshah ósh bini̱li ka̱ pisahmat písat kaníyacha, “Chishnak kiya, Jesus, Nazareth ámi̱ti ma̱, takla ish a̱yatok!” im áchittók.

68Hihma̱ Peter at áchihmat, “Yammat a̱lhi kiyoh ókih! Nána isht ish ano̱poli ka̱ ikkánalih kiyoh hikmat ak chim akostinícho hókih,” áchittók. Hihmat Peter at holitta okissa ya̱ onattók, hihma̱ aka̱k nakni yat olattók.

69Hihma̱ allatík mak ásh at hima̱kma Peter pi̱satok hicha oklah alhíha yat ma̱ hiyohma̱ya toka̱ i̱makáchihmat, “Hattak pat Jesus áchaffa yókih!” áchittók.

70Hihma̱, Peter at hima̱kma áchihmat, “Yammat a̱lhi kiyoh ókih!” áchittók.

O̱t ahchíbat tahahma̱, oklah alhíha kaniyómi kat Peter i̱makáchihmat, “Jesus ibá achaffa chiya kat a̱lhih ókih. Galilee ámi̱ti chiya átoko̱,” oklah áchittók.

71Hihma, Peter at makáchihmat, “A̱lhi hachi̱ makáchilishkih, hattak ma̱ isht hash anópoli ka̱ ikkánalih kiyoh ókih. Hachi̱ holábili hokma̱, Chihówa yat ik safammi,” áchittók. 72Hihma̱, ashshali̱t aka̱k nakni at isht hitoklaho̱ olattók. Hihma̱, Peter at pit ikkáhnattók Jesus at, “Aka̱k nakni at hitokla olah alhlhika̱, ish sakkána kiyoh kat hitohchína ho̱ ish makáchachi̱h hókih,” imáchitoka̱. Hihmat Peter at yáyah fihnattók.

Currently Selected:

Mark i̱ Holisso 14: CHTW

Highlight

Copy