Mark i̱ Holisso 15

Chapta Awah Talhlhápih (15)

Jesus a̱ Pilate Tikba Isht Imónah

1O̱t onnahi̱li fihnahma̱ priest i̱ noshkobóka alhíha yat Jew tikba hikíya alhíha, Moses i̱ Nán Alhpisa im ábachi, hicha Jew pihlíchi alhíha ittafáma cha Jesus oklah kanihcháchi̱ kat oklah ittimatahlittók. Hihmat Jesus a̱ oklah takchi cha Pilate oklah isht imónattók.

2Hihma̱ Pilate at Jesus a̱ i̱ ponaklohmat, “Chishnákósh Jew alhíha ya̱ i̱ mi̱ko chiya ho̱?” im áchittók.

Hihma̱, Jesus at áchihmat, “Yammak siya ho̱ ish makáchih,” áchittók.

3Priest i̱ noshkobóka alhíha yat Jesus a̱ nán ik áyalhpíso la̱wa ka̱ mihchi apísattók. Hihókako̱ Jesus at nána kiya ik áchottók. 4Hihmat, Pilate at Jesus i̱ ponakloh mómahmat áchihmat, “Nánah kiya ish áchá hi̱nah kat ik chimiksho ho̱? Nán ik áyalhpíso la̱wa ka̱ ish mihchitok miya ka̱, ish ha̱kloh ho̱?” im áchittók.

5Hihókako̱, Jesus at nána ik áchoh mómattók. Hihma̱ Pilate at noklhaka̱chattók.

6Nittak makfokka ka̱, affammi ayyoka ka̱ Awánablit O̱t Iya I̱pa Chito at a̱sha ka̱, yoka kanímakako̱ mokofá hi̱nah oklah ahnikma̱, Pilate at achaffa ka̱ mokóffih bíkattók. 7Hihma̱, makfokálika̱ hattak Barabbas hohchifo yat yoka yósh a̱ttattók. Barabbas hicha kaniyómikat, Mi̱ko ásanálit ma̱yat kanah oklah abittókó. 8Oklah lawa yash at Pilate imonacha nána ka̱ oklah i̱mihchi billíya yatok at yamihcha̱ chi̱ka̱ oklah im ahnittók.

9Hitoko̱ Pilate at oklah i̱ ponaklohmat, “Jew alhíha i̱ mi̱ko ako̱ mokoffilih o̱ hachinna ho̱?” im áchittók. 10Priest i̱ noshkobóka alhíha yat Jesus a̱ i̱ noktalhah mak ókásh isht oklah imónatoka̱ Pilate at ikkánah átokósh yot ponaklottók. 11Hihókako̱ priest i̱ noshkobóka alhíha yat oklah alhíha ya̱ atohnichittók Barabbas ako̱ mokoffahi̱nah oklah ahnáchi̱ka̱.

12Hihma̱, himákma̱ Pilate at oklah lawa alhíha ya̱ i̱ ponaklohmat, “Jew okla i̱ mi̱ko hash áchi hattak ilappa̱ katihchilih o̱ hachinnah?” im áchittók.

13Oklah lawa yásh at tappalah mómat, “Iti ittayyokana ya̱ áhónalhlhichih!” oklah áchittók.

14Pilate at i̱ ponaklohmat, “Katihminá? Nán ik áyalhpíso nátaho̱ mihchitokó?” im áchittók.

Hihma i̱shalihchit, oklah tappalahmat, “Iti ittayyokkana ako̱ ahónalhlhichih!” oklah áchittók.

15Hihma̱, Pilate at oklah lawa alhíha ya̱ imachokmalih bannah átokósh, Barabbas a̱ pit okli̱ mokófáttók. Hicha Jesus ano i̱tashka alhíha yat lhokka̱hat ilbashshat kachicha iti ittayyokkana ahónalhlhíchit takácháchi̱ ho̱, i̱mihattók.

Tashka Alhíha Yat Jesus a̱ Yokpa Oklah Ayikbih

16Hihmat tashka alhíha yat Jesus a̱ Mi̱ko i̱chokka (Praetorium hohchifo) isht ónacha tashka alhíha i̱la ka̱ i̱ pa̱yat ittahoblittók. 17Hicha Jesus a̱ náfokka chito okchakalbi (purple) faláya oklah fokkáchittók. Hihmat, shawwa naksis halóppa (thorny branch) pannit tahli cha, Jesus inoshkobo ma̱ pit shapóchittók. 18Hicha Jesus a̱ yokpa oklah áyikbih cha oklah tappalahmat, “Jew alhíha i̱ Mi̱ko chiyah mah!” oklah áchittók. 19Hihmat, ano̱ti iti tapa íshi cha inoshkobo oklah bólicha o̱ tofattók. Hihmat, hacho̱bilhípa cha oklah ayoppachi iláhobittók. 20Tashka alhíha yat Jesus a̱ yokpa oklah áyikbit im alhtahahmat, náfokka okchakalbi ma̱ i̱shoffittók. Hicha i̱ náfokka átokma̱ falammi̱t oklah fokkachittók. Hicha Jesus a̱ iti ittayyokkana ahónalhlhachit takácháchi̱h ósh isht ilhkólittók.

Jesus a̱ Iti Ittayyokkana Oklah Ahónalhlhichit Takáchih

21Hattak Simon hohchifo, Cyrene atta yat mak yóbaka̱ osápa attat mi̱tit tamáhah iyah ósh a̱yahma̱, Jesus im iti ittayyokana oklah shólichittók. Simon pat Alexander hicha Rufus i̱ki áttók. 22Tashka alhíha mat, Jesus a̱ yakni Golgotha achí ho̱ isht ilhkólittók. Golgotha pat nánaho áchikato, “Hattak noshkobo foni áyásha,” áchih ókih. 23Yamma̱ oklah áyonahma̱, tashka alhíha yat Jesus at ishkáchi̱ka̱, pa̱ki okchi homi ósh okki̱sh ittiyammi yo̱ oklah i̱wílittók. Hihókako̱, Jesus at ik ishkottók. 24Tashka alhíha mat Jesus átokma̱, iti ittayyokkana oklah ahónalhlhichit takáchittók. Hattak achaffa ayyoka kat Jesus i̱ náfokka yómi ka̱ kanímmakako̱ isháchi̱kat talo̱shik (small rocks) ná o̱cho̱wa isht oklah washóhat i̱ náfokka oklah itti̱ kashápattók.

25Jesus a̱ iti itayyokkana oklah ahónalhichih a̱, onnahi̱lih hashi kanalli yat chakkálih fokálittók. 26Iti ittayyokkana ma̱ ícho̱wat taka̱likat, “Jew Alhíha i̱ Mi̱ko Yókih,” áchih ósh taka̱littók. 27Hicha tashka alhíha mat hattak ná ho̱kopa toklo iti ittayyokkana achaffa bi̱ka takáchittók. Achaffa kano Jesus imisht a̱lhi imma takálichicha, achaffa manoh afábi imma takálichittók. 28Yamma mihchika̱ Holisso Holittópa yat áchi kat, hattak nán ikachokmo alhíha yo̱ ibá holhtinátok áchi átok at o̱t isht áya̱lhittók ókih. 29Hihma̱ oklah alhíha yat iti ittayyokkana itto̱ma o̱t ilhkólihmat, Jesus oklah ná miha̱chit o̱t ilhkólittók. Hikmat Jesus a̱ ikahóbálo kat oklah inoshkobo shanayóchit (shook their heads) o̱t ilhkólittók. Hicha pit oklah taklholálit, “Hitoko̱, chishnash Jew im Áyittanáha Chito okpanit talih cha, nittak ishit átohchinakma̱ (3), falámmi̱t ish ikbá hi̱nah ósh ish makáchitok, 30hihókat ilí lhakoffi̱chi hicha iti ittayokkana ma̱, akkowah,” im áchittók.

31Priest i̱ noshkobóka alhíha, tikba hikíya alhíha hicha, Moses i̱ Nán Alhpisa im ábachi alhíha akkiya, Jesus a̱ yokpa oklah ayikbittók. Oklah áchihmat, “Kanah i̱laka̱ lhakoffi̱chi hókash, iláp aki̱li kano híkiyoh. 32Iláp akósh Christ hicha Israel i̱ mi̱ko átokmat, iti ittayyokkana ma̱, ik akkowa! Hihokma̱ Israel i̱ mi̱ko yóka̱, oklah í yimmá hi̱nah,” áchittók. Hikma̱ ná ho̱kopa toklo akkiya, ibá taka̱lit oklah kásh, mat Jesus a̱ ná miháchittók.

Jesus at Illih

33Tákolihma̱ (noon), shotik at o̱t losat tahattók, hicha yohmi na̱ hashi kanalli tohchínah onattók. 34Hihma̱ hashi kanalli tohchínah ma̱ Jesus at tappalat, “Eloi, Eloi, lama sabachthani?” áchittók. Anno̱pa yappat áchikat, “A̱ Chihówa mah, A̱ Chihówa mah, katína issa ka̱chih chóh?” áchih.

35Oklah alhíha kaniyómikat yamma̱ hiyohma̱ya kásh at Jesus oklah ha̱klottók hicha oklah áchihmat, “Jesus at Elijah ako̱ i̱payah ókih,” oklah áchittók.

36Hattak achaffa kato, pit balíli cha, náfokka tapa o̱t ishittók. Hicha pa̱ki okchi homi ishit lachálit ka̱chi cha iti tapa apokfoblit takálichit, Jesus at ishkáchi̱ka̱, pit i̱ wílittók. Hicha áchihmat, “Elijah at álacha a̱t akkowáchikmah nánachi̱ hokmá, oklah kí pisa,” áchittók.

37Hihma̱ Jesus at chitólih ósh tappalahmat, illittók.

38Hihma̱, Jew im Áyittanáha Chito ano̱ka ma̱, okhissa nátanna sokko (thick curtain) takáli átokat aba hikít akka íya kat lhiláfat o̱t tahattók. 39Hihma̱ Rome i̱ tashka alhíha tikba hikíya yat iti ittayyokkana ma̱ tikba hiki̱yatok at Jesus at chitót tappalaka̱ ha̱klotok hicha illi ka̱ pi̱sa tokósh, “Hattak illappat Chihówa Oshi ókat a̱lhitok ókih,” áchittók.

40Hikma̱ ohóyoh kaniyómikat, mishihma ho̱ ít pist hiyohma̱yattók. Takla hiyohma̱ya kat Mary Magdalene, Mary, (James himmita hicha Joses ishki) hicha Salome ayínattók. 41Galilee yakni ma̱, ohóyoh alhíha pat Jesus iyákayya hicha apílachit nán imatahlih attók. Hikma̱ ohóyoh alhíha i̱la kat lawah ósh Jesus awa̱t Jerusalem oklah áyonatokat makmákósh o̱t hiyohma̱yattók.

Jesus Hollopi Isht Imma

42Nittak pat nán atahli nittak attók. Makátoko̱ Jew alhíha yat Nittak Holittópa nittak (Sabbath) áchi̱ka̱ nán áyatahlit ma̱ya attók. Hitoko̱, okítiya ma̱, 43hattak Joseph hohchifo, Arimathea tamáhah ámi̱ti yat ik nokshópoh ósh Pilate imóna cha Jesus i haknip a̱ o̱t ponaklottók. Joseph at Jew pihlichi alhíha ya̱ áyachaffa attók hikmat oklah at holítoblit áya̱lhittók. Hikmat, oklah alhíha moyyómakat Chihówa akósh i̱ mi̱ko yo̱ oklah hochífot holítobláchi̱ nittak ma̱, iláp akkiya ho̱yottók. 44Pilate at noklhaka̱chattók, Jesus at illit issa yo̱ haklohmat. Hitokósh Rome i̱ tashka alhíha tikba hikiya ásh ma̱ i̱pa̱ya cha Jesus at illit issá okmah nána toka̱ i̱ponaklottók. 45Tashka alhíha tikba hikíya ásh mat yammat a̱lhi ka̱ im ano̱lihma̱, Pilate at Jesus ihaknip a̱ Joseph imattók. 46Joseph at nátanna isht ála cha Jesus ihaknip átokma̱ iti ittayyokkana ma̱ akkowáchittók. Hicha nátanna ma̱ i haknip a̱ abonittók. Hicha Joseph at Jesus ihaknip a̱ itombi ano̱ka fokkittók. Áhoppi yappat tali chito ákollih ósh cholok ikbi attók. Joseph at tali chito átokma̱ tonollichit áchokwa ma̱ pit hilíchittók. 47Mary Magdalene, hicha Mary, Joses ishki, yat Jesus i haknip a̱ kaníyako̱ bohli toka̱ pi̱sat oklattók.

Currently Selected:

Mark i̱ Holisso 15: CHTW

Highlight

Copy