Mark i̱ Holisso 13
13
Chapta Awah Tohchínah (13)
Jew I̱m Áyittáha Chito at Okpolot Taha Polláchi̱h
1Jesus at Jew im Áyittanáha Chito (Jewish Temple) ma̱ akanallih ósh a̱yahma̱, iyákayya achaffa kat i̱makáchihmat, “Nán im ábachi mah, Jew im Áyittanáha Chito yappa̱ hicha achakat talohma̱ya ayína kat pisa hóchokma hicha tali hochito isht átoba óka̱, pisa,” im áchittók.
2Hihma̱, Jesus at áchihmat, “Aboha hochito yokomika̱ hash pi̱sa? Yakómikat okpolot taha polláchi̱ hókih. Tali achaffa kiya ittiyo̱kama̱yáchi̱ kiyoh ókih,” im áchittók.
Hicha Ibashshaka at A̱shachi̱h
3O̱t áchíhbat tahahma̱, Jew im Áyittanáha Chito i̱tannap ma̱, Jesus at Olives Nanih Cháha apaknaka ma̱ bini̱littók. Hihma̱, Peter, James, John hicha Andrew yómi kat oklah iláp illah ósh Jesus oklah imónattók. 4Hicha oklah i̱ ponaklohmat, “Hapim ano̱lih, katikmako̱, nána yakómikat yohmáchi̱h? Hicha nán annówa natah ósh hayákáchi̱, ná yakómikat yohmit isht hikit iyachi̱ ka̱?” oklah áchittók.
5Hihma̱ Jesus at i̱makáchihmat, “Aha hash ahnashkih. Kanahat ik hachi haksícho kiyah. 6Oklah la̱wa kat ála cha, ának iláhobbit nówáchi̱h. Hicha ‘Anakósh Christ siyah ókih,’ ácháchi̱h. Hikmat oklah la̱wa ka̱ haksicháchi̱h ókih. 7Hikmat ittibi chito a̱sha ka̱ hash haklo, hicha ittibi chito yat a̱sháchi̱h annówa ka̱ hash hakloh okmat hachi nokshópannah. Yakómikat ti̱kba yohmik mak áchih polla, hikásh, yammat o̱t ishtayyópih kano kiyoh ki̱shah ókih. 8Okloshi alhíha ittimilayyoka kat okloshi i̱la ya̱ oklah ittiyásanálit ittibáchi̱h. Hikma̱ mi̱ko alhíha yat mi̱ko alhíha i̱la ka̱ oklah ittibáchi̱h ókih. Hikma̱ yakni ittimilayyoka ka̱ yakni at winakácháchi̱, hikmat, oklah la̱wa kat hokchafot illáchi̱h ókih. Hihókakósh ná yakómikat, nán palammi chito áyisht hikít íyah ókih.
9Hikma̱, aha hash ahnih okmakáchi̱h! Oklah at hachi yokáchi̱ hicha nán alhpisa ayikbi ya̱, oklah hachisht iyáchi̱h, hikma̱ ano̱ti Jew im áyittanáha ano̱ka ma̱ áhachi fammáchi̱h ókih. Hikmat, ának átok polla na̱, tikba hikíya alhíha hicha mi̱ko alhíha ya̱ tikba o̱t hachi hilicháchi̱h. Hikma̱, ának isht imma ya̱ oklah hash im anóláchi̱h. 10Hicha ishtayyópi kat ala alhlhih ka̱, okloshi alhíha moyyómaka̱ Chihówa im anno̱pa yat im annówa okmakáchi̱h ókih. 11Hikmat hachi yokáchit nán alhpisa áyikbi yá hachisht iyakma̱, nátaho̱ makáchiláchi̱h ahnit ishit hachiya ataklamannah. Hashi kanalli yat onak ma̱, nána ho hash makácha hi̱nah toka̱, Chihówa yat anno̱pa alhpísa ka̱ chimáchi̱ aki̱nih. Hihókakósh, hashchish naki̱nih ósh hash anópoláchi̱ kiyoh. Hachim anno̱pa yat Shilombish Holittópa ako̱ ami̱táchi̱h ókih.
12Hikmat ittayápishi alhíha yat oklah ittiyásanaláchi̱ hikmat, kanahat abáchi̱ ho̱ pit i̱ makoffáchi̱h. I̱ki alhíha yat im alla alhíha ya̱ ásanáláchi̱h. Hikma̱, alla alhíha yat i̱ki hicha ishkih ásanáli cha kanahat abáchi̱ ho̱ pit i̱ makoffáchi̱h. 13Anak átok, polla na̱, kanah makósh oklah ik hachi achokmánokáchi̱h ókih. Hihókakósh, hash sa̱ yi̱himmi na̱ o̱t ishtayyópih okmat, okcha̱ya billíya ishachi̱h ókih.
Nána Ayokpoló
14Nána ayokpolóka yat áhiki̱ya hitok kiyoh kat hiki̱yaná hash pisáchi̱h ókih. Kanah ósh ilappa̱ ittimano̱polikmat im akostiníchashkih. Yohmikma̱, makfokálika̱ Judea yakni hash ma̱yah okmat nanih cháha pit ho balílih. 15Hikmat, chi̱ chokka apaknaka ish hiki̱yah okmat, falámat chi̱ chokka abóha íya cha nána kiya o̱t ish íshinnah. 16Hikmat osápa ano̱ka ya̱ ish a̱tta hokmat, falámat íya cha chi̱ náfokka chito o̱t ish íshinnah. 17Yohmikma nittak yammak fokálika̱ ohóyoh alhíha yat alla sho̱láchi̱ hicha alla pishíchi ayína kat, oklah i̱ palammáchi̱h ókih. 18Hicha ná yakómikat onáfa (winter) ano̱ka yo̱ áyohmáchi̱ kiyoh ka̱, anno̱pa ilbashsha hash asilhha chikih, 19nittak ya̱komi kat ná palammi chito áchi̱h oka̱. Chihówa yat ammóna chásh yakni ikbit hikít mi̱ti toka̱ yappat ná palammi chito áchi̱h ókih. Hikmat ná palammi kat yappa̱ ohmi kat himmakma̱ yohmáchi̱h kiyoh ókih. 20Chihówa yat nittak ná palammi chito yómi ka̱ ik yoskolóchoh okma̱, kanah mákósh okcha̱yáchi̱ kiyóshkih. Hihókakósh Chihówa yat atokloli alhíha (chosen ones) átok polla kako̱, ná palammi chito nittak yómi ka̱ yoskolócháchi̱h. 21Yohmikma̱ nittak yammak fokálika̱ kanahat yappa makáchi okma̱, ‘Yappat Christ ókih,’ kiyokmat, ‘Ya̱ hiki̱yah ókih,’ áchih okma̱, ish i̱ yimmi nah. 22Christ iláhobi alhíha hicha hopayyi holittópa ilíhobi alhíha yat ála cha, nána kat yohma hi ik ahobo la̱waka̱ oklah mihchi̱k mat oklah alhíha haksicháchi̱h ókih. Hicha Chihówa yat atokoli alhíha akmako̱ oklah haksichi bannat pisáchi̱h ókih. 23Hihátoko̱, aha oh ahni! Yammak atoko̱ ná yakómikat ik yohmo ki̱sha ka̱, tikba̱li hachim anólilih ókih.
Hattak Oshi Holittópa Yat Mi̱tih
24Ná palammi nittak yómikat o̱t tahakma̱, ‘Hashi yat o̱t losáchi̱h, hicha hashi ninak a̱ya at tokwikiláchíh kiyoh. 25Fichik yómikat at akka ít lowiláchi̱h, hikma̱ shotik (sky) a̱ ná moyyóma kat winákacháchi̱h ókih.’ 26Hikma̱ ano, Hattak Oshi Holittópa yat tokwikili chito ho̱ hosho̱tik (clouds) anokaka yá ámi̱tili hicha isht lha̱ko fihna íshi lihósh míhi̱tili oklah sapisáchi̱h ókih. 27Hikmat am angel alhíha yat atokolili alhíha yakni moyyómaka̱ ámi̱ti alhíha ya̱ ittahobláchi̱ ho̱, yakni apaknaka pit yolhiláchi̱h ókih.
Bihhi Chito Api Ya̱ Nán Ish Ayikkana
28Bihhi chito api ya̱ nána isht iyikkana ya̱ hash im ayikkanashkih. Api mat naksis (branches) offot hicha hashtap (leaves) at offot isht hikít iyakma̱, toffa (summer) yat alá ho̱si ka̱ hash ikkánah ókih. 29Hitoko̱ makíni chohmi ka̱ ná yakómik at yohmik ma̱ hash pisakmat, hash ikkánáchi̱h, hashi kanalli yat alá ho̱si ka̱. 30A̱lhi hachim anólilih ókih, himak ma̱ya kaniyómikat okcha̱ya móma ná, ná yakómi kat yohmáchi̱h ókih. 31Shotik hicha yakni pat hiki̱yana billiyáchi̱ kiyoshkih, hihókakósh, am anno̱pa ato hichi̱h ókih.
Kaníkak Yakómikat Yohmáchika̱ Kanahat Ikkána Kiyoshkih
32Kanahat ikkána kiyoshkih, nittak kaníkako̱ kiyokmat, hashi kanalli kanikak yakómikat yomáchi̱ ka̱. Angel aba yakni máya alhíha akkiya oklah ikkána kiyoshkih. Hicha Chihówa Oshi ak makósh ikkána kiyoshkih. A̱ki Chihówa illah ósh ikkánah ókih, kanikak, oshi yat aláchi̱ ka̱. 33Hitoko̱, apisa̱chi hicha imalhta̱ha! Hachi̱ Chitókaka yat kanikak aláchi̱ ka̱ hash ikkána kiyoh ókih. 34Nittak mat yappak ohmáchi̱h ókih: Hattak at anówah hopaki ho̱ iyáchi̱h ósh i̱ to̱ksali alhíha yat i̱ chokka hicha nánah ósh ima̱shatok ma̱ apisa̱cháchi̱ ho̱ im anólittók. Hicha i̱ to̱ksali ayyoka kat nánaho̱ mihcháchi̱ ka̱ im anólittók. Hicha i̱ to̱ksali, okissa apisa̱chi ma̱, mi̱ko at falámat alachi̱ka apisa̱cha̱chi̱ im anólittók. 35Hihátoko̱, kanikako̱, hattak chokka i̱tala̱ya yat falámat aláchi̱ ka̱ hash ikkána kiyoh atokósh, apisa̱chih! Okitiya kiyokmat ninak ikklana kiyokmat onna ho̱si kiyokmat onnahi̱li másh yomma hi̱nah ókih. 36Hihókakósh aláchi̱ chik ahno ho̱ ala hokma̱, nosih ósh ish itto̱la ná chiyahochinnah. 37Yohmih óka̱ nána ho̱ hachim áchilih kat oklah moyyóma ka̱ im áchilih ókih. Oh im alhta̱ha!” áchittók.
Currently Selected:
Mark i̱ Holisso 13: CHTW
Highlight
Share
Copy
Want to have your highlights saved across all your devices? Sign up or sign in
Choctaw Mark and Genesis Portions © American Bible Society, 2005.
