Mark i̱ Holisso 12

Chapta Awah Tokloh (12)

Osápa Pota Alhiha Nán Isht Alhpisah Anno̱wa

1Hihmat, Jesus at nán isht alhpisa annówa pa̱ oklah im anólittók: “Hattak at i̱ yakni átokma̱, pa̱ki api hokchittók. Pa̱ki api áholokchi ma̱ tali holitta (fence) ikbit áfolóllichittók, hikmat ano̱ti kollit kolokbi askáchicha pa̱ki ápichihli ya̱ fokittók. Hikmat ná apisa̱chit biníli i̱chokka cháha ikbittók. Makohmat, i̱ yakni ya̱ osápa ná hokchi alhíha i̱pótat chilófáchi cha iláp ato yakni hopákiho̱ iyattók. 2Hihma̱ pa̱ki amo onah ma̱, yakni i̱tala̱yah makatok at, i̱pa̱ki kashapa ka̱ o̱t isháchi̱ho̱ i̱ to̱ksali achaffa ka̱ pit chaffichittók. 3Hihókako̱, osápa ná hokchi alhíha yat hattak i̱ to̱ksali ma̱ oklah hoklit ishittók. Hihmat oklah bóli cha nána kiya iksho ho̱ kani pit chaffichittók. 4Hihma̱ hima̱kma̱, hattak at yakni i̱tala̱ya mat i̱ to̱ksali i̱la ho̱ pit chaffichittók. Hihókako̱, osápa ná hokchi alhíha mat hattak i̱ to̱ksali ma̱ inoshkobo oklah bot ka̱chi cha ámiháchit hofáyahlichih fihnattók. 5Hihma̱ ano̱ti hattak mat hima̱kma̱ i̱to̱ksali i̱laho̱ pit chaffichih mómattók. Hihma̱ yammano oklah abittók. Hihókako̱, hattak yakni i̱tala̱ya mat i̱ to̱ksali i̱la ka̱ pit i̱chaffihi̱chittók. Hihma̱ kaniyómi kano oklah bot ka̱chittók, hikmat i̱la kano oklah abittók.

6Hattak mat oshi im achaffah illattók. Oshi ma̱ i̱ holloh fihna tokósh ishtayyópika̱ ná hokchi alhíha ma̱, pit i̱ chaffichittók. Hattak mat anokfillih kato, ‘Am alla nakni pano oklah holítobláchi̱h akini̱h,’ ahnittók.

7Hihókako̱, osápa ná hokchi alhíha mat oklah itti̱makáchihmat, ‘Nittak kanimmaká shi̱likano yakni pat, oshi mako̱ ilap áchi̱h ókih. Hitoko̱, oklah kíl abi! Hikmato̱, áhollokchi pat hapishno áhi̱nah,’ oklah ittimáchit ma̱yattók. 8Hitokósh hattak oshi ma̱ oklah hoklit íshi cha oklah abittók. Hihmat ihaknip a̱ pa̱ki áholokchi átokma̱ ákohchit pilattók ókih,” áchittók.

9Hihmat ano̱ti Jesus at oklaha̱ i̱ ponaklohmat, “Yohmi kano hattak, pa̱ki api áhollokchi i̱tala̱ya kásh mat nátah katiyohmáchi̱ chó? Hattak mat ála cha, osápa ná hokchi alhíha yash o̱ abit tahlicha, osápa ná hokchi alhíha i̱la ho̱ i̱m osápa ma i̱pótat chilófacháchi̱h ókih. 10Holisso Holittópa yat yappa̱ áchika̱ hash ittimano̱poli kiyoho̱h: ‘Tali (stone) yamma̱ chokka ikbi alhíha yat oklah ik bannoh ósh kani pila kásho̱, yammak fihnah ósh chokka anóka ya̱ tali mómaka̱ i̱shahli ho̱ tobattók. 11Ilappa̱ Chihówa ak ósh yamihchi, hi̱na nána achokma fihnah ósh yohmi ka̱ oklah í pisah ókih,’ áchih,” im áchittók.

12Hihma̱, priest i̱ noshkobóka alhíha, Moses i̱ Nán Alhpisa im ábachi alhíha hicha Jew tikba hikíya alhíha yat nán isht alhpisa annówa pa̱ haklohmat, Jesus at oklah iláp ako̱ isht anópolih óka̱ oklah ikkánattók. Hitokósh, Jesus oklah yokáchih bannattók. Hihókak ósh oklah lawa alhíha ya̱ oklah i̱ nokshópah átokósh pi oklah kanállittók.

Rome I̱ Mi̱ko Caesar, Iskali I̱ Chilofah

13Hihmat, Jew tikba hikíya alhíha mat, Pharisee alhíha hicha Mi̱ko Herod iyákayya alhíha kaniyómi ka̱ Jesus pit i̱ chaffichittók. Yómi kat, Jesus oklah haksíchi ná, nána ik alhpísoho̱ makácháchi̱ho̱ ilhkólittók. 14Hitokósh Jesus oklah imóna cha yappa̱ i̱ ponaklohmat, “Nán im ábachi mah, hattak achokma̱, ná holábi kiyoh chiyaka̱ ilikkánah. Oklah alhíha ya̱ ish itti̱shahlichih kiyoh, hikmat oklah alhíha yat ná oklah chiya nokfilli ka̱ ishit chiya taklamma kiyoh. Hikmat, kanit ma̱yá hi̱natok Chihówa yat ahni ka̱ áya̱lhi mak ish im ábachih ókih. Hihátok ósh, hapim anóli, iskali (taxes) Caesar oklah ili̱chilófa ka̱ alhpísaho̱, cho kiyoh? 15Ili̱chilofa ho̱, cho kiyoh?” oklah im áchittók.

Hihókako̱, Jesus at ikkánattók nánaho̱ oklah mihchih banna ka̱ hicha oklah im áchihmat, “Katína sa haksichih hachinnah chó? Iskali tali hata ya̱ sapísachih,” im áchittók. 16Hihma̱ iskali tali hata oklah isht imónattók. Hihma̱ Jesus at oklaha̱ i̱ ponaklohmat, “Kataho̱ holbat toba, hicha, hohchifo yósh taka̱lih chó?” im áchittók.

Hihma̱, oklah áchihmat, “Caesar ak ókih,” oklah im áchittók.

17Hitoko̱, Jesus at im áchihmat, “Nánah ósh Caesar iláp okma̱, oh imah, hicha Chihówa ya̱, nánah ósh iláp okma̱, hash ímáshkih,” im áchittók. Hihma̱ oklah at yamma̱ haklohmat, oklah noklhaka̱chittók.

Aba Yakni Ano Ittawáya at Ikshoh Isht Anno̱pa

18Hihma̱, Sadducee alhíha kaniyómi kat Jesus oklah imónáttók. (Illi yat falámat taná hi̱nah ka̱ Sadducee alhíha yat oklah yimmi kiyottók.) Hicha Jesus oklah i̱ ponaklohmat, 19“Nán im ábachi mah, Moses at i̱cho̱likat, hattak at ittawáya yósh alla ikimiksho ki̱shah ósh illikma̱, ittayápishi mat ittayápishi illi itikchi maki̱niho̱ ittawáya hi̱natok. Hicha, alla yat ima̱shwakma̱, ittayápishi illi mako̱ iláp áchi̱h, áchittók. 20Himonnah chásh, ittayápishi o̱tokloh (7) ósh ma̱yattók. Hihma̱ assano mat ittawáyattók. Hihókakósh, alla ikimiksho ki̱sha hósh illittók. 21Hina ittayápishi iyákayya mákósh ohóyoh hattak im illi ma̱ ittawáyattók. Hihma̱, mak mákósh alla ikimiksho ki̱shah ósh illittók. Hikma̱, ittayápishi isht atohchína mak mákósh, alla ikimikshoh ósh illittók. 22Ittayápishi o̱tokloh móma ka̱ á yommit o̱t tahattók. Hihma̱ ohóyoh mat ishtayyopi illittók. 23Chihówa yat illi alhíha falámat tanichik ma̱, ohóyoh pat ittayápishi o̱toklo móma ka̱ ittawáyattók ókat, katimakako̱ itikchi áchi̱h cho?” áchittók.

24Hihmá Jesus at i̱makáchihmat, “Hachi̱ tiballi kat a̱lhi ókih! Holisso Holittópa yat nánaho̱ ábachi ka̱, hachik imikkánoh. Hicha Chihówa imishit lha̱ko yat nánaho mihchá hi̱nah ka̱, hachik imikkánoh ókih. 25Chihówa yat illi alhíha ya̱ tanichikma̱, oklah ittawayáchi̱h kiyoh ókih. Pí angel alhíha aba yakni ma̱ya ma̱, mak ohmáchi̱h ókih. 26Hikma̱ Moses i̱ Nán Alhpisa ya̱ illi yat falámat taná hi ako̱ isht imma ya̱ nána áchika̱ hash ittimano̱poli kiyo ho? Chihówa yat shawwa lowa anóka ya̱ Moses áyim ano̱polimat, ‘Anak ósh Abraham i̱ Chihówa siyah, hikmat Isaac i̱ Chihówa siyah, hicha Jacob i̱ Chihówa siyah ókih,’ im áchittók a̱ Moses at holissochittók. 27Hitoko̱ Chihówa yat illi alhíha ano i̱ Chihówa kiyoh, hihókakósh, okcha̱ya alhíha ako̱ hih. Sadducee alhíha hachiya mah, hash móma kat hachi̱ tiballih ókih,” im áchittók.

Chihówa I̱ Nán Alhpisa Yat Móma Ka̱ I̱ Shahlih

28Jesus hicha Sadducee alhíha yat oklah ittachówa ósh ma̱ya ka̱, Moses i̱ Nán Alhpisa nán im ábachi achaffa kat onattók. Hihma̱ Jesus at anno̱pa faláma achokma ho̱ makáchika̱ hakloh mat, Jesus a̱ yappa o̱t i̱ ponaklohmat, “Chihówa i̱ Nán Alhpisa, katimma kakósh mo̱ma ka̱ i̱shahli?” im áchittók.

29Hihma̱ Jesus at i̱máchihmat, “Nán alhpisa móma ka̱ i̱shahli kat illappak ókih: ‘Israel alhíha ma̱, yappa̱ ho hakloh, hachi̱ Chihówa Chitókaka (Lord God) yat hachim achaffah illah ókih. 30Hachi̱ Chihówa Chitókaka ya̱ ish i̱ hollokat, chit cho̱kash a̱ mómi̱chit, chi shilombish a̱ mómi̱chit, hicha chim anokfilla ya̱ mómi̱chit isht ish i̱ holláshkih.’ 31Hikmat, nán alhpisa mo̱ma ka̱ i̱shahli iyákayya yat áchikat, ‘Kanah i̱laka̱, ish i̱hollo kat, chishno aki̱li ish ili̱ hollo ka̱ ohmashkih’ áchih. Hikmat nán alhpisa tokloh (2) pakósh nán alhpisa mo̱ma ka̱ i̱shahlih ókih,” áchittók.

32Hihma̱ hattak mat áchihmat, “Nán im ábachi mah, hikat a̱lhi ish makah, Chihówa yat achaffa illah óka̱. Chihówa akilla kásh hapi̱ Chitókaka (Lord), hikmat, Chihówa i̱la kat ikshoh ókih. 33Hikmat hapitcho̱kash mo̱mi̱chit, hicha hapim anokfilla mo̱mi̱chit, hicha hapim isht lha̱kochi mo̱mi̱chit Chihówa ako̱ isht oklah ili̱ hollá hi̱natok. Hikmat kanaha̱ oklah ili̱ hollo kat hapishno aki̱li ili̱ hollo kak ohmá hi̱natok. Nán alhpisa yakómikakósh, nán alhpowa hokmit Chihówa isht ayoppachi ya̱ áyi̱shahlih ókih,” im áchittók.

34Hattak mat anno̱pa faláma achokma ka̱ makáchi ná Jesus at haklohmat im áchihmat, “Chihówa im ápihlichíka ish chokowáchi̱kat chi̱ hopaki kiyoh ókih,” im áchittók. Yappat yohmih ma̱, kanahat Jesus a̱ ná aponaklochi oklah ik bannottók.

Christ Isht Imma Ya̱ Ná Ponaklot Áshah

35Jesus at Jew im Áyittanáha Chito ma̱ nán im ábachih ósh a̱ttah mat, Jesus at i̱ponaklohmat, “Katína, Moses i̱ Nán Alhpisa im ábachi alhíha yat yappa̱ oklah áchih, ‘Christ at, Mi̱ko David ako̱, im ayo̱cholóli áchi̱’? 36David at iláp akíni kak kiya Shilombish Holittópa átok pollaho̱ álhopollit áchihmat, ‘Chitókaka yat a̱ Chitókaka ya̱ i̱makáchihmat: Sabbak isht a̱lhi imma pa̱ binílih, hikma̱ chiyásanáli alhíha ya̱ chi̱ notáka alhíha yo̱ ikbiláchi̱h,’ im áchittók. 37David at Christ a̱ ‘Chitókaka’ hochífo ka̱, katit Christ at David im ayo̱cholóli áhi̱na?” im áchittók. Hihma̱ oklah lawa alhíha yat Jesus at nán im ábachih ósh a̱tta ka̱ oklah achokmahnittók.

“Moses I̱ Nán Alhpisa Im ábachi Alhíha Yómika̱, Aha Oh Ahniho!”

38Jesus at nán im ábachih ósh a̱ttahmat, yappa̱ áchihmat, “Moses i̱ Nán Alhpisa im ábachi alhíha yómika̱, aha oh ahniho! Yómi kato̱, náfokka faláya oklah fokka cha nówat ittanóho̱wa kat achokmahni, hikmat nán áka̱chi ittanówak ma̱, kanahat oklah ayokpachi ka̱ isht im achokmah. 39Hikmat, mato Jew im áyittanáha ma̱, tikba biníli kat oklah achokmahnih ókih, hicha i̱pah chito okma̱, holittópa im ábiníli ako̱ oklah binohli kat achokmahni. 40Hihókakósh ohóyoh hattak im illi alhíha ya̱ apílah iláhobbit, haksichih ósh i̱chokka alhíha hicha nánah ósh im ásha ka̱ mo̱mit im áyówat tahli. Hikmat oklah alhíha yat oklah pi̱sa kako̱ anno̱pa ilbashsha oklah asilhha kat faláyachi. Yómi kato ná palammi chito i̱shahlih o̱ oklah isháchi̱h ókih,” áchittók.

Ohoyoh Hattak Im Illi Yat Iskali Apittah

41Jesus at Jew im Áyittanáha Chito ano̱ka ma o̱t chokkówa cha iskali ápitta itto̱ma o̱t binílittók. Hihmat oklah alhíha yat iskali pit ápitta ka̱ pi̱sattók. Hihma̱ yóchito alhíha yat iskali lawát ápittah ósh ma̱ya ka̱, yohmi ahnittók. 42Hitokósh, ohóyoh hattak im illi, ilbashsha yat iskali bosholi tokloh ósh iskitíni iyalli yo̱ fokki ka̱ pi̱sattók. 43Hihmat Jesus at iyákayya alhíha yat ittahóbat áfolóta hi̱nah ahnit im anólittók. Hihmat, i̱makáchihmat, “A̱lhi hachim áchilíshkih! Ohóyoh pat lawa kat mo̱ma ka̱ i̱shahli ho̱ fokkih ókih. 44Oklah yómi kato nán i̱ lawah átokósh im áta̱pa mako̱ áyishit bohli. Hihókako̱, ohóyoh mato ilbashsha kat a̱lhih okásh im iskali mo̱ma ka̱ bohlitok. Hitokósh himakano nána kiya isht i̱pána kat ikimiksho,” áchittók.

Currently Selected:

Mark i̱ Holisso 12: CHTW

Highlight

Copy