MATHI 7

Kutami Shou Kughathabekeu

(Lk 6.37-38,41-42)

1“Kutami shou kughathabe kevilo, tishianguno Alhou no nongu shou kughathabemo nani. 2Kughengu nonguno kutami shou kughathabe keu pesu Alhou no nongu shou kughathabe nani, nonguno kutami shou kiu qhemi mighibeni keno Alhou no tipa qhemi nongu shou mighibe nani. 3Tishiaye, noye kushiye othikuzuu nhethilo amihi jukuto cheni puzu olikhi onhethilo asulu akeu jukutomo kya? 4Momu, onhethilo asulu akenokuu kishi puzu noye othikuzuu vilo, ‘Onhethilo amihi akeu ino shiphevetsuni’ ipiluni kya? 5Noye kuhakughamie! Atughushi onhethilo asulu akeu ikhiphevelo, tithiuno othikuzuu nhethilo amihi akeu ikhiphe nike onhethi tsughukhuyi ithuluve nani.

6“Akimthe nhemgha pesu atsuqo tsukevilo; eno akughupu chi pesu awoqo zulo veqhitsu kevilo, panonguno apukhuno nedaqodave nosake eno ighowo nongu kutsave nosake.

Khulo, Phulo, Kukhulo

(Lk 11.9-13)

7“Khulo, eno ti nongu tsu nani; phujulo eno nonguno phulu nani; kukhulo eno nongu khaqhitsu nani. 8Kughengu khukemino ithulu cheni, phujukemino phulu cheni, kukhu kemi lau khaqhisutsu cheni. 9Momu, nongu gholo timi khuno pa nuno asho khukelo atu pesu pa tsu nani kya? 10Momu, pano akha lakhi khu aye noye apighi lakhi pesu pa tsu nani kya? 11Tishiaye, nongu alhoksami shianamu thime kivi pesu nongu ti-anuli tsukeu yeh ithi ani aye nongu paPuh kungughalo akeuye tinguno alaushi thime kivi pesu pa vilo khukemiqo tsu nani!

12“Timi kutami pelo olau shipeni shikeu hutoi noye kutami lau shilo; kughengu hiye Muse no sughikeu yezah kiqi eno hiye tungkupmino kutsuchekeuke. #Lk 6.31

Kibikhoyikeu Liwo

(Lk 13.24)

13“Kibikhoyikeu liwo veche ilolulo, kughengu ililayikeu liwo eno mlaleyikeu laye kutsapinyive kepualo sawu cheni eno timi kutomono tipala pula cheni. 14Ikemu aliwo kibikhoyikeu eno ala sholokutu keuno akuxupulo sawu cheni eno timi aghulono tipala phulu cheni.

Asubo eno tipau Xathi

(Lk 6.43-44)

15“Kichile tungkupmi jukutomasa, panonguno ashouye bheri toi nongu lau ighi cheni, ikemu panongu loloye tungtugha yikusa toike. 16Panongu kumlakughutha lono nonguno panoqo ithi nani. Asahubo lono atsayithi pithi chemoe, momu koghesahubo lono khughuthi pithi chemo! 17Asubo kivi lono axathi kivi pithi cheni, ikemu asubo lhoksa loye athi kivi pithi chemoe. 18Asubo kiviye axathi lhoksa pithini chemoe, momu asubo lhoksa loye axathi kivi pithini chemoe. 19Asubo khijeno athi kivi pithimo nikeno yeqhive cheni eno amilo vesuve cheni. #Mt 3.10; Lk 3.9 20Tishiaye, nonguno kichile tungkupmiqo pano kumla kughutha lono ithive nani.” #Mt 3.10; Lk 3.9

Niye Nongu Khilemu Mthae

(Lk 13.25-27)

21“Ivilo, ‘Ampeu, Ampeu,’ ipi ikukemi kumtsuno Alhou yehkipelo ilolunike kumoe, ikemu khunoqono iPuh kungughalo akeu pulou shi cheni keno tipaqono ilolu nani. 22Kughou tipa Tsala ighini keno timi kutomono ivilo ishi pinani, ‘Ampeu! Ampeu! ninguye oje lono Alhou no pilo pikeu piche, oje lono tughami kutomo hapheche eno oje lono akumzapu kumla kutomo shicheke kumokesha!’ 23Tileno ino tipanoqo vilo ishi piqhi nani, ‘Niye kutulamu nongu mthae; nongu lhoksakugha shichekeqo, ilauno chevelo!’ #Leshe 6.8

Aki Kini-Kishimi

(Lk 6.47-49)

24“Tishiaye, timi khuno itsa hipaqo chilu puzu tipaqo shini keno, paye atuqu shou pa ki shipuku kemi alokutsumi lakhi toike. 25Tsutsughu ighi eno aghokiqo azuno yimve, eno pasapagha mulhuno aki tipau fudaqhi, ikemu tiye ilaiqimoe kughengu tiye atuquno aboqha shino shipe puake. 26‘Timi khuno itsa hipaqo chilu puzu tipaqo shimo nikeno, paye asaye shou pa ki shipukukemi mbomzumi lakhi toike. 27Tsutsughu ighi, aghokiqo azuno yimve, pasapagha mulhuno aki tipau fudaqhi eno aki tipau ilaiqive. Tiye mzamghaleyi iluqikeu lakhi!’ ”

Jisu Kuka Kumto

28Jisu no hipaqo pive kethiu, timi aqokitikhi huye pano kutsukeu inipesu apuchopungove. 29Paye panongu yezah kutsuchekemi toimo puzu akuka kumto shi panoqo kutsuke. #Mk 1.22; Lk 4.32

Currently Selected:

MATHI 7: SUMIBSI

Highlight

Copy