MATHI 6

Kupukini Vehu Kutsukeu

1“Timi pelo ithulupe niye nowu achineyehlo shichekeu kikimiye kumla timi zulo shipe piye kevilo. Kughengu nonguno tishiaye nongu paPuh kungughalo akeu launo nongu jume kuhave nani.

2“Ikehu kughou timino kiuala avehupu shi aghikelo nono tsu keu pesu ojekipi shikevilo, tiye kuhakughamino Sinagog lo eno alaghila lono tishi cheni, tiye timi pelo panoqo sheqhe peniyeke. Kuchouno ino nongu vilo pini, panonguye pano jume ithuluvae. 3Ikemu kughou timi lakhino kiuala avehupu shi aghikelo nono tsuaye akusami kuchou pelomu tipau ithi pekevilo; 4ikemu tiye tuqhou vehu shilo eno oPuh tuqhouno ithulu akeuno asaxu otsu nani.

Akighini vehu Shika

(Lk 11.2-4)

5“Nonguno kughou inikhu nikeno kuhakughami toi shi kepu kumoe, kughengu panonguye Sinagog chekulo eno alaghila phelo puthughono inikhuni keuno pano lokutu cheni, tishianguno timi pelo panoqo ithulupe niye tishi cheni. Kuchouno ino nongu vilo pini, panonguye panongu jume ithuluvae. 6Ikemu kughou nono inikhu nikeno, ochebolo ilolo eno aki khavelo eno oPuh ithumlano akeu vilo inikhulo, nono kusuuno kiu shi anikeno ithulu akeu oPuhno asaxu otsu nani.

7“Nongu kighinilo, kutami shiayeh qo toi kumsa tsa kutomo peitha kevilo, kughengu panonguno atsa chilo pikeu lono Alhou no initsu nani kughashi panonguye kumsu acheni. 8Panoqo toi shi kevilo, kughengu nongu paPuh ye nonguno pa vilo khumphi lono nonguye kiu avehupu shi ani keno pano ithi ani.

9Tishiaye hitoi inikhulo;

O niPuh kungughalo kuau,

Oje akimtheshi pelu pelo,

10Oyehkipe ighilo,

Kungughalo toi ayeghilo ghi opulou shilu pelo.

11Tsalakipe chuqupu ishi tsalalo ningu tsulo;

12Kutamino nilau akipimi shikeu ninguno pevetsuke toi, ninguno oshou akipimi shikeu pevetsulo.

13Ghukujulo ningu sailotsu kevilo,

ikemu Alhoksau launo nixaphetsulo.#akiyepa hamiloye highi sukuqha puani:“Kughengu ayehkipe, akuka eno akimthe-jekipiye alhokupujulo owuke, AMEN”

14“Kughengu nonguno timi kutamino nongu shou pimivekeu pevetsu aye nongu paPuh kungughalo akeu ghi nonguno pimivekeu pevetsu nani. #Mk 11.25-26 15Ikemu nonguno kutamino pimivekeu pevetsumo aye nongu paPuh kungughalo kuaughi nonguno pimivekeu pevetsumo nani.”

Kumvukeu vehu Shika

16“Kughou nonguno kumvuni keno, kuhakughami toi agi kuzu piye kevilo, kughengu panoqono agi thibuyi pesu kutami pelo panonguye kumvu anikenapi ithulupe niye shi cheni. Kuchouno ino nongu vilo pini, panonguye panoqo jume ithuluvae. 17Kughou nonguno kumvuni keno, akutsulo teli suve, agi phave ishilo, 18tishianguno kutami pelo nono kumvu akeu ithipemo nike, ikemu nongu paPuh ye kutamino ithumlano akeu hu ithi anie. Nongu paPuh kutamino ithumlakeu ithuluakeu huno asaxu otsu nani.”

Kungugha lo Kini

(Lk 12.33-34)

19“Ayeghi hipaulo apila ngo ayisano tsapuhavetsu eno kupkamino hepho-piniyi ilo pukapewuve keu-alo nongu likhi nongu sala akini pekutsu kevilo. #Joshu 5.2-3 20Ikemu kungughalo nongu kini pekikelo, kughengu tileye apila ngo ayisano tsapuhave mlae eno kupkamino hephopiniyi ilo pukapuwuve mlae. 21Kughengu nongu kini khile pekutsupe puani keno nongu mlo ghi pulhapuju tile anani.

Aphi mpi Kuvu

(Lk 11.34-36)

22“Anhethino aphi mpi kuvuke. Ikehu onhethino tsughukhuyi aye, ophi mpi kuchopu akuvuno chhitoi nani; 23Ikemu onhethino vimo aye, ophimpi kuchopu akuzuno chhitoi nani. Tishiaye akuvu nongu lolo akeu huno akuzu shive aye tiye kiutoi zumoyive nani kela!.

Alhou eno Kuakini

(Lk 16.13; 12.22-31)

24“Timi khumu ampiu kini quaxemi shimlae, kughengu paye lakhiye mithive puzu lakhiu kimiye nani; lakhi qhoqhu puzu lakhiu phimo nanie. Nongu ghi titoi Alhou ngo kuakini kuma kinikujo quaxeuye shimlae.

25“Highenguno ino nongu vilo pini, xuanike ghenguno kiu chuni shonikela momu aphi-mpi ghenguno kiu pepuni kelapi nongu mlo kutakihi kevilo. Akuxuye achuqupu nguno akhotouke kumokesha? Momu aphi-mpiye aphimini nguno akhotouke kumo kesha? 26Aghauqono yeiqho-iqi akeu julo, panoqoye apiti yisu chemo momu ghile huchemoe momu alelo pukishe suwo qhichemoe, ikeghi nongu paPuh kungughalo akeuno panoqo loji acheni| Nonguye aghauqo nguno shishe amekushou ke kumo kesha? 27Nongu gholo khuuno pa mlokutakihi akeu lono pa kuxulo ampe lakhi- kinimu xukuphasulu nani kya? 28‘Maye kushiye aphimini ghenguno amlo kutakihi cheni kya? Aluqalo lapu xamunuqono kishi thuwu acheni kela kumsukutojulo. Panonguye akumla shichemo momu panoqo sala aphimini gho chemoe, 29ikeghi ino nongu vilo hi pini, Solomon ye kuakinino kutsasashi anamu axamunu hipaqo gholo lakhino qhivutsuniyi juvikeu toi aphimini pepumla aphie. #1 Kuka 10.4-7; 2 Yeki 9.3-6 30Alupi ishiye xuano thoghiuye nhupe pitiveni keghi Alhou no tipaqo ajukivi pesu pu-upe qhiaye, tinguno shishe alaushi paye nongu pu- umoni kesha? O nongu akupulu kitila likhi akemiqo!’

31“Tighenguno amlo kutakihi ishi pikevilo. ‘Ninguye achuqupu kiu chuni kela? momu Ninguye kiu shoni kela? momu Ninguye aphimini kiu umininikela?” 32Alhou mthakemino pulhapuju hipaqo kumtsu phu acheni; eno nongu paPuh kungughalo akeuno nonguye hipaqo kumtsu avehupu shi akeu pano ithi ani. 33Ikemu Alhou yehkipe eno pa chipiu mikucho paghi nonguno phulo, tishiaye hipaqo kutau kumtsu nongu kupha tsu nani. 34Tighenguno thoghiu vehu pesu omlo kutakihi pekevilo, kughengu thoghiuno thoghiu tsala ghenguno amlo kutakihi kepu ananike. Atsala atsalalo kutakihi kepu akeuno tipa tsala ghenguno lukumkhake.”

Currently Selected:

MATHI 6: SUMIBSI

Highlight

Copy