MATHI 8

Apughami lakhi Shipivi

(Mk 1.40-45; Lk 5.12-16)

1Kughou Jisu no ato lono iqighi keno timi aqokitikhino pa papeche. 2Tile apughami lakhi pa lau ighi eno pa zulo qhoqhunhe puzu ishipi, “Akijeu, nono pulo aghi aye noye ishikimthevetsu lunanie.” 3Jisu no pa-u chhophe pesu pa buno ishipi, “Niye pulo ani, mithelulo.” Paikhavino pa pugha mitheluve. 4Tishieno Jisu no pa vilo pi,”Hila julo, timi khuvilomu kumu pi kevilo, ikemu vejoyi achinemi lau wulo,noye kishekulu pa piyelo eno tishi no Muse no ahza tsupuakeu kiqi lono akumllagho pesu mllalo, tiye kutami#Grik lo “ panoqo” pelo noye mithevae pikeu ithipe nike.” #Achine 14.1-32

Rommi Kijemi Qeu Shipivi

(Lk 7.1-10)

5Kughou Jisu no Kapernaum taun tokeno ghushimi 100 shou akijeuno pa sasu kusho eno pa kuphu tsulepi qhuyiniju. 6“Akijeu, iqeuye akilo azu-a dapesu ithamlano shiluksa shi su ni.” 7Jisu no pa vilo pi, “Ino ighi puzu pa shipivitsuni.” 8Ikemu akijeuno pa khochile, “Akijeu, opelo ikisheqholo ighipe nike akuzupu kumoe.Nono atsa likhimu pivetsu aye iqeuye viluve nani. 9Kughengu nighi ishou kijemi ani eno ghushimi iqhou akemike. Kughou ino milakhi vilo ‘Wulo!’ ipiaye pano wu cheni, eno kutami lakhiu vilo ‘Hila ighilo!’ ipi aye pano ighi cheni; eno iqeu vilo ino ‘Hi shilo|’ ipiaye pano ti shi cheni.” 10Jisu no hipatsa chilu puzu akichiqhive, eno pa papechekemi vilo pi, “Kuchouno ino nongu vilo pini, Israilmi gholomu akupulu hitoi keu niye phumla aphie. 11Ino nongu vilo pini, timi kutomono tsukinhe kipelau ngo kulolauno ighi puzu Kungugha yehkipelo Abraham, Isak eno Jakob ishi sasu iqano kuchukusho shi nani. #Lk 13.29 12Ikemu Kungugha yehkipelo aghikepushi akeqo huye khalau zumoyikelo vepheve nani, tilano panonguye qa-mlo nani eno aghime launo ahu tsughububushi nani.” #Mt 22.13; 25.30; Lk 13.28 13Ipuzu Jisu no akijeu vilopi, “Okilo wolo, nono puluke toi tishiluve aghipeni.” Aqeu huye tipa suche do lono vive aghi.

Jisu no Timi kutomo Shipivi

(Mk 1.29-34; Lk 4.38-41)

14Jisu no Pitor kilo iloghi kelo, Pitor paniye aghakimkino muqhomuzai suno azua dapesu aghi. 15Jisu no li ulo bukelo aghakimiki taveno lino ithu puzu kuchukusho kutope pa tsu. 16Tipani avelau timiqono tughami aphilo akemi kutomo pa lau saghi. Jisu no atsa likhi pipuzu tughakusaqo haphetsu eno kusukinimi kumtsu shipivitsu. 17Pano hitoi shikeuye Isaya tungkupuno ishi pipuakeu shikupuke, “Pano niwu tomo-chhimokeu kusu luvetsu eno niwu kusukiniqo puluvetsue.” #Isa 53.4

Jisu Papeniepikemi

(Lk 9.57-62)

18Kughou timi aqokitikhino pa suhope akeu Jisu no ithulu keno azughi tuxau ikuveni keushi ahza tsu. 19Tile Ayezah kutsuchekemi lakhi ighi puzu pa vilo pi, “Kutsuchekeu, nono khile khile wunamu niye opapesu wuni.” 20Jisu no pa khochile, “Sherqoye ngokepu tuki acheni, eno aghauqono apusu ani; ikemu ni Timi Nu ye pa kutsu mukhu kepu-a ghi kuhae.” 21Akhopemi gholo kutami lakhino Jisu vilo pi, “Akijeu, atughushi ipelo wono ipuh jupithi pelo.” 22Ikemu Jisu no pa vilo pi, “Noye ipapelo, eno kithimi pelo pano wu kithimi jupithi apelo.”

Jisu no Pasapagha Hakuqusu

(Mk 4.35-41; Lk 8.22-25)

23Jisu no ashukalo ikukelo pa khopemino pa papewu. 24Zuleno pasapagha lakhi azughi shou ighive, ikelo azufukuchono ashuka kuzupholuve, ikemu Jisu ye zuche. 25Akhopemino pa lau ighi puzu pa kuda puthuve. Panonguno pi, “Ni xaphelulo, Ampeu! Ninguye thiveni cheae!” 26Tile Jisu no ishi panongu vilo pi, “Akupulu kitila likhi akeqo, nonguye kushiye msa ani kya?” Tishieno pano ithu puzu amlhu ngo azughi lomipi, ikelo shishe iquneyive. 27Timiqono apuchopungove eno ishipi, “Timi hipauye kiutoi kemi keno amulhu ngo azufukucho thotsu pa gholu kya?”

Mikini philo Tughami Have

(Mk 5.1-20; Lk 8.26-39)

28Kughou Jisu no Gedarane qhalo, azughi tuxa kudau tolu keno, timi kini akumo qho chekeu tuki lono ipeghi puzu pa sasu kusho. Timi hipamaye tughamino aphilo akemi kehu ighono ayikusa eno akuyighupu kehu khunomu tipala hechesu iqho-iqimlano ache. 29Pamano qhayi ighathughi, “Noye nilau kiu shi cheni kya? O, Alhou Nu! Ado tomphi lono noye ni ghimeqhiniye hilau ighi ani kesha?” 30Panonguno akeu-a lono kushuwa kumolo awo kutomo aqo shi nguchu ae. 31Tileno tughami no Jisu qhuiniju ghi pi, “Nono ningu hapheveni aye awoqo loji lau ningu puwulo.” 32Jisu no panoqo vilopi, “Wulo!” Ikehu panonguno ipeve puzu awoqo philo ilove. Awo aqo akuchopu atuxulo kuhakive iqi azughilo iloveno azu lono putsuqhive. 33Awo khemino pove eno aphughilo wupuzu tilano thwokha kumtsu pi, eno tughamino sa-akemi hu kishivekela tighi pie. 34Ikelauye aphughilo akemi kumtsu Jisu sasu kushoniye ighi; kughou panonguno pa ithulu keno panongu ghakhu lono chevetsulopi pa qhuiniju.

Currently Selected:

MATHI 8: SUMIBSI

Highlight

Copy