METTHIU 19

Nowtaanmei lam khou Dincloumei

(Mrk 10.1-12)

1Jisu mi guay hei salou tang lana Galili mpatlouna Jordan paengc thangc Judia tuang ramvrei lungc khou gut the. 2Khoutei meic kangdai kathei lay the, kumna mi khou tei kaniw ta tigaylou the.

3Khoutei Pharisimei nunc guangna kata nchanvna, “Nggaanvmei rui kanow ta ramh lam akhat zaeng rui taan khang Riakdanv rui nuh daih?” twna thanv the.

4Jisu rui mundawna sa the, “Puakthau puaksiak khou rui Damhmeipu rui kaney ta nggaanvmei khatni ntumei swna damclou the twmei nangniw pah mak he nah cho?#Tha 1.27; 5.2 5Khoutei Ravguangc rui sa the, ‘Hei zaeng rui nggaanvmei rui kapui kapu ta mpatlouna kanow lev guang kariu nina e, kumna kaney pumh akhat sw nina e.’#Tha 2.24 6Hei zaeng rui kaney tei kanei hamh the, pumh akhat di the. Hei zaeng rui Ravguangc rui zay kariulou kanmei tei maansei rui sw ntamv dat nuh mak khe.”

7Kaniw rui Jisu khou sa the, “Mi kumc e thei tabui swna now taan latryan hyna tii e thei taan nuh e twna Mousi rui sa tu cho?”#Ria 24.1-4; Met 5.31

8Jisu rui kaniw khou mundawna sa the, “Nangniw nowtaan nuh khang Mousi rui nuhloumei tei thu nangniw lung tanc langv tipui zaeng rui e; puakthau puaksiak khou thu mi kumh mak ge. 9Ai rui nangniw khou samei thu: lungcmaanvpui zaeng rui hamhna kanow ta taan lana meic baihmei ta kaw datmei kamei tei lungcmaanvmei e.”#Met 5.22; 1 Ko 7.10-11

10Kaziap nunc tei rui kakhou sa the, “Nggaanvmei khang mi kumhmei sih nai e thei thu, nowkaw mak rapmei rui gay the cho!”

11Khoutei Jisu rui kaniw khou sa the, “Ai ntaw samei hei meic kathuic na kabah laa thay ni tu hamh e, kabah thay khang Ravguangc rui tiiloupui mei na tei rui laa thay khang de. 12Nowkaw makmei lam mpeyna nai e: gaanvsaekc rui kapui bungpuak khou rui nggaanvmei paek pat makmei nai e, gaanvsaekc rui kapumc siammei nai e, gaanvsaekc rui Ravguangc guangcdic khang rui nggaanvmei chwn ganhmei nai e. Mi kabac hei laa thay thaymei rui laa la tho.”

Jisu rui Alauc nunc ta Suaihiamloumei

(Mrk 10.13-16; Luk 18.15-17)

13Mi tangv tei, kaniw py khou kabaanc bouclouna huayneylou khang alauc nunc ta meic nunc rui Jisu daeng khou laaguang khwan e. Khoutei ziap nunc tei rui meic nunc ta tei luh the. 14Khoutei, “Alauc nunc tei adaeng khou guang kan diu, kaniw ta khaam riu. Kalam thu tingkauh guangcdic hei mi kumhmei nunc khang e,” twna Jisu rui sa the.

15Khoutei Jisu rui kaniw py khou kabaanc bouclouna tat kan the.

Lungcgaymei Chabwan Gaanv Khat

(Mrk 10.17-31; Luk 18.18-30)

16Khoutei meic gaanv khat Jisu daeng khou guangna, “Dinhpouc, ringcsuangmei laa khang ai tabui tuang gaymei taanc nina cho?” twna thanv the.

17Jisu rui kakhou sa the, “Tabui swna nang akhou gaymei lam khou thanv bam tu cho? Gaymei gaanv khat nai e; nang ringhmei khou gut nii e thei kalatdanv guay tei piu o.”

18“Tabui latdanv tei cho?” twna kamei rui thanv the.

Khoutei Jisu rui sa the, “Nang meicdow lak nina e, Nang lungcmaanv lak nina e, Nang kaihouc lak nina e, Nang saraamhmei sakhi tii lak nina e,#Tat 20.13-16; Ria 5.17-20 19Nang pui nang pu ta chakhwang sw nina e, Nang tuang kaining kaigeimei ta nang rana nang ta nzianmei kumcna nzian nina e twmei guay hei the.”#Tat 20.12; Ria 5.16; Lev 19.18

20“Mi guay hei thu ai piu the. Ai tabui tuang nthuih mak tuang nai bu heh cho?” twna mi pu tei rui sa the.

21Khoutei Jisu rui kakhou sa the, “Nang nthuih nii e thei, tat lana nang tuang naimei guay tei zuanc lana lungcsimei khang tii tio. Kum e thei tingkauh thangc nang tuang lanv nai puni. Kumna guangna athei lay o.”

22Mi chabwanpu tei hei tei chu la khou, neihla makna tat kan the. Kalam thu katuang lanv mpeyna nai khwan e.

23Khoutei Jisu rui kaziap nunc khou sa the, “Ai rui nangniw khou kaling siakna sa tuang e: Lungcgaymei thu tingkauh guangcdic gut khang kungc puni. 24Ai rui nangniw khou sa dat re: Lungcgaymei rui Ravguangc guangcdic gutmei suangc guaikuan mpinh mai khou gutmei rui chiw e.”

25Ziap nunc tei hei tei chu la khou kaniw ngakna, “Kum e thei ringcsuangmei kiu thow rui laa ngam nina cho?” twna sa the.

26Khoutei Jisu rui kaniw ta zaucna sa the, “Mi hei maansei khang thu ngam mak khe, tiki Ravguangc khang thu ngam tu rana de.”

27Khoutei Pitar rui mundawna sa the, “Zauclo, aniw ramh guayna ganclouna nang thei lay tat bam the. Kum e thei aniw khang tabui tuang nai puni tha?”

28Jisu rui kaniw khou sa the, “Ai rui nangniw khou kaling siakna sa tuang e: Athei laymei nangniw hei thu kandih kathanc thangc Meic Nac Mpouh rui hymdaihmei katuang guangc bamvpaeng khou dungc pwkhou guangh bamvpaeng ruhna kanei khou dungc nchamcna Isaraelmei kaikhwang ruhna kanei ta sin bam puni.#Met 25.31; Luk 22.30 29Kumna thow pw ni kakai, kalau, kachaic, kakainac, kapui, kapu, khatni kanac ta azaeng khang rui gancloumei thai tei hei tei suangc geihna kamei laatow dat puni, kumna ringcsuangmei ni laa puni. 30Kumna ntaw reymei sw bammei mpeyna hei nkhamhmei sw puni, khatni ntaw nkhamhmei sw bammei mpeyna hei reymei sw puni.”#Met 20.16; Luk 13.30

Currently Selected:

METTHIU 19: RONGBSI

Highlight

Copy