METTHIU 18

Thow tei Daic Liangmei Cho?

(Mrk 9.33-37; Luk 9.46-48)

1Mi ganv khou tei ziap nunc tei Jisu daeng khou guangna, “Thow tei tingkauh guangcdic khou daic liangmei cho?” twna thanv the.#Luk 22.24

2Khoutei alauc khat ta kaw guangna kaniw hu khou tidinglouna 3sa the, “Ai rui nangniw khou sa tuang e: nangniw lungh laicna alauc nunc kumh mak ge thei, nangniw tingkauh guangcdic khou gut zat ni tu hamh e.#Mrk 10.15; Luk 18.17 4Hei zaeng rui thow pw ni niamh keyna, mi nac launa hei kumhpui mei tei tingkauh guangcdic khou daic liangpui mei e. 5Kumna thow pw ni mi kumhmei alauc gaanv khat ta azanc khou laaloupui mei tei, ata laalou tu e.”

Paapc Taanh khang Nthiammei

(Mrk 9.42-48; Luk 17.1-2)

6Thow pw ni akhou lwmmei mi kumhmei alauc akhat ta tiphaysuyloupui mei ta thu kaguang khou napriaktauc daihmei ntalouna duipui syng thangc phaicloumei rui kakhang gay e. 7Meic nunc ta tiphaysuypui tuang mpeyna naimei mbaanv kandic hei sansi e dav! Nthiammei thu guang puni di the, tiki kakhou rui nthiammei guang bampui mei tei sansimei e.

8“Nang phay rui hamh e thei nang baanc rui nang ta tiphaysuy e thei, hei tei dan tapna nang khou rui ganc o. Kalam thu nang phay nang baanc ntanghna tingsaeng mai khou gutmei suangc, nang phay nang baanc ntangh mak sini ringhmei khou gutmei rui nang khang gay e.#Met 5.30 9Nang mik rui nang ta tiphaysuy e thei, hei tei lat patna ganc o. Kalam thu nang mik kanei naina maikwam mai khou gutmei suangc nang mik akhat na naina ringhmei khou gutmei rui nang khang gay e.#Met 5.29

Maanmei Lauziu Latgiam

(Luk 15.3-7)

10“Mi nthyammei nunc ti hei thouh sw makpui tuang sw mak khang nangniw ramhthay o. Ai rui nangniw khou sapui tuang e: tingkauh thangc kaniw tuang baanchara nunc tingkauh thangc bammei aPu daeng khou guang tanh tan bam e. 11(Kalam thu Meic Nac Mpouh hei maanmei ta kanlou khang guang tuang e.)

12“Thowkumhmei lauziu phay khat naimei gaanv khatpu katuang lauziu akhat ruan maan tat kan ti thei kamei akumh puni cho? Riakchakiuna chakiu ta tei chyngbut khou ganclou ducna ruan maan kanmei akhat ta tei phu tat pw lak nah cho? 13Ai rui nangniw khou kaling siakna sa tuang e: kamei rui hei tei ariw dat pwkhou maan makmei riakchakiuna chakiu naimei khang tei suangc maan kanmei akhat ta phu tow datmei khou tei neihla diangc e. 14Hei tei kumcna, mi nthyammei pang khou rui akhat na sini maan kanmei ta tingkauh thangc bammei nangniw pu laa nii mak ge.

Nkhuaimei Chana

15“Nang chana rui nang khou nkhuailou tuang nai e thei, tatna kamei rui nkhuailoumei tei nangney rana rac o. Kamei rui nang lat tei chulou e thei, nang rui nangney chana kiang riang tigaylou dat the.#Luk 17.3 16Tiki kamei rui chulou mak ge thei, gaanv nei gaanv thumh mwang khou rui kiuc dyng e twmei thay khang gaanv khat gaanv nei ta nduanghna tat ro.#Ria 19.15 17Kamei rui kaniw tuang lat tei ni chulou mak ge thei, phwamling khou phungclou ti tho. Kamei rui phwamling tuang lat tei nganvna chulou mak ge thei, kata tei Zentelmei khatni dihkhav kakhamei nunc ta kumcna khaclou ti tho.

Bangcloumei khatni Ricloumei

18“Ai rui nangniw khou kaling siakna saloupui tuang e: nangniw rui kandih khou bangcloumei tei tingkauh thangc ni bangclou puni khatni nangniw rui kandih khou ricloumei tei tingkauh thangc ni riclou puni.#Met 16.19; Jhn 20.23

19“Ai rui nangniw khou sa dat re: Kandih khou bammei nangniw gaanv nei rui tabui lam khou pw ni chwnchamhna ney e thei tingkauh thangc bammei aPu rui swlou puni. 20Kalam thu gaanv nei gaanv thumh azanc khou guang kariuna bammei bamv khou tei ai bam e.”

Kuaklou Makmei Bangc Gaanv Khat Latgiam

21Khoutei Pitar guangna Jisu khou sa the, “Poubauhmei, akhou nkhuaimei swlou bammei chana gaanv khat ta ai kuaklou azuh nina cho? Chanei ny?”#Luk 17.3,4

22Jisu rui kakhou sa the, “Chanei na hamh e, kuaklou luan chanei tei riakchanei nina de.”#Tha 4.24

23“Kalam thu, tingkauh guangcdic hei guangh khat rui katuang bangc nunc tuang syan chak sw nthan khang swmei kumhmei tuang e. 24Rey liangmei khou talent#Mi hei syan zanc e. ching ruh pow phunghmei bangc akhat ta nduangh guang the. 25Mi pu tei tii dat ngam timak khena, kanow kanac nunc khatni katuang naimei guay zuancna khangh khang guangh tei rui sa the. 26Khoutei banghpu tei pun nkhum laamv keyna kalumna, ‘Nang lung puamclou ri tho, kaguayna ai khangclou ni de,’ twna sa the. 27Khoutei guangh tei kabangcpu ta tei ning ngam makna kapow guay tei kuaklouna mpatlou kan the.

28“Mi bangcpu tei tat pat pwkhou guangh bangc sw nchamcmei katuang denari#Mi hei syan zanc e. phay khat pow phunghmei kapammei gaanv khat ta ariw the. Khoutei mi pu ta tei nymna kakhac gayna ‘Apow tei tii tho’ twna sa the. 29Mi pu tei rui, pun nkhum laamv keyna, ‘Nang lung puamclou ri tho, ai khangclou ni de,’ twna sa the. 30Khoutei kamei tei nuh mak khe, kumna kapow tei khangclou mak saanv lou khang kangkai khou tiilou kan the. 31Kapammei guangh bangc nunc tei hei tei how pwkhou kaniw lung mpeyna kabiu the. Kumna kaniw guangh daeng khou guangna pat kanmei guayna tei poulou the. 32Khoutei mi bangcpu ta tei kaw guangna guangh tei rui kakhou sa the, ‘Meicsimei bangc, nang rui zaenghuaypui thei layna nang pow guayna tei ai kuaklou kan the. 33Ai rui nang ta zauc nzianloumei kumcna nang ni nang pammei ta zauc nzianlou nina hamh nah cho?’ 34Khoutei guangh tei kalung puamcna kapow guayna tei khangc ngam mak saanv rai khang kangkai kaipouc baanc khou tiilou kan the.

35“Nangniw chana makaamv khat khat ta nangniw lung syng khou rui kuaklou mak ge thei, tingkauh thangc bammei aPu rui ni nangniw khou hei tei kumcna swlou puni.”

Currently Selected:

METTHIU 18: RONGBSI

Highlight

Copy