METTHIU 20
20
Lauphihmei Latgiam
1“Tingkauh guangcdic kiu mi hei kumh tuang e. Drakha lau taanhmei gaanv khatpu rui taanv taanhpui mei phu khang lauthwan khuanzingh pat the. 2Zaeng neih khat phy denari#Mi hei syan zanc e. akhat khang nuhna meic gaanvsaekc katuang drakha lau thangc ndiulou kan the. 3Tingchung zaengc khou tat pat dat pwkhou meic gaanvsaekc taanv taanh makna kaithyan khou ding bammei ta how the. 4Khoutei kamei rui kaniw khou, ‘Nangniw ni atuang drakha lau tat ro, phy gayna tii puni,’ twna sa the. 5Khoutei kaniw tei ni tat kan the. Neih ndyng khou ni, neih nchiangh key khou ni kamei tat pat dat muayna hei tei kumcna ndiulou dat muay the. 6Kumna tingzyn ramvgei kamei tat pat dat pwkhou meic baihmei ni ding bammei ta ariw the. Khoutei, ‘Nangniw tabui swna taanv taanh makna mi khou hei nsa ding zingc bam tu cho?’ twna sa the. 7‘Aniw ta thu meic rui lanvloumei maekna the,’ twna kaniw rui daw the. Khoutei kaniw khou, ‘Nangniw ni atuang drakha lau tat ro.’ twna sa the.
8“Tingzyn drakha lau kaipouc tei rui katuang taanvpypu khou sa the, ‘Taanv taanhmei guay ta kaw tho, kumna kaniw phy tei tat nkhamh liangmei khou rui tii thauna tat rey liangmei khang nkhamh liangmei khou tii ti tho.’#Lev 19.13; Ria 24.15 9Khoutei tingzyn ramvgei tatmei nunc khang denari akhat akhat tiilou the. 10Tat rey liangmei nunc tei kaniw khang thu geic pwng the twna ningna guang the. Tiki kaniw khang ni denari akhat akhat tiilou the. 11Hei tei tiilou pwkhou laupouc ta pian makna sa thau the, 12‘Mi nkhamhmei nunc thu ganvdak akhat na taanh tuang de. Aniw neih ndaengna neihmaryn taanhmei nunc phy lev nchamcna nang tii bammei thu tabui thiak cho?’ twna sa the. 13Khoutei kamei rui kaniw pang khou gaanv khat khou, ‘Champanv, ai nang ta guat mak ge. Denari akhat khang nang nuhna taanh de. 14Nang tuang phy laana tat tho. Mi nkhamhmeipu khang ni nang khang lev nchamcna ai tii nii na de. 15Atuang tei thu ai anyng sw nuh mak nah cho? Alung daicna tiimei ti hei nang mamav bu cho?’
16“Mi hei kumcna nkhamhmei nunc hei reymei sw puni, khatni reymei nunc hei nkhamhmei sw puni.”#Met 19.30; Mrk 10.31; Luk 13.30
Jisu Kamei Theic Nimei lam Sa Luan Kathumhmei
(Mrk 10.32-34; Luk 18.31-34)
17Jisu Jerusalem thangc nganghmei chaenglwan khou, kaziap ruhna kanei ta nduangh langc patna kaniw rana tat bam khou kamei rui kaniw khou sa the, 18“Zauclo, aniu Jerusalem khou ngangh puni the. Mi khou tei Meic Nac Mpouh ti hei amuh daihmei nunc khatni Riakdanv dinhpouc nunc baanc khou tii pat puni the. Kumna kaniw rui kakhuay nkhamlouna kata swluai khang, 19Zentelmei nunc khou tiilou tina kaniw rui kata sinnui puni, bai puni, kumna kros khou thaengcluai puni. Tiki zaeng neih thumhpui neic kata tiringcthau dat puni.”
Zebedi Now rui Kanac Nei Bamv khang Neymei
(Mrk 10.35-45)
20Mi tangv Zebedi now kanac nei ta nduanghna ramhkhat ney khang Jisu daeng khou guangna kalum khwan e.
21Khoutei, “Nang tabui tuang kahawna cho?” twna Jisu rui thanv the.
“Anac nei ti hei nang guangcdic khou kiu nang tuang baanzat baandaw khou tidungh khang latdanv patlou o,” twna sa the.
22Mundawna Jisu rui sa the, “Nangney tabui tuang ney bam tu cho twmei nangney thay mak ge. Ai rui zangv nimei buangc hei nangney zangv diw nah cho?”
“Aney zangv diw e,” twna kaney rui kakhou daw the.
23Khoutei Jisu rui kaney khou sa the, “Nangney atuang buangc zangv puni de, tiki atuang baanzat baandaw khou dungc nimei thu ai rui tii nina hamh e. Mi bamv hei thu aPu rui kamei rui chamdaanvloumei nunc khang tii kan ni tuang de.”
24Hei tei baihmei ziap ruh tei rui chu la khou kakai chana nei ta kaniw lung puamc the. 25Khoutei Jisu rui kaniw ta kaw guang kaduaina sa the, “Nangniw thay bammei tei the: Zentelmei guangc nunc thu kaniw tuang mei nunc ruc khou kaipou sw e, khatni kaniw tuang meicdaihmei nunc tei meic nunc ruc khou ngamv sin e.#Luk 22.25-26 26Tiki nangniw thu hei tei kumc nina hamh e. Nangniw thowkumhmei rui meicdaihmei sw nii e thei, kamei meic guayna siamruaimei sw nina de.#Met 23.11; Mrk 9.35; Luk 22.26 27Thowkumhmei rui daic liangmei sw nii e thei, kamei tei nangniw bangc sw nina e. 28Zauclo, Meic Nac Mpouh hei kasiamruai swlou khang guang tu hamh e, tiki siamruai sw khang khatni meic mpeyna ta thuak pat khang theiclou khang guang tuang de.”
Jisu rui Mik Tiatmei Gaanv Nei ta Tigayloumei
(Mrk 10.46-52; Luk 18.35-43)
29Jisu lev kaziap nunc Jeriko khou rui tat pat dat khou, meic kangdai kathei lay tat bam khwan e. 30Khoutei chaeng daeng khou dungc bammei mik tiatmei gaanv nei Jisu guang e twmei chu lana, “Poubauhmei, David Nac Mpouh, aney ta zauc nzianlou o,” twna kauc the.
31Khoutei meic nunc tei rui kaney ta “Reih rei o” twna luh the. Tiki kaney kauc ranv hay hayna, “Poubauhmei, David Nac Mpouh, aney ta zauc nzianlou o,” twna kauc the.
32Khoutei Jisu dingna kaney ta kawna, “Ai rui nangney khang tabui swlou tu laa niina cho?” twna thanv the.
33Khoutei, “Poubauhmei, aney mik tihowlou dat ro,” twna sa the.
34Jisu kaney khang ningngam mak khe, kumna kaney mik tei kahilou the. Mi dyng khou tei kaney how dat the, kumna kathei lay the.
Currently Selected:
METTHIU 20: RONGBSI
Highlight
Share
Copy
Want to have your highlights saved across all your devices? Sign up or sign in
Rongmei Naga (Revised) Bible - NTHANMEI BAIBAL (Revised)
Copyright © 2017 by The Bible Society of India
Used by permission. All rights reserved worldwide.
