METTHIU 21

Jisu Jerusalem khou Guangh Swna Gutmei

(Mrk 11.1-11; Luk 19.28-40; Jhn 12.12-19)

1Jisu lev kaziap nunc Jerusalem ana guangna, Olive Chyng khou naimei Bethphage khou guang pwkhou, Jisu rui kaziap gaanv nei ta ndiulouna 2sa the, “Nangney hu khou naimei namv khou hei gut tho. Mi khou hei nangney gut rappui lev kuanniam kui akhat bangclou bammei ta ariw puni. Kanac ni kadaeng khou bam puni. Hei tei ricna adaeng khou laaguang o. 3Thow rui pw ni nangney ta sa pw e thei, ‘Kaipouc#Kaipouc; hamh e thei kakaipouc. khang mi nei hei kage naina de,’ twna sa tio. Kum ti thei kaneih makna kamei mpatlou puni de.”

4-5“Zaion nac aluhpui khou sa tio,

Zauclo, nang guangc kuanniam tuangcna,

kuanniam nay launa khou tuangcna,

nzaenghna nang khou guang e,”

twna muhzwng rui saloumei tei guang tangh khang mi hei pat tuang e.#Zek 9.9

6Ziap nei tei tatna Jisu rui saloumei kumcna taanc the: 7Kaney rui kuanniam kui akhat lev kanac akhat laa guangna mi kanei nam khou tei kaniw phey bamclouna Jisu dungc the. 8Meic kangdai rui kaniw phey chaeng khou bamclou the. Baihmei gaanvsaekc rui thingnuy laana chaeng khou bamclou the. 9Khoutei kathei kahu lwan tatmei meic kangdai tei rui, “David Nac Mpouh khang Hosanna! Poubauhmei zanc khou guangmeipu hei sangaymei sw diu!” twna kauc the.#Kal 118.25,26

10Jisu Jerusalem khou gut pwkhou, kaidai kapwm tei kachin karo the, kumna, “Mi pu hei thow lana cho?” twna meic nunc rui thanv the.

11“Mi pu hei Nazarethmei muhzwng Jisu e,” twna meic kangdai tei rui sa the.

Jisu Ravkai khou Gutmei

(Mrk 11.15-19; Luk 19.45-48; Jhn 2.13-22)

12Jisu Ravkai khou gutna Ravkai khou puat zuanc bammei khatni liu bammei guay ta nthau pat the, syan akhiak bammei nunc tuang paeng guay khatni aphyna zuanc bammei nunc tuang bamv guay thui nkhanlou the. 13Kumna kaniw khou sa the, “‘Akai ta huayneypui kai kaw pu ni,’ twna hylou e, tiki nangniw rui mi ti hei kwamtumei nunc duppui bamv tiswlou the.”#Isa 56.7; Jer 7.11

14Mik tiatmei nunc khatni phay baumei nunc Ravkai khou tei kadaeng khou guang the. Khoutei kamei rui kaniw ta tigaylou the. 15Kamei rui taancloumei charynmei taanv guay khatni “David Nac Mpouh khang Hosanna,” twna alauc nunc rui Ravkai khou kauc bammei tei amuh daihmei nunc khatni Riakdanv dinhpouc nunc tei how lana kaniw lung puamc the. 16Khoutei kaniw rui kakhou, “Mi alauc nunc hei rui sa bammei hei nang chu daih?” twna sa the. Khoutei Jisu rui kaniw khou, “Ai chu e, ‘Ngasatna nunc khatni puanc nouc bammei nunc mwang khou rui nang rui nthuihna tithuanc pat the,’ twna hyloumei tei nangniw pah mak he nah cho?” twna Jisu rui daw the.#Kal 8.2

17Kumna kaniw ta ganclouna, Jisu kaidai paengc thangc patna Bethani khou pat ziplou the.

Jisu rui Tadut Bang ta Siangloumei

(Mrk 11.12-14,20-24)

18Jisu kaidai thangc tei ngangh thuan dat khou kamei ndaapc the. 19Chaeng daeng khou tadut bang akhat how lana hei tei guang zauc pwkhou kanuy nsyn bam khwan the. Khoutei, “Nang thai nthai dat zat mak kan di tho,” twna Jisu rui salou the. Mi dyng khou tei mi tadut bang tei ngguaih key kan the.

20Hei tei how lana ziap nunc tei ngakna, “Mi tadut bang hei akumhna kadyng khou ngguaih bam tu cho,” twna sa the.

21“Ai rui nangniw khou kaling siakna sa tuang e: nangniw lwm e thei khatni lwmsi zat mak ge thei, ai rui tadut bang khou swlou kanmei hei nangniw ni taanc ngam puni de. Mi na hei hamh e, nangniw rui mi chyngbut ti hei, ‘nang thauna duipui thangc gut kan o,’ twna sa ti thei gut kan ni de.#Met 17.20; 1 Ko 13.2 22Nangniw lwm ti thei nangniw huayney khou tabui pw ni neymei tei nangniw laatow puni.”

Jisu Ngamv lam khou Thanvmei

(Mrk 11.27-33; Luk 20.1-8)

23Jisu Ravkai khou guang datna nchamlouna bam khou, amuh daihmei nunc khatni kaniw tuang gaanvthaih nunc kadaeng khou guangna, “Tabui ngamv khou rui nang mi guay hei taanc bam tu cho khatni thow rui nang khou mi ngamv hei tiilou pwna cho?” twna thanv the.

24Mundawna Jisu rui kaniw khou sa the, “Ai ni nangniw khou lat akhat thanv puni. Hei tei nangniw daw e thei, tabui ngamv khou rui mi guay hei ai taanc bam tu cho twmei ai ni nangniw khou sa puni: 25Jahon khou duilupmei ngamv tei thow rui tiilou tu cho? Ravguangc rui ny maansei rui cho?”

Kaniw rana kaphianhna sa the, “Ravguangc rui e twna sa ti thei, ‘kum e thei nangniw tabui swna kata lwm mak tu cho?’ twna kamei rui sa puni. 26‘Maansei rui de,’ twna sa khang ni meic nunc ta ping e; kalam thu meic guay rui thu kata muhzwng e twna laa bam di the.” 27Kumna, “Aniw thay mak ge,” twna kaniw daw the.

“Mi guay hei tabui ngamv khou rui ai taanc bam tu cho twmei ai ni nangniw khou salou lak ge,” twna Jisu rui kaniw khou mundaw the.

Alauc Gaanv Nei Latgiam

28“Nangniw akumhna ning bo? Gaanv khat pu nac alauc gaanv nei nai khwan e. Gaanvthaihmeipu daeng khou guangna, ‘Abung, nang aseic drakha lau tat ro,’ twna sa the. 29‘Apu, ai tat zih e,’ twna kamei daw the, tiki kamei katangv thangc lungh laic datna tat dat kan the. 30Alaucmeipu daeng khou tei ni guangna hei tei kumcna sa muay the. Khoutei, ‘Ai tat puni’ twna kamei daw the, tiki tat mak khe. 31Mi nei khou tei thow rui kapu rui ningmei taanc kan tu cho?”

“Reymeipu tei e,” twna kaniw rui daw the.

Jisu rui kaniw khou sa the, “Ai rui nangniw khou kaling siakna sa tuang e: dihkhav kakhamei nunc khatni mangcsangmeiluc nunc rui Ravguangc guangcdic khou nangniw khang suangc gut hu bam the. 32Kalam thu Duiluploumei Jahon tei nangniw khou guangna nchumhmei chaeng dinclou tisini nangniw thu kata lwm kan mak ge; tiki dihkhav kakhamei nunc khatni mangcsangmeiluc nunc thu kata lwm kan the. Nangniw hei tei how khou nganvna lungh laic datna kata lwm kan mak ge.#Luk 3.12; 7.29-30

Drakha Lau Saanvmei Latgiam

(Mrk 12.1-12; Luk 20.9-19)

33“Latgiam baihmei akhat nking dat ro. Laupouc gaanv khat rui drakha lau akhat taanclou lana hei tei karaengv raenglou the, drakha dui sunhmei bamv kasiamhlou the, lauphaan kai kasiamhlou the, kumna hei tei lau nngemei nunc khang saanvlou ducna tat kan the.#Isa 5.1-2 34Drakha thai reipui ganv guang pwkhou, kathai laa khang kabangc nunc ta lau nngemei nunc khou tei ndiu guang the. 35Khoutei lau nngemei nunc tei rui kabangc nunc ta tei nymna gaanv khat ta bai the, gaanv khat ta swluai the, gaanv khat ta ntauh kwam the. 36Kamei rui reymei kang khang tei suangc geihmei kabangc kang akhat ndiu guang dat di he. Khoutei lau nngemei nunc tei rui kaniw ta ni hei tei kumcna swlou dat muay the. 37‘Kaniw anac ta thu chakhwang swlou puni muay di the,’ twna ningna nkhamh khou kanac mpouh ta ndiu guang the. 38Tiki kaniw rui kanac mpouh ta tei how pwkhou kaniw rana sa the, ‘mi hei tampy laa nimeipu the, guang tho, kata swluaina aniu katuang dam tei laa di kho.’ 39Kumna kaniw rui kata nymna drakha lau paengc thangc siauc gancna swluai the.

40“Kumna drakha lau kaipouc tei guang pwkhou tabui tuang sw puni tha?”

41Kaniw rui kakhou sa the, “Kamei rui meicsimei nunc ta tei swluai kasic karouclou puni, kumna drakha lau tei kathai reipui ganv kathuic kathai laaguang bam punimei baihmei nunc khou tiilou dat kan puni.

42‘Kai swmei nunc rui ganc patloumei tauc tei,

kaikwnpy tauc sw kan puni.

Mi hei Poubauhmei rui swloumei tuang e,

Mi hei aniw mikzaw khou charyn tuang e,’

twna hyloumei tei nangniw pah mak he nah cho?#Kal 118.22-23

43“Hei zaeng rui ai rui nangniw khou samei tuang e: Ravguangc guangcdic tei nangniw khou rui laa dat lana kathai nthai nimei zaat akhat khang tii kan puni.

44“(Mi tauc ruc khou bow keypui mei tei puat paruat puni, khatni mi tauc hei rui karuc khou key simpui mei tei mbut mbaih puni.)”#Baanhhy baibal asaekc khou kathaek 44 hei maek ge.

45Amuh daihmei nunc khatni Pharisimei nunc rui Jisu tuang latgiam guay hei chu la khou kaniw lam khou sa bam tuang e twmei kaniw thay the. 46Kumna kata nym khang kaniw sw the, tiki meic nunc rui kata muhzwng akhat re twna laa bam tipui zaeng rui meic nunc ta tei kaniw ping the.

Currently Selected:

METTHIU 21: RONGBSI

Highlight

Copy