MATTHAI 9

Jesu'n Zeng Damlou Ahihdam

(Mar 2.1-12; Luk 5.17-26)

1Huan long ah lut in agalkah a, ama khua ahong tung hi. 2Ngai in, mizeng khat damlou, lupna a lum ahon zawng ua; huchi in Jesu'n aginna uh mu in, zeng damloupa kiang ah, “Tapa, khamuangtak in om in, na khelhnate ngaihdam ahita,” achi hi.

3Ngai in, laigelhmi kuate hiam akingaihtuah ua, “Hiai mi'n Pathian agensia,” achi uh.

4Huchi in Jesu'n angaihtuahte uh athei a, “Bangziak a na lungtang ua gilou ngaihtuah na hi ua? achi hi. 5‘Na khelhnate ngaihdam hi hen’ chih leh ‘thou inla, khe in pai in, chih koi abaihlamzaw?’ 6Himahleh Mihing Tapa in leitung ah khelhnate ngaihdam theihna anei chih na theihna ding un,” zeng damloupa kiang ah, “Thou in, na lupna la inla, na inn ah pai in,” achi hi.

7Huchi in athou a, a-inn ah apaita hi. 8Himahleh, mipi'n amuh un lamdang asa ua, huchibang hihtheihna mihingte kiang a pepa, Pathian apahtawita uhi.

Matthai Sapna

(Mar 2.13-17; Luk 5.27-32)

9Huai a kipan Jesu apai zel a, siah piakna mun a tu, mi khat, amin Matthai amu a; akiang ah, “Hon zui in,” achi a, huchi in athou a, azuita hi.

10Huan hichi ahong hi a, a-inn a ankuang a-um lai in, ngai in, siahkhonte leh mikhial tampi ahong pai ua, Jesu leh anungzuite a-umpih uhi. 11Pharisaite'n huai amuh un, anungzuite kiang ah, “Bangziak a na heutupa un siahkhonte leh mikhialte kiang a ne ahia?” achi uhi.

12Himahleh Jesu'n huai azaktak in, “Midamtheite'n daktor akiphamoh kei ua, midamtheiloute'n akiphamohzaw uhi. 13Huchi in ‘kithoihna deih lou in zahngaihna ka deih hi,’ chih, a-omdan va zil un, midiktatte sam dia hong pai ka hi kei a, mikhialte sam ding a hong pai ka hi zaw,” achi hi.

An Ngawl Thu A Dotna

(Mar 2.18-22; Luk 5.27-32)

14Huchih lai in akiang ah Johan nungzuite ahong pai ua, “Bangziak a kou leh Pharisaite'n an ngawl zelzel ua, na nungzuite'n ngawl lou uh ahia?” achi uhi.

15Jesu'n akiang uah, “Moupite kiang a apasal a-om lai teng moupite'n asuun thei ua hia? Himahleh, akiang ua kipan apasal pimang nite ahong tung ding a, huai hun chiang in an angawl ding uhi. 16Huan kuamah in puan lui puan tui khai louh them in athuap ngei kei; athuapna in puan akaihkek ding ziak in, ahong nakkek zaw sem ding hi. 17Kuamah in uain thak savun uain thawl lui ah athun ngei kei uh; huchi lou in zaw savun thawlte apuakkek dia, uain abo dia, savun thawl leng hong kise ding; huaiziak in savun uain thawl thak ah uain thak athun zaw ua, huchi in hoihtak in a-om tuaktuak hi,” achi hi.

Jaira Tanu Leh Numei Sipawt Damna

(Mar 5.21-43; Luk 8.40-56)

18Huan akiang ua agen laitak in, ngai in, vaihawmpa khat ahong pai a, amah bia in, “Tu mah in ka tanu asi a; himahleh hong pai inla, atung ah na khut koih lechin ahong hing nawn ding,” achi hi.

19Huchi in Jesu athou a, azuita a, nungzuite'n leng azui uhi.

20Ngai in, numei khat kum sawm leh kum nih sipawt damlou, anung ah hong pai a, apuan mong akhoihsak hi. 21“Apuan mongkai khoih lel leng, hihdam in ka om mai ding,” alungsim in achi hi.

22Huan Jesu akihei a, amah amu a, “Ka tanu, khamuangtak in om in; na ginna na dampih hi,” achi hi. Huchi in numeinu huai dakkal a kipan adamta hi.

23Vaihawmpa inn ah Jesu alut a, tamngai tumte leh mipi thawm ngaih vengvungte ava muh in, 24“Pawt un; naupang asi kei, ihmu ahi zaw,” achi hi. Amau bel amah anuihsan maimah uh. 25Himahleh mipite polam a apawtsak zoh in amah alut a, naupang khut ah alen a, hong thou maimah hi. 26Hiai tanchin huai gam tengteng ah athangkheta hi.

Jesu'n Mittaw Mi Nih Ahihdam

27Huai a kipan Jesu apai zel a, mittaw nih in, “David Tapa, ka tung uah zahngai in,” chi a kikou in azui uhi.

28Huan inn a alutleh akiang ah mittawte ahong pai ua; Jesu'n akiang uah, “Hiai hihthei ding in na hon gingta ua hia?” achi hi. Amaute'n akiang ah, “Gingta e, Toupa,” achi uhi.

29Ama'n amit uh akhoihsak a, “Na gintak bang un na tung uah tung hen,” achi hi. 30Huchi in amitte uh hong vakta hi. Jesu'n akiang uah, “Kuamah theih louh ding in pilvang un,” achi bilbel hi. 31Himahleh amau apawt ua, huai gam tengteng ah atanchin agenthangta uhi.

Dawimat Pau Thei Lou Khat Jesu Hihdamna

32Huai a pan apawt laitak un, ngai in, dawimat pau thei lou khat akiang ah ahon pi uhi. 33Huai dawi adelhkhiaktak in pau thei lou tuh ahong pauta a; mipite'n lamdang asa mahmah ua, “Israelte lak ah hichibang akimu ngei kei hi,” achi uhi.

34Pharisaite'n bel, “Dawi kumpipa ziak in ahi, dawite adelhkhiak nak,” achi uh.

Jesu'n Mipite Ahehpih

35Huan Jesu'n asinagogte ua hilh a, lalgam tanchinhoih gen in, damlouhna chiteng leh natna chiteng ahihdam a, kholian leh khoneu tengteng atawn vialvial hi. 36Huchi in mipite amuh in, chingtu nei lou belamte bang a gimthuak leh dalh a a-om ziak un alainat mahmah hi. 37Anungzuite kiang ah, “Buh lak ding atam mahmah a, himahleh sem mite atawm uhi. 38Huaiziak in abuh la dia sem dingte sawl ding in buh neipa kiang ah ngen un,” achi hi.

Currently Selected:

MATTHAI 9: PAITBSI

Highlight

Copy