MATTHAI 8

Phak Hihdamna

(Mk. 1.40-45; Lk. 5.12-16)

1Huan tang a kipan a a hong paisuk nung in mipi thupitak in amah a zuita uhi. 2Ngai in, a kiang ah phak khat a hongpai a, “Toupa, na ut leh n’on hihsiangthou thei hi” chi in, a bia hi. 3Jesu’n a sawk a, a khoih a, “Ka ut hi, na siangthouta in” a chi hi. Thakhat in phak a hong siangthou pah hi. 4Jesu’n a kiang ah, "kuamah hilhlou ding in pilvang in, himahleh siampu kiang ah vakilak inla, Mosi in thilpiak ding a chihte lan in amau a hon theihchet na ding un," a chi hi.

Sepaih Zaheutu Sikha Hihdamna

(Lk. 7.1-10)

5Kapernaum khua a lut in, a kiang ah sepaih zaheutu a hongpai hi, 6“Toupa, ka naupang zaw, inn ah a lum maimah a, nakpitak a hihnat in a om” chi in a na ngen hi.

7Huan aman a kiang ah, “Ka hongpai dia, ka hihdam ding” a chi hi.

8Sepaih zaheutu’n, “Toupa, ka inn sung na lutna tak ahi kei, thu kia gen lechin, ka naupang a dam ding. 9Keileng mi thunuai a om ka hi a, ka nuai ah sepaihte a om ua, ‘nang, pai in,’ ka chih leh, a pai zel; midang kiang ah, ‘nang hongpai in,’ ka chih leh, a hongpai zel; ka sikha kiang ah leng, ‘hiai hih in’ ka chih leh, a hihzel” chi in a dawng hi.

10Huan Jesu’n huai thu a zak in lamdang a sa a, amah zuite kiang ah, “Chihtaktak in, k’on hilh ahi, Israelte lak ah leng hichitel a ginna thupi ka mu kei hi. 11K’on hilh ahi, suahlam leh tumlam apat mi tampi a hongpai ding ua, van gam ah Abraham, Isak leh Jakob kiang ah a tu ding uhi. 12Gam tate zaw pawlam mial ah paihkhiak in a om ding uh; huai ah kah leh hagawi a om ding” a chi hi. 13Huan Jesu’n sepaih zaheutu kiang ah, “Paita in; na gin bang in na tung ah tung hen” a chi a, huchi in naupang a damta hi.

Peter Sungnu Leh Mi Tampi Hihdamna

(Mk. 1.29-34; Lk. 4.38-41)

14Jesu Peter inn ah a lut a, a zi nu khosik a lum a mu hi. 15A khut a khoihsak a, a khosik a daita; a thou a, a na a sepsakta hi.

16Huan nitaklam a hong hih in a kiang ah dawimatte tampi a honpi ua; thu in dawite a delhkhia a, damlou tengteng a hihdam hi. 17Zawlnei Isai in, “Amah ngei in i hatlouhnate a la a, i natnate a pua” chi a a gen a hongtun theihna ding in.

Nungzui Dingte Theihna

(Lk. 9.57-62)

18Jesu’n a kimvel a mipi thupitak a muh in, galkhat lam a pai ding in thu a pia hi. 19Laigelhmi khat a hongpai a, a kiang ah, “Heutupa, na paina peuh ah k’on zui ding” a chi hi.

20Jesu’n a kiang ah, “Sehalte’n kua a nei ua, tungleng vasate’n leng bu a nei uh, himahleh Mihing Tapa in zaw lungakna ding mun a neikei” a chi hi. 21Huan a nungzuite lak a midang khat in, “Toupa, ka pa hon vuisak phot in” a chi hi, 22Himahleh aman a kiang ah, “Honzui in; misi in amau misi kivui uhen” a chi hi.

Huihpi Jesu’n A Daihsakna

(Mk. 4.35-41; Lk. 8.22-25)

23Huan long sung ah a lut a, a nungzuite’n a zui uhi. 24Ngai in, dil ah huihpi thupitak a hongnung a, huchi in tuikihawt in long hontum tou a; amah lah a ihmu hi. 25Huan a kiang ah a hongpai ua, a phawng ua, “Toupa, hon hondam in, mangthang ding ka kei uhiam” a chi uhi.

26Aman a kiang uah, “Ginglahte aw, bangdia lau na hi ua?“ a chi hi. Huchi in a thou a, huih leh dil a tai a; huan a hong dai sipsipta hi.

27Huan mite’n lamdang a sa mahmah uhi. “Hiai mi bangchidan ahia, huih leh dil nangawn in a thu a man uh?” a chi uhi.

Dawimat Minih Jesu Hihdamna

(Mk. 5.1-20; Lk. 8.26-39)

28Huan galkhat lam Gadara mite gam a tun in dawimat nih, han a kipan a hongpawt in, a hontuak ua; a hang mahmah ua, huchi in, huai lampi ah kuamah a pai theikei uhi. 29Ngai in, amau “Pathian Tapa kou leh nang bang ahia i kizolhna om? Hunchiam tunma a koute hongawt dia hongpai na hi maw?” chi in, a kikou uhi.

30Huan a omna ua kipan gamla khop ah vokhon tampi a gamta uhi. 31Huan dawite’n, “N’on delhkhiak a leh huai a vokhonte sung ah hon lutsak in” chi in, a kiang ah nakpi’n a ngen uhi.

32Aman a kiang uah, “Pai un” a chi a, huchi in, a hong pawtkhia ua, vok sung ah a lut uhi; ngai in, vokhon tengteng tuigei ken ah a taisuk ua, dil ah a tailut ua, tui ah a mangthangta uhi.

33Huan a vulte a tai ua, khua ah a pai ua, dawimatte tung a thil hongtungte bangkim a hilhta uhi. 34Ngai in, a khua in Jesu mu ding in a hongpawt ua; amah a muhtak un a gam ua kipan a pawtkhe ding in nakpi’n a ngen uhi.

Currently Selected:

MATTHAI 8: PAITBSI

Highlight

Copy