MATTHAI 9

Jesu’n Zeng Damlou A Hihdamna

(Mk. 2.1-12; Lk. 5.17-26)

1Huan long ah a lut a, a galkah a, a khua a hongtung kiknawn hi. 2Ngai in, mi zeng khat damlou, lupna a lum a honzawng ua; huchi in Jesu’n a ginna uh mu in, zeng damloupa kiang ah, “Tapa, khamuangtak in om in, na khelhnate ngaihdam hi hen” a chi hi.

3Ngai in, Laigelhmi kuate hiam a kingaihtuah ua, “Hiai mi’n Pathian a gensia” a chi uhi.

4Huchi in Jesu’n a ngaihtuahte uh a thei a, “Bangdia na lungtang ua gilou ngaihtuah na hi ua? a chi hi. 5‘Na khelhnate ngaihdam hi hen’ chih leh, ‘thou inla, khe in pai in, chih koi a baihlam zaw?’ 6Himahleh Mihing Tapa in leitung ah khelhnate ngaihdam theihna a nei chih na theihna ding un” zeng damloupa kiang ah “Thou in, na lupna la inla, na inn ah pai in” a chi hi.

7Huchi in a thou a, a inn ah a paita hi. 8Himahleh, mipi’n a muh un, lamdang a sa ua huchibang hihtheihna mihingte kiang a pepa, Pathian a pahtawita uhi.

Matthai Sapna

(Mk. 2.13-17; Lk. 5.27-32)

9Jesu huai a kipan a pai zel a, siah piakna mun a tu, mi khat, a min Matthai a mu a; a kiang ah, “Honzui in” a chi a, huchi in, a thou a, a zuita hi.

10Hichi ahi a, a inn a Ankuang a umlai in, ngai in, siahkhawnmite leh mikhial tampi a hongpai ua, Jesu leh a nungzuite a umpih uhi. 11Pharisaite’n huai a muh un, a nungzuite kiang ah, “Bangdia na heutupa un siahkhawnmite leh mikhialte kiang a ne ahia?” a chi uhi.

12Himahleh Jesu’n huai a zaktak in, “Mi damtheite’n daktor a kiphamoh kei ua, mi damtheiloute’n a kiphamoh zaw uhi. 13Huchi in, ‘kithoihna deihlou in zahngaihna ka deih hi,’ chih, a omdan vazil un, mi diktatte sam dia hongpai ka hi kei, mikhialte sam dia hongpai ka hizaw” a chi hi.

Anngawl Thu A Dotna

(Mk. 2.18-22; Lk. 5.27-32)

14Huchihlai in Johan nungzuite a kiang ah a hongpai ua, “Bangdia kou leh Pharisaite’n anngawl gige a, na nungzuite’n ngawllou uh ahia?” a chi uhi.

15Jesu’n a kiang uah, “Moupite kiang a a pasal a omlai teng moupite’n a sun thei ua hia? Himahleh, a pasal a kiang ua kipan a pimang nite a hongtung ding a, huai hun chiang in an a ngawl ding uhi. 16Huan kuamah in puan lui puan tuikhai louh them in a thuap ngeikei uh; a thuapna in puan a kaihkek ding ziak in, a hong nakkek zawsem ding hi. 17Kuamah in uain thak savun uain thawl lui ah a thun ngeikei uh; huchilou in zaw savun thawlte a puakkek dia, uain a baw dia, savun thawl leng a hong seding; huaiziak in uain thak savun uain thawl thak ah a thun zaw ua, huchi in hoihtak in a om tuaktuak” a chi hi.

Jaira Tanu Leh Numei Sipawt Damna

(Mk. 5.21-43; Lk. 8.40-56)

18Huan a kiang ua a genlai tak in, ngai in, vaihawmpa khat a hongpai a, Amah bia in, “Tu tak in ka tanu a si a; himahleh hongpai inla, a tung ah na khut koih lechin a hong hingnawn ding” a chi hi.

19Huchi in, Jesu a thou a, a zuita a, nungzuite’n leng a zui uhi.

20Ngai in, numei khat kum sawm leh kum nih si pawt damlou, a nung ah a hongpai a, a puanmong a khoihsak hi. 21“A puan mongkai khoihlel leng, hihdam in ka om mai ding” a lungsim in a chi hi.

22Huan Jesu a kihei a, amah a mu a, “Ka tanu, khamuangtak in om in; na ginna na dampih hi” a chi hi. Huchi in numeinu huai dakkal a kipan a damta hi.

23Jesu vaihawmpa inn ah a lut a, tamngai tumte leh mipi thawm ngaih vengvungte a va muh in, 24“Pawt un: naupang a si kei, a ihmu ahizaw,” a chi hi. Amau bel amah a nuihsan maimah uhi. 25Himahleh mipite pawlam a a pawtsak zoh in amah a lut a, naupang khut ah a len a, a hong thou maimah hi. 26Huai tanchin huai gam tengteng ah a thangkheta hi.

Jesu’n Mittaw Mi Nih Hihdamna

27Jesu huai a kipan a pai zel a, mittaw nih in, “David Tapa, ka tung uah zahngai in” chi a kikou in a zui uhi.

28Huan inn a a lut leh mittawte a kiang ah a hongpai ua; Jesu’n a kiang uah, “Hiai hihthei din n’on gingta ua hia?” a chi hi. Amau a kiang ah, “Gingta e, Toupa” a chi uhi.

29Aman a mit uh a khoih a, “Na gintak bang un na tung uah tung hen,” a chi hi. 30Huchi in a mit uh a hongvakta hi. Jesu’n a kiang uah, “Kuamah theihlouh ding in pilvang un” a chi bilbel hi. 31Himahleh amau a pawt ua, huai gam tengteng ah a tanchin a genthangta uhi.

Dawimat Pautheilou Khat Jesu Hihdamna

32Huai apan a pawtlaitak un, ngai in, dawimat pautheilou khat a kiang ah a honpi uhi. 33Huai dawi a delhkhiak tak in pautheilou a hong pauta a; mipite’n lamdang a sa mahmah uhi, “Israelte lak ah hichibang a kimu ngeikei hi” a chi uhi.

34Pharisaite’n bel “Dawi kumpipa ziak in ahi, dawite a delhkhiak nak,” a chi uhi.

Jesu’n Mipite A Hehpih

35Huan Jesu’n a kikhopnain ua hilh in, gam Tanchinhoih gen in, damlouhna chiteng leh natna chiteng hihdam in, kholian leh khoneu tengteng a tawn vialvial hi. 36Huchi in mipite a muh in, chingtu neilou belamte bang a gimthuak leh dalh a a om ziak un a lainat mahmah hi. 37A nungzuite kiang ah, “Buhlak ding a tam mahmah a, himahleh a semmite a tawm uhi. 38Huaiziak in a buhla dia semdingte sawl ding in buhneipa kiang ah ngen un” a chi hi.

Currently Selected:

MATTHAI 9: PAITBSI

Highlight

Copy